John 20

ယေရှု သီရာက ပြန်ရှင်ထမြောင့်ခြင်း

(မဿဲ ၂၈:၁-၁၁၊ မာကု ၁၆:၁-၈၊ လုကာ ၂၄:၁-၁၂)

1တလင်္ဂနွီနိ မိုးသောက်စောစောက နီမထွက်ခင် တစ်ဖဲ့အယင်က မာဂဒလမြို့သမ မာရိစာ ယေရှုကို ထားစာ သင်္ချိုင်းဂူတို့ လားလီရေ။ ယင်းခါ သူစာ သင်္ချိုင်းဂူဝမာ ပိတ်ထားစာ ကျောက်လုံး ရွိရို့ ဟိစာကို မြင်လီရေ။ 2ယင်းအတွက်န မာရိစာ ပေတရုန အသျှင်ယေရှုချစ်စာ အခြားတပည့်တို့ ဗြီးလားခလီရေ။ ယင်းနောက် မာရိစာ သူရို့ကို ပြောလီရေ၊ “အသျှင်၏ အကောင်တော်ကို လူရို့ သင်္ချိုင်းဂူအထဲက ထုတ်ယူလားခပါဗျာ။ သူရို့စာ သူ့အကောင်တော်ကို ဇာမာ ထားရေလည်းဆိုစာကို အကျွန်ရို့ မသိပါ။”

3ယင်းခါ ပေတရုန အခြားတပည့် တစ်ယောက်စာ ယင်းနေရာက ထွက်ရို့ သင်္ချိုင်းဂူနားတို့ လားကတ်လီရေ။ 4သူရို့ နှစ်ယောက်စာ အပြိုင်ဗြီးရို့ လားကတ်လီရေ၊ ယေကေလည်း အခြားတပည့်စာ ပေတရုထက် အပြင်း ဗြီးလားရို့ သင်္ချိုင်းဂူနားတို့ အယင် ရောက်လီရေ။ 5အရာ သူစာ သင်္ချိုင်းဂူထဲတို့ ငုံ့ရို့ ကြည့်လီရေ။ ယင်းခါ သူစာ ယေရှုအကောင်တော်မာ ရိုက်စာအဝတ်တိ ကျရို့ ဟိစာကို မြင်လီရေ၊ ယေကေလည်း သူစာ သင်္ချိုင်းဂူထဲတို့ မဝင်လီ။ 6ယင်းနောက် ပေတရုလည်းသောက် သူ့နောက်ကနောက်က လိုက်လာပြီးကေ သင်္ချိုင်းဂူနားတို့ ရောက်လီရေ။ အရာ သူစာ သင်္ချိုင်းဂူထဲတို့ ဝင်လီရေ။ ယင်းခါ သူစာ အသျှင်ယေရှု အကောင်တော်မာ ရိုက်စာအဝတ်တိ ကျရို့ ဟိစာကို မြင်လီရေ။ 7သူစာ ယေရှုအဂေါင်းမာ ရိုက်စာ ပဝါပိုင်းကိုလည်း မြင်လီရေ၊ ယေကေလည်း ယင်းပဝါပိုင်းစာ ခန္ဓာမာ ရိုက်စာ အဝတ်တိနအတူ မဟိဘိုင်းန အခြားတစ်နေရာမာ လိပ်ရို့ ဟိလီရေ။ 8ယင်းခါ သင်္ချိုင်းဂူနားမာ ပထမ ရောက်လီစာ အခြားတပည့်လည်းသောက် အထဲတို့ ဝင်လီရေ အရာ သူစာ ဖြစ်ပျက်ခြင်းတိကို မြင်ရို့ ကျုံလီရေ။ 9ယေကေလည်း ယေရှုစာ သီရာက ပြန်ရှင်ထမြောင့်ရဖို့ ဟို့ ကျမ်းစာမာ ပြောထားစာ စကားကို တပည့်ရို့စာ ယင်းခါလည်း နားမလည်လီကတ်သိ။

မာဂဒလမြို့သမ မာရိဘားမာ ယေရှု အမြင်ခံခြင်း

(မာကု ၁၆:၉-၁၁)

