John 14

ယေရှုရာ အဖတို့ လားဖို့စာလမ်း ဖြစ်တေ

1ယေရှုစာ တပည့်ရို့ကို ပြောလီရေ၊ “နင်ရို့ စိတ်မပူကတ်ကေ့။ ထာဝရဘုရားကို ကျုံကတ် အရာ ငါ့ကိုလည်း ကျုံကတ်။ 2ငါ့အဖအိမ်မာ နီဖို့စာနေရာ အများကြီး ဟိရေ။ ယင်းပိုင် မဟိဆိုကေ ငါ နင်ရို့ကို ပြောဖို့ မဟုတ်။ ငါ နင်ရို့အတွက် နေရာ အဆင်သင့်လုပ်ဖို့ လားဖို့။ 3ငါ လားရို့ နင်ရို့အတွက် နေရာ အဆင်သင့် လုပ်ရို့ပြီးရေခါ ငါ အရာပြန်ရို့ လာဖို့။ အရာ နင်ရို့လည်း ငါနီစာ နေရာမာ နီဖို့ရလတ်အောင် နင်ရို့ကို ငါ့တို့ ခေါ်ယူလားဖို့။ 4ငါ လားဖို့စာလမ်းကိုကား နင်ရို့ သိကတ်တေ။”

5သောမစာ ယေရှုကို ပြောလီရေ၊ “အသျှင်၊ ကိုယ်တော် ဇာတို့ ကြွဖို့လည်းဆိုစာကို အကျွန်ရို့ မသိပါ။ ယင်းပိုင်ဆိုကေ ကိုယ်တော် လားဖို့စာလမ်းကို အကျွန်ရို့ ဇာပိုင်ပျင်ရို့ သိကတ်ပါဖို့လည်း?” 6ယေရှုစာ သောမကို ပြောလီရေ၊ “ငါစာ လမ်းလည်း ဖြစ်တေ၊ မှန်ကန်ခြင်းတရားလည်း ဖြစ်တေ အရာ အသက်လည်း ဖြစ်တေ။ ငါ့ကို အမှီမပြုကေ တစ်ယောက်လည်း အဖတို့ ရောက်နိုင်ကတ်လိမည် မဟုတ်။ 7နင်ရို့ ငါ့ကို သိကတ်ဖို့ဆိုကေ ငါ့အဖကိုလည်း သိကတ်ဖို့၊ ယေကေလည်း နင်ရို့ ဒေဂုကပင် ငါ့အဖကို သိကတ်ပျာ အရာ မြင်လည်း မြင်ဖူးကတ်ပျာ။”

8ဖိလိပ္ပုစာ ယေရှုကို ပြောလီရေ၊ “အသျှင်၊ အဖကို တစ်ခေါက် အကျွန်ရို့ကို ပြပါ။ ယင်းပိုင်ဆိုကေ အကျွန်ရို့ ပျော်ကတ်ပါဖို့။” 9ယေရှုစာ ဖိလိပ္ပုကို ပြောလီရေ၊ “ဖိလိပ္ပု၊ ငါ နင်ရို့နအတူ ရက်ပေါင်းများစွာ နီရို့လာဗျာ၊ ယေကေလည်း နင် ငါ့ကို မသိသိလော? ငါ့ကို မြင်ရသူစာ ငါ့အဖကိုလည်း မြင်ရဗျာ။ ယင်းပိုင်ဆိုကေ အဖကို တစ်ခေါက် အကျွန်ရို့ကို ပြပါ ဟို့ နင် ဇာဖို့ ပြောစာလည်း? 10ငါစာ အဖန တစ်ကိုယ်တည်း ဖြစ်ရို့ နီရေ၊ ငါ့အဖလည်း ငါန တစ်ကိုယ်တည်း ဖြစ်ရို့ နီရေဆိုစာကို နင် မကျုံလော? ငါ နင်ရို့ဘားမာ ပြောစာစကားတိ ငါ့စကား မဟုတ်၊ ယေကေလည်း ငါ့အဖစာ ငါန တစ်ကိုယ်တည်း ဖြစ်ရို့ နီပြီးကေ ကိုယ့်အလုပ်တိကို လုပ်နီရေ။ 11ငါစာ အဖန တစ်ကိုယ်တည်း ဖြစ်ရို့ နီရေ၊ ငါ့အဖလည်း ငါန တစ်ကိုယ်တည်း ဖြစ်ရို့ နီရေဆိုစာကို နင်ရို့ ကျုံကတ်။ ယင်းပိုင် မဟုတ်ဆိုကေ ငါလုပ်စာ အလုပ်တိကို မြင်ရို့ ငါန ငါ့အဖ တစ်ကိုယ်တည်း ဖြစ်ရို့ နီရေဆိုစာကို ကျုံကတ်။

