John 21

တပည့်ခုနစ်ယောက်ဘားမာ ယေရှု အမြင်ခံခြင်း

1လိုင်းကေရက် ရွန်ရေခါ အသျှင်ယေရှု တိဗေရိမြစ်ကမ်းနားမာ အရာတစ်ပြန် တပည့်ရို့ဘားမာ အမြင်ခံလီရေ။ 2အမြင်ခံလီစာကား ဒေပိုင်၊ ယင်းခါ တစ်ချိုးတပည့်ရို့စာ တစ်နေရာတည်းမာ ဟိကတ်လီရေ။ သူရို့ ဖြစ်တေကား၊ ပေတရု၊ အမြွှာပူးခေါ်သူ သောမ၊ ဂါလိလဲပြည်နယ် ကာနမြို့သျှေသား နာသနေလ၊ ဇေဗေဒဲသား နှစ်ယောက် အရာ အခြားတပည့် နှစ်ယောက် ဖြစ်ကတ်တေ။ 3ပေတရုစာ အခြားတပည့်ရို့ကို ပြောလီရေ၊ “ငါ ငါးရှာစောင် လားဖို့ဗျာ။” ယင်းခါ သူရို့စာ ပေတရုကို ပြောကတ်လီရေ၊ “ငါရို့လည်း နင်နအတူ လိုက်ဖို့။” ယင်းခါ သူရို့စာ လောင်းမာ တက်ရို့ ငါးရှာဖို့ ထွက်လားကတ်လီရေ၊ ယေကေလည်း သူရို့စာ ယင်းနိ ညဉ့်မာ ငါးတစ်ကောင်လည်း မရကတ်လီ။

4မိုးလင်းလာရေခါ ယေရှုစာ မြစ်ကမ်းနားမာ လာရို့ ရပ်လီရေ၊ ယေကေလည်း တပည့်ရို့စာ ယေရှုကို မှတ်ရို့ မရကတ်လီ။ 5ယင်းခါ ယေရှုစာ တပည့်ရို့ကို မီးလီရေ၊ “ငါ့ အချစ်သားရို့၊ ငါး ရကတ်လော?” တပည့်ရို့စာ အဖြေပီးကတ်လီရေ၊ “မရပါသိ။”

6ယေရှုစာ တပည့်ရို့ကို ပြောလီရေ၊ “ပိုက်ကို နင်ရို့ လောင်းညာဖက်က ချလိုက်။ ယင်းပိုင်ဆိုကေ ရကတ်လိမည်။” သူရို့စာ ယေရှု ပြောရေအတိုင်း ပိုက်ကို ချကတ်လီရေ။ ယင်းခါ ပိုက်မာ ငါးအများကြီး ငြိမ့်ရေအတွက်န သူရို့စာ ပိုက်ကို လောင်းထက်တို့ ငင်တင်ဖို့ မနိုင်ကတ်လီ။

7ယင်းခါ ယေရှု ချစ်စာ တပည့်စာ ပေတရုကို ပြောလီရေ၊ “ထိုသူ အသျှင် ဖြစ်တေ။” ပေတရုစာ၊ “ထိုသူ အသျှင် ဖြစ်တေ” ဟို့ ပြောစာကို ကြားရေခါ ချွတ်ထားလီစာ ပြင်ခံအင်္ကျီကို အရာတစ်ပြန် ဝတ်ရို့ မြစ်တို့ ခုံဆင်းလီရေ။ 8သူရို့စာ မြစ်ကမ်းနားန အဝီး မဟိလီ၊ လက်တောင်နှစ်ရာလှောက်ရာ ဟိလီရေ။ ယင်းအတွက်န အခြားတပည့်ရို့စာ လောင်းမာ တက်ရို့ ငါးအများကြီး ငြိမ့်စာ ပိုက်ကို မြစ်ကမ်းနားတို့ ငင်ယူခကတ်လီရေ။

