Hebrews 9

လောကသားရို့ ဆောက်စာတဲခုတ်မာ ဝတ်ပြုကိုးကွယ်ခြင်း

1ပထမ စာချုပ်မာ ဝတ်ပြုကိုးကွယ်ဖို့အတွက် အမျိုးမျိုး စည်းကမ်းနည်းလမ်း ဟိလီရေ အရာ လောကမာ နေရာလည်းသောက် တစ်ခု ဟိလီရေ။ 2ထိုနေရာစာ တဲခုတ်အထဲမာ ဟိလီရေ။ ထိုတဲခုတ်အထဲမာ အခန့်နှစ်ခန့် ဟိလီရေ၊ ပထမ အခန့်ကို သန့်ရှင်းစာနေရာ ဟို့ ခေါ်ရေ။ ထိုနေရာမာ ဆီမီးကျိုင်၊ စားပွဲခုံ အရာ ထာဝရဘုရားဘားမာ ပူဇော်ထားစာ သန့်ရှင်းစာ ပေါင်မုန့်လည်း ဟိလီရေ။ 3အရာ ရန်ကာ နောက်ကဟိစာ ဒုတိယ အခန့်ကို မဟာသန့်ရှင်းစာနေရာ ဟို့ ခေါ်ရေ။ 4ထိုနေရာမာ အမွှီးနံသာပေါင်း ပူဇော်ဖို့အတွက် ရွှေနလုပ်စာ ယဇ်ပလ္လင်န သန့်ရှင်းစာ-တိုက်တာ တစ်လုံး ဟိလီရေ။ ထိုသန့်ရှင်းစာ-တိုက်တာ လေးဖက်လက်စိမာ ရွှေကွတ်ရို့ ဟိလီရေ။ ထိုတိုက်တာအထဲမာ မန္နမုန့် ထည့်ထားစာ ရွှေအိုးတစ်လုံးန ပန်းပွင့်လီစာ အာရုန်၏ တောင်မိ တစ်ချောင်း ဟိလီရေ အရာ ပညှတ်တရား ရွီးထားစာ ကျောက်ပြက်နှစ်ပြက်လည်း ဟိလီရေ။ 5ထိုတိုက်တာထက်မာ ရွှေနလုပ်စာ ခေရုဗိမ်နာမည်န တစ်ဇတ်သားသတ္တဝါနှစ်ပါး ဟိလီရေ။ ထိုသတ္တဝါတိစာ ထာဝရဘုရား၏ ဘုန်းတန်ခိုးကို ဖေါ်ပြရို့ နီလီကတ်တေ။ သူရို့စာ ထာဝရဘုရား၏ ကျေးဇူးတော် ပလ္လင်ထက်မာ အတောင်ဖြန့်ရို့ ဟိကတ်လီရေ။ ဒေဂု ထိုအကြောင်းတိကို ငါရို့ ရှရှင်းလလင်း ခွဲရို့ ပြောပြဖို့မနိုင်။

