John 19

1ယင်းခါ အုပ်ချုပ်သူကြီးပိလတ်စာ ယေရှုကို ယူလားရို့ စက်ကျာကြိုးန သတ်ဖို့အတွက် အာဏာချလိုက်လီရေ။ 2စစ်သားရို့စာ စူးခက်ကို သရဖူတစ်ခု လုပ်ရို့ ယေရှုအဂေါင်းမာ ဆောင်းကတ်လီရေ။ ယင်းနောက် သူရို့စာ ယေရှုခန္ဓာမာ ခရန်းရောင်အဝတ်ကို ဝတ်ပီးကတ်လီရေ။ 3ယင်းနောက် သူရို့စာ ယေရှုအနားတို့ လားရို့၊ “အိုး၊ ယုဒလူမျိုးရို့မာ မင်း အောင်မြင်ပါစီ” ဟို့ ပြောရို့ ယေရှုကို ပါးသတ်ကတ်လီရေ။

4ပိလတ်စာ အရာတစ်ပြန် ပြင်တို့ ထွက်လာရို့ ယုဒလူရို့ကို ပြောလီရေ၊ “ကြည့်ကတ်၊ ဒေသူမာ အပြစ် တစ်ခုလည်း မဟိဆိုစာကို နင်ရို့ သိကတ်ပတ်စီအတွက် ငါ ဒေသူကို နင်ရို့တို့ ထုတ်ယူခရေ။” 5ယင်းနောက် ယေရှုစာ ပြင်တို့ ထွက်လာလီရေ။ ယင်းခါ သူ့အဂေါင်းမာ စူးသရဖူ ဆောင်းရို့ ဟိလီရေ အရာ ခန္ဓာမာလည်း ခရန်းရောင်အဝတ် ဝတ်ရို့ ဟိလီရေ။ ပိလတ်စာ ယုဒလူရို့ကို ပြောလီရေ၊ “ဒေသူကို ကြည့်ကတ်။”

6 ယဇ်ပုရောဟိတ်အကြီးရို့န အစောင့်သားရို့စာ ယေရှုကို မြင်ကတ်တေခါ၊ “ယင်းသူကို ကားတိုင်မာ တင်ရို့ သတ်ဘိုက်လိုက်ပါ၊ ယင်းသူကို ကားတိုင်မာ တင်ရို့ သတ်ဘိုက်လိုက်ပါ” ဟို့ အားန အော်ရို့ ပြောကတ်လီရေ။

ပိလတ်စာ သူရို့ကို ပြောလီရေ၊ “ငါ ဒေသူမာ အပြစ် တစ်ခုလည်း မမြင်၊ နင်ရို့ ကိုယ်တိုင် ဒေသူကို ယူလားရို့ ကားတိုင်မာ တင်ရို့ သတ်ဘိုက်လိုက်ကတ်။”

7ယုဒဂေါင်းဆောင်ရို့စာ ပိလတ်ကို ပြောကတ်လီရေ၊ “ဒေသူ ကိုယ့်ကိုကိုယ် ထာဝရဘုရား၏ သားတော် ဟို့ ခံပါရေ။ ယင်းအတွက်န သူစာ အကျွန်ရို့ ထုံးစဉ်အတိုင်း သီဒါဏ် ခံဖို့ထိုက်တန်ပါရေ။” 8ပိလတ်စာ ထိုစကားကို ကြားရို့ အရာလည်း အများ ကြောက်လီရေ။ 9ယင်းခါ သူစာ အိမ်ထဲတို့ ဝင်ရို့ ယေရှုကို မီးလီရေ၊ “နင် ဇာက လာစာလည်း?” ယေကေလည်း ယေရှုစာ သူ့ကို တစ်ခုလည်း အဖြေမပီးလီ။

