John 11

လာဇရု ရောဂါ ဖြစ်ရို့ သီခြင်း

1ဗေသနိရွာမာ လာဇရုနာမည်န လူတစ်ယောက် ရောဂါဖြစ်ရို့ ဟိလီရေ။ လာဇရုမာ မာရိန မာသ ခေါ်စာ နမှ နှစ်ယောက်လည်း ယင်းရွာမာ နီထိုင်ရို့ ဟိကတ်လီရေ။ 2ထိုမာရိစာ အသျှင်ယေရှု အခြီမာ ရီမွှီးဆီ သွန်ရို့ ကိုယ့်ဆံပင်န ပွတ်လီစာ မာရိ ဖြစ်တေ။ ဒေ လာဇရုစာ ထိုမာရိမာ မောင်သျှေ ဖြစ်တေ။ 3လာဇရုမာ နမှရို့စာ ယေရှုတို့ လူရွှတ်လိုက်ရို့၊ “အသျှင်၊ ကိုယ်တော်မာ ချစ်ခင်စာ မိတ်ဆွေ လာဇရု ရောဂါ ဖြစ်နီပါရေ” ဟို့ ပြောလီရေ။ 4ယေရှု ထိုစကားကို ကြားရေခါ ပြောလီရေ၊ “ဒေ ရောဂါဖြစ်ရို့ ယင်းသူ မသီ၊ ယေကေလည်း ဒေ ရောဂါစာ ထာဝရဘုရားကို ဘုန်းတန်ခိုး ခံရစီလိမည်။ ယင်းသူ ရောဂါ ဖြစ်ခြင်းကနီရို့ ထာဝရဘုရား၏ သားတော်စာ ဘုန်းတန်ခိုးကို ခံရလိမည်။”

5ယေရှုစာ မာသ၊ မာရိ အရာ လာဇရု သူရို့ မောင်နမှ သုံးယောက်ကို ကောင်းကောင်း ချစ်လီရေ။ 6ယေကေလည်း လာဇရု ရောဂါဖြစ်စာ သတင်းကို ကြားရေခါ ယေရှု မကြွဘိုင်းန ကိုယ်နီစာရွာမာ အရာလည်း နှစ်ရက်နီလီရေ။ 7ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “လား၊ ငါရို့ အရာတစ်ပြန် ယုဒပြည်နယ်တို့ လားကတ်မည်။” 8ယေကေလည်း တပည့်ရို့စာ ယေရှုကို ပြောကတ်လီရေ၊ “အသျှင်၊ အယင်တစ်ခေါက်ခါ ထိုပြည်နယ်က ယုဒလူမျိုးရို့ ကိုယ်တော်ကို ကျောက်ခဲ ဘိုက်ရို့ အသီသတ်ဖို့ ကြည့်ကတ်လီရေ မဟုတ်ပါလော? ယင်းပိုင်ဆိုကေ ကိုယ်တော် အရာတစ်ပြန် ဇာဖို့ ထိုပြည်နယ်တို့ ကြွချင်ပါစာလည်း?” 9ယင်းခါ ယေရှုစာ သူရို့ကို ပြောလီရေ၊ “တစ်ရက်မာ တစ်ဆယ့်နှစ်နာရီ ဟိရေ မဟုတ်လော? နိခင်းမာ လမ်းသျှောက်သူရို့စာ လောက၏ အလင်းရောင်ကို မြင်ရေအတွက်န ခလုံးမခတ်ကတ်။ 10ယေကေလည်း ညဉ့်မာ လမ်းသျှောက်သူရို့စာ ခလုံးခတ်ရို့ လဲကျနိုင်ရေ၊ အကြောင်းကား သူရို့အထဲမာ အလင်းရောင် မဟိ။”

11ထိုစကားတိကို ပြောပြီးရေနောက် ယေရှုစာ ကိုယ့်တပည့်ရို့ကို ပြောလီရေ၊ “ငါရို့မာ မိတ်ဆွေ လာဇရု အိပ်ရို့ ဟိရေ။ ငါ ယင်းသူကို နှိုးဖို့ လားဖို့။” 12ယင်းခါ တပည့်ရို့စာ ယေရှုကို ပြောကတ်လီရေ၊ “အသျှင်၊ ယင်းသူ အိပ်နီရေဆိုကေ ယင်းသူ့မာ ရောဂါ ကောင်းပါလိမည်။”

