James 2

အားကုံးသူကို ရိုသေကတ်ရဖို့

1ငါ့ ညီအစ်ကိုမောင်နမှရို့၊ နင်ရို့စာ ငါရို့မာ ဘုန်းတန်ခိုးနပြည့်စုံစာ အသျှင်ယေရှုခရစ်တော်ကို ကျုံသူအနေန အားကုံးသူကို တစ်ညီတည်း မျက်စိန ကြည့်ကတ်ရဖို့။ 2ကိုင်လိုက်ဖိ၊ လူတစ်ယောက် အဝတ်ကောင်း အစားကောင်းန ရွှေလက်စွပ် ဝတ်ရို့ နင်ရို့ တိုင်ဘင်နီစာနေရာတို့ လာလီရေ။ အရာ ယင်းချိန်ခါ ဆင်းရဲသားတစ်ယောက်လည်း အဝတ်အဆိုး ဝတ်ရို့ လာလီရေ။ 3ယင်းခါ နင်ရို့ ထိုအဝတ်ကောင်း-အစားကောင်း ဝတ်ရို့ လာသူကို ဇာ ပြောကတ်ဖို့လည်း? ယင်းသူကို ကောင်းကောင်း အရေးစိုက်ရို့၊ “အဘေ၊ အဘေ ထိုနေရာအကောင်းမာ ထိုင်ပါ” ဟို့ ပြောဖို့စာလော? အရာ ထိုဆင်းရဲသားကို နင်ရို့ ဇာ ပြောကတ်ဖို့လည်း? “အဝေး၊ နင် ထိုနေရာမာ ရပ်နီ၊” မဟုတ်ကေ “ငါ့အခြီရင်းမာ ထိုင်နီ” ဟို့ ပြောဖို့စာလော? 4ယင်းပိုင်ဆိုကေ နင်ရို့အထဲမာ တစ်ယောက်ကို တစ်ယောက် မျက်နှာကြီး-မျက်နှာသျှေ ခွဲထားစာ မဟုတ်လော? ယင်းသျှင့် နင်ရို့ မကောင်းစာ အကြံန တရားစစ်ဆေးကတ်စာ မဟုတ်လော?

5ငါ ချစ်ခင်စာ ညီအစ်ကိုမောင်နမှရို့၊ ငါ ပြောမည်၊ နင်ရို့ နားထောင်ကတ်။ ဒေ လောကသားရို့ မျက်စိမာ ဆင်းရဲသူရို့ကို ကျုံခြင်းတရားဖက်က သူဌေး ဖြစ်ဖို့အတွက် ထာဝရဘုရား ရွီးကောက်ယူလီရေ မဟုတ်လော? ထာဝရဘုရားကို ချစ်သူရို့ကို ပီးဖို့ ဂတိခံထားစာ နိုင်ငံတော်ကို ပိုင်ဆိုင်ဖို့အတွက် ထိုဆင်းရဲသားရို့ကို ရွီးကောက်ယူလီရေ မဟုတ်လော? 6ယေကေလည်း နင်ရို့ ထိုဆင်းရဲသားရို့ကို အားမနာ လုပ်ကတ်တေ။ ထိုသူဌေးရို့ နင်ရို့ကို ဒုက္ခ ပီးကတ်တေ မဟုတ်လော? အရာ သူရို့စာ နင်ရို့ကို တရားယုံးတို့ ငင်ယူလားကတ်တေ မဟုတ်လော? 7ထိုသူဌေးရို့စာ နင်ရို့ ခံယူလီကတ်စာ ရိုသေခြင်းနပြည့်စုံစာ အသျှင်၏ နာမည်ကို ပုတ်ခတ်ရို့ စကား ပြောကတ်တေ မဟုတ်လော?

