Hebrews 7

အာဗြဟံထက် မေလခိဇေဒက် ကြီးမြတ်ခြင်း

1ထိုမေလခိဇေဒက်စာ ရှာလင်မြို့ကို အုပ်ချုပ်စာ မင်းတစ်ပါး ဟိလီရေ အရာ သူစာ မြင့်မြတ်စာ ထာဝရဘုရား၏ ယဇ်ပုရောဟိတ်လည်း ဟိလီရေ။ အာဗြဟံစာ အခြားမင်းရို့ကို အနိုင်ယူရို့ ပြန်လာရေခါ မေလခိဇေဒက်စာ အာဗြဟံန အတွိခံလီရေ အရာ သူစာ အာဗြဟံကို ပဿိ ပီးလီရေ။ 2ယင်းခါ အာဗြဟံစာ ကိုယ့်မာ ရခစာ ဟိသမျ ပစ္စည်း-ဥစ္စာတိက မေလခိဇေဒက်ကို ဆယ်ဖို့တစ်ဖို့ လှူလီရေ။ မေလခိဇေဒက်နာမည် အဓိပ္ပါယ်ကား ရိုးသားစာ မင်း ဟို့ ခေါ်ရေ။ အရာ သူစာ ရှာလင်မြို့ကို အုပ်ချုပ်စာ မင်းလည်း ဖြစ်တေ။ ယင်းအတွက်န သူ့နာမည် အရာတစ်ခု အဓိပ္ပါယ်ကား ငြိမ်းချမ်းစာ မင်း ဟို့ ခေါ်ရေ။ 3မေလခိဇေဒက်မာ အမိအဖန အမျိုးအနွယ် စာရင်း မဟိလီ။ သူစာ ဇာခါ မွီးဖွားရို့ ဇာခါ သီလားခလီရေလည်းဆိုစာကို တစ်ယောက်လည်း မသိကတ်။ မေလခိဇေဒက်စာ ထာဝရဘုရား၏ သားတော်ပိုင် ထာဝရ ယဇ်ပုရောဟိတ် ဟိလီရေ။

4မေလခိဇေဒက် ဇာလှောက် ကြီးမြတ်တေလည်းဆိုစာကို နင်ရို့ စဉ်းစားရို့ ကြည့်ကတ်! ဣသရေလလူမျိုးမာ ကြီးမြတ်စာ အဖ အာဗြဟံ တိုင်အောင်ပင် ကိုယ့်မာ ရခစာ ဟိသမျ ပစ္စည်း-ဥစ္စာတိက မေလခိဇေဒက်ကို ဆယ်ဖို့တစ်ဖို့ လှူလီရေ။ 5လေဝိအမျိုးအနွယ်အထဲက ယဇ်ပုရောဟိတ် ဖြစ်သူရို့န ဣသရေလလူရို့စာ အာဗြဟံအစိုင် ဖြစ်ကတ်တေ၊ ယေကေလည်း သူရို့စာ မောရှေ၏ ပညှတ်တရားအတိုင်း ကိုယ်ရို့မာ ညီအစ်ကို တော်စာ ဣသရေလလူရို့က ဆယ်ဖို့တစ်ဖို့ ကောက်ယူရရေ။ 6ထိုမေလခိဇေဒက်စာ လေဝိအမျိုးအနွယ်သား မဟုတ်၊ ယေကေလည်း သူစာ အာဗြဟံက ဆယ်ဖို့တစ်ဖို့ ကောက်ယူလီရေ။ အရာ သူစာ ထာဝရဘုရား၏ ဂတိတော်ကို ခံရသူ အာဗြဟံကို ပဿိ ပီးလီရေ။ 7ကြီးသူစာ သျှေသူကို ပဿိပီးရေဆိုစာကို တစ်ယောက်လည်း မငြင်းနိုင်။ 8မေလခိဇေဒက်နတကွ ဟိသမျ ယဇ်ပုရောဟိတ်ရို့စာ ဆယ်ဖို့တစ်ဖို့ ကောက်ယူလီကတ်တေ။ ယေကေလည်း အခြား ယဇ်ပုရောဟိတ်ရို့ အားကုံးသူ သီလားခလီကတ်ကေလည်း မေလခိဇေဒက် အသက်အရှင် ဟိရေဆိုစာကို ကျမ်းစာမာ သက်သီပြထားရေ။ 9– 10လူရို့က ဆယ်ဖို့တစ်ဖို့ ကောက်ယူသူ လေဝိစာ အာဗြဟံကနီရို့ မေလခိဇေဒက်ကို ဆယ်ဖို့တစ်ဖို့ လှူလီရေ ဟို့ ငါရို့ ပြောနိုင်ရေ၊ အကြောင်းကား အာဗြဟံ မေလခိဇေဒက်န တွိလီရေခါ ထိုလေဝိစာ အာဗြဟံ၏ ခန္ဓာအထဲမာ ဟိလီရေ ဟို့ ပြောနိုင်ရေ။ နောက်က လေဝိစာ အာဗြဟံ၏ အမျိုးအနွယ်က မွီးဖွားလာလီရေ။