10ယင်းအတွက်န သူစာ ယေရှုကို ပြောလီရေ၊ “နင် ငါန စကား မပြောချင်စာလော? နင့်ကို ရွှတ်ပီးဖို့စာန ကားတိုင်မာ တင်ရို့ သတ်ဖို့စာ အခွင့်အာဏာ ငါ့မာ ဟိရေဆိုစာကို နင် မသိလော?” 11ယင်းခါ ယေရှုစာ သူ့ကို ပြောလီရေ၊ “ထာဝရဘုရား ကိုယ်ဘင်ကို အခွင့်အာဏာ မပီးကေ ကိုယ်ဘင် ငါ့ကို တစ်ခုလည်း လုပ်နိုင်မည် မဟုတ်။ ယင်းအတွက်န ငါ့ကို ကိုယ်ဘင်အလက်မာ အပ်ပီးသူစာ အရာလည်း ပိုရို့ အပြစ်ကြီးသူ ဖြစ်တေ။”

12ပိလတ်စာ ယေရှု ပြောစာစကားကို ကြားရို့ ယေရှုကို ရွှတ်ဖို့ ကြိုးစားလီရေ။ ယေကေလည်း ယုဒလူရို့စာ အားန အော်ရို့ ပြောကတ်လီရေ၊ “ကိုယ်ဘင် သူ့ကို ရွှတ်တေဆိုကေ ကိုယ်ဘင် ရောမကဲသာမင်းကြီးမာ မိတ်ဆွေ မဟုတ်ပါ။ အသူမဆို ကိုယ့်ကို မင်း ဟို့ ပြောရေဆိုကေ သူစာ ကဲသာမင်းကြီးကို ဆန့်ကျင်ပါရေ။”

13ယုဒဂေါင်းဆောင်ရို့ ပြောစာစကားကို ကြားရေခါ အုပ်ချုပ်သူကြီးပိလတ်စာ ယေရှုကို ပြင်တို့ ထုတ်ယူခလီရေ။ ယင်းနောက် သူစာ “ကျောက်ခင်း” ဟို့ ခေါ်စာ နေရာအမြင့်တစ်ခုမာ တည်ရို့ထားစာ တရားပလ္လင်မာ ထိုင်လီရေ။ (ယင်းနေရာကို ဟေဗြဲဘာသာစကားန “ဂဗ္ဗသ” ဟို့ ခေါ်ရေ)။ 14ယင်းနိစာ လွတ်မြောင့်ခြင်းပွဲအတွက် အစီစဉ်ချစာနိ ဖြစ်တေ။ ယင်းခါ မွန်းတည့် တစ်ဆယ့်နှစ်နာရီလှောက် ဟိလီရေ။

ပိလတ်စာ ယုဒဂေါင်းဆောင်ရို့ကို ပြောလီရေ၊ “နင်ရို့မာ မင်းကို ကြည့်ကတ်။”

15ယင်းခါ အားကုံးသူ အားန အော်ရို့ ပြောကတ်လီရေ၊ “သတ်ဘိုက်လိုက်ပါ! သူ့ကို သတ်ဘိုက်လိုက်ပါ! သူ့ကို ကားတိုင်မာ တင်ရို့ သတ်ဘိုက်လိုက်ပါ!”

ပိလတ်စာ သူရို့ကို ပြောလီရေ၊ “နင်ရို့မာ မင်းကို ငါ ကားတိုင်မာ တင်ရို့ သတ်ဖို့စာလော?”

ယဇ်ပုရောဟိတ်အကြီးရို့စာ ပြောကတ်လီရေ၊ “ကဲသာမင်းကြီးကို ပယ်ရို့ အကျွန်ရို့မာ အရာတစ်ယောက်လည်း မင်း မဟိပါ။” 16ယင်းခါ ပိလတ်စာ ယေရှုကို ကားတိုင်မာ တင်ရို့ သတ်ဖို့အတွက် သူရို့အလက်မာ အပ်လိုက်လီရေ။ ယင်းအတွက်န စစ်သားရို့စာ ယေရှုကို ယူလားခကတ်လီရေ။

ယေရှုကို ကားတိုင်မာ တင်ခြင်း

(မဿဲ ၂၇:၃၂-၄၄၊ မာကု ၁၅:၂၁-၃၂၊ လုကာ ၂၃:၂၆-၃၉)