6ယင်းပိုင် ဟိသမျ အားကုံးကို အဆင်သင့် လုပ်ပြီးရေခါ ယဇ်ပုရောဟိတ်ရို့စာ ထာဝရဘုရားကို ဝတ်ပြုဖို့အတွက် နိတိုင်း ထိုတဲခုတ်အထဲမာ ပထမ အခန့်တို့ ဝင်လီကတ်တေ။ 7ယေကေလည်း မဟာယဇ်ပုရောဟိတ် တစ်ယောက်တည်းရာ ဒုတိယ အခန့်ဆိုစာ မဟာသန့်ရှင်းစာနေရာတို့ ဝင်ရလီရေ။ မဟာယဇ်ပုရောဟိတ်စာ တစ်နှစ်မာ တစ်ခေါက်စီ ယဇ်ပူဇော်စာ တိရစ္ဆာန် သွီးကို ယူရို့ ထိုနေရာတို့ ဝင်လီရေ အရာ သူစာ ကိုယ့်အပြစ်အတွက်န လူရို့ မသိဘိုင်း လုပ်ကတ်စာ အပြစ်တိအတွက် ထိုသွီးကို ထာဝရဘုရားဘားမာ လှူလီရေ။ 8ယင်းပိုင် ဝတ်ပြုကိုးကွယ်စာ တဲခုတ်အဟောင်း ဟိသရိကာလပတ်လုံး ဂေါင်းခင်ဘုံမာဟိစာ မဟာသန့်ရှင်းစာနေရာတို့ ဝင်ဖို့အခွင့် ဟိဖို့ မဟုတ်ဆိုစာကို သန့်ရှင်းသောဝိညာဉ်တော် ငါရို့ကို ပြပီးရေ။ 9ထိုတဲခုတ်အဟောင်းစာ ဒေနိအတွက်မာ ပုံဥပမာ တင်ပြချက်တစ်ခု ဖြစ်တေ။ ထိုတဲခုတ်အဟောင်း ငါရို့ကို ပြပီးစာကား၊ တိရစ္ဆာန်ကို ယဇ်ပူဇော်ခြင်းန အမျိုးမျိုး ဝန်တိစာ ဝတ်ပြုကိုးကွယ်သူရို့ စိတ်နှလုံးကို စင်ကြယ်အောင် မလုပ်နိုင်။ 10အကြောင်းကား ထိုယဇ်ပူဇော်ခြင်းတိစာ သက်သက် လူရို့ ခန္ဓာအတွက် စားစရာသောက်စရာ ဖြစ်တေ အရာ ဘာသာရေး ထုံးစဉ်အတိုင်း ကိုယ်ခန္ဓာကို သန့်ရှင်းအောင် လုပ်စာလှောက်ရာ ဖြစ်တေ။ ကိုယ်ခန္ဓာအကြောင်းနဆိုင်စာ စည်းကမ်းတိကို သက်သက် ပညှတ်ချက်အသစ် မရောက်သကြား ထာဝရဘုရားစာ ကိုယ့်လူရို့ကို ကျင့်ဖို့ ပီးလီစာ ဖြစ်တေ။

စာချုပ်အသစ်အောက်မာ ဝတ်ပြုကိုးကွယ်ခြင်း

11ယေကေလည်း ဒေဂု ကောင်းမြတ်စာ အကြောင်းအရာတိအတွက် ခရစ်တော်စာ မဟာယဇ်ပုရောဟိတ်အဖြစ် ကြွလာလီရေ။ ခရစ်တော် ဒေဂု ဝတ်ပြုနီစာ တဲခုတ်စာ အယင်က တဲခုတ်အဟောင်းထက် ပိုရို့ ကြီးမြတ်တေ အရာ ပိုရို့ ပြည့်စုံရေ၊ အကြောင်းကား ထိုတဲခုတ်စာ လူအလက်န ဆောက်စာ တဲခုတ် မဟုတ် အရာ ဒေ လောကနလည်း တစ်ခုလည်း မဆိုင်။ 12ခရစ်တော်စာ ဂေါင်းခင်ဘုံမာဟိစာ မဟာသန့်ရှင်းစာနေရာတို့ တစ်ခေါက်တည်းန ထာဝရပတ်လုံးအတွက် ဝင်လားခလီရေ၊ ယေကေလည်း သူစာ ဆိတ်သွီးန နွားသျှေသွီးကို ယူရို့ ဝင်လီစာ မဟုတ်။ ယင်းထက်ပင် သူစာ ကိုယ့်သွီးကို ယူရို့ ဝင်လားခပြီးကေ ငါရို့ကို အပြစ်က ထာဝရ လွတ်မြောင့်ခြင်း ပီးလီရေ။ 13ဆိတ်သွီးန နွားတွီးသွီးကို၊ မဟုတ်ကေ နွားမသျှေပြာကို မစင်ကြယ်သူရို့ ခန္ဓာမာ ဖြန်းရို့ သူရို့ကို စင်ကြယ်အောင် လုပ်လီရေ၊ ယေကေလည်း သက်သက် သူရို့မာ ခန္ဓာရာ စင်ကြယ်လီရေ။ 14ယေကေလည်း ယေရှုခရစ်တော်စာ ထာဝရ ဝိညာဉ်တော်၏ တန်ခိုးန အနာအဆာနကင်းသူအဖြစ် ကိုယ့်ကို ထာဝရဘုရားဘားမာ ယဇ်ပူဇော်လီရေ။ ယင်းပိုင်ဆိုကေ စဉ်းစားကြည့်၊ ခရစ်တော် သွီးစာ ငါရို့ စိတ်နှလုံးကို အရာလည်း ဇာလှောက် ပိုရို့ စင်ကြယ်အောင် လုပ်နိုင်ဖို့လည်း! ငါရို့ အသက်သျှင် ထာဝရဘုရားကို ဝတ်ပြုကိုးကွယ်ဖို့ရလတ်အောင် ထိုသွီးစာ ငါရို့ စိတ်နှလုံးကို စင်ကြယ်အောင် လုပ်လိမည်။

