John 16

1“နင်ရို့မာ ကျုံခြင်းတရား မပျက်ရအောင် ငါ ထိုစကားတိကို နင်ရို့ဘားမာ ပြောပြလီရေ။ 2လူရို့စာ နင်ရို့ကို ဘာသာရေး တရားဇရပ်က နှင်ထုတ်ကတ်လိမည်။ ယင်းထက်မက သူရို့စာ တစ်ရက်နိ နင်ရို့ကို အသီသတ်ကတ်လိမည်။ ယင်းခါ သူရို့စာ ထာဝရဘုရားကို ဝတ်ပြုရေ ဟို့ မှတ်ကတ်လိမည်။ 3သူရို့စာ အဖကိုလည်း မသိကတ် အရာ ငါ့ကိုလည်း မသိကတ်။ ယင်းအတွက်န သူရို့ ထိုအလုပ်တိကို လုပ်ကတ်လိမည်။ 4နောက်အနာဂါတ်မာ ထိုအကြောင်းအရာတိ ဖြစ်ပျက်လာလိမည်။ ယင်းအတွက်န ငါ ဒေဂုကပင် နင်ရို့ဘားမာ ဒေ အကြောင်းအရာတိကို ပြောထားလိုက်စာ ဖြစ်တေ၊ အကြောင်းကား အယင်ကပင် ဒေ အကြောင်းတိကို ယူရို့ နင်ရို့ကို သတိပီးထားလီရေဆိုစာကို ငါ နင်ရို့ကို တွက်ရစီချင်ရေ။

သန့်ရှင်းသောဝိညာဉ်တော် လုပ်ဆောင်ခြင်း

“ငါ ပထမကပင် နင်ရို့နအတူ ဟိလီရေအတွက်န ဒေ စကားတိကို ငါ နင်ရို့ကို မပြောလီ။ 5ငါ့ကို ရွှတ်လိုက်သူတို့ ငါ ဒေဂု ပြန်လားဖို့ဗျာ။ ယေကေလည်း နင်ရို့အထဲက၊ ‘အသျှင် ဇာတို့ ကြွပါဖို့စာလည်း’ ဟို့ ငါ့ကို တစ်ယောက်လည်း မမီးကတ်။ 6ငါ ဒေ စကားတိကို နင်ရို့ကို ပြောလီရေအတွက်န နင်ရို့ ကောင်းကောင်း စိတ်ဒုက္ခ ရနီကတ်တေ။ 7ယေကေလည်း ငါ နင်ရို့ကို အမှန် ပြောရေ၊ ငါ လားရေဆိုကေ နင်ရို့အတွက် ကောင်းဖို့။ ငါ မလားဆိုကေ နင်ရို့တို့ ကူညီသူ ရောက်လာလိမည် မဟုတ်။ ယေကေလည်း ငါ လားရေဆိုကေ ကူညီသူကို ငါ နင်ရို့တို့ ရွှတ်လိုက်ဖို့။

8“ထိုကူညီသူ ရောက်လာရေခါ အပြစ် အကြောင်းကို လောကသားရို့ဘားမာ ဖေါ်ပြလိမည်၊ ထာဝရဘုရား၏ ကောင်းမြတ်စာ အလုပ်အကြောင်းကို ဖေါ်ပြလိမည် အရာ တရားစစ်ဆေးခြင်း အကြောင်းကိုလည်း ဖေါ်ပြလိမည်။ 9လူရို့စာ ငါ့ကို မကျုံကတ်။ ယင်းအတွက်န ကူညီသူစာ လူရို့ဘားမာ အပြစ် အကြောင်းကို ဖေါ်ပြလိမည်။ 10ငါ အဖတို့ ပြန်လားဖို့ဗျာ။ လူရို့ ငါ့ကို အရာတစ်ခါလည်း မြင်ရကတ်ဖို့ မဟုတ်ပျာ။ ယင်းအတွက်န ကူညီသူစာ လူရို့ဘားမာ ထာဝရဘုရား၏ ကောင်းမြတ်စာ အလုပ်အကြောင်းကို ဖေါ်ပြလိမည်။ 11မာရ်နတ်စာ လောကကို အုပ်ချုပ်နီရေ၊ ယေကေလည်း သူစာ တရားစစ်ဆေးခြင်းကို ခံရလားခဗျာ။ ယင်းအတွက်န ကူညီသူစာ လူရို့ဘားမာ တရားစစ်ဆေးခြင်း အကြောင်းကို ဖေါ်ပြလိမည်။