13ယေရှုစာ လာဇရု သီစာ အကြောင်းကို ပြောလီစာ ဖြစ်တေ၊ ယေကေလည်း တပည့်ရို့စာ လာဇရု ပကတိ အိပ်နီစာကို ပြောစာ ဟို့ ထင်ကတ်လီရေ။ 14ယင်းခါ ယေရှုစာ တပည့်ရို့ကို ပပွင့်လလင်း ပြောလီရေ၊ “လာဇရု သီလားခဗျာ။ 15ငါ လာဇရုနအတူ မဟိလီရေအတွက်န နင်ရို့အတွက် ငါ ပျော်ရေ၊ အကြောင်းကား ဒေဂု နင်ရို့ ငါ့ကို ကျုံဖို့ အခွင့်ရေး ရကတ်လိမည်။”

16ယင်းခါ သောမစာ အခြားတပည့်ရို့ကို ပြောလီရေ၊ “လား၊ ငါရို့လည်း အသျှင်နအတူ အသီခံဖို့ လားကတ်မည်။” ယင်းသောမကို အမြွှာပူးလည်း ခေါ်ကတ်တေ။

ပြန်ရှင်ထမြောင့်ခြင်းန အသက်ရှင်ခြင်း

17ယင်းနောက် ယေရှုစာ ဗေသနိရွာနားတို့ ရောက်လီရေ။ ယင်းခါ လာဇရု လေးရက်ပတ်လုံး သင်္ချိုင်းဂူခေါင်းမာ ဟိနီဗျာဆိုစာကို သူစာ သိရလီရေ။ 18ဗေသနိရွာစာ ယေရုရှလင်မြို့ကနီရို့ နှစ်မိုင်လှောက် အဝီး ဟိလီရေ။ 19မာသန မာရိမာ မောင်သေလာဇရု သီလားခရေအတွက်န ယုဒလူရို့စာ သူရို့ ညီအစ်မ နှစ်ယောက်ကို စိတ်ဖျော်ဖို့ လာကတ်လီရေ။ 20ယင်းခါ မာသစာ ယေရှု ကြွလာစာ သတင်းကို ကြားရို့ ယေရှုန အတွိခံဖို့ လားခလီရေ၊ ယေကေလည်း မာရိစာ အိမ်မာ နီလိုက်လီရေ။ 21မာသစာ ယေရှုနိုင်ဗြင်းတို့ ရောက်တေခါ ယေရှုကို ပြောလီရေ၊ “အသျှင်၊ ကိုယ်တော် ဒေမာ ဟိလီဖို့ဆိုကေ အကျွန့် မောင်သျှေ သီလီဖို့ မဟုတ်ပါ။ 22အကျွန် သိပါရေ၊ ဒေဂုလည်း ကိုယ်တော် ထာဝရဘုရားက တောင်းစာ အားကုံးကို ထာဝရဘုရား ကိုယ်တော်ကို ပီးပါဖို့။” 23ယေရှုစာ မာသကို ပြောလီရေ၊ “နင့် မောင်သျှေ ပြန်ရို့ ရှင်လိမည်။”

24ယင်းခါ မာသစာ ယေရှုကို ပြောလီရေ၊ “ဟုတ်ပါရေ၊ ကမ္ဘာကုန်ဆုံးရေနိမာ သီသူရို့ ပြန်ရှင်ထမြောင့်ကတ်တေခါ အကျွန့် မောင်သျှေလည်းသောက် ပြန်ရှင်ထမြောင့်ဖို့ဆိုစာကို အကျွန် သိပါရေ။” 25ယေရှုစာ မာသကို ပြောလီရေ၊ “ငါ ကိုယ်တိုင် ပြန်ရှင်ထမြောင့်ဖို့သူ ဖြစ်တေ အရာ အခြားလူကို အသက် ပီးဖို့သူလည်း ဖြစ်တေ။ ယင်းအတွက်န ငါ့ကို ကျုံသူစာ သီလားခကေလည်း ပြန်ရှင်လိမည်။ 26အရာ ငါ့ကို ကျုံရို့ အရှင်ဟိသူစာ တစ်ခါလည်း သီလိမည် မဟုတ်။ နင် ငါ့ စကားကို ကျုံရေလော?” 27ယင်းခါ မာသစာ ယေရှုကို ပြောလီရေ၊ “ဟုတ်ပါရေ အသျှင်! အကျွန် ကျုံပါရေ။ ကိုယ်တော် အမှန် ဒေ လောကတို့ ကြွလာဖို့ စကားဟိစာ ခရစ်တော် ဖြစ်ပါရေ အရာ ကိုယ်တော် ထာဝရဘုရား၏ သားတော်လည်း ဖြစ်ပါရေ။”

