John 18

ယေရှုကို ရန်သူရို့ ဖမ်းခြင်း

(မဿဲ ၂၆:၄၇-၅၆၊ မာကု ၁၄:၄၃-၅၀၊ လုကာ ၂၂:၄၇-၅၃)

1အသျှင်ယေရှု ဆုတောင်းရို့ ပြီးရေခါ ကိုယ့်တပည့်ရို့ကို ယူရို့ ကေဒြုန်ချောင်း ကမ်းတစ်ဖက်တို့ ကူးလီရေ။ ထိုကမ်းဖက်က ဥယျာဉ်တစ်ခင်း ဟိလီရေ။ ယေရှုစာ သူရို့ကို ယူရို့ ယင်းဥယျာဉ်တို့ ဝင်လီရေ။ 2သူရို့စာ မကြာမကြာ ယင်းဥယျာဉ်တို့ ကြွနီလီကတ်တေ။ ယင်းအတွက်န ယေရှုကို ရန်သူရို့အလက်မာ ဖမ်းပီးလီသူ ယုဒရှကာရုတ်စာ ယင်းဥယျာဉ်ကို သိလီရေ။

3ယင်းအတွက်န ယုဒရှကာရုတ်စာ ယဇ်ပုရောဟိတ်အကြီးရို့န ဖာရိရှဲအဖွဲ့သားရို့တို့ လားလီရေ။ ယင်းခါ သူရို့စာ ဝိပဿနာကျောင်းမာ အစောင့်သား လိုင်းကေယောက်န ရောမအစိုးရစစ်သား တစ်ဖွဲ့ကို ယုဒရှကာရုတ်နအတူ ယင်းဥယျာဉ်တို့ ရွှတ်လိုက်လီရေ။ သူရို့အလက်မာ လိုင်တန်ဆီမီး၊ ဆီမီးကျိုင် အရာ လက်နှက်တိလည်း ပါလီရေ။

4ကိုယ့်ဘားမာ ကျလာဖို့စာ ဖီးဒုက္ခတိကို ယေရှု သိရေအတွက်န သူရို့တို့ လားရို့ မီးလီရေ၊ “ကိုယ်ဘင်ရို့ အသူ့ကို ရှာကတ်စာလည်း?” 5သူရို့စာ ယေရှုကို အဖြေပီးကတ်လီရေ၊ “နာဇရက်မြို့သျှေသား ယေရှုကို။”

ယေရှုစာ သူရို့ကို ပြောလီရေ၊ “ငါ ယင်းသူ ဖြစ်တေ။” ယေရှုကို ရန်သူရို့အလက်မာ ဖမ်းပီးလီသူ ယုဒရှကာရုတ်လည်း သူရို့နအတူ ရပ်ရို့ ဟိလီရေ။ 6ယေရှုစာ သူရို့ကို၊ “ငါ ယင်းသူ ဖြစ်တေ” ဟို့ ပြောရေခါ သူရို့စာ နောက်ဆုတ်ပြီးကေ မြေပြင်မာ လဲကျကတ်လီရေ။

7ယေရှုစာ အရာတစ်ပြန် သူရို့ကို မီးလီရေ၊ “ကိုယ်ဘင်ရို့ အသူ့ကို ရှာကတ်စာလည်း?” ယင်းခါ သူရို့စာ အဖြေပီးကတ်လီရေ၊ “နာဇရက်မြို့သျှေသား ယေရှုကို။”

8ယေရှုစာ သူရို့ကို ပြောလီရေ၊ “ငါ ယင်းသူ ဖြစ်တေ ဟို့ ငါ ကိုယ်ဘင်ရို့ကို ပြောလီရေ မဟုတ်လော? ကိုယ်ဘင်ရို့ ငါ့ကို ရှာနီကတ်တေဆိုကေ ငါ့နောက်က လိုက်သူရို့ကို ရွှတ်လိုက်။” 9“ကိုယ်တော် အကျွန့်အလက်မာ အပ်ပီးသူရို့ကို အကျွန် တစ်ယောက်ကိုလည်း မပျောက်စီပါ” ဟို့ ယေရှု ပြောလီစာ စကား ပြည့်စုံဖို့အတွက် ဒေ အားကုံးစာ ဖြစ်ပျက်လာလီရေ။

10ယင်းခါ ပေတရုစာ ကိုယ့်မာ ပါစာ ဒါးရှည်ကို ထုတ်ရို့ မဟာယဇ်ပုရောဟိတ်မာ ကျွန်ကို ခွတ်ရို့ ညာဖက်က နားရွက်ကို ဖြတ်ချလိုက်လီရေ။ သူ့နာမည်စာ မော်လခု ဖြစ်တေ။ 11ယင်းခါ ယေရှုစာ ပေတရုကို ပြောလီရေ၊ “နင့် ဒါးရှည်ကို ဒါးအိပ်မာ ထည့်ထားလိုက်။ အဖ ငါ့ကို ပီးစာ ဒုက္ခ-ဝေဒနာကို ငါ ခံယူဖို့ မသင့်လော?”

ယေရှုကို မဟာယဇ်ပုရောဟိတ်တို့ ယူလားခြင်း

(မဿဲ ၂၆:၅၇-၅၈၊ မာကု ၁၄:၅၃-၅၄၊ လုကာ ၂၂:၅၄)

12ရောမအစိုးရစစ်သားရို့၊ စစ်ဗိုလ် အရာ ယုဒဂေါင်းဆောင်ရို့မာ အစောင့်သားရို့စာ ယေရှုကို ဖမ်းရို့ ချိုင်ကတ်လီရေ။ 13ယင်းနောက် ယေရှုကို ပထမဆုံး အန္နတ်တို့ ယူလားခလီရေ။ အန္နတ်စာ ကာယာဖမာ ယောက္ခမ ဖြစ်တေ။ ကာယာဖစာ ယင်းနှစ်အတွက်မာ မဟာယဇ်ပုရောဟိတ် ဟိလီရေ။ 14ဒေ ကာယာဖစာ၊ “တစ်မျိုးသားလုံး ပျက်စီးလားဖို့စာ တက်စား လူတစ်ယောက် အသီခံစာ အများကောင်းဖို့သိ” ဟို့ ယုဒဂေါင်းဆောင်ရို့ကို အကြံပီးလီသူ ဖြစ်တေ။

ယေရှုကို ပေတရု ပထမခေါက် ငြင်းခြင်း

(မဿဲ ၂၆:၅၈၊ ၂၆:၆၉-၇၅၊ မာကု ၁၄:၅၄၊ ၁၄:၆၆-၆၈၊ လုကာ ၂၂:၅၄-၆၂)

15ပေတရုန အခြား တပည့်တစ်ယောက်စာ ယေရှုနောက်က လိုက်လားခကတ်လီရေ။ အခြားတပည့်စာ မဟာယဇ်ပုရောဟိတ်န အသိ ဟိလီရေ။ ယင်းအတွက်န သူစာ ယေရှုနအတူ မဟာယဇ်ပုရောဟိတ် အိမ်တပ်ဂွင်းထဲတို့ ဝင်လားခလီရေ။ 16ယေကေလည်း ပေတရုစာ တပ်ဂွင်းပြင်က ရပ်ရို့ နီလိုက်လီရေ။ ယင်းခါ မဟာယဇ်ပုရောဟိတ်န အသိဟိစာ တပည့်စာ ပြင်တို့ ထွက်လာလီရေ။ အရာ သူစာ လမ်းခဝရင်းမာ အလုပ်လုပ်နီစာ မိန်းမသျှေက ဝင်ခွင့်တောင်းရို့ ပေတရုကို အထဲတို့ ခေါ်သွင်းလီရေ။

17ထိုမိန်းမသျှေစာ ပေတရုကို မီးလီရေ၊ “အမောင်လည်း ထိုလူ တပည့်ရို့အထဲက တစ်ယောက် မဟုတ်လော?” ယင်းခါ ပေတရုစာ ပြောလီရေ၊ “ငါ မဟုတ်!” 18ယင်းခါ ကောင်းကေင်း ချမ်းလီရေ။ ယင်းအတွက်န ကျွန်ရို့န အစောင့်သားရို့စာ မီးဖေါ်ပြီးကေ မီးနှူရို့ နီကတ်လီရေ။ ပေတရုလည်း သူရို့အနားတို့ လားပြီးကေ ရပ်ရို့ မီးနှူလီရေ။

ယေရှုကို မဟာယဇ်ပုရောဟိတ် စစ်ဆေးခြင်း

(မဿဲ ၂၆:၅၇-၆၆၊ မာကု ၁၄:၅၃-၆၄၊ လုကာ ၂၂:၆၆-၇၁)

19ယင်းခါ မဟာယဇ်ပုရောဟိတ်စာ တပည့်ရို့ အကြောင်းန သူ၏ သွန်သင်ချက် အကြောင်းကို ယေရှုကို မီးကြည့်လီရေ။ 20ယေရှုစာ အဖြေပီးလီရေ၊ “ငါ လောကသားရို့ဘားမာ ပပွင့်လလင်း သွန်သင်ပီးလီရေ။ အရာ ယုဒလူမျိုးရို့ စုကတ်စာ ဘာသာရေး တရားဇရပ်တိန ဝိပဿနာကျောင်းမာ ငါ အမြဲတိုင်း သွန်သင်ပီးလီရေ။ ငါ တစ်ခါလည်း ဖုံးရို့ရွှက်ရို့ စကား မပြောလီ။ 21ယင်းပိုင်ဆိုကေ ငါ့ကို ဇာဖို့ မီးစာလည်း? ငါ သူရို့ကို ဇာ သွန်သင်ပီးလီရေလည်းဆိုစာကို နားထောင်သူရို့ကို မီးကြည့်။ ငါ သွန်သင်ပီးလီစာတိကို သူရို့ သိကတ်တေ။”

