James 1

သို့၊ ယုဒလူမျိုးအထဲက ကျုံသူရို့။

1ငါ ယာကုပ်၊ ငါစာ ထာဝရဘုရားန အသျှင်ယေရှုခရစ်တော်၏ ကျွန်တစ်ယောက် ဖြစ်တေ။ အမျိုးမျိုး ပြည်မာ ဟိကတ်စာ ယုဒလူမျိုးအထဲက တစ်ဆယ့်နှစ်စိုင်ကို ငါ နှုတ်ဆက်တေ။

ကျုံခြင်းန ညာဏ်ပညာ

2ငါ့ ညီအစ်ကိုမောင်နမှရို့၊ နင်ရို့စာ အမျိုးမျိုး စုံစမ်းခြင်းကို ခံရကတ်တေခါ ကောင်းကောင်း ဝမ်းသာစရာ ဖြစ်တေ ဟို့ မှတ်ကတ်၊ 3အကြောင်းကား နင်ရို့ ကျုံခြင်းတရားကို စုံစမ်းစာကနီရို့ နင်ရို့မာ သည်းခံခြင်းကို တိုးပွါးစီရေဆိုစာကို နင်ရို့ သိကတ်တေ။ 4ထိုသည်းခံခြင်းကို နင်ရို့ အပြည့်အစုံ လုပ်ပိုင်ခွင့် ပီးကတ်။ ယင်းပိုင်ဆိုကေ နင်ရို့ ပြည့်စုံသူန စင်ကြယ်သူ ဖြစ်ကတ်လိမည် အရာ ဝိညာဉ်ရေးဖက်က နင်ရို့မာ တစ်ခုလည်း ခေါင်းပါးခြင်း ဟိလိမည် မဟုတ်။

5နင်ရို့အထဲမာ ညာဏ်ပညာနည်းသူ ဟိရေဆိုကေ သူစာ ထာဝရဘုရားဘားမာ ဆုတောင်း။ ထာဝရဘုရားစာ စေတနာစိတ်န ယင်းသူကို ညာဏ်ပညာ ပီးလိမည်၊ အကြောင်းကား ထာဝရဘုရားစာ ကိုယ့်က တောင်းစာလူ အားကုံးသူကို မတိုင်းမထွာဘိုင်းန ညာဏ်ပညာ ပီးရေ။ 6ယေကေလည်း နင်ရို့စာ ထာဝရဘုရားဘားမာ ဆုတောင်းရေခါ မယုံသင်္ခါစိတ်ကို မထားဘိုင်း အပြည့်အစုံ ကျုံခြင်းတရားစိတ်န တောင်းကတ်ရဖို့၊ အကြောင်းကား မယုံသင်္ခါစိတ် ထားသူစာ သမုဒ္ဒရာပင်လယ်မာ လီတိုက်ရို့ လုတ်နီစာ ရီလှိုင်းလုံးနတူရေ။ 7– 8မယုံသင်္ခါစိတ် ထားသူစာ စိတ်နှစ်ခွ ဟိသူ ဖြစ်တေ။ ယင်းအတွက်န သူစာ ဟိသမျ အလုပ်မာ တည်မြဲခြင်း မဟိ။ ယင်းပိုင်ဇတ်လူစာ ထာဝရဘုရားက မှည်သေတစ်ခု ရမည် ဟို့ မှတ်ဖို့ မသင့်။