8ခရစ်တော်၏ နိုင်ငံတော် ပညှတ်တရား အကြောင်းကို ကျမ်းစာမာ ရွီးရို့ ဟိရေ၊ “နင့် အိမ်နားပါးသားကို ကိုယ့်ကိုပိုင် ချစ်ရဖို့။” ထိုပညှတ်တရားကို နင်ရို့ လိုက်နာရေဆိုကေ ပိုရို့ ကောင်းရေ။ 9ယေကေလည်း နင်ရို့အထဲမာ တစ်ယောက်ကို တစ်ယောက် မျက်နှာကြီး-မျက်နှာသျှေ ခွဲထားရေဆိုကေ နင်ရို့ အပြစ် လုပ်ကတ်တေ။ ယင်းခါ နင်ရို့စာ ထာဝရဘုရား၏ ပညှတ်တရားကို ဖျက်တေအတွက်န အပြစ်သေ ဟို့ အပြစ်အတင်ခံကတ်တေ။ 10အသူမဆို ဟိသမျ ပညှတ်တရားကို လိုက်နာရို့လည်း ယင်းအထဲက ပညှတ်တရားတစ်ခုကို မလိုက်နာဆိုကေ သူစာ ဟိသမျ ပညှတ်တရားကို ဖျက်တေ ဆိုပြီးကေ အပြစ်အတင် ခံရရေ။ 11အကြောင်းကား ထာဝရဘုရားစာ ပြောလီရေ၊ “ကာမဂုဏ် မလိုက်စားရ၊” သူစာ အရာတစ်ပြန် ပြောလီရေ၊ “လူအသက်ကို မသတ်ရ။” နင်ရို့ ကာမဂုဏ် မလိုက်စားဘိုင်းန လူအသက်ကို သတ်ကေလည်းသောက် နင်ရို့ ပညှတ်တရားကို ဖျက်ကတ်တေ။ 12နင်ရို့ကို လွတ်မြောင့်ခြင်းပီးစာ ပညှတ်တရားအတိုင်း နင်ရို့ တရားစစ်ဆေးခြင်းကို ခံရကတ်လိမည်။ ယင်းအတွက်န အလုပ်အကိုင်-အပြောအဟော အားကုံးစာမာ နင်ရို့ သတိထားကတ်။ 13အကြောင်းကား လူကို မသနားသူစာ ထာဝရဘုရား၏ သနားခြင်းကို မခံရဘိုင်းန တရားစစ်ဆေးခြင်းကို ခံရလိမည်။ ယေကေလည်း လူကို သနားသူစာ တရားစစ်ဆေးရေခါ ထာဝရဘုရား၏ သနားခြင်းကို ခံရလိမည်။ အရာ ထိုသနားခြင်းစာ တရားစစ်ဆေးခြင်းကို အနိုင်ရရေ။

အလုပ်မပါစာ ကျုံခြင်းတရား အသီ

14ငါ့ ညီအစ်ကိုမောင်နမှရို့၊ အသူမဆိုတစ်ယောက် ငါ့မာ ကျုံခြင်းတရား ဟိရေ ဟို့ ပြောရို့ပင်လည်း အလုပ် မလုပ်ဘိုင်းန နီရေဆိုကေ ယင်းသူမာ ကျုံခြင်းတရားစာ တစ်ခုလည်း တန်ဖိုး မဟိ။ ယင်းပိုင်ဆိုကေ ထိုကျုံခြင်းတရားစာ သူ့ကို ကယ်တင်ဖို့ မနိုင်။ 15ကိုင်လိုက်ဖိ၊ ခရစ်တော်ကို ကျုံသူညီအစ်ကိုမောင်နမှရို့အထဲက အသူမဆိုတစ်ယောက်မာ စားစရာလည်း မဟိ၊ ဝတ်စရာလည်း မဟိ။ 16ယင်းပိုင် ဖြစ်နီစာကို မြင်ရို့အတိုင်း နင်ရို့ ယင်းသူကို တစ်ခုလည်း မကူညီဘိုင်းန၊ “နင် မကြောင်းကြကေ့၊ ထာဝရဘုရား နင့်ကို ကူညီမစားလိမည်။ နင် အီးရို့သျှေ ဝတ်ရို့-စားရို့နီ” ဟို့ ပြောရေဆိုကေ ယင်းသူမာ ဇာအကျိုး ဖြစ်ဖို့လည်း? 17ယင်းပိုင်တထန် ကျုံခြင်းတရား တစ်ခုတည်းန မလုံလောက်သိ။ ထိုကျုံခြင်းတရားစာ အလုပ်ကို မပြနိုင်ဆိုကေ အသီ ဖြစ်တေ။