12“ငါ့မာ နင်ရို့ကို စကားပြောဖို့စာ အရာလည်း အများကြီး ဟိသိရေ၊ ယေကေလည်း ဒေဂု ထိုစကားတိကို ငါ ပြောရေဆိုကေ နင်ရို့ ကောင်းကောင်း စိတ်ဒုက္ခ ရကတ်ဖို့။ 13ယေကေလည်း ထိုမှန်ကန်ခြင်းနပြည့်စုံစာ ဝိညာဉ်တော် ရောက်လာရေခါ နင်ရို့ဘားမာ ဟိသမျ မှန်ကန်ခြင်း အကြောင်းကို ပြောပြလိမည်။ သူစာ ကိုယ့်အလိုအတိုင်း တစ်ခုလည်း ပြောလိမည် မဟုတ်၊ ယေကေလည်း သူစာ ထာဝရဘုရားက ကြားစာတိကို နင်ရို့ဘားမာ ပြောပြလိမည်။ အရာ နောက်အနာဂါတ်မာ ဖြစ်ပျက်လာဖို့စာ အကြောင်းတိကိုလည်း နင်ရို့ဘားမာ ပြောပြလိမည်။ 14ထိုဝိညာဉ်တော်စာ ငါ့ကို ရိုသေခြင်း ပီးလိမည်၊ အကြောင်းကား သူစာ ငါ့စကားတိကို နင်ရို့ဘားမာ ပြောပြလိမည်။ 15ငါ့အဖမာဟိစာ အားကုံးကို ငါ ပိုင်ဆိုင်ရေ။ ယင်းအတွက်န ထိုဝိညာဉ်တော်စာ ငါ့စကားတိကို နင်ရို့ဘားမာ ပြောပြလိမည် ဟို့ ငါ ပြောလီရေ။

ဝမ်းနည်းခြင်းစာ ပျော်ပါးခြင်းတို့ ပြောင်းလှဲခြင်း

16“တစ်နားသျှေနီပြီးရေခါ နင်ရို့ ငါ့ကို မြင်ရကတ်ဖို့ မဟုတ်ပျာ။ အရာတစ်နားသျှေနီပြီးရေခါ ငါ့ကို မြင်ရကတ်လိမည်။”

17ယင်းခါ တစ်ချိုးတပည့်ရို့စာ ပြောကတ်လီရေ၊ “သူ ငါရို့ကို ဇာ ပြောဖို့ ကြည့်စာလည်း? ‘တစ်နားသျှေနီပြီးရေခါ နင်ရို့ ငါ့ကို မြင်ရကတ်ဖို့ မဟုတ်ပျာ။ အရာတစ်နားသျှေနီပြီးရေခါ နင်ရို့ ငါ့ကို မြင်ရကတ်လိမည်။’ သူစာ အရာတစ်ပြန်၊ ‘ငါ အဖတို့ ပြန်လားဖို့ဗျာ’ ဟို့ ပြောလီရေ။ 18တစ်နားသျှေနီပြီးရေခါ ဟို့ သူပြောစာစကား အဓိပ္ပါယ် ဇာလည်း? သူပြောစာစကားကို ငါရို့ နားမလည်။”

19တပည့်ရို့ ထိုအကြောင်းကို ယူရို့ မီးချင်ကတ်စာကို ယေရှု သိလီရေ။ ယင်းအတွက်န သူစာ တပည့်ရို့ကို ပြောလီရေ၊ “‘တစ်နားသျှေနီပြီးရေခါ နင်ရို့ ငါ့ကို မြင်ရကတ်ဖို့ မဟုတ်ပျာ။ အရာ တစ်နားသျှေနီပြီးရေခါ နင်ရို့ ငါ့ကို မြင်ရကတ်လိမည်’ ဟို့ ငါ ပြောလီစာ စကားကို ယူရို့ နင်ရို့ အချင်းချင်း တိုင်ဘင်နီကတ်စာလော? 20ငါ နင်ရို့ကို အမှန် ပြောရေ၊ နင်ရို့ ကောင်းကောင်း ဝမ်းနည်းရို့ ငိုကတ်လိမည်၊ ယေကေလည်း လောကသားရို့ ပျော်ကတ်လိမည်။ ပထမခါ နင်ရို့ စိတ်ဒုက္ခ ရကတ်လိမည်၊ ယေကေလည်း တစ်နားသျှေနီပြီးရေခါ ထိုစိတ်ဒုက္ခစာ ဝမ်းသာခြင်း ဖြစ်လိမည်။ 21မိန်းမ တစ်ယောက် သားမွီးဖွားဖို့အချိန် စိရေခါ ကောင်းကောင်း ဝေဒနာကို ခံရရေ။ ယေကေလည်း သားမွီးဖွားရို့ ပြီးရေခါ လောကမာ လူအသစ်တစ်ယောက် မွီးဖွားရေအတွက်န သူစာ ပျော်ရို့ ကိုယ်ခံရစာ ဝေဒနာကို မိလားခရေ။ 22ယင်းပိုင်တထန် ဒေဂု နင်ရို့လည်း စိတ်ဒုက္ခ ရနီကတ်တေ၊ ယေကေလည်း ငါ အရာတစ်ပြန် နင်ရို့န တွိရေခါ နင်ရို့ ကောင်းကောင်း ပျော်ကတ်လိမည်။ ထိုပျော်ပါးခြင်းကို တစ်ယောက်လည်း နင်ရို့က လုယူနိုင်လိမည် မဟုတ်။ 23ယင်းအချိန်ခါ နင်ရို့ ငါ့ကို တစ်ခုလည်း မီးကတ်လိမည် မဟုတ်။ ငါ နင်ရို့ကို အမှန် ပြောရေ၊ နင်ရို့ ငါ့နာမည်န တောင်းစာ အားကုံးကို အဖ နင်ရို့ကို ပီးလိမည်။ 24နင်ရို့ ဒေဂု တိုင်အောင်ပင် ငါ့နာမည်န တစ်ခုလည်း မတောင်းကတ်သိ။ နင်ရို့ တောင်းကတ်၊ တောင်းရေဆိုကေ ရကတ်လိမည်။ ယင်းခါ နင်ရို့ စိတ်နှလုံးမာ ပျော်ပါးခြင်းန ပြည့်စုံလိမည်။