ဆင်းရဲသူန သူဌေး အကြောင်း

9ခရစ်တော်ကို ကျုံသူညီအစ်ကိုမောင်နမှရို့အထဲက ဆင်းရဲသူတစ်ယောက်စာ ကိုယ့်ကိုကိုယ် မင်္ဂလာဟိရေ ဟို့ မှတ်၊ အကြောင်းကား ထာဝရဘုရားစာ သူ့ကို ဝိညာဉ်ရေးဖက်က သူဌေးဖြစ်အောင် လုပ်ပျာ။ 10အရာ ကျုံသူရို့အထဲက သူဌေးတစ်ယောက်မာ ဟိသမျ အားကုံးကို ဆုံးရှုံးရကေလည်းသောက် သူစာ ကိုယ့်ကိုကိုယ် မင်္ဂလာဟိရေ ဟို့ မှတ်၊ အကြောင်းကား သူဌေးမာ ပစ္စည်း-ဥစ္စာတိစာ မြက်အပွင့်နတူရေ။ ယင်းသျှင့်တိစာ တစ်ရက်နိ မျှိုင်ရို့ ကြွီဆင်းလိမည်။ 11နီစာ အပူအဟိန်န ထွက်လာရေခါ မြက်ပင်တိစာ ခြောက်လားခရေ အရာ အပွင့်တိစာ မျှိုင်ရို့ ကြွီဆင်းလားခရေ။ ထိုအပွင့်တိစာ ကောင်းကောင်း လှကေလည်း အရုပ်စာ ပျက်လားခရေ။ သူဌေးလည်း ယင်းပိုင်တထန် ဖြစ်တေ။ သူစာ ကိုယ့်အလုပ်တိကို လုပ်နီရေအတိုင်း ဗြုန်းခနိုင်းပျင်ရို့ သီလားလိမည်။

အပြစ်လမ်းတို့ ဆောင်ယူခြင်း

12စုံစမ်းခြင်းကို ခံရရေအချိန်မာ စိတ်ရှည်သည်းခံခြင်းန နီသူစာ မင်္ဂလာဟိရေ၊ အကြောင်းကား စုံစမ်းခြင်းကို ခံရို့ အောင်မြင်ရေခါ ထာဝရဘုရားစာ သူ့ကို ဆုအဖြစ် ထာဝရအသက်ကို ပီးလိမည်။ ထာဝရဘုရားစာ ကိုယ့်ကို ချစ်သူရို့ကို ထိုအသက်ကို ပီးဖို့ ဟို့ ဂတိခံထားလီရေ။

13အသူမဆိုတစ်ယောက် နင်ရို့ကို အပြစ်လမ်းတို့ သွေးဆောင်ရေခါ၊ “ထာဝရဘုရား ငါ့ကို အပြစ်လမ်းတို့ သွေးဆောင်ရေ” ဟို့ မပြောကတ်ကေ့။ ဆိုးယုတ်ခြင်း တစ်ခုလည်း ထာဝရဘုရားကို အပြစ်လမ်းတို့ သွေးဆောင်ရို့ မယူနိုင် အရာ ထာဝရဘုရားလည်းသောက် တစ်ယောက်ကိုလည်း အပြစ်လမ်းတို့ သွေးဆောင်ရို့ မယူ။ 14ယေကေလည်း လူစိတ်နှလုံးမာ အလိုဆန္ဒစာ သူ့ကို အပြစ်လမ်းတို့ သွေးဆောင်ရို့ လိမ်လှည့်ခြင်းမာ ချရေ။ 15ယင်းနောက် ထိုအလိုဆန္ဒစာ အပြစ်ကို မွီးဖွားရေ အရာ အပြစ် ကြီးလာရေခါ သီခြင်းတရားကို မွီးဖွားရေ။

16ငါ ချစ်ခင်စာ ညီအစ်ကိုမောင်နမှရို့၊ နင်ရို့ အလိမ် မခံကတ်ကေ့။ 17ဟိသမျ ကောင်းမြတ်စာ ဆုကျေးဇူးန ပြည့်စုံစာ ဆုကျေးဇူးစာ ဂေါင်းခင်ဘုံမာ ကျိန်းဝပ်နီစာ အဖထာဝရဘုရားက လာရေ။ အဖထာဝရဘုရားစာ ဟိသမျ အလင်းကို ဖန်ဆင်းလီရေ။ ထိုအလင်းစာ ပြောင်းလှဲကေလည်း ထာဝရဘုရားမာ တစ်ခုလည်း ပြောင်းလှဲခြင်း မဟိ။ 18ထာဝရဘုရားစာ ကိုယ့်အလိုတော်အတိုင်း ကိုယ့်မာ မှန်ကန်စာ စကားတော်န ငါရို့ကို မွီးဖွားလီရေ။ ယင်းအတွက်န ထာဝရဘုရား ဟိသမျ ဖန်ဆင်းစာအထဲမာ ငါရို့စာ ပထမဆုံး နေရာကို ရကတ်ပျာ။