18ယေကေလည်း အသူမဆို ပြောနိုင်ရေ၊ “နင့်မာ ကျုံခြင်းတရား ဟိရေ အရာ ငါ့မာ ကောင်းမြတ်စာ အလုပ် ဟိရေ။” ယင်းပိုင်ဆိုကေ ငါ ပြောမည်၊ “အလုပ် မပါဘိုင်းန နင့် ကျုံခြင်းတရားကို ငါ့ကို ပြ၊ ယေကေလည်း ငါစာ အလုပ်ကနီရို့ ငါ့ ကျုံခြင်းတရားကို နင့်ကို ပြမည်။” 19ထာဝရဘုရား တစ်ပါးတည်း ဟိရေဆိုစာကို နင် ကျုံရေ မဟုတ်လော? ကောင်းရေ! ယေကေလည်း ယင်းသျှင့်ကို နတ်ဆိုးရို့လည်း ကျုံကတ်တေ အရာ သူရို့စာ ကြောက်ရို့ တုန်ကတ်တေ!

20အဝေး ပညာတုံး! အလုပ်မပါစာ ကျုံခြင်းတရား တန်ဖိုး မဟိဆိုစာကို နင့်ကို ပြဖို့စာလော? 21ငါရို့မာ အဖိုးအဖီးအစိုင်လာ အာဗြဟံကို ထာဝရဘုရား ဇာပိုင်ပျင်ရို့ သူတော်ကောင်းအဖြစ် လက်ခံလီရေလည်းဆိုစာကို နင်ကား သိရေ။ သူစာ ကိုယ့်မာသား ဣဇာက်ကို ယဇ်ပလ္လင်မာ တင်ရို့ ယဇ်ပူဇော်လီရေ။ ယင်းအလုပ်အတွက်န ထာဝရဘုရားစာ သူ့ကို နှစ်သက်ရို့ သူတော်ကောင်းအဖြစ် လက်ခံလီရေ။ 22အာဗြဟံမာ ကျုံခြင်းတရားစာ သူ၏ လုပ်ကိုင်ခြင်းနအတူ ဟိလီရေဆိုစာကို နင် မြင်ရေ မဟုတ်လော? ထိုအလုပ်စာ သူ့ကျုံခြင်းတရားကို ပြည့်စုံအောင် လုပ်လီရေ။ 23အာဗြဟံ၏ အလုပ်စာ ကျမ်းစာကို ပြည့်စုံအောင် လုပ်လီရေ။ ကျမ်းစာမာ ဒေပိုင် ရွီးရို့ ဟိရေ၊ “အာဗြဟံ ထာဝရဘုရားကို ကျုံလီရေအတွက်န ထာဝရဘုရားစာ သူ့ကို သူတော်ကောင်းအဖြစ် လက်ခံလီရေ။” ယင်းအတွက်န ထာဝရဘုရားစာ အာဗြဟံကို မိတ်ဆွေ ဟို့ သတ်မှတ်လီရေ။ 24ယင်းပိုင်ဆိုကေ နင်ရို့ မြင်ရကတ်တေ၊ ထာဝရဘုရားစာ သက်သက် ကျုံခြင်းတရားအတွက်န လူကို သူတော်ကောင်းအဖြစ် လက်ခံစာ မဟုတ်။ ယေကေလည်း ကျုံခြင်းတရားန လုပ်ကိုင်ခြင်းအတွက် သူတော်ကောင်းအဖြစ် လက်ခံစာ ဖြစ်တေ။

25ပုံဥပမာအဖြစ် ရာခပ်နာမည်န ပြည်တန်းဆာမ တစ်ယောက် အကြောင်းကို ပြောနိုင်ရေ။ ပြည်တန်းဆာမ ရာခပ်စာ ဣသရေလလူမျိုးရို့က ရွှတ်လိုက်စာ လူသျှိုရို့ကို ကြိုဆိုလက်ခံလီရေ အရာ သူစာ ထိုလူရို့ကို ရန်သူရို့အလက်က ရွတ်လတ်အောင် ရွှက်ရို့ ထားလီရေ။ ယင်းနောက် သူစာ ထိုလူရို့ကို အခြားတစ်လမ်းက ထွက်လားဖို့အတွက် ကူညီလီရေ။ ထိုအလုပ်အကြောင်းန ထာဝရဘုရားစာ သူ့ကို သူတော်ကောင်းအဖြစ် လက်ခံလီရေ။

26ယင်းအတွက်န ငါရို့ မြင်ရစာကား၊ အသက် မဟိစာခန္ဓာ အသီ ဖြစ်စာပိုင် အလုပ် မပြနိုင်စာ ကျုံခြင်းတရားလည်း အသီ ဖြစ်တေ။