John 13

တပည့်ရို့ အခြီကို ဆီးခြင်း

1ယုဒလူမျိုးရို့မာ လွတ်မြောင့်ခြင်းပွဲ မကျခင်အယင်က ကိုယ် ဒေ လောကက ထွက်ရို့ အဖတို့ ကြွဖို့စာအချိန် ရောက်နီဗျာဆိုစာကို ယေရှုစာ သိလီရေ။ သူစာ ဒေ လောကမာ ဟိကတ်စာ ကိုယ့်လူရို့ကို ကောင်းကောင်း ချစ်လီရေ အရာ သူရို့ကို အဆုံးတိုင်အောင် ချစ်လီရေ။ 2ယေရှုန တပည့်ရို့စာ ညဉ့်မာ စားသောက်နီကတ်လီရေ။ ယင်းအယင်က မာရ်နတ်စာ ယေရှုကို ဖမ်းရို့ ရန်သူရို့အလက်မာ ဇာပိုင် အပ်ပီးရဖို့လည်းဆိုစာကို ရှိမုန်ရှကာရုတ်မာသား ယုဒရှကာရုတ် စိတ်နှလုံးကို နှိုးဆော်ပီးလီရေ။ 3ယေရှုစာ ထာဝရဘုရားက ကိုယ့်ကို ဟိသမျ တန်ခိုးအာဏာကို အပ်ပြီးဗျာဆိုစာကို သိလီရေ။ အရာ သူစာ ထာဝရဘုရားက ကြွလာရို့ ထာဝရဘုရားတို့ ပြန်ရို့ ကြွဖို့ဗျာဆိုစာကိုလည်း သိလီရေ။ 4ယင်းအတွက်န သူစာ စားပွဲက ထရို့ အင်္ကျီကို ချွတ်လီရေ အရာ ကိုယ်သုတ် တစ်ပိုင်းကို ကိုယ့် ခါးမာ ချိုင်လီရေ။ 5ယင်းနောက် ယေရှုစာ အင်တုံမာ ရီထည့်ပြီးကေ ကိုယ့်တပည့်ရို့ အခြီကို ဆီးဖို့ စလီရေ။ အရာ သူစာ ဆီးပြီးရေခါ ကိုယ့် ခါးမာ ချိုင်ရို့ထားစာ ကိုယ်သုတ်န သူရို့ အခြီကို ပွတ်လီရေ။

6ယင်းပိုင် တစ်ယောက်ပြီးကေ တစ်ယောက် ဆီးရို့ လားရေခါ ယေရှုစာ ပေတရုနိုင်ဗြင်းတို့ ရောက်လီရေ။ ယင်းခါ ပေတရုစာ ယေရှုကို မီးလီရေ၊ “အသျှင်၊ ကိုယ်တော် အကျွန့်အခြီကိုလည်း ဆီးပါဖို့စာလော?” 7ယေရှုစာ သူ့ကို ပြောလီရေ၊ “ငါ ဇာလုပ်တေလည်းဆိုစာကို နင် ဒေဂု နားမလည်သိ၊ နောက်က နားလည်လာလိမည်။”

8ပေတရုစာ ပြောလီရေ၊ “ကိုယ်တော် အကျွန့်အခြီကို အသျှင်းလည်း မဆီးပါကေ့။” ယင်းခါ ယေရှုစာ ပြောလီရေ၊ “ငါ နင့်အခြီကို မဆီးဆိုကေ နင် ငါ့တပည့် မဟုတ်။”

9ယင်းခါ ပေတရုစာ သူ့ကို ပြောလီရေ၊ “အသျှင်၊ ယင်းပိုင်ဆိုကေ သက်သက် အကျွန့်အခြီကို မဟုတ်ပါသိ၊ အကျွန့်အလက်န အဂေါင်းကိုလည်း ဆီးပါ။” 10ယေရှုစာ ပြောလီရေ၊ “ရီချိုးပြီးသူစာ ခန္ဓာတစ်ကိုယ်လုံး စင်ကြယ်လားခဗျာ။ ယင်းအတွက်န ယင်းသူမာ အခြီကိုပယ်ရို့ အခြားတစ်ခုကိုလည်း ဆီးဖို့ မလိုဗျာ။ ဟုတ်တေ၊ နင်ရို့ စင်ကြယ်ကတ်တေ၊ ယေကေလည်း အားကုံးသူ စင်ကြယ်စာ မဟုတ်။” 11ကိုယ့်ကို အသူ ရန်သူရို့အလက်မာ အပ်ပီးဖို့လည်းဆိုစာကို ယေရှု သိရေ။ ယင်းအတွက်န သူစာ၊ “ယေကေလည်း အားကုံးသူ စင်ကြယ်စာ မဟုတ်” ဟို့ ပြောလီစာ ဖြစ်တေ။