10ယင်းနောက် ထိုတပည့်နှစ်ယောက်စာ ပြန်လားခကတ်လီရေ။ 11ယေကေလည်း မာဂဒလမြို့သမ မာရိစာ သင်္ချိုင်းဂူခေါင်းနားမာ ရပ်ပြီးကေ ငိုရို့ နီလီရေ အရာ သူစာ ငိုရို့အတိုင်း သင်္ချိုင်းဂူခေါင်းထဲတို့ ငုံ့ရို့ ကြည့်လီရေ။ 12ယင်းခါ သူစာ အဝတ်အဖြူဝတ်ရို့ ဂေါင်းခင်နတ်သားနှစ်ပါး ထိုင်ရို့ ဟိစာကို မြင်လီရေ။ ယင်းဂေါင်းခင်နတ်သားရို့စာ အသျှင်ယေရှု အကောင်တော်ကို တင်ထားစာနေရာမာ ဂေါင်းရင်းက တစ်ပါး အရာ အခြီရင်းက တစ်ပါး ထိုင်ရို့ ဟိကတ်လီရေ။ 13သူရို့စာ မာရိကို ပြောကတ်လီရေ၊ “နမှ၊ နင် ဇာဖို့ ငိုနီစာလည်း?” ယင်းခါ မာရိစာ သူရို့ကို ပြောလီရေ၊ “အကျွန့် အသျှင်၏ အကောင်တော်ကို လူရို့ ယူလားခကတ်ပါဗျာ။ သူ့ကို ဇာမာ ထားရေလည်းဆိုစာကို အကျွန် မသိပါ။” 14မာရိစာ ထိုစကားကို ပြောရို့ နောက်တို့ လှည့်ကြည့်ရေခါ အသျှင်ယေရှု ရပ်ရို့ ဟိစာကို မြင်လီရေ၊ ယေကေလည်း သူစာ ယေရှုကို အမှတ်မကျလီ။

15ယေရှုစာ မာရိကို ပြောလီရေ၊ “နမှ၊ နင် ဇာဖို့ ငိုနီစာလည်း? အရာ နင် အသူ့ကို ရှာနီစာလည်း?” ယင်းခါ မာရိစာ ယေရှုကို ဥယျာဉ်ကို သုတ်သင်သူ ထင်ရို့ ပြောလီရေ၊ “အမောင်၊ ကိုယ်ဘင် အသျှင်၏ အကောင်တော်ကို အမှန် ယူလားခရေဆိုကေ ဇာမာ ထားရေလည်းဆိုစာကို အကျွန့်ကို ပြောပါ။ အကျွန် သူ့ကို ယူလားပါဖို့။”

16ယေရှုစာ သူ့ကို၊ “မာရိ” ဟို့ ခေါ်လီရေ။ ယင်းခါ မာရိစာ ယေရှုဖက်တို့ လှည့်ရို့ ဟေဗြဲဘာသာစကားန၊ “ရဗ္ဗုနိ” ဟို့ ထူးလီရေ။ (ရဗ္ဗုနိ အဓိပ္ပါယ်ကား ဆရာ ဖြစ်တေ)။

17ယေရှုစာ မာရိကို ပြောလီရေ၊ “နင် ငါ့ကို တည်းရို့ မထားကေ့။ ငါ ဒေဂုလည်း အဖတို့ မလားသိ၊ ယေကေလည်း နင် ငါ့ ညီအစ်ကိုမောင်နမှရို့တို့ လားလီ အရာ သူရို့ကို ပြောခီ၊ ‘ငါစာ ငါ့အဖန ငါ့ထာဝရဘုရားတို့ လားဖို့ဗျာ။ သူစာ နင်ရို့ အဖလည်း ဖြစ်တေ အရာ နင်ရို့ ထာဝရဘုရားလည်း ဖြစ်တေ။’” 18ယင်းခါ မာဂဒလမြို့သမ မာရိစာ အသျှင်ယေရှုကို မြင်ခစာန အသျှင်ယေရှု မှာခစာစကားတိကို တပည့်ရို့တို့ လားရို့ ပြောပြလီရေ။

ကိုယ့်တပည့်ရို့ဘားမာ ယေရှု အမြင်ခံခြင်း

(မဿဲ ၂၈:၁၆-၂၀၊ မာကု ၁၆:၁၄-၁၈၊ လုကာ ၂၄:၃၆-၄၉)

19ယင်းနိစာ တလင်္ဂနွီနိ ဖြစ်တေ။ ယင်းနိ ညဇာဖက် နီဝင်ဖို့လုတ်မာ တပည့်ရို့ အားကုံးသူ အိမ်တစ်အိမ်မာ တစ်စုတည်း စုကတ်လီရေ။ သူရို့စာ ယုဒဂေါင်းဆောင်ရို့ကို ကြောက်တေအတွက်န အိမ်မာ လမ်းခဝတိကို ပိတ်ရို့ ထားကတ်လီရေ။ ယင်းအချိန်ခါ ယေရှုစာ ဗြုန်းခနိုင်း ကြွလာပြီးကေ တပည့်ရို့ အလယ်မာ ရပ်ရို့ ပြောလီရေ၊ “နင်ရို့မာ ငြိမ်းချမ်းခြင်း ဟိစီ။” 20ယေရှုစာ ယင်းစကားကို ပြောပြီးရေနောက် တပည့်ရို့ကို ကိုယ့်အလက် နှစ်ဖက်န ကိုယ့်နံဘေးကို ပြလီရေ။ ယင်းခါ တပည့်ရို့စာ အသျှင်ကို မြင်ရရေအတွက်န ကောင်းကောင်း ပျော်ကတ်လီရေ။