9သူရို့ မြစ်ကမ်းနားတို့ ရောက်ကတ်တေခါ မီးဖေါ်မာ ငါးကင်ရို့ ဟိစာကို မြင်ရကတ်လီရေ အရာ ပေါင်မုန့်တိကိုလည်း မြင်ရကတ်လီရေ။ 10ယင်းခါ ယေရှုစာ တပည့်ရို့ကို ပြောလီရေ၊ “ဒေဂု ရှာရို့ ရစာငါးက တစ်ကောင်နှစ်ကောင် ယူခ။”

11ပေတရုစာ လောင်းမာ တက်ရို့ ငါးအကြီး တစ်ရာ့ငါးဆယ်န သုံးကောင် ငြိမ့်ရို့ဟိစာ ပိုက်ကို မြစ်ကမ်းနားတို့ ငင်တင်လီရေ။ ဒေလှောက် ငါးအများကြီး ငြိမ့်ရို့လည်း ယင်းပိုက်စာ မစုတ်လီ။ 12ယေရှုစာ တပည့်ရို့ကို ပြောလီရေ၊ “လာလတ်၊ စားခလိုက်ကတ်။” ယင်းခါ သူစာ အသျှင် ဖြစ်တေဆိုစာကို တပည့်ရို့စာ သိကတ်လီရေ။ ယင်းအတွက်န သူရို့စာ၊ “ကိုယ်ဘင် အသူလည်း?” ဟို့ တစ်ယောက်လည်း မီးဖို့ မဝံ့ကတ်လီ။ 13ယင်းနောက် ယေရှုစာ တပည့်ရို့တို့ လားရို့ ပေါင်မုန့်န ငါးကို ဝီပီးလီရေ။ 14အသျှင်ယေရှု သီရာက ပြန်ရှင်ထမြောင့်ပြီးရေနောက် တပည့်ရို့ဘားမာ ဒေ တတိယခေါက် အမြင်ခံလီရေ။

ပေတရုကို ယေရှု တာဝန်ပီးခြင်း

15သူရို့ စားသောက်ရို့ ပြီးကတ်တေခါ ယေရှုစာ ပေတရုကို မီးလီရေ၊ “ယောနသား ရှိမုန်၊ ဒေသူရို့ထက် နင် ငါ့ကို အများ ချစ်လော?” ယင်းခါ ပေတရုစာ ယေရှုကို ပြောလီရေ၊ “ဟုတ်ပါရေ အသျှင်၊ အကျွန် ကိုယ်တော်ကို ချစ်တေဆိုစာကို ကိုယ်တော် သိပါရေ။”

ယေရှုစာ သူ့ကို ပြောလီရေ၊ “ငါ့သိုးဆိတ်သျှေတိကို ကျွေးမွေးပြုဇုရို့ ထားလီ။” 16ယေရှုစာ ပေတရုကို ဒုတိယခေါက် မီးလီရေ၊ “ယောနသား ရှိမုန်၊ နင် ငါ့ကို ချစ်လော?” သူစာ ယေရှုကို ပြောလီရေ၊ “ဟုတ်ပါရေ အသျှင်၊ အကျွန် ကိုယ်တော်ကို ချစ်တေဆိုစာကို ကိုယ်တော် သိပါရေ။” ယေရှုစာ သူ့ကို ပြောလီရေ၊ “ငါ့သိုးဆိတ်တိကို ကြည့်ရှုစောင့်သျှောက်ရို့ ထားလီ။”

17ယင်းနောက် တတိယခေါက် ပေတရုကို မီးလီရေ၊ “ယောနသား ရှိမုန်၊ နင် ငါ့ကို ချစ်လော?” ယေရှု ပေတရုကို သုံးခေါက်တိုင်အောင် မီးလီရေအတွက်န ပေတရု စိတ်ဒုက္ခ ရလီရေ။ ယင်းအတွက်န သူစာ ယေရှုကို ပြောလီရေ၊ “ဟုတ်ပါရေ အသျှင်၊ ကိုယ်တော် ဟိသမျ အားကုံးကို သိပါရေ။ အကျွန် ကိုယ်တော်ကို ချစ်တေဆိုစာကိုလည်း ကိုယ်တော် သိပါရေ။”