12“ငါ နင်ရို့ကို အမှန် ပြောရေ၊ ငါ့ကို ကျုံသူစာ ငါလုပ်စာ အလုပ်တိကို လုပ်လိမည်။ ငါ အဖတို့ လားရေအတွက်န သူစာ ဒေ အလုပ်တိထက် အရာလည်း အလုပ်အကြီးတိကို လုပ်လိမည်။ 13နင်ရို့ ငါ့နာမည်န တောင်းကတ်၊ နင်ရို့ တောင်းစာ အားကုံးကို ငါ လုပ်မည်၊ အကြောင်းကား အဖ၏ ဘုန်းတန်ခိုးကို သားတော်ကနီရို့ ပေါ်ထွန်းစီချင်ရေ။ 14နင်ရို့ ငါ့နာမည်န ဇာကိုပင်မဆို ငါ့က တောင်းရေဆိုကေ နင်ရို့ တောင်းစာကို ငါ လုပ်မည်။”

သန့်ရှင်းသောဝိညာဉ်တော်ကို ရွှတ်ဖို့ ဂတိခံခြင်း

15ယေရှုစာ တပည့်ရို့ကို အရာလည်း ပြောလီရေ၊ “နင်ရို့ ငါ့ကို ချစ်တေဆိုကေ ငါပီးစာ ပညှတ်ချက်တိကို နင်ရို့ လိုက်နာကတ်လိမည်။ 16နင်ရို့နအတူ ထာဝရပတ်လုံး နီဖို့အတွက် ကူညီသူတစ်ပါးကို အဖက ငါ တောင်းမည်။ ငါ့အဖစာ ထိုကူညီသူကို နင်ရို့တို့ ရွှတ်လိုက်လိမည်။ 17ထိုကူညီသူစာ ထာဝရဘုရား၏ ဝိညာဉ်တော် ဖြစ်တေ။ သူစာ ထာဝရဘုရား၏ အကြောင်းကို မှန်ကန်စာနည်းန သွန်သင်ပီးရေ။ လောကသားရို့ သူ့ကို မြင်လည်း မမြင်ဖူးကတ်၊ သိလည်း မသိကတ်။ ယင်းအတွက်န သူရို့စာ ယင်းဝိညာဉ်တော်ကို လက်မခံနိုင်ကတ်၊ ယေကေလည်း သူစာ နင်ရို့နအတူ ဟိရေ အရာ နင်ရို့ စိတ်နှလုံးမာ ကျိန်းဝပ်လိမည်။ ယင်းအတွက်န နင်ရို့ သူ့ကို သိကတ်တေ။

18“ငါ နင်ရို့ကို အမိအဖ မဟိစာသားသမီးကိုပိုင် စွန့်ရို့ မလား။ ငါ နင်ရို့တို့ ပြန်လာဖို့သိ။ 19တစ်နားသျှေနီပြီးရေခါ လောကသားရို့စာ ငါ့ကို အရာ မြင်ရကတ်ဖို့ မဟုတ်ပျာ၊ ယေကေလည်း နင်ရို့ ငါ့ကို မြင်ရကတ်လိမည်။ အရာ ငါ အရှင်ဟိရေအတွက်န နင်ရို့လည်း အရှင် ဟိကတ်လိမည်။ 20ငါစာ ငါ့အဖန တစ်ကိုယ်တည်း ဖြစ်ရို့ နီရေ၊ နင်ရို့လည်း ငါန တစ်ကိုယ်တည်း ဖြစ်ရို့ နီကတ်တေ၊ အရာ ငါလည်း နင်ရို့န တစ်ကိုယ်တည်း ဖြစ်ရို့ နီရေ။ ထိုအကြောင်းကို ငါ ပြန်ရှင်ထမြောင့်ရေနိမာ နင်ရို့ သိရကတ်လိမည်။ 21ငါ့ကို အစစ် ချစ်သူစာ ငါ့ ပညှတ်ချက်တိကို သိရို့ လိုက်နာလိမည်။ ငါ့ကို ချစ်သူကို ငါ့အဖ ချစ်လိမည် အရာ ငါလည်း သူ့ကို ချစ်ဖို့။ ငါ ကိုယ့်ကို သူ့ဘားမာ ဖေါ်ပြဖို့။”

