James 5
သူဌေးရို့ကို သတိပီးခြင်း
1အိုး သူဌေးရို့၊ နင်ရို့ ငါ့စကားကို နားထောင်ကတ်။ နင်ရို့ဘားမာ ကြောက်လန့်စရာ ဖီးဒုက္ခ ကျရောက်လိမည်။ ယင်းအတွက်န နင်ရို့ အားန အော်ရို့ ငိုကတ်။ 2– 3နင်ရို့စာ ဒေ နောက်ဆုံးကာလအတွက်မာ ပစ္စည်း-ဥစ္စာ စုဆောင်းနီကတ်တေ။ ယေကေလည်း နင်ရို့မာ ပစ္စည်း-ဥစ္စာတိစာ ပျက်စီးလားနီဗျာ အရာ နင်ရို့မာ အဝတ်အစားတိကို ပိုးမြုန့်ဘိုက်နီဗျာ။ အရာ နင်ရို့မာ ရွှေ-ငွေတိလည်း သန်ချီးတက်လိမည်။ ယင်းသန်ချီးတိစာ နင်ရို့ကို ဆန့်ကျင်ရို့ သက်သီ ပီးလိမည် အရာ မီးပိုင် နင်ရို့ ခန္ဓာကို စားဘိုက်လိမည်။ 4နားထောင်ကတ်၊ နင်ရို့စာ ကိုယ်ရို့ လယ်မာ အသီးအနှံ ရိတ်သိမ်းကတ်စာ အငှားသားရို့ကို အခ မပီးလီကတ်သိ။ ယင်းအတွက်န ဒေဂု သူရို့ အားန အော်ရို့ နင်ရို့ကို အပြစ်တင်နီကတ်တေ။ သူရို့ အော်ကတ်စာ အသံကို အနန္တတန်ခိုးနပြည့်စုံစာ အသျှင် ကြားဗျာ။ 5ဒေ လောကမာ နင်ရို့ ကောင်းကောင်း စဉ့်စိမ်ခံရို့ လာကတ်ပျာ အရာ ကာမဂုဏ်အလိုဆန္ဒအတိုင်း ပျော်ရို့ လာကတ်ပျာ။ တိရစ္ဆာန်ပိုင် အလှီးခံဖို့စာ နိရက်အတွက် နင်ရို့ ကိုယ်ရို့ခန္ဓာကို တတုံ့ဖဖျို့ လုပ်ရို့ ထားကတ်တေ။ 6နင်ရို့စာ သူတော်ကောင်းရို့ကို အပြစ်တင်ရို့ အားဒမ သတ်ဘိုက်လိုက်ကတ်တေ၊ ယေကေလည်း သူရို့စာ နင်ရို့ကို ဆန့်ကျင်ဖက် မလုပ်ကတ်လီ။ဒုက္ခ ခံရရေအချိန်မာ သည်းခံဖို့စာ အကြောင်း
7ယင်းအတွက်န ငါ့ ညီအစ်ကိုမောင်နမှရို့၊ နင်ရို့စာ အသျှင် ပြန်ရို့ ကြွမလာသကြား သည်းခံရို့ စောင့်နီကတ်။ နင်ရို့ ကြည့်ကတ်၊ လယ်သမားတစ်ယောက်စာ ကိုယ့်လယ်က တန်ဖိုးဟိစာ အသီးအနှံတိကို ရဖို့အတွက် မိုးဦးန မိုးနှောင်းကို သည်းခံရို့ စောင့်နီရေ။ 8နင်ရို့လည်း ယင်းပိုင်တထန် သည်းခံရို့ စောင့်နီကတ် အရာ နင်ရို့ စိတ်မပျက်ကတ်ကေ့၊ အကြောင်းကား အသျှင် ကြွလာဖို့ ပါးနီဗျာ။ 9ငါ့ ညီအစ်ကိုမောင်နမှရို့၊ နင်ရို့ တစ်ယောက်ကို တစ်ယောက် ဆန့်ကျင်ရို့ မစစ်စွဲကတ်ကေ့။ နင်ရို့ တစ်ယောက်ကို တစ်ယောက် စစ်စွဲရေဆိုကေ နင်ရို့စာ အမှန် တရားစစ်ဆေးခြင်းကို ခံရကတ်လိမည်။ ကြည့်ကတ်၊ တရားသူကြီး အပါးမာ ရောက်နီဗျာ။ 10ငါ့ ညီအစ်ကိုမောင်နမှရို့၊ နင်ရို့ ဒုက္ခ-ဝေဒနာကို ခံရရေအချိန်မာ ဇာပိုင် သည်းခံရို့ နီရကတ်ဖို့လည်းဆိုစာကို ပုံဥပမာအဖြစ် ဘုရားသတင်းပို့သူရို့ကို ကြည့်ကတ်။ ထိုဘုရားသတင်းပို့သူရို့စာ အသျှင်၏ အကြောင်းကို ဟောပြောလီရေခါ ကောင်းကောင်း ဒုက္ခ-ဝေဒနာကို ခံရကေလည်း သည်းခံရို့ နီလီကတ်တေ။ 11ဒုက္ခ-ဝေဒနာကို ခံရရေအချိန်မာ စိတ်ရှည်သည်းခံခြင်းန နီသူရို့ကို မင်္ဂလာဟိရေ ဟို့ ငါရို့ ပြောကတ်တေ။ ယောဘနာမည်န လူတစ်ယောက် သည်းခံခြင်း အကြောင်းကို နင်ရို့ ကြားဖူးကတ်တေ မဟုတ်လော? အရာ ယင်းသူ ဒုက္ခ-ဝေဒနာကို ခံရပြီးရေနောက် ထာဝရဘုရားစာ သူ့ကို ကူညီမစားလီရေဆိုစာကိုလည်း နင်ရို့ သိကတ်တေ မဟုတ်လော? ထာဝရဘုရားစာ ကရုဏာတော်န သနားကြင်နာခြင်း ပြည့်စုံရေဆိုစာကို ယင်းပိုင် လုပ်ခြင်းကနီရို့ သိရရေ။ 12ငါ့ ညီအစ်ကိုမောင်နမှရို့၊ ငါ အရေးတကြီး ပြောချင်စာကား၊ နင်ရို့ ဂေါင်းခင်ဘုံန ကမ္ဘာကို ယူရို့ အကျိန်သစ္စာ မကိုင်ကတ်ကေ့ အရာ အခြားတစ်ခုဝန်ကိုလည်း ယူရို့ အကျိန်သစ္စာ မကိုင်ကတ်ကေ့။ ယင်းထက်ပင် နင်ရို့ ဟုတ်တေဆိုကေ ဟုတ်တေ အရာ မဟုတ်ဆိုကေ မဟုတ် ပြောကတ်။ ယင်းပိုင်ဆိုကေ တရားစစ်ဆေးရေခါ နင်ရို့ အပြစ်ဒါဏ်ကို ခံရကတ်လိမည် မဟုတ်။ကျုံခြင်းတရား ပြည့်စုံစာ ဆုတောင်းခြင်း
13နင်ရို့အထဲမာ အသူ့မာမဆို စိတ်ဒုက္ခ ရောက်နီရေဆိုကေ ယင်းသူစာ ဆုတောင်း။ အသူမဆို စိတ်ပျော်ရေဆိုကေ ယင်းသူစာ ချီမွမ်းစာ တေးခြင်းကို ဆို။ 14အရာ အသူမဆို ခန္ဓာ မကျန်းမာ ဖြစ်တေဆိုကေ ယင်းသူစာ အသင်းတော် ဂေါင်းဆောင်အကြီးရို့ကို ခေါ်။ သူရို့စာ မကျန်းမာသူအဂေါင်းမာ ဆီထည့်ရို့ အသျှင်၏ နာမည်ကို အာရုံပြုရို့ ယင်းသူအတွက် ဆုတောင်းကတ်။ 15ကျုံခြင်းတရား အပြည့်န ဆုတောင်းခြင်းစာ မကျန်းမာသူကို ကျန်းမာအောင် လုပ်လိမည်။ အသျှင်စာ သူ့ကို အကောင်း လုပ်လိမည် အရာ သူစာ အပြစ်လုပ်ရို့ ဟိကေလည်း အသျှင်စာ သူ့ကို ခွင့်ရွှတ်လိမည်။ 16ယင်းအတွက်န နင်ရို့ တစ်ယောက်ဘားမာ တစ်ယောက် ကိုယ်ရို့အပြစ်တိကို ဖေါ်ပြရို့ ဝန်ခံကတ်။ အရာ ကျန်းမာဖို့အတွက် ကိုယ်ရို့အချင်းချင်း ဆုတောင်းပီးကတ်။ သူတော်ကောင်းရို့ ဆုတောင်းခြင်းစာ ကောင်းကောင်း တန်ခိုး ဟိရေအတွက်န အကျိုး ပီးရေ။ 17ဘုရားသတင်းပို့သူ ဧလိယစာ ငါရို့ပိုင် လူတစ်ယောက် ဟိလီရေ။ သူစာ မိုးမကျလတ်အောင် အားထုတ်ရို့ ထာဝရဘုရားဘားမာ ဆုတောင်းလီရေ။ ယင်းခါ သုံးနှစ်န ခြောက်လတိုင်တိုင် ဒေ ကမ္ဘာမာ မိုးမကျဘိုင်းန နီလီရေ။ 18ယင်းနောက် သူစာ မိုးကျလတ်အောင် အရာတစ်ပြန် ထာဝရဘုရားဘားမာ ဆုတောင်းလီရေ။ ယင်းခါ ဂေါင်းခင်က မိုးကျလီရေ အရာ မြေပြင်မာ အပင်တိ ပေါက်ရို့ အသီးဖလံ သီးလီရေ။ 19ငါ့ ညီအစ်ကိုမောင်နမှရို့၊ ကိုင်လိုက်ဖိ၊ နင်ရို့အထဲက လူတစ်ယောက် မှန်ကန်ခြင်းတရား၏ လမ်းကို စွန့်ရို့ လားခလီရေ။ အရာ အခြားတစ်ယောက် ယင်းသူကို ပြန်ယူခလီရေ။ 20နင်ရို့ မှတ်ထားကတ်၊ ထိုလူစာ အပြစ်သေတစ်ယောက်ကို ထာဝရသီခြင်းက ကယ်ဆယ်ရေ အရာ ထိုအပြစ်သေမာ ဟိသမျ အပြစ်ကို ဖုံးထားရေ။
Copyright information for
RmzSC