ယင်းခါ ယေရှုစာ သူ့ကို ပြောလီရေ၊ “ငါ့သိုးဆိတ်တိကို ကျွေးမွေးပြုဇုရို့ ထားလီ။ 18ငါ နင့်ကို အမှန် ပြောရေ၊ နင် လူပျိုခါ ကိုယ့်ခါးမာ ခါးပန်းကို ပန်းလီရေ အရာ နင် လားချင်စာနေရာတို့ လားလီရေ။ ယေကေလည်း နင် အိုလာရေခါ ကိုယ့်အလက် နှစ်ဖက်ကို ဆန့်ရို့ ပီးလိမည်။ ယင်းခါ အခြားတစ်ယောက်စာ နင့်ခါးမာ ခါးပန်းကို ပန်းလိမည် အရာ နင် မလားချင်စာနေရာတို့ ယူလားလိမည်။” 19ပေတရု ဇာပိုင် သီရဖို့လည်းဆိုစာကို ယေရှု ပြောပြလီစာ ဖြစ်တေ၊ အကြောင်းကား ပေတရု သီခြင်းကနီရို့ ထာဝရဘုရား၏ ဘုန်းတန်ခိုး ပေါ်ထွန်းဖို့။ ထိုစကားတိကို ပြောပြီးရေနောက် ယေရှုစာ ပေတရုကို ပြောလီရေ၊ “နင် ငါ့နောက်က လိုက်။”

20ပေတရုစာ နောက်တို့ လှည့်ရို့ ကြည့်လိုက်တေခါ ယေရှု ချစ်စာ တပည့် နောက်က လိုက်လာစာကို မြင်လီရေ။ သူစာ အယင်တစ်ခေါက် စားပွဲမာ အသျှင်ယေရှုဘားမာ နှီပြီးကေ၊ “အသျှင်၊ ကိုယ်တော်ကို ရန်သူရို့အလက်မာ အပ်ပီးဖို့သူ အသူပါလည်း” ဟို့ မီးလီသူ ဖြစ်တေ။ 21ယင်းတပည့် ကိုယ်ရို့ နောက်က လိုက်လာစာကို မြင်ရေခါ ပေတရုစာ ယေရှုကို ပြောလီရေ၊ “အသျှင်၊ ဒေသူ ဇာ ဖြစ်ပါဖို့လည်း?”

22ယေရှုစာ ပေတရုကို ပြောလီရေ၊ “ငါ လိုရေဆိုကေ ယင်းသူ ငါ မလာသကြား အသက်အရှင် ဟိဖို့။ ယင်းအကြောင်းမာ နင်န ဇာဆိုင်စာလည်း! နင် ငါ့နောက်က လာလတ်။”

23ယင်းအတွက်န ယင်းတပည့်ကို မသီဗျာ ဟို့ ပြောစာစကား အခြားတပည့်ရို့အထဲမာ ပြန့်လားခလီရေ။ ယေကေလည်း ယေရှုစာ ယင်းတပည့်ကို မသီဗျာ ဟို့ ပြောလီစာ မဟုတ်။ “ငါ လိုရေဆိုကေ ယင်းသူ ငါ မလာသကြား အသက်အရှင် ဟိဖို့။ ယင်းအကြောင်းမာ နင်န ဇာဆိုင်စာလည်း” ဟို့ ယေရှု ပြောလီစာ ဖြစ်တေ။

အဆုံးသတ်ချက် စကား

24ယင်းတပည့်စာ ဒေ အကြောင်းအရာတိကို သက်သီ ပီးလီရေ အရာ သူစာ ဒေ အကြောင်းအရာတိကို ရွီးလီရေ။ သူပီးစာ သက်သီ အားကုံး မှန်ရေဆိုစာကို ငါရို့ သိရေ။ 25ယေရှုစာ အရာလည်း အများကြီး အလုပ်လုပ်ခလီရေ။ ယင်းအကြောင်းတိကို တစ်အုပ်တစ်အုပ်စီ ခွဲရို့ ရွီးထားခလီဖို့ဆိုကေ ရွီးထားစာ ကျမ်းစာအုပ်တိကို ဒေ ကမ္ဘာမာ ထားဖို့စာနေရာ ဟိလီဖို့ မဟုတ် ဟို့ ငါ ထင်ရေ။