12ယေရှုစာ ကိုယ့်တပည့်ရို့ အခြီကို ဆီးပြီးရေနောက် အင်္ကျီကို ဝတ်ပြီးကေ ပြန်ရို့ စားပွဲမာ ထိုင်လီရေ။ ယင်းနောက် သူစာ တပည့်ရို့ကို ပြောလီရေ၊ “နင်ရို့အတွက် ငါ ဇာလုပ်တေလည်းဆိုစာကို နင်ရို့ နားလည်ကတ်တေလော? 13နင်ရို့ ငါ့ကို ဆရာလည်း ခေါ်ကတ်တေ အရာ အသျှင်လည်း ခေါ်ကတ်တေ။ နင်ရို့ ငါ့ကို ဆရာန အသျှင် ခေါ်ကတ်စာ မှန်ရေ၊ အကြောင်းကား ငါစာ အမှန် နင်ရို့မာ ဆရာန အသျှင် ဖြစ်တေ။ 14ငါစာ အသျှင်န ဆရာ ဖြစ်ရို့ပင်လည်း နင်ရို့ အခြီကို ဆီးလီရေ။ ယင်းပိုင်ဆိုကေ နင်ရို့လည်း တစ်ယောက် အခြီကို တစ်ယောက် ဆီးဖို့သင့်ရေ။ 15ငါ နင်ရို့ဘားမာ ပုံဥပမာတစ်ခု တင်ပြလီရေ၊ အကြောင်းကား ငါ နင်ရို့ကို လုပ်ပြရေပိုင်တထန် နင်ရို့လည်း လုပ်ကတ်ပတ်စီအတွက် ဖြစ်တေ။ 16ငါ နင်ရို့ကို အမှန် ပြောရေ၊ အပိုင်သျှင်ထက် ကျွန် မကြီး။ တမန်တော်စာ သူ့ကို ရွှတ်လိုက်သူထက် မကြီး။ 17နင်ရို့ ဒေဂု ဒေ အကြောင်းအရာတိကို သိကတ်တေ။ နင်ရို့ သိကတ်စာပိုင်တထန် လိုက်နာကတ်တေဆိုကေ ထာဝရဘုရား နင်ရို့ကို ပဿိ ပီးလိမည်။

18“ငါ နင်ရို့ အားကုံးသူကို ရွယ်မှတ်ရို့ ပြောစာ မဟုတ်။ ငါ ရွီးကောက်ထားသူရို့ကို ငါ သိရေ၊ ယေကေလည်း ကျမ်းစာမာ ရွီးရို့ဟိစာ စကား ပြည့်စုံရဖို့။ ကျမ်းစာမာ ရွီးရို့ ဟိရေ၊ ‘ငါနအတူ ထိုင်ရို့ စားသောက်သူစာ ငါ့ကို ဆန့်ကျင်ဖက် လုပ်လီရေ။’ 19အားကုံးစာ ဖြစ်ပျက်လာရေခါ ငါစာ ထာဝရဘုရား ဂတိပီးထားစာ မင်း ဖြစ်တေဆိုစာကို နင်ရို့ ကျုံကတ်ပတ်စီအတွက်န မဖြစ်ပျက်ခင်အယင်က ငါ နင်ရို့ကို ပြောထားလိုက်ယ။ 20ငါ နင်ရို့ကို အမှန် ပြောရေ၊ ငါရွှတ်လိုက်သူကို လက်ခံသူစာ ငါ့ကို လက်ခံရေ။ အရာ ငါ့ကို လက်ခံသူစာ ငါ့ကို ရွှတ်လိုက်သူကို လက်ခံရေ။”