15ထာဝရဘုရား၏ ခေါ်ခြင်းကို ခံရသူရို့စာ ထာဝရဘုရား၏ ဂတိတော် ပဿိကို ရကတ်ပတ်စီအတွက် ခရစ်တော်စာ စာချုပ်အသစ်တစ်ခု ထိုးလီရေ။ သူရို့စာ ထိုပဿိကို ထာဝရပတ်လုံး ခံရကတ်လိမည်၊ အကြောင်းကား ပထမ စာချုပ် ထိုးရို့ ဟိလီရေခါ အပြစ် အများကြီး လုပ်လီသူရို့ကို ကယ်တင်ဖို့အတွက် ခရစ်တော် အသီခံလီစာ ဖြစ်တေ။

16လူရို့စာ ကိုယ်ရို့ မသီခင်အယင်က အခြားတစ်ယောက်ကို အမွီဥစ္စာ ပီးဖို့အတွက် အမွီခံစာချုပ်တစ်ခု ထိုးရို့ ထားဘိုက်ခရေ။ ယေကေလည်း ထိုအမွီခံစာချုပ်ကို အသုံးပြုဖို့ဆိုကေ ထိုအမွီခံစာချုပ်ကို ထိုးသူ သီလားခဗျာဆိုစာကို သက်သီပြရဖို့၊ 17အကြောင်းကား အမွီခံစာချုပ် ထိုးသူ သီလားခပြီးခါရာ ထိုအမွီခံစာချုပ်ကို အသုံးပြုဖို့ ရရေ။ အမွီခံစာချုပ် ထိုးသူစာ အရှင်ဟိရေဆိုကေ အမွီခံစာချုပ်ကို အသုံးပြုဖို့ မရ။ 18ယင်းပိုင်တထန် ပထမ စာချုပ်ကို အသုံးပြုဖို့အတွက်လည်း သွီးကို လိုလီရေ။ ယင်းအဓိပ္ပါယ်ကား သီဖို့ လိုလီရေ။ 19မောရှေစာ ပထမဆုံး လူရို့ဘားမာ ဟိသမျ ပညှတ်ချက်ကို ဖတ်ပြလီရေ။ ယင်းနောက် သူစာ နွားသျှေသွီးန ဆိတ်သွီးကို ယူရို့ ရီန ရောလီရေ။ ယင်းနောက် သူစာ သိုးဆိတ်အမွီးအနီကို ယူရို့ အပင်အခက်တစ်ခက်မာ ချိုင်ရို့ သွီးမာ နှစ်လီရေ အရာ ထိုသွီးကို ပညှတ်တရား စာအုပ်န လူရို့ ခန္ဓာမာ ဖြန်းလီရေ။ 20ယင်းခါ မောရှေစာ လူရို့ကို ပြောလီရေ၊ “ဒေ သွီးစာ နင်ရို့န ထာဝရဘုရား စာချုပ်ထိုးစာ သွီးဖြစ်တေ။ ဒေ စာချုပ်ကို လိုက်နာဖို့အတွက် ထာဝရဘုရားစာ နင်ရို့ကို အာဏာပီးလီရေ။” 21ယင်းပိုင်တထန် မောရှေစာ သန့်ရှင်းစာ-တဲခုတ်န ဝတ်ပြုကိုးကွယ်စာ အလုပ်မာ အသုံးပြုစာ ဟိသမျ ဝန်တိမာ ထိုသွီးကို ဖြန်းလီရေ။ 22ဟုတ်တေ မှန်ရေ၊ မောရှေ၏ ပညှတ်တရားမာ ဟိသမျ ဝန်တိကို သွီးန စင်ကြယ်အောင် လုပ်ရဖို့ ဟို့ ရွီးရို့ ဟိရေ။ ယင်းအတွက်န သွီးမကျကေ အပြစ် ခွင့်ရွှတ်ခြင်း မဟိ။

