Hebrews 5
1ယုဒလူမျိုးရို့မာ မဟာယဇ်ပုရောဟိတ် တစ်ယောက်မကျန်ကို လူရို့အထဲက ရွီးကောက်ယူရရေ အရာ လူရို့တက်စား ထာဝရဘုရားဘားမာ ယဇ်ပူဇော်ဖို့အတွက် သူ့ကို ခန့်ထားရရေ။ မဟာယဇ်ပုရောဟိတ်စာ လူရို့အပြစ်အတွက် ထာဝရဘုရားဘားမာ ယဇ်ပူဇော်ရေ အရာ သူစာ အမျိုးမျိုး ဝန်ဆန်တိကိုလည်း ယူရို့ ထာဝရဘုရားဘားမာ လှူရေ။ 2မဟာယဇ်ပုရောဟိတ်မာလည်း အခြားလူရို့ပိုင် အားနည်းချက် ဟိရေ။ ယင်းအတွက်န သူစာ မသိဘိုင်း အပြစ် လုပ်သူရို့န မှားယွင်းစာလမ်းမာ လားသူရို့ကို နုညံ့ခြင်းန ဆက်ဆံနိုင်ရေ။ 3မဟာယဇ်ပုရောဟိတ်စာ အခြားလူရို့ အပြစ်အတွက် ယဇ်ပူဇော်ရေ။ ယင်းပိုင်တထန် သူစာ ကိုယ့်အပြစ်အတွက်လည်း ယဇ်ပူဇော်ရရေ၊ အကြောင်းကား အခြားလူရို့ပိုင် သူ့မာလည်း အားနည်းချက် ဟိရေ။ 4မဟာယဇ်ပုရောဟိတ် ဖြစ်သူတစ်ယောက်စာ ရိုသေခြင်းကို ခံရရေ၊ ယေကေလည်း မဟာယဇ်ပုရောဟိတ် အရာကို တစ်ယောက်လည်း ကိုယ့်စိတ်တချင် ခံယူရို့ မရ။ အာရုန်ပိုင် ▼▼အာရုန်အာရုန်စာ ဣသရေလလူမျိုးရို့မာ ပထမ မဟာယဇ်ပုရောဟိတ် တစ်ယောက် ဖြစ်ပါရေ။ အရာ သူစာ လေဝိအမျိုးအနွယ်သား ဖြစ်ပါရေ။
ထာဝရဘုရား၏ ခေါ်ခြင်းကို ခံရသူတစ်ယောက်တည်းရာ မဟာယဇ်ပုရောဟိတ် ဖြစ်နိုင်ရေ။ 5ခရစ်တော်လည်း မဟာယဇ်ပုရောဟိတ် ဖြစ်ဖို့အတွက် ကိုယ့်ကိုကိုယ် ရွီးကောက်ယူလီစာ မဟုတ်။ ယေကေလည်း ထာဝရဘုရားရာ ခရစ်တော်ကို ရွီးကောက်ရို့ မဟာယဇ်ပုရောဟိတ် အရာမာ ခန့်ထားလီရေ။ ထာဝရဘုရားစာ ခရစ်တော်ကို ဒေပိုင် ပြောရို့ ချီးမြှောင့်လီရေ၊“နင် ငါ့သား ဖြစ်တေ၊
ဒေနိကပင် ငါ နင့်အဖ ဖြစ်ပျာ။” 6ထာဝရဘုရားစာ အခြားနေရာတစ်ခုမာ ပြောလီရေ၊
“နင် မေလခိဇေဒက်ပိုင် ထာဝရ မဟာယဇ်ပုရောဟိတ် ဖြစ်ပျာ။” 7ခရစ်တော်စာ လူ့သားအဖြစ် ဒေ လောကမာ ဟိလီရေခါ သူ့ကို သီခြင်းက ကယ်ဆယ်နိုင်စာ ထာဝရဘုရားဘားမာ တောင်းပန်လီရေ။ ယင်းခါ သူစာ ထာဝရဘုရားဘားမာ အားန အော်ရို့ ငိုပြီးကေ ဆုတောင်းလီရေ။ အရာ ထာဝရဘုရားစာ သူတောင်းစာ ဆုကို လက်ခံလီရေ၊ အကြောင်းကား သူစာ ရိုသေကြောက်လန့်ခြင်းန ထာဝရဘုရား၏ အလိုတော်ကို လိုက်နာလီရေ။ 8ယေရှုခရစ်တော်စာ ထာဝရဘုရား၏ သားတော် ဖြစ်ရို့ပင်လည်း ဒုက္ခ-ဝေဒနာကို ခံယူလီရေ အရာ သူစာ ထိုဒုက္ခ-ဝေဒနာကနီရို့ နာခံဖို့စာကို သင်ယူလီရေ။ 9ထိုဒုက္ခ-ဝေဒနာကို ခံရခြင်းကနီရို့ သူစာ ပြည့်စုံစာ မဟာယဇ်ပုရောဟိတ် ဖြစ်လီရေ။ ယင်းအတွက်န ဒေဂု သူစာ ကိုယ့်စကားကို လိုက်နာသူရို့ အားကုံးသူကို ထာဝရ ကယ်တင်ခြင်းကို ပီးနိုင်ရေ။ 10ထာဝရဘုရားစာ သူ့ကို မေလခိဇေဒက်ပိုင် မဟာယဇ်ပုရောဟိတ် ဖြစ်စီလီရေ။
ကျုံခြင်းတရားကို မစွန့်ဖို့အတွက် သတိပီးခြင်း
11ထိုအကြောင်းကို ယူရို့ ငါရို့မာ စကားပြောဖို့စာ အများကြီး ဟိသိရေ၊ ယေကေလည်း နင်ရို့ ထိုအကြောင်းကို နားလည်ဖို့စာကို မကြိုးစားကတ်။ ယင်းအတွက်န ရှင်းပြဖို့စာ ကောင်းကောင်း ခက်ခဲရေ။ 12ဒေလှောက်တိုင်အောင် နင်ရို့ ဆရာ ဖြစ်ဖို့ တန်ကတ်ပျာ၊ ယေကေလည်း ထာဝရဘုရား၏ စကားတော်ကို အရာတစ်ပြန် နင်ရို့ကို အရင်းကပင် သွန်သင်ပီးဖို့အတွက် ဆရာကို လိုနီကတ်ပျာ။ နင်ရို့ ကျန်းစာ အစားအစာကို မလိုဘိုင်းန အသျှေရို့ပိုင် နို့ကို လိုနီကတ်ပျာ။ 13နို့စို့သူစာ ဒေဂုလည်း အသျှေ ဖြစ်တေ။ ယင်းအတွက်န သူစာ အမှားန အမှန်ကို ခွဲခြားရို့ မသိ။ 14ယေကေလည်း အသက်အရွှယ်ကြီးသူရို့စာ ကျန်းစာ အစားအစာတိကိုရာ စားနီကတ်တေ။ ယင်းအဓိပ္ပါယ်ကား သူရို့စာ ထာဝရဘုရား၏ ခက်ခဲစာ သွန်သင်ချက်တိကို နားလည်နိုင်ကတ်တေ။ အရာ သူရို့စာ အယင်ကပင် အကောင်း-အဆိုးကို ယူရို့ အမြဲတိုင်း စဉ်းစားနီရေအတွက်န ခွဲခြားမှုကို သိကတ်တေ။
Copyright information for
RmzSC