25“ပုံဥပမာန ငါ ထိုအကြောင်းတိကို နင်ရို့ဘားမာ သွန်သင်ပီးလီရေ။ ငါ နင်ရို့ဘားမာ ပုံဥပမာ မပါဘိုင်းန အဖ၏ အကြောင်းကို ပပွင့်လလင်း သွန်သင်ပီးဖို့စာအချိန် ရောက်လာလိမည်။ 26ယင်းနိ နင်ရို့ ငါ့နာမည်န အဖက တောင်းကတ်လိမည်။ ငါ ကိုယ်တိုင် နင်ရို့အတွက် အဖက အကူညီတောင်းဖို့ မလိုဗျာ။ 27နင်ရို့ ငါ့ကို ချစ်ရို့ လာကတ်ပျာ အရာ ငါ ထာဝရဘုရားက လာလီရေဆိုစာကိုလည်း နင်ရို့ ကျုံကတ်ပျာ။ ယင်းအတွက်န ထာဝရဘုရား ကိုယ်တိုင် နင်ရို့ကို ချစ်တေ။ 28ငါ အဖက ဒေ လောကတို့ ကြွလာလီရေ။ ဒေဂု ငါ ဒေ လောကကို စွန့်ရို့ အရာတစ်ပြန် အဖတို့ ပြန်ရို့ လားဖို့ဗျာ။”

29ယင်းခါ တပည့်ရို့စာ ယေရှုကို ပြောကတ်လီရေ၊ “ကြည့်ပါ၊ ကိုယ်တော် ဒေဂု ပုံဥပမာ မပါဘိုင်းန ပပွင့်လလင်း စကား ပြောပါရေ။ 30ကိုယ်တော် ဟိသမျ အားကုံးကို သိရေဆိုစာကို ဒေဂု အကျွန်ရို့ သိကတ်ပါဗျာ။ အသူမဆို ကိုယ်တော်ကို စကားမမီးခင်ပင် ကိုယ်တော် ယင်းသူကို အဖြေပီးနိုင်ပါရေ။ ယင်းအတွက်န ကိုယ်တော် ထာဝရဘုရားက ကြွလာလီရေဆိုစာကို အကျွန်ရို့ ကျုံပါရေ။”

31ယေရှုစာ တပည့်ရို့ကို ပြောလီရေ၊ “နင်ရို့ ဒေဂု ကျုံကတ်ပျာလော? 32ကြည့်ကတ်၊ နင်ရို့ တစ်ယောက်တစ်လမ်း ကွဲကြင်းလားဖို့စာအချိန် ရောက်လာလိမည်၊ ယင်းထက်မက ဒေဂုပင် ရောက်နီဗျာ။ နင်ရို့ ငါ့ကို ထားရို့ ထွက်ဗြီးလားကတ်လိမည်၊ ယေကေလည်း ငါ နူးချင်းတည်း မဟုတ်။ ငါ့အဖ ငါနအတူ ဟိရေ။ 33နင်ရို့ ငါ့ကနီရို့ ငြိမ်းချမ်းခြင်းကို ရကတ်ပတ်စီအတွက် ငါ ဒေ စကားတိကို နင်ရို့ဘားမာ ပြောပြစာ ဖြစ်တေ။ နင်ရို့ ဒေ လောကမာ စိတ်ဒုက္ခ ရကတ်လိမည်၊ ယေကေလည်း နင်ရို့ မကြောက်ကတ်ကေ့။ ငါစာ ဒေ လောက၏ တန်ခိုးကို အနိုင်ယူပြီးဗျာ။”