Hebrews 6
1– 2ယင်းအတွက်န ငါရို့မာ ပထမဆုံး ရလီကတ်စာ သွန်သင်ချက်တိကို အပြန်ပြန် သင်ယူဖို့ မသင့်။ ယင်းထက်ပင် ငါရို့မာ ရှိတို့ တိုးရို့ လားဖို့ သင့်ကတ်တေ။ ပထမဆုံး ရလီစာ သွန်သင်ချက်တိ ဖြစ်တေကား ဒေပိုင်၊ အကျိုးမဟိစာ အလုပ်တိက စိတ်လှည့်ရို့ လာခြင်း၊ ထာဝရဘုရားကို ကျုံခြင်း၊ အမျိုးမျိုး ရီနှစ်မင်္ဂလာ လုပ်ခြင်း၊ အဂေါင်းမာ အလက်တင်ခြင်း၊ သီသူရို့ ပြန်ရှင်ထမြောင့်ခြင်း၊ အရာ ထာဝရပတ်လုံး အပြစ်ဒါဏ် ခံရခြင်း အကြောင်း ဖြစ်တေ။ ယေကေလည်း ဒေဂု ငါရို့မာ အရာလည်း ရှိတို့ တိုးရို့ လားဖို့စာ အလိုဟိသိရေ အရာ အဆင့်အမြင့် သွန်သင်ချက်တိကို လက်ခံယူဖို့ အလိုဟိရေ။ 3အမှန် ထာဝရဘုရား အလိုဟိရေဆိုကေ ငါရို့စာ ရှိတို့ တိုးရို့ လားဖို့နိုင်ကတ်ဖို့။ 4– 5– 6လူရို့စာ ခရစ်တော်၏ လမ်းကို စွန့်ရို့ လားခကတ်တေဆိုကေ သူရို့ စိတ်နှလုံးကို အရာတစ်ပြန် ပြောင်းလှဲပီးဖို့ မနိုင်ဗျာ၊ အကြောင်းကား သူရို့စာ မှန်ကန်ခြင်း၏ အလင်းကို မြင်ဖူးလီကတ်တေ၊ ထာဝရဘုရား၏ ဆုကျေးဇူးကို ရလီကတ်တေ၊ သန့်ရှင်းသောဝိညာဉ်တော်န ဆက်ဆံခြင်းကို ရလီကတ်တေ၊ ထာဝရဘုရား၏ ကောင်းမြတ်စာ သွန်သင်ချက်ကို နားထောင်လီကတ်တေ အရာ ကမ္ဘာအသစ်၏ တန်ခိုးအကြောင်းကိုလည်း သိလီကတ်တေ။ ယေကေလည်း သူရို့စာ မှန်ကန်ခြင်းလမ်းကို စွန့်ရို့ နောက်တို့ ပြန်လားခလီကတ်တေ။ ယင်းအတွက်န သူရို့ကို စိတ်လှည့်ရို့ အရာတစ်ပြန် ခရစ်တော်၏ လမ်းတို့ ပြန်ယူခဖို့ မနိုင်ဗျာ၊ အကြောင်းကား သူရို့ ကိုယ်တိုင် ထာဝရဘုရား၏ သားတော်ကို အရာတစ်ပြန် ကားတိုင်မာ တင်ကတ်တေ၊ အရာ သူ့ကို အားကုံးသူ ရှိက အသရေရှုတ်ချကတ်တေ။ 7မိုးရီကို အပြန်ပြန် စုတ်ယူပြီးကေ လယ်သမားရို့အတွက် ကောင်းမြတ်စာ အသီးအနှံတိကို သီးစီစာ မြေစာ ထာဝရဘုရား၏ ပဿိကို ခံရရေ။ 8ယေကေလည်း အမျိုးမျိုး စူးခြုံတိကို ပေါက်စီစာ မြေစာ တစ်ခုလည်း အသုံးမဝင်ဗျာ။ ယင်းအတွက်န ယင်းမြေစာ ထာဝရဘုရား၏ ကျိန်ဆဲထည့်ခြင်းကို ခံရလိမည် အရာ နောက်ဆုံးပြီးမာ ယင်းမြေစာ မီးအတိုက်ကို ခံရရို့ ပျက်စီးလားလိမည်။ 9ချစ်ခင်စာ မိတ်ဆွေရို့၊ ငါရို့ ဒေ စကားတိကို ပြောကေလည်းသောက် နင်ရို့စာ ခရစ်တော်၏ လမ်းကို စွန့်ရို့ လားခသူရို့ပိုင် မဟုတ်ဆိုစာကို ငါရို့ ကျုံရေ။ နင်ရို့မာ ကယ်တင်ခြင်း အကျိုးကို နင်ရို့ အလုပ်တိကနီရို့ ဖေါ်ပြရေဆိုစာကိုလည်း ငါရို့ သိရေ။ 10ထာဝရဘုရားစာ တရားသဖြင့် စစ်ဆေးသူတစ်ပါး ဖြစ်တေ။ ယင်းအတွက်န နင်ရို့လုပ်စာ ကောင်းမြတ်စာ အလုပ်တိကို ထာဝရဘုရား မှတ်ထားလိမည်။ နင်ရို့စာ သူ၏ လူရို့ကို ချစ်ခြင်းမေတ္တာ ထားရို့ ကူညီမစားလီစာကို ထာဝရဘုရား မိလိမည် မဟုတ်။ အရာ နင်ရို့ ဒေဂုလည်းသောက် ကူညီမစားနီစာကိုလည်း ထာဝရဘုရား မိလိမည် မဟုတ်။ 11နင်ရို့ အားကုံးသူ အဆုံးတိုင်အောင် တတိုင်းမမြိုင်း နီကတ်ဖို့စာကို ငါရို့ လိုချင်ရေ။ ယင်းပိုင်ဆိုကေ နင်ရို့မာ မျှော်လင်းချက် ပြည့်စုံဖို့ဆိုစာကို နင်ရို့ စိတ်ချရို့ ရကတ်လိမည်။ 12ငါရို့စာ နင်ရို့ကို ပျင်းသူ မဖြစ်စီချင်၊ ယေကေလည်း ငါရို့စာ နင်ရို့ကို ထာဝရဘုရား၏ ဂတိတော် ပဿိကို ခံရသူရို့ပိုင် ဖြစ်စီချင်ရေ။ ထိုပဿိကို ခံရသူရို့စာ ထာဝရဘုရား၏ ဂတိတော်ကို ရဖို့အတွက် ကျုံခြင်းတရားန စိတ်ရှည်သည်းခံခြင်းကို ထားပြီးကေ စောင့်မျှော်ရို့ နီလီကတ်တေ။ထာဝရဘုရား၏ ဂတိတော် ပြောင်းလှဲခြင်း မဟိ
13– 14ထာဝရဘုရားစာ အယင်ခါ အာဗြဟံဘားမာ ဂတိတစ်ခု ခံလီရေ။ ယင်းခါ ကိုယ့်ထက် ကြီးမြတ်သူတစ်ပါးလည်း မဟိလီရေအတွက်န ထာဝရဘုရားစာ ကိုယ့်နာမည်န အကျိန်ကိုင်ရို့ ပြောလီရေ၊“ငါ အမှန် နင့်ကို ပဿိ ပီးမည်၊
အရာ နင့် အမျိုးအနွယ်ကို တိုးပွါးစီမည်။” 15ယင်းအတွက်န အာဗြဟံစာ ထိုဂတိတော်ကို ရဖို့အတွက် စိတ်ရှည်သည်းခံခြင်းန စောင့်နီလီရေ။ အရာ နောက်ဆုံးပြီးမာ သူစာ ထာဝရဘုရား၏ ဂတိတော်ကို ခံရလီရေ။ 16လူရို့ အကျိန်ကိုင်ရေခါ ကိုယ့်ထက် ကြီးမြတ်သူနာမည်ကို အသုံးပြုရို့ အကျိန်ကိုင်ကတ်တေ။ ယင်းအတွက်န ထိုအကျိန်ကိုင်ချက်စာ ဂတိ မှန်ရေလော မှားရေလောဆိုစာကို သက်သီပြရေ အရာ ငြင်းခုံခြင်း အားကုံးကို ဖြည်ရှင်းပီးရေ။ 17ထာဝရဘုရား၏ ဂတိတော်စာ ပြောင်းလှဲခြင်း မဟိ။ ယင်းအကြောင်းကို ထိုဂတိတော် ခံရဖို့သူရို့ဘားမာ သက်သီပြဖို့အတွက် ထာဝရဘုရားစာ အကျိန်ကိုင်လီရေ။ 18ထာဝရဘုရား၏ ဂတိတော်န အကျိန်ကိုင်ချက်စာ တစ်ခါလည်း မပြောင်းလှဲ၊ အကြောင်းကား ထာဝရဘုရားစာ မုတ်သားစကား မပြောနိုင်ဆိုစာကို ငါရို့ သိရေ။ ယင်းအတွက်န ငါရို့စာ ကယ်တင်ခြင်းကို ရဖို့အတွက် ထာဝရဘုရားတို့ ဗြီးလားကတ်တေ အရာ ထာဝရဘုရားပီးစာ မျှော်လင်းချက်ကို နနောင်းတည်းရို့ ထားကတ်တေခါ ငါရို့မာ စိတ်အားရကတ်တေ။ 19ဒေ မျှော်လင်းချက်စာ ကျောက်ဟက်နတူရေ။ ▼
▼ကျောက်ဟက် ကျောက်ဟက် အဓိပ္ပါယ်ကား သင်္ဘောကြီးကို ချိုင်းထားရေခါ တတိုင်းထားဖို့အတွက် အသုံးပြုစာ သံဂုတ်ကို ခေါ်ပါရေ။ ဒေ ကျောက်ဟက်စာ ကောင်းကောင်း လီးပါရေ။
ယင်းပိုင်တထန် ဒေ မျှော်လင်းချက်စာ ငါရို့ ဘဝကို တတိုင်းမမြိုင်းပျင်ရို့ ကာကွယ်ထားရေ။ ယေရှုစာ ငါရို့မာ မျှော်လင်းချက် ဖြစ်တေ။ သူစာ မဟာသန့်ရှင်းစာနေရာမာ ကာထားစာ ရန်ကာနောက်တို့ ဝင်လားခလီရေ။ 20သူစာ ငါရို့အတွက် အယင်ဆုံး ယင်းနေရာတို့ ဝင်လားခလီရေ၊ အကြောင်းကား သူစာ မေလခိဇေဒက်ပိုင် ထာဝရပတ်လုံးအတွက် မဟာယဇ်ပုရောဟိတ် ဖြစ်ပျာ။
Copyright information for
RmzSC