22ယေရှု ထိုစကားကို ပြောပြီးရေခါ သူ့အနားမာ ရပ်ရို့ဟိစာ အစောင့်သား တစ်ယောက်စာ ယေရှုကို ပါးသတ်လီရေ။ အရာ ယင်းအစောင့်သားစာ သူ့ကို ပြောလီရေ၊ “အဝေး၊ နင် မဟာယဇ်ပုရောဟိတ် တစ်ယောက်ကို ဇာဖို့ ဒေပိုင် စကား ပြောစာလည်း!” 23ယေရှုစာ သူ့ကို ပြောလီရေ၊ “ငါ ပြောစာစကား မှားရေဆိုကေ မှားစာအကြောင်းကို ပြပီး။ ယေကေလည်း ငါ ပြောစာစကားတိ မှန်ရေဆိုကေ ငါ့ကို ဇာဖို့ ပါးသတ်စာလည်း?” 24ယင်းနောက် အန္နတ်စာ ယေရှုကို ချိုင်ရို့အတိုင်း မဟာယဇ်ပုရောဟိတ် ကာယာဖတို့ ပို့လိုက်လီရေ။

ပေတရု အရာတစ်ပြန် ငြင်းခြင်း

(မဿဲ ၂၆:၇၁-၇၅၊ မာကု ၁၄:၆၉-၇၂၊ လုကာ ၂၂:၅၈-၆၂)

25ပေတရုစာ မီးဖေါ်နားမာ ရပ်ပြီးကေ မီးနှူရို့ နီလီရေ။ ယင်းခါ လူရို့စာ သူ့ကို မီးကတ်လီရေ၊ “နင်လည်း ထိုလူ တပည့်ရို့အထဲက တစ်ယောက် မဟုတ်လော?” ယေကေလည်း ပေတရုစာ၊ “ငါ မဟုတ်” ဟို့ ငြင်းလီရေ။

26ယင်းခါ မဟာယဇ်ပုရောဟိတ်မာ ကျွန်တစ်ယောက်စာ ပြောလီရေ၊ “ငါ နင့်ကို ထိုလူနအတူ ဥယျာဉ်ထဲမာ မြင်ခလီရေ မဟုတ်လော?” သူစာ ပေတရု ဒါးရှည်န ခွတ်ရို့ နားရွက် ပြတ်ကျလားခစာ လူန အမျိုးကျရေ။ 27ယေကေလည်း ပေတရုစာ အရာတစ်ပြန် ငြင်းလီရေ။ ယင်းခါ ချက်ချင်း ကြက်တွန်လီရေ။

ယေရှုကို အုပ်ချုပ်သူကြီးပိလတ် စစ်ဆေးခြင်း

(မဿဲ ၂၇:၁-၂၊ ၂၇:၁၁-၃၁၊ မာကု ၁၅:၁-၁၅၊ လုကာ ၂၃:၁-၅၊ ၂၃:၁၃-၂၅)

28ယင်းနောက် ယုဒဂေါင်းဆောင်ရို့စာ ယေရှုကို ကာယာဖအိမ်ကနီရို့ ရောမအစိုးရ အုပ်ချုပ်သူကြီးပိလတ် အိမ်တို့ ယူလားခလီရေ။ ယင်းအချိန်စာ မိုးသောက်ထ အချိန် ဖြစ်တေ။ ယုဒဂေါင်းဆောင်ရို့စာ ကိုယ်ရို့ကို သသန့်စစင် ထားရို့ လွတ်မြောင့်ခြင်းပွဲမာ စားသောက်ဖို့ရလတ်အောင် သူရို့စာ အုပ်ချုပ်သူကြီးပိလတ် အိမ်တို့ မဝင်ကတ်လီ။ 29ယင်းခါ ပိလတ်စာ ပြင်တို့ ထွက်လာပြီးကေ သူရို့ကို မီးလီရေ၊ “နင်ရို့ ဒေသူကို ဇာ အပြစ်အကြောင်းန စစ်စွဲကတ်စာလည်း?” 30ယုဒဂေါင်းဆောင်ရို့စာ ပြောကတ်လီရေ၊ “ဒေသူ လူဆိုး မဟုတ်ကေ အကျွန်ရို့ ဒေသူကို ကိုယ်ဘင်ဘားမာ တင်အပ်လီဖို့ မဟုတ်ပါ။”