21ယင်းနောက် ယေရှုစာ အရာတစ်ခေါက် တပည့်ရို့ကို ပြောလီရေ၊ “နင်ရို့မာ ငြိမ်းချမ်းခြင်း ဟိစီ။ အဖ ငါ့ကို ရွှတ်လိုက်တေပိုင် နင်ရို့ကိုလည်း ငါ ရွှတ်တေ။” 22ထိုစကားကို ပြောပြီးရေနောက် ယေရှုစာ တပည့်ရို့အထက်က ဖူးခနိုင်းမှုတ်ရို့ ပြောလီရေ၊ “နင်ရို့ သန့်ရှင်းသောဝိညာဉ်တော်ကို လက်ခံယူကတ်။ 23နင်ရို့ အခြားတစ်ယောက်ကို ခွင့်ရွှတ်တေဆိုကေ သူစာ ခွင့်ရွှတ်ခြင်းကို ရလိမည်။ နင်ရို့ အခြားတစ်ယောက်ကို ခွင့်မရွှတ်ဆိုကေ သူစာ ခွင့်ရွှတ်ခြင်းကို ရလိမည် မဟုတ်။”

သောမ ကျုံခြင်း

24အသျှင်ယေရှု ကိုယ့် တပည့်ရို့တို့ ရောက်လာလီရေခါ တပည့် တစ်ဆယ့်နှစ်ယောက်အထဲက အမြွှာပူးခေါ်သူ သောမစာ သူရို့နအတူ မဟိလီ။ 25ယင်းနောက် အခြားတပည့်ရို့စာ သောမကို ပြောကတ်လီရေ၊ “ငါရို့ အသျှင်ကို မြင်ရကတ်ပျာ။” ယေကေလည်း သောမစာ သူရို့ကို ပြောလီရေ၊ “သူ့အလက် နှစ်ဖက်မာ သံမှိုခတ်စာနေရာကို ငါ မမြင်ရကေ အရာ ယင်းနေရာမာ ငါ့လက်ညှိုးန ထိုးကြည့်ဖို့ မရကေ ငါ တစ်ခါလည်း မကျုံ၊ အရာ သူ့နံဘေးမာလည်းသောက် ငါ့အလက်န ကိုင်ကြည့်ဖို့ မရကေ ငါ မကျုံ။”

26ယင်းနောက် ရှစ်ရက်ကြာရေခါ တပည့်ရို့စာ အရာတစ်ပြန် ယင်းအိမ်ထဲမာ တစ်စုတည်း စုကတ်လီရေ။ ယင်းခါ သူရို့နအတူ သောမလည်း ဟိလီရေ။ သူရို့စာ ယင်းအိမ်မာ ဟိသမျ လမ်းခဝတိကို ပိတ်ရို့ ထားကတ်လီရေ၊ ယေကေလည်း ယေရှုစာ ကြွလာရို့ တပည့်ရို့အလယ်မာ ရပ်ရို့ ပြောလီရေ၊ “နင်ရို့မာ ငြိမ်းချမ်းခြင်း ဟိစီ။” 27ယင်းနောက် သူစာ သောမကို ပြောလီရေ၊ “ငါ့အလက် နှစ်ဖက်မာ သံမှိုခတ်စာနေရာကို နင့်လက်ညှိုးန ထိုးကြည့်။ အရာ နင့်အလက်ကို ဆန့်ရို့ ငါ့နံဘေးကို ကိုင်ကြည့်။ နင် မယုံသင်္ခါ စိတ်ကို မထားဘိုင်းန ကျုံခြင်းတရားကို ထား။” 28ယင်းခါ သောမစာ ယေရှုကို ပြောလီရေ၊ “ကိုယ်ဘင်စာ အကျွန့် အသျှင်န အကျွန့် ထာဝရဘုရား ဖြစ်ပါရေ။” 29ယေရှုစာ သူ့ကို ပြောလီရေ၊ “သောမ၊ နင် ငါ့ကို မြင်ရရေအတွက်န ကျုံစာလော? ငါ့ကို မမြင်ဘိုင်းန ကျုံသူရို့စာ အများကြီး မင်္ဂလာ ဟိကတ်တေ။”

30ယေရှုစာ တပည့်ရို့ဘားမာ အရာလည်း အများကြီး အံ့ဩဖွယ်-နိမိတ်လက္ခဏာတိကို လုပ်ရို့ ပြခလီရေ။ ထိုအကြောင်းအရာတိကို ဒေ ကျမ်းစာမာ မရွီးလီ။ 31ယေကေလည်း ဒေ ဟိသမျ အကြောင်းအရာကို ရွီးလီစာ အကြောင်းကား၊ ယေရှုစာ ခရစ်တော် ဖြစ်တေ အရာ သူစာ ထာဝရဘုရား၏ သားတော်လည်း ဖြစ်တေဆိုစာကို နင်ရို့ ကျုံကတ်ပတ်စီအတွက် ဖြစ်တေ။ အရာ နင်ရို့ ကျုံရို့ ယေရှုခရစ်တော်ကနီရို့ ထာဝရအသက်ကို ရကတ်ပတ်စီအတွက် ဖြစ်တေ။