မေလခိဇေဒက်ထက် ယေရှု ကြီးမြတ်ခြင်း

11လေဝိအမျိုးအနွယ်သား ယဇ်ပုရောဟိတ်ရို့ လုပ်ကတ်စာ အလုပ်မာ အရင်းတည်ရို့ရာ ထာဝရဘုရားစာ ဣသရေလလူရို့ကို ကိုယ့်ပညှတ်တရား ပီးလီရေ။ ယေကေလည်း လေဝိအမျိုးအနွယ်သား ယဇ်ပုရောဟိတ်ရို့ အလုပ်တိစာ လူရို့ကို အပြည့်အစုံ စင်ကြယ်အောင် မလုပ်နိုင်လီ။ ယင်းအတွက်န အခြား ယဇ်ပုရောဟိတ်တစ်ပါး လာဖို့ ကျလီရေ။ ထိုအခြား ယဇ်ပုရောဟိတ်စာ အာရုန်ပိုင် မဟုတ်ဘိုင်းန မေလခိဇေဒက်ပိုင် ဖြစ်ရလီရေ။ 12ယဇ်ပုရောဟိတ် နည်းစနစ် ပြောင်းလှဲရေခါ ပညှတ်တရားကိုလည်း ပြောင်းလှဲဖို့ ကျရေ၊ 13အကြောင်းကား ယေရှုခရစ်တော်စာ လေဝိအမျိုးအနွယ်က ဆင်းလာလီစာ မဟုတ်၊ ယေကေလည်း အခြားတစ်ခု အမျိုးအနွယ်က ဆင်းလာလီစာ ဖြစ်တေ။ ထိုအမျိုးအနွယ်က ယဇ်ပုရောဟိတ်အဖြစ် တစ်ယောက်လည်း ယဇ်ပလ္လင်ထက်မာ ယဇ်မပူဇော်ဖူး။ 14ငါရို့မာ အသျှင်ယေရှု ယုဒအမျိုးအနွယ်က ဆင်းလာလီရေဆိုစာကို ငါရို့ ရှရှင်းလလင်း သိရေ။ ယေကေလည်း ထိုအမျိုးအနွယ်က ယဇ်ပုရောဟိတ် ဖြစ်ဖို့စာ အကြောင်းကို မောရှေ တစ်ခုလည်း မပြောခလီ။ 15ယဇ်ပုရောဟိတ် အသစ်တစ်မျိုးသား ရောက်လာဗျာဆိုစာကို ငါရို့ အရာလည်း ရှရှင်းလလင်း သိရေ၊ အကြောင်းကား ထိုယဇ်ပုရောဟိတ်အသစ်စာ မေလခိဇေဒက်နတူရေ။ 16ထိုယဇ်ပုရောဟိတ်စာ သူ့အမျိုးအနွယ်အတိုင်း ခန့်ထားခြင်းကို ခံရလီစာ မဟုတ်၊ ယေကေလည်း သူစာ ကိုယ့်ထာဝရအသက်၏ တန်ခိုးန ခန့်ထားခြင်းကို ခံရလီစာ ဖြစ်တေ။ 17ကျမ်းစာမာ ရွီးရို့ ဟိရေ၊
“နင် မေလခိဇေဒက်ပိုင် ထာဝရ ယဇ်ပုရောဟိတ် ဖြစ်ပျာ။”

18နှစ်ပေါင်းများစွာ အယင်က ဟိလီစာ ပညှတ်တရားအဟောင်းစာ အားနည်းရို့ အသုံးမဝင်ရေအတွက်န ပယ်ဘိုက်လိုက်ပျာ။ 19အကြောင်းကား ထိုပညှတ်တရားစာ လူရို့ကို အပြည့်အစုံ အပြစ်က ချွတ်ဖို့ မနိုင်လီ။ ယေကေလည်း ဒေဂု ငါရို့ ထိုပညှတ်တရားထက် ကြီးမြတ်စာ မျှော်လင်းချက် တစ်ခုကို ရကတ်ပျာ။ ထိုမျှော်လင်းချက်စာ ငါရို့ကို ထာဝရဘုရားတို့ ရောက်အောင် ယူလားနိုင်ရေ။

