James 3
လျှာကို ထိန်းသိမ်းဖို့စာ အကြောင်း
1ငါ့ ညီအစ်ကိုမောင်နမှရို့၊ နင်ရို့အထဲက လူအများကြီး ကျမ်းဆရာ ဖြစ်ဖို့အတွက် ကြိုးစားဖို့ မသင့်၊ အကြောင်းကား ငါရို့ ဆရာ ဖြစ်ကတ်တေအတွက်န ထာဝရဘုရားစာ ငါရို့ကို အခြားလူရို့ထက် ပိုရို့ ကကြမ်းတတမ်း ပျင်ရို့ တရားစစ်ဆေးဖို့ဆိုစာကို နင်ရို့ကား သိကတ်တေ။ 2ငါရို့ အားကုံးသူ အမျိုးမျိုးပိုင် အပြစ် လုပ်နီကတ်တေ၊ ယေကေလည်း အသူမဆို ပစကို ထိန်းသိမ်းရို့ ထားနိုင်ရေဆိုကေ သူစာ အပြစ်နကင်းသူ တစ်ယောက် ဖြစ်တေ။ အရာ သူစာ ကိုယ့်ခန္ဓာတစ်ကိုယ်လုံးကို ထိန်းသိမ်းရို့ ထားနိုင်ရေ။ 3မြင်းကို ထိန်းဖို့အတွက် ဇက်ကြိုးကို မြင်းပစမာ ချိုင်ရရေ။ ယင်းခါရာ မြင်းကို ကိုယ်လိုရာတို့ ယူလားဖို့ ရရေ။ 4ဒေဂု နင်ရို့ သင်္ဘောတစ်စင်း အကြောင်းကို စဉ်းစားကြည့်ကတ်။ သင်္ဘောကြီးတစ်စင်းစာ ကောင်းကောင်း ပြင်းစာလီအဟုန်န ပင်လယ်မာ လားရေ၊ ယေကေလည်း သင်္ဘောသမားစာ ထိုသင်္ဘောကြီးကို တက်မသျှေတစ်ခုန ကိုယ်လိုရာဖက်တို့ ယူလားနိုင်ရေ။ 5ယင်းပိုင်တထန် လျှာလည်းသောက် ကိုယ်ခန္ဓာအထဲမာ အင်္ဂါအသျှေတစ်ခု ဖြစ်တေ၊ ယေကေလည်း လျှာစာ အကြီးအကျယ် စကားတိကို ပြောရေ။ အရာ နင်ရို့ စဉ်းစားကြည့်ကတ်၊ မီးတန်သျှေတစ်တန်စာ ဇာပိုင်ပျင်ရို့ တောကြီးတစ်တောကို ပြာကျအောင် လုပ်နိုင်ရေလည်း? 6ယင်းပိုင်တထန် ငါရို့မာ လျှာလည်းသောက် ငရဲအိုးအထဲက ထွက်လာစာ မီးနတူရေ အရာ ငါရို့ ခန္ဓာမာဟိစာ အင်္ဂါမျိုးစုံအထဲမာ ကောင်းကောင်း ဆိုးယုတ်စာ လောကတစ်ခုနလည်းတူရေ။ ဒေ လျှာစာ ငါရို့ ခန္ဓာတစ်ကိုယ်လုံးကို မစင်ကြယ်အောင် လုပ်တေ အရာ ငါရို့ကို တစ်သက်ပတ်လုံး ကျွန်းလောင်အောင် လုပ်တေ။ 7လူစာ ဟိသမျ သတ္တဝါမျိုးစုံကို ထိန်းရို့ ထားနိုင်ရေ အရာ ထိန်းရို့ ထားလီရေ။ ထိုသတ္တဝါတိ ဖြစ်တေကား အမျိုးမျိုး တိရစ္ဆာန်၊ အမျိုးမျိုး ငှက်၊ အမျိုးမျိုး ရင်ဖတ်နတွားရို့လားစာ သတ္တဝါ အရာ မြစ်ပင်လယ်မာဟိစာ အမျိုးမျိုး သတ္တဝါတိ ဖြစ်တေ။ 8ယေကေလည်း လျှာကို တစ်ယောက်လည်း ထိန်းသိမ်းရို့ မထားနိုင်ကတ်၊ အကြောင်းကား ဒေ လျှာစာ ရိုင်းစိုင်းရေ၊ ကောင်းကောင်း ဆိုးယုတ်ခြင်းန ပြည့်စုံနီရေ အရာ ကြောက်ဖို့ကောင်းစာ အဆိပ်န ပြည့်စုံနီရေ။ 9ငါရို့စာ တစ်ခါတစ်ရီ ဒေ လျှာန ငါရို့မာ အဖဖြစ်သူ အသျှင်ထာဝရဘုရားကို ချီမွမ်းကတ်တေ အရာ တစ်ခါတစ်ရီ ထာဝရဘုရား၏ ပုံသဏ္ဍာန်နတတူတည်း ဖန်ဆင်းစာ လူကို ကျိန်ဆဲထည့်ကတ်တေ။ 10ငါရို့မာ ပစတစ်ခုတည်းက ချီမွမ်းခြင်းန ကျိန်ဆဲထည့်ခြင်း ထွက်လာရေ။ ငါ့ ညီအစ်ကိုမောင်နမှရို့၊ ယင်းပိုင် ဖြစ်ဖို့ မသင့်။ 11ရီမျက်တွင်း တစ်တွင်းတည်းက ရီချိုန ရီခါး ထွက်လာနိုင်ရေလော? 12ငါ့ ညီအစ်ကိုမောင်နမှရို့၊ သဖန်းပင်မာ ဝါဟောင်းသီး သီးရေလော? အရာ စပျစ်နွယ်မာ သဖန်းသီး သီးရေလော? ယင်းပိုင်တထန် ရီငန်တွင်းက ရီချို မထွက်နိုင်!ညာဏ်ပညာ နှစ်မျိုး
13နင်ရို့အထဲမာ ပညာသျှင်န လိမ္မာသူ ဟိရေလော? ဟိရေဆိုကေ သူစာ နုညံ့ခြင်း အကျင့်သီလကနီရို့ ကိုယ့်မာ ကောင်းမြတ်စာ ညာဏ်ပညာကို ဖေါ်ပြ။ 14ယေကေလည်း နင်ရို့မာ မနာလိုခြင်းစိတ်န ကိုယ့်တစ်ကိုယ်တည်းကို ချစ်ခြင်းစိတ် ဟိရေဆိုကေ နင်ရို့စာ ဘော်ကြော့ မကြင်းကတ်ကေ့ အရာ နင်ရို့ အမှန်ကို အမှား မလုပ်ကတ်ကေ့။ 15ယင်းပိုင်ဇတ် စိတ်စာ ဂေါင်းခင်ဘုံက ဆင်းလာစာ ညာဏ်ပညာ မဟုတ်၊ ယေကေလည်း လောက၏ ညာဏ်ပညာ၊ ကိုယ့်တစ်ကိုယ်တည်းကို ချစ်ခြင်း ညာဏ်ပညာ အရာ မာရ်နတ်၏ ညာဏ်ပညာ ဖြစ်တေ။ 16အကြောင်းကား မနာလိုစိတ်န ကိုယ့်တစ်ကိုယ်တည်းကို ချစ်ခြင်းစိတ် ဟိစာနေရာမာ အသင်းခွဲခြင်းန ဟိသမျ မတရားလုပ်ခြင်းတိ ဟိရေ။ 17ယေကေလည်း ဂေါင်းခင်ဘုံက ဆင်းလာစာ ညာဏ်ပညာစာ ပထမဆုံး စင်ကြယ်ရေ၊ ယင်းနောက် ငြိမ်းချမ်းခြင်းန ပြည့်စုံရေ။ ထိုညာဏ်ပညာစာ နုညံ့ခြင်းစိတ်န စကားကို လိုက်နာရေ။ ထိုညာဏ်ပညာစာ သနားကြင်နာခြင်းကို ထားရို့ ကောင်းမြတ်စာ အလုပ်ကို လုပ်တေ။ အရာ ထိုညာဏ်ပညာစာ မျက်နှာလိုက်ခြင်း မဟိ အရာ ဟန်ဆောင်မှု မဟိ။ 18အရာ ငြိမ်းချမ်းခြင်းကို ရဖို့အတွက် ကြိုးစားသူရို့စာ ငြိမ်းချမ်းစာ မျိုးစိတိကို စိုက်ပျိုးကတ်တေ အရာ ထိုမျိုးစိတိက ရိုးသားစာ အသီးအနှံတိ ထွက်လာရေ။
Copyright information for
RmzSC