17အသျှင်ယေရှုစာ ကိုယ့်ကားတိုင်ကို ရွက်ယူလားရို့ “အဂေါင်းခွံ” ဟို့ ခေါ်စာ နေရာတစ်ခုတို့ ရောက်လီရေ။ ယင်းနေရာကို ဟေဗြဲဘာသာစကားန “ဂေါလဂေါသ” ဟို့ ခေါ်ရေ။ 18ယင်းနေရာမာ စစ်သားရို့စာ ယေရှုကို ကားတိုင်မာ တင်ကတ်လီရေ။ ယင်းခါ သူရို့စာ ယေရှုနအတူ အခြားနှစ်ယောက်ကိုလည်း ကားတိုင်မာ တင်ကတ်လီရေ။ သူရို့စာ ယေရှုအနားက တစ်ဖက်တစ်ယောက် ဟိကတ်လီရေ။ ယေရှုစာ သူရို့ နှစ်ယောက်အလယ်မာ ဟိလီရေ။

19– 20အုပ်ချုပ်သူကြီးပိလတ်စာ အပြစ်ဖေါ်ပြချက် ကမ္ဗည်းစာတစ်ခု ရွီးလီရေ။ ယင်းကမ္ဗည်းစာကို ကားတိုင်မာ ယေရှုအဂေါင်းထက်က ကပ်လီရေ။ ယင်းကမ္ဗည်းစာမာ၊ “နာဇရက်မြို့သျှေသား ယေရှု ယုဒလူမျိုးရို့မာ မင်း” ဟို့ ဟေဗြဲဘာသာစကား၊ ရောမဘာသာစကား အရာ ဂရိဘာသာစကားန ရွီးရို့ ဟိလီရေ။ ယေရှုကို ကားတိုင်မာ တင်လီစာ နေရာစာ မြို့နအပါး ဟိလီရေ။ ယင်းအတွက်န ယုဒလူအများကြီး ယင်းကမ္ဗည်းစာကို ဖတ်ကတ်လီရေ။

21ယုဒလူမျိုးရို့မာ ယဇ်ပုရောဟိတ်အကြီးရို့စာ ပိလတ်ကို ပြောကတ်လီရေ၊ “‘ယုဒလူမျိုးရို့မာ မင်း’ မရွီးဘိုင်းန ‘ဒေသူ ပြောရေ၊ ငါ ယုဒလူမျိုးရို့မာ မင်း’ ဟို့ ရွီးပါ။” 22ယင်းခါ သူစာ ပြောလီရေ၊ “ငါ ရွီးစာကို အရာ မပြောင်းလှဲဗျာ။”

23ယေရှုကို ကားတိုင်မာ တင်ပြီးရေနောက် စစ်သားရို့စာ ယေရှု ကိုယ်ရုံကို လေးပိုင်းပိုင်းရို့ တစ်ယောက် တစ်ပိုင်းစီ ဝီကတ်လီရေ။ ယင်းနောက် သူရို့စာ အင်္ကျီကိုလည်း ယူကတ်လီရေ။ ယင်းအင်္ကျီမာ တစ်ခုလည်း ခြုပ်သား မဟိလီ။ ယင်းအင်္ကျီစာ အထက်အစွန်းကပင် အောက်အစွန်းတိုင်အောင် ရက်စာအင်္ကျီ ဖြစ်တေ။ 24ယင်းအင်္ကျီကို ကြည့်ရို့ စစ်သားရို့စာ ကိုယ်ရို့အချင်းချင်း ပြောကတ်လီရေ၊ “ဒေ အင်္ကျီကို မဆုတ်ဘိုင်းန မဲဖေါက်ရို့ အသူ ရမည်လည်း ကြည့်မည်။” မဲဖေါက်ဖို့စာ အကြောင်းကို ကျမ်းစာမာ ရွီးရို့ ဟိရေ၊
“သူရို့ ငါ့အဝတ်ကို ကိုယ်ရို့အထဲမာ ဝီရို့ ယူကတ်လီရေ၊
အရာ ငါ့အင်္ကျီအတွက် မဲဖေါက်ကတ်လီရေ။”