ယေရှု မျက်ရည်ကျခြင်း

28မာသစာ ထိုစကားကို ပြောပြီးရေနောက် ကိုယ့်မာ ညီမ မာရိတို့ လားရို့ တတိုးသျှေ ပြောလီရေ၊ “အသျှင် ဒေမာ ရောက်နီရေ၊ သူစာ နင့်ကို ခေါ်လိုက်တေ။” 29ထိုစကားကို ကြားရေခါ မာရိစာ အပြင်းထပြီးကေ ယေရှုတို့ လားခလီရေ။ 30ယင်းခါ ယေရှုစာ ရွာအထဲတို့ မဝင်လီသိ၊ မာသန အတွိခံလီစာ နေရာမာ ဟိလီရေ။ 31ယုဒလူရို့စာ မာရိကို စိတ်ဖျော်ရို့ မာရိနအတူ သူ့အိမ်မာ နီကတ်လီရေ။ သူရို့စာ မာရိ အပြင်းထရို့ ပြင်တို့ ထွက်လားခစာကို မြင်ရေခါ သင်္ချိုင်းတို့ ငိုဖို့ ထွက်လားခစာ ဟို့ ထင်ကတ်လီရေ။ ယင်းအတွက်န သူရို့စာ မာရိ နောက်က နောက်က လိုက်ကတ်လီရေ။

32မာရိစာ ယေရှု ဟိစာ နေရာတို့ ရောက်လီရေ။ ယင်းခါ မာရိစာ ယေရှုကို မြင်ရို့ ယေရှုအခြီရင်းမာ အပြားဝပ်ပြီးကေ ပြောလီရေ၊ “အသျှင်၊ ကိုယ်တော် ဒေမာ ဟိလီဖို့ဆိုကေ အကျွန့် မောင်သျှေ သီလီဖို့ မဟုတ်ပါ။”

33မာရိန ယုဒလူရို့ ငိုကတ်စာကို မြင်ရေခါ ယေရှုစာ ကောင်းကောင်း ဝမ်းနည်းရို့ စိတ်ပူပင်လီရေ။ 34ယေရှုစာ သူရို့ကို မီးလီရေ၊ “နင်ရို့ လာဇရု အကောင်ကို ဇာမာ ထားကတ်တေလည်း?” ယင်းခါ သူရို့စာ ပြောကတ်လီရေ၊ “အသျှင်၊ လာရို့ ကြည့်ခလိုက်ပါ။” 35ယင်းခါ ယေရှုစာ မျက်ရည်ကျလီရေ။ 36ယင်းခါ ယုဒလူရို့စာ ပြောကတ်လီရေ၊ “ကြည့်ကတ်၊ ထိုလူ လာဇရုကို ဇာလှောက် ချစ်တေလည်း။”

37ယေကေလည်း သူရို့အထဲက တစ်ချိုးလူရို့စာ ပြောကတ်လီရေ၊ “သူကား မျက်စိကန်းသူကို အကောင်း လုပ်ဖို့နိုင်လီရေ။ ယင်းပိုင်ဆိုကေ လာဇရုကို မသီရအောင် လုပ်ဖို့ မနိုင်လီလော?”

သီလားခသူ လာဇရု ပြန်ရှင်ခြင်း

38ယင်းခါ ယေရှုစာ အရာပြန်ရို့ ကောင်းကောင်း စိတ်ပူပင်ရို့ သင်္ချိုင်းဂူခေါင်းအနားတို့ ကြွလီရေ။ ထိုသင်္ချိုင်းဂူခေါင်းစာ တောင်ကို ထွင်းရို့ထားစာ ဂူခေါင်းတစ်ခေါင်း ဖြစ်တေ။ ထိုသင်္ချိုင်းဂူခေါင်းအဝမာ ကျောက်လုံးကြီး တစ်လုံး ပိတ်ထားကတ်လီရေ။ 39ယေရှုစာ ပြောလီရေ၊ “ဒေ ကျောက်လုံးကို ရွှိဘိုက်လိုက်ကတ်။” ယင်းခါ သီလားခသူမာ နမှ မာသစာ ယေရှုကို ပြောလီရေ၊ “အသျှင်၊ အကျွန့် မောင်သျှေ သီလားခစာ လေးရက် ဖြစ်နီပါဗျာ။ ဒေဂုကား ကောင်းကောင်း ပုတ်စိုနံပါဖို့ဗျာ။”