ခရစ်တော်၏ ယဇ်ပူဇော်ခြင်းစာ လူအပြစ်ကို ခွင့်ရွှတ်တေ

23ထိုတဲခုတ်အထဲမာဟိစာ ဟိသမျ ဝန်တိစာ ဂေါင်းခင်ဘုံမာဟိစာ ဝန်တိ ပုံဥပမာ ဖြစ်တေ။ ယင်းသျှင့်တိကို ယဇ်ပူဇော်စာ သွီးန စင်ကြယ်အောင် လုပ်ဖို့ လိုလီရေ၊ ယေကေလည်း ဂေါင်းခင်ဘုံမာဟိစာ ဝန်တိကို စင်ကြယ်အောင် လုပ်ဖို့အတွက် အရာလည်း ကြီးမြတ်စာ ယဇ်ပူဇော်ဖို့ လိုရေ။ 24ခရစ်တော်စာ လူအလက်န ဆောက်စာ မဟာသန့်ရှင်းစာနေရာတို့ ဝင်လီစာ မဟုတ်၊ ယေကေလည်း သူစာ ဂေါင်းခင်ဘုံမာ မဟာသန့်ရှင်းစာနေရာတို့ ဝင်လီစာ ဖြစ်တေ။ သူစာ ဒေဂု ငါရို့အတွက် ထာဝရဘုရား၏ ရှိက ရပ်ရို့ ဟိရေ။ ဒေ လောကမာဟိစာ တဲခုတ်အထဲမာ မဟာသန့်ရှင်းစာနေရာစာ ဂေါင်းခင်ဘုံမာဟိစာ နေရာ အရိပ်တစ်ခု ဖြစ်တေ။ 25မဟာယဇ်ပုရောဟိတ်စာ နှစ်တိုင်း တစ်နှစ်မာ တစ်ခေါက်စီ တိရစ္ဆာန် သွီးကို ယူရို့ မဟာသန့်ရှင်းစာနေရာတို့ ဝင်လီရေ။ ယေကေလည်း ခရစ်တော်စာ ထိုမဟာယဇ်ပုရောဟိတ်ရို့ပိုင် ကိုယ့်ကို အပြန်ပြန် ယဇ်ပူဇော်ဖို့အတွက် ဂေါင်းခင်ဘုံတို့ ဝင်လီစာ မဟုတ်။ 26ခရစ်တော်စာ ကိုယ့်ကို အပြန်ပြန် ယဇ်ပူဇော်ဖို့ ကျလီဖို့ဆိုကေ ကမ္ဘာကို ဖန်ဆင်းရေလှောက်ကပင် အခါပေါင်းများစွာ ဒုက္ခ-ဝေဒနာကို ခံရို့ သီရလီဖို့၊ ယေကေလည်း သူစာ တစ်ခေါက်တည်းန ထာဝရပတ်လုံးအတွက် ကိုယ့်ကို ယဇ်ပူဇော်လီရေ။ ခရစ်တော်စာ ကိုယ့်ကို ယဇ်ပူဇော်ရို့ လောကသားရို့ အပြစ်ကို ပယ်ဖျောက်ဘိုက်ဖို့အတွက် နောက်ဆုံးကာလမာ ပေါ်ထွန်းလာလီရေ။ 27လူတိုင်း တစ်ခေါက် သီရကတ်ဖို့၊ ယင်းနောက် ထာဝရဘုရားဘားမာ တရားစစ်ဆေးခြင်းကို ခံရကတ်ဖို့။ 28ယင်းပိုင်တထန် လူအများကြီး အပြစ်ကို ခွင့်ရွှတ်ဖို့အတွက် ခရစ်တော်စာ ကိုယ့်ကို တစ်ခေါက်တည်း ယဇ်ပူဇော်လီရေ။ ယင်းနောက် သူစာ ဒုတိယခေါက် ပြန်ရို့ ကြွလာဖို့သိ၊ ယေကေလည်း သူစာ လူရို့အပြစ်အတွက် အသီခံဖို့ ကြွလာဖို့စာ မဟုတ်။ ယင်းထက်ပင် သူ့ကို ကောင်းကောင်း အောက်မိခြင်းစိတ်န မျှော်လင်းရို့ စောင့်နီသူရို့ကို အပြည့်အစုံ ကယ်တင်ခြင်း ပီးဖို့အတွက် ကြွလာဖို့စာ ဖြစ်တေ။