25ယင်းခါ ယေရှုကို တင်ထားစာ ကားတိုင်အနားမာ ယေရှု အမိ၊ ယေရှု အမိမာ ညီမ၊ ကလောဖ မယား မာရိ အရာ မာဂဒလမြို့သမ မာရိလည်း ရပ်ရို့ ဟိလီရေ။ 26ယေရှုစာ ကိုယ့်အမိန ကိုယ်ချစ်စာ တပည့်ကို ရပ်ရို့ မြင်လီရေ။ ယင်းခါ သူစာ ကိုယ့်အမိကို ပြောလီရေ၊ “အမိ၊ အမိမာ သားကို ကြည့်လိုက်။” 27ယင်းနောက် ကိုယ်ချစ်စာ တပည့်ကို ပြောလီရေ၊ “အဝေး၊ နင့် အမိကို ကြည့်လိုက်။” ယင်းအတွက်န ထိုတပည့်စာ ယေရှု အမိကို ကြည့်ရှုစောင့်သျှောက်ရို့ ထားဖို့အတွက် ကိုယ့်အိမ်တို့ ခေါ်ယူလားခလီရေ။

ယေရှု ကားတိုင်ထက်မာ အသက်စွန့်ခြင်း

(မဿဲ ၂၇:၄၅-၅၆၊ မာကု ၁၅:၃၃-၄၁၊ လုကာ ၂၃:၄၄-၄၉)

28ယင်းနောက် ယေရှုစာ အလုပ်အားကုံး ပြီးဆုံးဗျာဆိုစာကို သိလီရေ။ အရာ သူစာ ကျမ်းစာမာ ရွီးရို့ ဟိစာစကား ပြည့်စုံဖို့အတွက်၊ “ငါ ရီသောက်မွတ်တေ” ဟို့ ပြောလီရေ။ 29ယင်းခါ ယင်းနေရာမာ ပုံးရည်အပြည့်န အိုးတစ်လုံး တည်ရို့ ဟိလီရေ။ ယင်းအတွက်န စစ်သားရို့စာ ဖေါ့တုံးတစ်တုံးကို ယူရို့ ယင်းပုံးရည်အိုးမာ နှစ်လီရေ။ ယင်းနောက် ယင်းဖေါ့တုံးကို အပင်အခက်တစ်ခက်မာ ချိုင်ရို့ ယေရှုပစမာ တို့လီရေ။ 30ယေရှုစာ ယင်းပုံးရည်ကို သောက်ရို့ ပြီးရေခါ၊ “အလုပ် ပြီးဗျာ” ဟို့ ပြောလီရေ။ ယင်းနောက် သူစာ အဂေါင်းကို အောက်တို့ ငုံ့ရို့ အသက် စွန့်လီရေ။

31ယင်းနိစာ လွတ်မြောင့်ခြင်းပွဲအတွက် အစီစဉ်ချစာနိ ဖြစ်တေ။ (နောက်တစ်ရက်နိစာ အရေးကြီးစာ သတင်းနိ ဖြစ်တေ၊ အကြောင်းကား ယင်းနိစာ လွတ်မြောင့်ခြင်းပွဲနိ ဖြစ်တေ)။ ယင်းအတွက်န ယုဒဂေါင်းဆောင်ရို့စာ ထိုအသီကောင်တိကို သတင်းနိမာ ကားတိုင်ထက်မာ ထားဖို့ မလိုကတ်လီ။ သူရို့စာ အုပ်ချုပ်သူကြီးပိလတ်တို့ လားရို့ တောင်းပန်ကတ်လီရေ၊ “အသျှင်၊ ကားတိုင်မာ ဟိသူရို့ အယင် သီလတ်အောင် သူရို့မာ အခြီတိကို ချိုးဖို့အတွက် စစ်သားရို့ကို အာဏာချလိုက်ပါ၊ အကြောင်းကား ဒေနိခါ ထိုအသီကောင်တိကို ကားတိုင်က အယင် ချဘိုက်လိုက်ရပါဖို့။” 32ယင်းခါ စစ်သားရို့စာ လာရို့ ယေရှုနအတူ ကားတိုင်မာ တင်လီစာ လူနှစ်ယောက် အခြီကို ချိုးဘိုက်လိုက်လီရေ။