အဆုံးခေါက် လွတ်မြောင့်ခြင်းပွဲ စားခြင်း

(မဿဲ ၂၆:၂၀-၂၅၊ မာကု ၁၄:၁၇-၂၁၊ လုကာ ၂၂:၂၁-၂၃)

21ထိုစကားတိကို ပြောပြီးရေနောက် ယေရှုစာ စိတ်ဒုက္ခ ရောက်လီရေ။ ယင်းအတွက်န သူစာ ပပွင့်လလင်း ပြောလီရေ၊ “ငါ နင်ရို့ကို အမှန် ပြောရေ၊ နင်ရို့အထဲက တစ်ယောက် ငါ့ကို ရန်သူရို့အလက်မာ ဖမ်းပီးလိမည်။”

22အသျှင်ယေရှု အသူ့အကြောင်းကို ပြောရေလည်းဆိုစာကို တပည့်ရို့ နားမလည်ကတ်လီ။ ယင်းအတွက်န သူရို့စာ တစ်ယောက် မျက်နှာကို တစ်ယောက် ကြည့်ရို့ နီကတ်လီရေ။ 23ယင်းခါ တပည့်ရို့အထဲမာ အသျှင်ယေရှု ချစ်စာ တပည့် တစ်ယောက် ဟိလီရေ။ သူစာ အသျှင်ယေရှုဘားမာ နှီရို့ ဟိလီရေ။ 24ပေတရုစာ ယင်းတပည့်ကို မျက်ရိပ် ပြရို့ ပြောလီရေ၊ “အသျှင် အသူ့အကြောင်းကို ပြောစာလည်း တစ်ခေါက် မီးကြည့်လိုက်။”

25ယင်းခါ သူစာ အသျှင်ယေရှု နားမာ ဟတ်ရို့ မီးလီရေ၊ “အသျှင်၊ ယင်းသူ အသူပါလည်း?”

26ယေရှုစာ ပြောလီရေ၊ “ငါ ဒေ ပေါင်မုန့်တစ်ဖဲ့ကို ခွက်မာ နှစ်ရို့ အသူ့ကို ပီးဖို့လည်း ယင်းသူစာ ငါ့ကို ရန်သူရို့အလက်မာ အပ်ပီးဖို့သူ ဖြစ်တေ။” ယင်းနောက် ယေရှုစာ ပေါင်မုန့်တစ်ဖဲ့ကို ခွက်မာ နှစ်ရို့ ရှိမုန်ရှကာရုတ်မာသား ယုဒရှကာရုတ်ကို ပီးလီရေ။

27ယုဒရှကာရုတ် ပေါင်မုန့်တစ်ဖဲ့ ယူရေချက်ချင်း သူ့ဘားမာ မာရ်နတ် ဝင်လီရေ။ ယင်းနောက် ယေရှုစာ ယုဒရှကာရုတ်ကို ပြောလီရေ၊ “နင် လုပ်ဖို့စာ အလုပ်ကို အယင်လုပ်။”

28ယုဒရှကာရုတ်ကို အသျှင်ယေရှု ဇာဖို့ ပြောရေလည်းဆိုစာကို စားပွဲမာ ထိုင်ရို့ စားသောက်နီသူရို့အထဲက တစ်ယောက်လည်း နားမလည်ကတ်လီ။ 29ယုဒရှကာရုတ်စာ တန်းကားအိပ် ကိုင်သူတစ်ယောက် ဟိလီရေ။ ယင်းအတွက်န တစ်ချိုးတပည့်ရို့စာ လွတ်မြောင့်ခြင်းပွဲအတွက်မာ လိုအပ်စာ ဝတ်ထုဝန်ဆန်တိကို ဝယ်ဖို့အတွက်၊ မဟုတ်ကေ ဆင်းရဲသားရို့ကို တန်းကားဖွေသျှာ အလှူပီးဖို့အတွက် အသျှင်ယေရှု ယုဒရှကာရုတ်ကို ပြောရို့ ရွှတ်လိုက်စာ ဟို့ ထင်ကတ်လီရေ။ 30ယုဒရှကာရုတ်စာ ပေါင်မုန့်တစ်ဖဲ့ကို ယူရေချက်ချင်း ပြင်တို့ ထွက်လားခလီရေ။ ယင်းခါ ညဉ့်မိုက်လားခဗျာ။