ကြားရေအတိုင်း လုပ်ကိုင်ခြင်း

19ငါ ချစ်ခင်စာ ညီအစ်ကိုမောင်နမှရို့၊ နင်ရို့ ငါ ပြောစာစကားကို မှတ်ထားကတ်။ နင်ရို့ အားကုံးသူ အယင်ဆုံး စကား နားထောင်ဖို့စာကို ကြိုးစားကတ်။ ယင်းနောက် စကားကို အီးရို့ ပြောကတ် အရာ နင်ရို့မာ မန်ကို ညှောရို့ ထားကတ်၊ 20အကြောင်းကား မန်တက်ခြင်းစာ ထာဝရဘုရား၏ အလိုတော်အတိုင်း နီထိုင်ဖို့စာကို တားဆီးရေ။ 21ယင်းအတွက်န နင်ရို့မာ ဟိသမျ မသန့်ရှင်းစာန ဆိုးယုတ်စာ အကျင့်တိကို စွန့်ဘိုက်လိုက်ကတ်။ ထာဝရဘုရားစာ ကိုယ့်စကားတော်ကို နင်ရို့ စိတ်နှလုံးထဲမာ သွင်းထားဗျာ။ ထိုစကားတော်ကို နုညံ့ခြင်းစိတ်န နင်ရို့ လက်ခံယူကတ်၊ အကြောင်းကား ထိုစကားတော်မာ နင်ရို့ကို ကယ်တင်ခြင်း ပီးဖို့စာတန်ခိုး ဟိရေ။

22ထာဝရဘုရား၏ စကားတော်ကို ကြားရေအတိုင်း နင်ရို့ အလုပ် လုပ်ကတ်။ ယင်းပိုင် ကြားရို့အတိုင်းလည်း အလုပ် မလုပ်ဘိုင်းန နီရေဆိုကေ နင်ရို့ ကိုယ့်ကိုကိုယ် လိမ်ရေ။ 23– 24အသူမဆို ထာဝရဘုရား၏ စကားတော်ကို ကြားရို့အတိုင်းလည်း အလုပ် မလုပ်ဘိုင်းန နီရေဆိုကေ သူစာ ကိုယ့်မျက်နှာကို မှန်မာ ကြည့်ရို့ ပြန်လားခရေချက်ချင်း ကိုယ့်အရုပ် ဇာပိုင်လည်းဆိုစာကို မိလားခစာလူနတူရေ။ 25ယေကေလည်း ထာဝရဘုရား၏ ပြည့်စုံစာ ပညှတ်တရားစာ လူကို လွတ်မြောင့်ခြင်း ပီးနိုင်ရေ။ အသူမဆို ထိုပညှတ်တရားကို စိတ်ဝင်စားရို့ ဖတ်နီရေဆိုကေ၊ ပညှတ်တရားကို ကြားရေအတိုင်း စိတ်မာ မှတ်ထားရေဆိုကေ အရာ ပညှတ်တရားအတိုင်း အလုပ်ကို လုပ်နီရေဆိုကေ ယင်းသူစာ ထာဝရဘုရား၏ ပဿိကို ခံရရေ။

26အသူမဆို ကိုယ့်ကိုကိုယ် ဘာသာတရားကို အလှပ လိုက်နာသူ ဟို့ မှတ်ရို့ပင်လည်း ကိုယ့်ပစကို မထိန်းနိုင်ဆိုကေ ယင်းသူစာ ကိုယ့်ကိုကိုယ် လိမ်ရေ။ ယင်းပိုင်ဇတ်လူမာ ဘာသာတရားစာ တစ်ခုလည်း တန်ဖိုး မဟိ။ 27ထာဝရဘုရား၏ မျက်စိမာ စင်ကြယ်ခြင်းန မှန်ကန်စာ ဘာသာတရား ဖြစ်တေကား၊ အမိအဖ မဟိစာ သားသမီးရို့န မဆမရို့ကို ကြည့်ရှုစောင်မခြင်း ဖြစ်တေ အရာ လောကမာ ဟိသမျ ဆိုးယုတ်ခြင်းက ကိုယ့်ကို ရှောင်ရို့ ထားခြင်း ဖြစ်တေ။