22ယင်းခါ ယုဒရှကာရုတ် မဟုတ်ဘိုင်းန အခြားတစ်ယောက် ယုဒစာ ယေရှုကို ပြောလီရေ၊ “အသျှင်၊ ကိုယ်တော် လောကသားရို့ဘားမာ မဖေါ်ပြဘိုင်းန သက်သက် အကျွန်ရို့ဘားမာ ဖေါ်ပြဖို့ဆိုစာ အဓိပ္ပါယ် ဇာပါလည်း?” 23ယေရှုစာ ယုဒကို အဖြေပီးလီရေ၊ “ငါ့ကို ချစ်သူစာ ငါ့သွန်သင်ချက်ကို လိုက်နာလိမည်။ ငါ့အဖစာ သူ့ကို ချစ်လိမည်။ အရာ ငါန ငါ့အဖစာ သူ့တို့ လားရို့ သူနအတူ နီထိုင်ဖို့။ 24ငါ့ကို မချစ်သူစာ ငါ့သွန်သင်ချက်ကို မလိုက်နာ။ နင်ရို့ ငါ့က ကြားရစာ သွန်သင်ချက်တိစာ ငါ့သွန်သင်ချက် မဟုတ်။ ငါ့ကို ရွှတ်လိုက်စာ အဖ၏ သွန်သင်ချက်တိ ဖြစ်တေ။ 25ငါ နင်ရို့နအတူ ဟိလီရေခါ ဒေ ဟိသမျ အကြောင်းအရာကို နင်ရို့ကို သွန်သင်ပီးလီရေ။ 26ယေကေလည်း အဖ ကူညီသူကို ငါ့နာမည်န ရွှတ်လိုက်လိမည်။ ထိုကူညီသူစာ သန့်ရှင်းသောဝိညာဉ်တော် ဖြစ်တေ။ သူစာ အားကုံးစာ အကြောင်းကို နင်ရို့ကို သွန်သင်ပီးလိမည်။ အရာ ငါ သွန်သင်ပီးစာတိကို သူစာ နင်ရို့ကို အတွက်ချရို့ ပီးလိမည်။

27“နင်ရို့ စိတ်မပူကတ်ကေ့ အရာ မကြောက်ကတ်ကေ့။ ငါ နင်ရို့အတွက် ငြိမ်းချမ်းခြင်း ထားဘိုက်ခရေ။ ငါ ကိုယ့် ငြိမ်းချမ်းခြင်းကို နင်ရို့ကို ပီးရေ၊ ယေကေလည်း ငါပီးစာ ငြိမ်းချမ်းခြင်းစာ လောကသားရို့ပီးစာ ငြိမ်းချမ်းခြင်းနမတူ။ 28‘ငါ အဖတို့ လားရဖို့ဗျာ၊ ယေကေလည်း ငါ နင်ရို့တို့ ပြန်လာဖို့သိ’ ဟို့ ငါ နင်ရို့ကို ပြောစာစကားကို နင်ရို့ ကြားရကတ်ပျာ။ နင်ရို့ ငါ့ကို ချစ်ဖို့ဆိုကေ ငါ အဖတို့ လားရေဆိုစာကို ကြားရို့ နင်ရို့ ပျော်ကတ်ဖို့၊ အကြောင်းကား ငါ့အဖစာ ငါ့ထက် ကြီးမြတ်တေ။ 29ထိုဖြစ်ပျက်ခြင်းတိ ဖြစ်လာရေခါ နင်ရို့ ကျုံလတ်အောင် ငါ ဒေဂုကပင် နင်ရို့ကို ပြောထားလိုက်ယ။ 30လောကကို အုပ်ချုပ်စာ မာရ်နတ် လာနီဗျာ။ ယင်းအတွက်န ငါ နင်ရို့နအတူ အကြာနီရို့ စကားအများ ပြောဖို့ မရဗျာ၊ ယေကေလည်း သူစာ ငါ့ကို တစ်ခုပိုင်လည်း အုပ်ချုပ်နိုင်မည် မဟုတ်။ 31ယေကေလည်း အဖ ငါ့ကို ခိုင်းရေအတိုင်း ငါ ဟိသမျ အားကုံးကို လိုက်နာနီရေ၊ အကြောင်းကား ငါစာ အဖကို ချစ်တေဆိုစာကို လောကသားရို့ကို သိစီချင်ရေ။ ထ၊ ငါရို့ ဒေ နေရာက ထွက်ရို့ လားကတ်မည်။”