John 2

ရီကို စပျစ်ရည် လုပ်ခြင်း

1နှစ်ရက်ရွန်ရေခါ ဂါလိလဲပြည်နယ်မာဟိစာ ကာနမြို့သျှေမာ လက်ဆောင်ပွဲတစ်ပွဲ ဖြစ်လီရေ။ ယင်းလက်ဆောင်ပွဲမာ ယေရှု အမိ ရောက်ရို့ ဟိလီရေ။ 2ထိုလက်ဆောင်ပွဲမာ ယေရှုန သူ့တပည့်ရို့ကိုလည်း ဖိတ်ခေါ်ရို့ ဟိလီရေ။ 3ထိုပွဲမာ စပျစ်ရည် ကုန်လားခရေခါ ယေရှု အမိစာ ယေရှုကို ပြောလီရေ၊ “ဒေ လူရို့မာ စပျစ်ရည် ကုန်လားခဗျာ။”

4ယေရှုစာ ကိုယ့်အမိကို ပြောလီရေ၊ “အမိ၊ ဒေ အကြောင်းမာ အကျွန့်ကို ဇာဖို့ ပြောစာလည်း? အကျွန့်မာ အဂုလည်း အလုပ်လုပ်ဖို့စာ အချိန်မကျသိ။”

5ယင်းခါ ယေရှု အမိစာ ပြုဇုသူရို့ကို ပြောလီရေ၊ “နင်ရို့ ဒေသူ ပြောစာပိုင် လုပ်ကတ်။”

6 ယုဒဘာသာရေး ထုံးစဉ်အတိုင်း သန့်စင်အောင် လုပ်ဖို့အတွက် ယင်းနေရာမာ ကျောက်ဒေါကြီး ခြောက်လုံး တည်ရို့ ဟိလီရေ။ ယင်းဒေါကြီးတိမာ အနည်းအများ ရီအိုးခွက် ခုနစ်လုံးရှစ်လုံးစီလှောက် ကန်လီရေ။ 7ယေရှုစာ ထိုပြုဇုသူရို့ကို ပြောလီရေ၊ “ဒေ ဒေါကြီးတိမာ ရီပြည့်အောင် ဖြည့်ကတ်။” ယင်းခါ ထိုပြုဇုသူရို့စာ ယေရှု ပြောစာပိုင် ယင်းဒေါကြီးတိမာ ရီအပြည့်ဖြည့်ကတ်လီရေ။ 8ယင်းနောက် ယေရှုစာ သူရို့ကို ပြောလီရေ၊ “ဒေဂု ဒေ ဒေါကြီးက တစ်ခွက်ကျုန်းရို့ ပွဲထိန်းတို့ လားရို့ ပီးခီ။” ယင်းခါ ထိုပြုဇုသူရို့စာ ယေရှု ပြောစာစကားအတိုင်း ပွဲထိန်းတို့ လားရို့ ပီးကတ်လီရေ။

9ပွဲထိန်းစာ ရီကဖြစ်စာ စပျစ်ရည်ကို တစ်ဖဲ့ မြည်းကြည့်လီရေ။ ဒေ စပျစ်ရည် ဇာက ရလီရေလည်းဆိုစာကို ပွဲထိန်းစာ မသိလီ၊ ယေကေလည်း ပြုဇုသူရို့စာ သိလီကတ်တေ။ ပွဲထိန်းစာ မသိရေအတွက်န သမက်သျှာကို ခေါ်ရို့ ပြောလီရေ၊ 10“လူရို့မာကား ပွဲစားလာသူရို့အတွက် ပထမဆုံး စပျစ်ရည် အကောင်းဆုံးကို တည်ပီးရေ။ ယင်းနောက် လူရို့ ဝအောင် သောက်ရို့ မုန်းရေခါ စပျစ်ရည် အညံ့ကို တည်ပီးရေ။ ငါ မြင်စာကား၊ နင့်မာ ဒေဂုလည်း စပျစ်ရည် အကောင်းဆုံးကို ထားသိရေ။”

11ယေရှု ပထမဆုံး ဒေ အံ့ဩဖွယ်-နိမိတ်လက္ခဏာ အလုပ်ကို လုပ်ရို့ ဂါလိလဲပြည်နယ်မာဟိစာ ကာနမြို့သျှေမာ ကိုယ့်ဘုန်းတန်ခိုးကို ဖေါ်ပြလီရေ။ ယင်းအတွက်န သူ့တပည့်ရို့စာ သူ့ကို ကျုံကတ်လီရေ။

12ယင်းနောက် ယေရှုစာ ကိုယ့်မာ အမိ၊ ကိုယ့်မာ ညီရို့ အရာ တပည့်ရို့နအတူ ကပေရနောင်မြို့သျှေတို့ လားရို့ လိုင်းကေရက် နီလီရေ။

ဝိပဿနာကျောင်းအတွက်မာ ယေရှု စိတ်ဒုက္ခရခြင်း

(မဿဲ ၂၁:၁၂-၁၃၊ မာကု ၁၁:၁၅-၁၇၊ လုကာ ၁၉:၄၅-၄၆)