40ယင်းခါ ယေရှုစာ မာသကို ပြောလီရေ၊ “နင် ကျုံရေဆိုကေ ထာဝရဘုရား၏ ဘုန်းတန်ခိုးကို မြင်ရလိမည် ဟို့ ငါ နင့်ကို ပြောလီရေ မဟုတ်လော?” 41ယင်းခါ လူရို့စာ ကျောက်လုံးကြီးကို ရွှိဘိုက်လိုက်ကတ်လီရေ။ ယင်းခါ ယေရှုစာ အထက်တို့ မော်ကြည့်ရို့ ပြောလီရေ၊ “အိုး အဖ၊ ကိုယ်တော် အကျွန့်စကားကို နားထောင်ရေအတွက်န အကျွန် ကိုယ်တော်ကို ကျေးဇူးတင်ပါရေ။ 42ကိုယ်တော် အမြဲတိုင်း အကျွန့်စကားကို နားထောင်ရေဆိုစာကို အကျွန် သိပါရေ၊ ယေကေလည်း အကျွန့် လေးဖက်လက်စိမာ ရပ်ရို့ ဟိကတ်သူရို့ အကျွန့်ကို ကိုယ်တော် ရွှတ်လိုက်တေဆိုစာကို ကျုံကတ်ပတ်စီအတွက်န အကျွန် ဒေ စကားတိကို ပြောစာ ဖြစ်ပါရေ။” 43ထိုစကားကို ပြောပြီးရေနောက် ယေရှုစာ အားန အော်ရို့ ခေါ်ထုတ်လီရေ၊ “လာဇရု ထွက်လာလတ်။” 44သီလားခသူ လာဇရုစာ သင်္ချိုင်းဂူခေါင်းက ထွက်လာလီရေ။ ယင်းခါ သူ့အခြီန အလက်မာ အဝတ်ရိုက်ရို့ ဟိလီရေ အရာ သူ့မျက်နှာမာလည်း ပဝါပိုင်း ချိုင်ရို့ ဟိလီရေ။ ယင်းအတွက်န ယေရှုစာ လူရို့ကို ပြောလီရေ၊ “ယင်းသူကို ဖြီရို့ ရွှတ်လိုက်ကတ်။”

ယေရှုကို အသီသတ်ဖို့ ကြံခြင်း

(မဿဲ ၂၆:၁-၅၊ မာကု ၁၄:၁-၂၊ လုကာ ၂၂:၁-၂)

45ယင်းခါ မာရိတို့ လာလီကတ်စာ ယုဒလူရို့အထဲက များကာလူရို့ ယေရှုလုပ်စာ အံ့ဩဖွယ်အလုပ်ကို မြင်ရို့ ယေရှုကို ကျုံကတ်လီရေ။ 46ယေကေလည်း သူရို့အထဲက တစ်ချိုးလူရို့စာ ဖာရိရှဲအဖွဲ့သားရို့တို့ လားရို့ ယေရှုလုပ်စာ အံ့ဩဖွယ်အလုပ် အကြောင်းကို ပြောပြကတ်လီရေ။ 47ယင်းခါ ယဇ်ပုရောဟိတ်အကြီးရို့န ဖာရိရှဲအဖွဲ့သားရို့စာ မဟာတိုင်ဘင်အဖွဲ့သားရို့ကို ခေါ်ရို့ တစ်စုတည်း စုကတ်လီရေ။ ယင်းနောက် သူရို့စာ ပြောကတ်လီရေ၊ “ငါရို့ ဒေဂု ဇာလုပ်ဖို့လည်း? ထိုလူကား အများကြီး အံ့ဩဖွယ်အလုပ်ကို လုပ်ဘိုက်လိုက်ပျာ။ 48ငါရို့ သူ့ကို ဒေပိုင် ဆက်ရို့ လုပ်ဖို့အခွင့်ရေး ပီးထားရေဆိုကေ လူရို့ အားကုံးသူ ယင်းသူကို ကျုံလာကတ်ဖို့။ အရာ ရောမအစိုးရ လာရို့ ငါရို့ ဝိပဿနာကျောင်းန ငါရို့ လူမျိုးကို ဖျက်စီးဘိုက်လိုက်ဖို့။”