31ပိလတ်စာ သူရို့ကို ပြောလီရေ၊ “နင်ရို့ ဒေသူကို ယူလားရို့ နင်ရို့ ထုံးစဉ်အတိုင်း တရားစစ်ဆေးလီကတ်။” ယင်းခါ ယုဒဂေါင်းဆောင်ရို့စာ ပြောကတ်လီရေ၊ “ယေကေလည်း အသူ့ကိုမဆို သီဒါဏ်ပီးဖို့အတွက် ကိုယ်ဘင်ရို့ ရောမအစိုးရက အကျွန်ရို့ကို အခွင့် မပီးပါ။” 32ကိုယ် ဇာပိုင် သီရဖို့လည်းဆိုစာ အကြောင်းကို ယေရှု အယင်ကပင် ပြောထားလီရေ။ ထိုအကြောင်း ပြည့်စုံဖို့အတွက် ဒေပိုင် ဖြစ်ပျက်လာစာ ဖြစ်တေ။

33ယင်းခါ ပိလတ်စာ အရာတစ်ပြန် အိမ်ထဲတို့ ဝင်ပြီးကေ ယေရှုကို ခေါ်ရို့ မီးလီရေ၊ “နင် ယုဒလူမျိုးရို့မာ မင်းလော?” 34ယေရှုစာ သူ့ကို မီးလီရေ၊ “ကိုယ်ဘင် ဒေ စကားကို ကိုယ့် စိတ်သဖေါန ပြောစာလော၊ မဟုတ်ကေ အခြားလူရို့ ငါ့အကြောင်းကို ကိုယ်ဘင်ဘားမာ ပြောလီကတ်စာလော?”

35ယင်းခါ ပိလတ်စာ ယေရှုကို ပြောလီရေ၊ “ငါ့ စိတ်သဖေါန ပြောစာ မဟုတ်၊ အကြောင်းကား ငါ ယုဒလူမျိုး မဟုတ်! နင့် လူမျိုးရို့န နင်ရို့မာ ယဇ်ပုရောဟိတ်အကြီးရို့ရာ နင့်ကို ငါ့အလက်မာ အပ်ကတ်လီရေ။ နင် ဇာအပြစ် လုပ်လီစာလည်း?” 36ယေရှုစာ သူ့ကို ပြောလီရေ၊ “ငါ့ နိုင်ငံ ဒေ လောကမာ မဟုတ်။ ငါ့ နိုင်ငံ ဒေ လောကမာ ဖြစ်ဖို့ဆိုကေ ငါ့နောက်က လိုက်နီသူရို့ ငါ့ကို ယုဒလူမျိုးအလက်က ကယ်ဆယ်ဖို့အတွက် စစ်တိုက်ကတ်ဖို့၊ ယေကေလည်း ငါ့ နိုင်ငံစာ ဒေမာ မဟုတ်။”

37ယင်းခါ ပိလတ်စာ ယေရှုကို ပြောလီရေ၊ “ယင်းပိုင်ဆိုကေ နင် မင်းလော?” ယေရှုစာ သူ့ကို ပြောလီရေ၊ “ငါ မင်း ဖြစ်တေ ဟို့ ကိုယ်ဘင် ပြောရေ။ မှန်ကန်ခြင်းဖက်က သက်သီပီးဖို့အတွက် ငါ မွီးဖွားခြင်းကို ခံယူရို့ ဒေ လောကတို့ ကြွလာလီရေ။ မှန်ကန်ခြင်းဖက်က ဟိသူစာ ငါ့စကားကို နားထောင်ရေ။”

38ပိလတ်စာ သူ့ကို၊ “မှန်ကန်ခြင်းဆိုစာ ဇာလည်း” ဟို့ မီးရို့ ပြင်တို့ ထွက်လားခလီရေ။ အရာ သူစာ ယုဒဂေါင်းဆောင်ရို့အနားတို့ လားရို့ ပြောလီရေ၊ “ငါ ဒေသူမာ အပြစ် တစ်ခုလည်း မမြင်။ 39ယေကေလည်း နင်ရို့ ထုံးစဉ်အတိုင်း ငါ လွတ်မြောင့်ခြင်းပွဲနိမာ ထောင်ကျသား တစ်ယောက်စီကို ရွှတ်ပီးနီရေ။ ငါ ဒေ ယုဒလူမျိုးရို့မာ မင်းကို နင်ရို့အတွက် ရွှတ်ပီးဖို့စာကို နင်ရို့ လိုကတ်တေလော?”

40ယင်းခါ လူရို့ အားကုံးသူ အားန အော်ရို့ ပြောကတ်လီရေ၊ “ယင်းသူကို မရွှတ်ပါကေ့၊ ဗာရဗ္ဗကို ရွှတ်ပီးပါ။” ဗာရဗ္ဗစာ ဒါးမြတစ်ယောက် ဟိလီရေ။