တပည့်ရို့အတွက် ပညှတ်ချက် အသစ်

31ယုဒရှကာရုတ် ပြင်တို့ ထွက်လားခပြီးရေနောက် ယေရှုစာ ပြောလီရေ၊ “ဒေဂု မနုသသားတော်၏ ဘုန်းတန်ခိုး ပေါ်ထွန်းဗျာဆိုစာကို လူရို့ မြင်ရကတ်ပျာ။ အရာ မနုသသားတော်ကနီရို့ ထာဝရဘုရား၏ ဘုန်းတန်ခိုး ပေါ်ထွန်းဗျာဆိုစာကိုလည်း လူရို့ မြင်ရကတ်ပျာ။ 32ထာဝရဘုရား၏ ဘုန်းတန်ခိုး မနုသသားတော်ကနီရို့ ပေါ်ထွန်းရေဆိုကေ ထာဝရဘုရားလည်း မနုသသားတော်ကို ကိုယ့်ဘုန်းတန်ခိုးန ပြည့်စုံအောင် လုပ်လိမည်။ ထာဝရဘုရား ယင်းသျှင့်ကို အယင်အမြန် လုပ်လိမည်။”

33“ငါ့ အချစ်သားရို့၊ ငါ နင်ရို့နအတူ အရာတစ်နားသျှေ နီဖို့စာဗျာ။ နင်ရို့ ငါ့ကို ရှာကတ်လိမည်၊ ယေကေလည်း ငါ ယုဒဂေါင်းဆောင်ရို့ကို ပြောစာပိုင် ဒေဂု ငါ နင်ရို့ကိုလည်း ပြောရေ၊ နင်ရို့ ငါ လားစာနေရာတို့ လာနိုင်ကတ်ဖို့ မဟုတ်။ 34ငါ နင်ရို့ကို ပညှတ်ချက် အသစ်တစ်ခု ပီးရေ၊ နင်ရို့ တစ်ယောက်ကို တစ်ယောက် ချစ်ကတ်။ ငါ နင်ရို့ကို ချစ်ရို့လာစာပိုင် နင်ရို့လည်း တစ်ယောက်ကို တစ်ယောက် ချစ်ကတ်။ 35နင်ရို့ တစ်ယောက်ကို တစ်ယောက် ချစ်တေဆိုကေ အခြားလူရို့ အားကုံးသူ နင်ရို့ကို ငါ့တပည့် ဖြစ်တေဆိုစာကို သိရကတ်လိမည်။”

ပေတရု ငြင်းဖို့စာ အကြောင်း

(မဿဲ ၂၆:၃၁-၃၅၊ မာကု ၁၄:၂၇-၃၁၊ လုကာ ၂၂:၃၁-၃၄)

36ပေတရုစာ ယေရှုကို မီးလီရေ၊ “အသျှင်၊ ကိုယ်တော် ဇာတို့ ကြွပါဖို့လည်း?” ယေရှုစာ ပေတရုကို အဖြေပီးလီရေ၊ “ဒေဂု ငါလားစာ နေရာတို့ နင် လိုက်နိုင်ဖို့ မဟုတ်၊ နောက်က လိုက်နိုင်လိမည်။”

37ပေတရုစာ သူ့ကို ပြောလီရေ၊ “အသျှင်၊ အကျွန် ဇာဖို့ ဒေဂု ကိုယ်တော်နအတူ မလိုက်နိုင်ပါစာလည်း? ကိုယ်တော်အတွက် အကျွန့်အသက်ကို တိုင်အောင်ပင် ပီးနိုင်ပါရေ။” 38ယင်းခါ ယေရှုစာ ပေတရုကို ပြောလီရေ၊ “နင် အမှန် ငါ့အတွက် နင့်အသက်ကို စွန့်နိုင်ဖို့စာလော? ငါ နင့်ကို အမှန် ပြောရေ၊ ကြက်မတွန်ခင်အယင်က နင် ငါ့ကို မသိ ဟို့ သုံးခေါက်တိုင်အောင် ငြင်းလိမည်။”