အကျိန်သစ္စာကိုင်ရို့ ခန့်ထားစာ မဟာယဇ်ပုရောဟိတ်

20ယင်းထက်မက ထာဝရဘုရားစာ ယေရှုကို အကျိန်သစ္စာကိုင်ရို့ မဟာယဇ်ပုရောဟိတ် အရာမာ ခန့်ထားလီရေ၊ ယေကေလည်း လေဝိအမျိုးအနွယ်က ယဇ်ပုရောဟိတ် အရာမာ ခန့်ထားဖို့ခါ ထာဝရဘုရားစာ တစ်ခုလည်း အကျိန်သစ္စာ မကိုင်လီ။ 21ယေရှုကို ခန့်ထားဖို့အတွက် ထာဝရဘုရားစာ ကျမ်းစာမာ ဒေပိုင် အကျိန်သစ္စာ ကိုင်လီရေ၊
“အသျှင်စာ အကျိန်သစ္စာ ကိုင်ရို့ ပြောလီရေ၊
‘နင် ထာဝရ ယဇ်ပုရောဟိတ် ဖြစ်ပျာ။’
သူစာ ထိုအကျိန်ကိုင်ချက်ကို ပြောင်းလှဲလိမည် မဟုတ်။”

22ထိုအကျိန်ကိုင်ချက်အတွက် ထာဝရဘုရားန ကိုယ့်လူရို့ ကြားမာ အရာလည်း ကြီးမြတ်စာ စာချုပ်ကို အမှန် ပြည့်စုံအောင် လုပ်ဖို့ ဆိုပြီးကေ ယေရှု အာမခံလီရေ။

23ယေရှု အကြောင်းနပတ်သပ်ရို့ အရာလည်း တစ်ခုခွဲခြားမှု ဟိရေ။ လေဝိအမျိုးအနွယ်အထဲက ယဇ်ပုရောဟိတ် အများကြီး ဟိလီရေ၊ အကြောင်းကား သီခြင်းတရားစာ တစ်ယောက်ကိုလည်း ယဇ်ပုရောဟိတ်အဖြစ် ထာဝရပတ်လုံးအတွက် နီဖို့အခွင့် မပီးလီ။ 24ယေကေလည်း ယေရှုစာ ထာဝရပတ်လုံး အသက်အရှင် ဟိရေအတွက်န အမြဲတိုင်း ယဇ်ပုရောဟိတ်အဖြစ် ဟိရေ။ 25ယင်းအတွက်န ယေရှုကို အမှီပြုရို့ ထာဝရဘုရားတို့ လာသူရို့ကို သူစာ အပြည့်အစုံ ကယ်တင်ခြင်း ပီးနိုင်ရေ၊ အကြောင်းကား သူရို့ဖက်က လိုက်ရို့ ထာဝရဘုရားဘားမာ တောင်းဆိုဖို့အတွက် သူစာ အမြဲတိုင်း အသက်အရှင် ဟိရေ။

26ယေရှုခရစ်တော်စာ ငါရို့ လိုအပ်စာ မဟာယဇ်ပုရောဟိတ်တစ်ပါး ဖြစ်တေ။ သူစာ သန့်ရှင်းသူန အပြစ်နကင်းသူ ဖြစ်တေ အရာ သူစာ အပြစ်သေရို့က အခြားခွဲထားခြင်းကို ခံရလီရေ။ အရာ ထာဝရဘုရားစာ သူ့ကို ဂေါင်းခင်ဘုံထက် အမြင့်မြတ်ဆုံးနေရာတို့ တင်ယူလီရေ။ 27ခရစ်တော်စာ အခြား မဟာယဇ်ပုရောဟိတ်ရို့န မတူ။ အခြား မဟာယဇ်ပုရောဟိတ်ရို့စာ နိတိုင်း ယဇ်ပူဇော်လီကတ်တေ။ သူရို့စာ ပထမဆုံး ကိုယ့်အပြစ်အတွက်၊ ယင်းနောက် အခြားလူရို့ အပြစ်အတွက် ယဇ်ပူဇော်လီကတ်တေ၊ ယေကေလည်း ခရစ်တော်စာ ထိုသူရို့ပိုင် ယဇ်ပူဇော်ဖို့ မလိုဗျာ။ သူစာ တစ်ခေါက်တည်းန ထာဝရပတ်လုံးအတွက် ကိုယ့်အသက်ကို ယဇ်ပူဇော်ရို့ အဆုံးသတ်လီရေ။ 28ပညှတ်တရားစာ အားနည်းသူရို့ကို မဟာယဇ်ပုရောဟိတ် အရာမာ ခန့်ထားရေ၊ ယေကေလည်း ပညှတ်တရား နောက်က ဆင်းလာစာ ထာဝရဘုရား၏ အကျိန်ကိုင်ချက်စာ သူ၏ သားတော်ကို ထာဝရ မဟာယဇ်ပုရောဟိတ် အရာမာ ခန့်ထားလီရေ။ အရာ သူစာ ထာဝရပတ်လုံးအတွက် အားကုံးစာဖက်က အပြည့်အစုံ မဟာယဇ်ပုရောဟိတ် ဖြစ်လီရေ။