49ယေကေလည်း သူရို့အထဲမာ ကာယာဖနာမည်န လူတစ်ယောက် ဟိလီရေ။ သူစာ ယင်းနှစ်ခါ မဟာယဇ်ပုရောဟိတ် တာဝန်ကို ရလီရေ။ 50ကာယာဖစာ သူရို့ကို ပြောလီရေ၊ “နင်ရို့ တစ်ခုလည်း မသိကတ်။ ယုဒလူမျိုး တစ်မျိုးလုံး ပျက်စီးလားဖို့စာထက်ပင် တစ်မျိုးသားလုံး တက်စား လူတစ်ယောက် အသီခံစာ ကောင်းကောင်း ကောင်းဖို့သိဆိုစာကိုလည်း နင်ရို့ မစဉ်စားကတ်။”

51ယုဒလူမျိုးရို့အတွက် ယေရှု အသီခံဖို့စာ အကြောင်းကို ထာဝရဘုရားစာ ကာယာဖကနီရို့ နောက်အနာဂါတ်စကား ပြောလီရေ၊ အကြောင်းကား ကာယာဖစာ ယင်းနှစ်အတွက်မာ မဟာယဇ်ပုရောဟိတ် တာဝန်ကို ရလီရေ။ 52ယေကေလည်း ယေရှု သက်သက် ယုဒလူမျိုးရို့အတွက် အသီခံဖို့စာ မဟုတ်သိ၊ ကမ္ဘာ လေးဖက်လက်စိမာ ကွဲကြင်းရို့ ဟိကတ်စာ ထာဝရဘုရား၏ သားသမီးရို့ကို တစ်စုတည်းစုဖို့အတွက်လည်း ယေရှု အသီခံဖို့ဆိုစာ အကြောင်းကို ကာယာဖ ပြောလီစာ ဖြစ်တေ။

53ယင်းနိကပင်စရို့ ဂေါင်းဆောင်ရို့စာ ယေရှုကို အသီသတ်ဖို့ ကြံကတ်လီရေ။ 54ယင်းအတွက်န ယေရှုစာ ယုဒလူရို့အထဲမာ လူသိလူမြင် အလားအလာ မလုပ်ဘိုင်းန နီလီရေ။ ယင်းနောက် ယေရှုစာ ယင်း နေရာက ထွက်ရို့ သဲကန္တာရတောနားမာ ဧဖရိမ်နာမည်န မြို့တစ်မြို့တို့ ကြွလီရေ။ သူစာ ထိုမြို့မာ ကိုယ့်တပည့်ရို့နအတူ နီလီရေ။

55ယင်းခါ ယုဒလူမျိုးရို့မာ လွတ်မြောင့်ခြင်းပွဲ ပါးလာလီရေ။ ယင်းအတွက်န အမျိုးမျိုးနေရာက ယုဒလူရို့စာ ကိုယ့်ကို သန့်စင်အောင် လုပ်ဖို့အတွက် လွတ်မြောင့်ခြင်းပွဲ မကျခင်အယင်က ယေရုရှလင်မြို့တို့ လာကတ်လီရေ။ 56ထိုလူရို့စာ ယေရှုကို ဝိပဿနာကျောင်းမာ ရှာကတ်လီရေ။ ယင်းခါ သူရို့စာ ဝိပဿနာကျောင်းမာ ရပ်ရို့ တစ်ယောက်ကို တစ်ယောက် မီးကတ်လီရေ၊ “ထိုလူ အမှန် ဒေပွဲတို့ မလာလော? ကိုယ်ဘင်ရို့ ဇာပိုင် မှတ်ကတ်ပါရေလည်း?”

57ယဇ်ပုရောဟိတ်အကြီးရို့န ဖာရိရှဲအဖွဲ့သားရို့စာ ယေရှုကို ဖမ်းဖို့အတွက်၊ “အသူမဆို ယေရှု နီစာနေရာကို သိရေဆိုကေ ငါရို့တို့ သတင်းပီးရဖို့” ဆိုပြီးကေ လူရို့ကို အာဏာချကတ်လီရေ။