13ယုဒလူမျိုးရို့မာ လွတ်မြောင့်ခြင်းပွဲ ကျဖို့စာအချိန် ပါးလာရေခါ ယေရှုစာ ယေရုရှလင်မြို့တို့ ကြွလီရေ။ 14ယင်းနောက် သူစာ ဝိပဿနာကျောင်းတို့ ကြွလီရေ။ ယင်းခါ သူစာ လူရို့ ဝိပဿနာကျောင်းထဲမာ နွားတွီး၊ သိုးဆိတ်၊ ခေါ် ရောင်းနီကတ်စာကို မြင်ရလီရေ အရာ သူစာ ထိုင်ရို့ တန်းကားဖနီကတ်စာကိုလည်း မြင်ရလီရေ။ 15ယင်းခါ သူစာ ဘုတ်ဖို့အတွက် ကြိုးတစ်ကြိုး ကျိုက်လီရေ။ ယင်းနောက် သူစာ ယင်းကြိုးကျိုက်န ရောင်းနီကတ်စာ လူရို့ အားကုံးသူကို ဝိပဿနာကျောင်းထဲက နှင်ထုတ်လီရေ အရာ နွားတွီးန သိုးဆိတ်တိကိုလည်း နှင်ထုတ်လီရေ။ ယင်းနောက် သူစာ တန်းကားတင်စာ ခုံတိကို ပြန်ဘိုက်လိုက်လီရေ။ ယင်းအတွက်န တန်းကားတိ ကြင်းကျလားခလီရေ။

16ယေရှုစာ ခေါ် ရောင်းသူရို့ကို ပြောလီရေ၊ “ဒေ ဝန်အားကုံးကို ယူရို့ ထွက်လားလီ။ ငါ့အဖ အိမ်ကို ကုန်သေဈီး မလုပ်ကတ်ကေ့!”

17ယင်းပိုင် ဖြစ်ပျက်တေခါ၊ “ကိုယ်တော်၏ အိမ်ကို အကျွန် ချစ်ခင်တွယ်တာပါရေ။ ယင်းအတွက်န အကျွန့်မာ စိတ်နှလုံး မီးလောင်စာပိုင် တွိနီပါဗျာ” ဟို့ ကျမ်းစာမာ ရွီးရို့ဟိစာ စကားကို တပည့်ရို့စာ တွက်ရကတ်လီရေ။

18ယင်းခါ ယုဒဂေါင်းဆောင်ရို့စာ ယေရှုကို ပြောကတ်လီရေ၊ “အဝေး၊ နင့်မာ အမှန် ဒေပိုင် လုပ်ပိုင်ခွင့် ဟိရေ ဟို့ နင် ငါရို့ကို ဇာ အံ့ဩဖွယ်-နိမိတ်လက္ခဏာ အလုပ်ကို လုပ်ရို့ သက်သီပြဖို့စာလည်း?”

19ယေရှုစာ သူရို့ကို အဖြေပီးလီရေ၊ “ယင်းပိုင်ဆိုကေ ကိုယ်ဘင်ရို့ ဒေ ဝိပဿနာကျောင်းကို ဖြိုဘိုက်လိုက်ကတ်။ သုံးရက်အထဲတွင်းမာ ငါ အရာတစ်ပြန် ဆောက်ဖို့။”

20ယေရှု ပြောစာစကားကို ကြားရို့ ယုဒဂေါင်းဆောင်ရို့စာ သူ့ကို ပြောကတ်လီရေ၊ “ဒေ ဝိပဿနာကျောင်းကို နှစ်ပေါင်း လေးဆယ်နခြောက်နှစ်ပတ်လုံး ဆောက်ရလီရေ အရာ နင်လော ဒေ ဝိပဿနာကျောင်းကို သုံးရက်အထဲတွင်းမာ ပြန်ရို့ ဆောက်ဖို့စာ!” 21ယေကေလည်း ယေရှု ဝိပဿနာကျောင်းကို ပြောစာစကားစာ ကိုယ့်ခန္ဓာအကြောင်းကို ပြောလီစာ ဖြစ်တေ။

22ယင်းအတွက်န ယေရှု သီရာက ပြန်ရှင်ထမြောင့်ပြီးရေနောက် သူ့တပည့်ရို့စာ ယေရှု ပြောခစာ စကားတိကို တွက်ရကတ်လီရေ။ ယင်းခါ သူရို့စာ ကျမ်းစာမာ ရွီးရို့ဟိစာန ယေရှု ပြောခစာ စကားတိကို ကျုံကတ်လီရေ။

လူရို့ စိတ်နှလုံးကို ယေရှု သိခြင်း

23လွတ်မြောင့်ခြင်းပွဲနိမာ ယေရှု ယေရုရှလင်မြို့မာ လုပ်လီစာ အံ့ဩဖွယ်အလုပ်တိကို မြင်ရို့ လူအများကြီး ယေရှုကို ကျုံကတ်လီရေ။ 24ယေကေလည်း ယေရှုစာ လူတိုင်း စိတ်နှလုံးမာ စဉ်းစားချက်ကို သိလီရေ။ ယင်းအတွက်န သူစာ ထိုလူရို့ကို မကျုံလီ။ 25သူစာ လူရို့ စိတ်နှလုံးမာ ဇာဟိရေလည်းဆိုစာကို သိလီရေ။ ယင်းအတွက်န လူအကြောင်းကို သူ့ဘားမာ တစ်ယောက်လည်း ပြောပြဖို့ အလိုမဟိလီ။