33ယင်းနောက် ယေရှုတို့ လာရေခါ ယေရှု သီရို့ဟိစာကို မြင်ကတ်လီရေ။ ယင်းအတွက်န သူရို့စာ ယေရှု အခြီကို မချိုးကတ်လီ။ 34ယေကေလည်း စစ်သားတစ်ယောက်စာ ယေရှုနံဘေးမာ လှံနထိုးလီရေ။ ယင်းခါ ချက်ချင်း ယေရှုနံဘေးက သွီးန ရီထွက်လာလီရေ။ 35နင်ရို့လည်း ကျုံကတ်ပတ်စီအတွက် ထိုဖြစ်ပျက်ခြင်းကို ကိုယ်တိုင် မြင်ဖူးသူစာ သက်သီ ပီးလီရေ။ သူပီးစာ သက်သီ မှန်ရေ အရာ ကိုယ်ပီးစာ သက်သီ မှန်ရေဆိုစာကို သူကိုယ်တိုင် သိရေ။

36ကျမ်းစာမာ ရွီးရို့ ဟိရေ၊ “သူ၏ အရိုးတစ်ချောင်းလည်း ကျိုးရမည် မဟုတ်။” ထိုစကား ပြည့်စုံဖို့အတွက် ဒေပိုင် ဖြစ်ပျက်လီစာ ဖြစ်တေ။ 37အခြားတစ်ခု ပုဒ်မမာ ရွီးရို့ ဟိရေ၊ “သူရို့စာ ကိုယ်ရို့ လှံန ထိုးသူကို မော်ကြည့်ကတ်လိမည်။”

ယေရှုကို သင်္ဂြိုဟ်ခြင်း

(မဿဲ ၂၇:၅၇-၆၁၊ မာကု ၁၅:၄၂-၄၇၊ လုကာ ၂၃:၅၀-၅၆)

38ယင်းနောက် အရိမသဲမြို့သား ယောသပ်စာ အုပ်ချုပ်သူကြီးပိလတ်တို့ လားရို့ ယေရှုအကောင်တော်ကို ယူလားဖို့အတွက် အခွင့်တောင်းလီရေ။ ယောသပ်စာ ယေရှုတပည့် တစ်ယောက် ဟိလီရေ၊ ယေကေလည်း သူစာ ယုဒဂေါင်းဆောင်ရို့ကို ကြောက်တေအတွက်န ကိုယ့်ကျုံခြင်းကို လူရို့ဘားမာ ဖေါ်ပြဖို့မဝံ့လီ။ ယင်းခါ ပိလတ်စာ သူ့ကို အခွင့်ပီးလီရေ။ ယင်းအတွက်န ယောသပ်စာ လာရို့ ယေရှု အကောင်တော်ကို ယူလားခလီရေ။ 39ယင်းခါ နိကောဒန်လည်း လာလီရေ အရာ သူစာ အမွှီးနံသာပေါင်း သုံးဆယ်နသုံးသစ်လှောက်ကို ယူရို့ လာလီရေ။ နိကောဒန်စာ အယင်တစ်ခေါက် ညဉ့်မာ ယေရှုတို့ လာလီသူ ဖြစ်တေ။ 40ယောသပ်န နိကောဒန်စာ ယေရှု အကောင်တော်ကို ယူလားခကတ်လီရေ။ ယင်းနောက် သူရို့နှစ်ယောက် ယုဒလူမျိုးရို့ သင်္ဂြိုဟ်စာ ထုံးစဉ်အတိုင်း ယေရှု အကောင်တော်မာ အမွှီးနံသာပေါင်းကို လူးရို့ ခြေသားအဝတ်န ရိုက်ကတ်လီရေ။

41ယေရှုကို ကားတိုင်မာ တင်ရို့ အသီသတ်လီစာ နေရာမာ ဥယျာဉ်တစ်ခု ဟိလီရေ။ ထိုဥယျာဉ်မာ သင်္ချိုင်းဂူ အသစ်တစ်ခု ဟိလီရေ။ ထိုသင်္ချိုင်းဂူအသစ်မာ တစ်ယောက်ကိုလည်း မထားလီသိ။ 42ယင်းနိစာ ယုဒလူမျိုးရို့မာ လွတ်မြောင့်ခြင်းပွဲအတွက် အစီစဉ်ချစာနိ ဖြစ်တေ။ ယင်းအတွက်န သူရို့စာ အပါးမာဟိစာ သင်္ချိုင်းဂူမာ ယေရှု အကောင်တော်ကို ထားကတ်လီရေ။