John 5
သုံးဆယ်နရှစ်နှစ် ရောဂါဖြစ်နီသူ ကောင်းခြင်း
1ယင်းနောက် ယုဒလူမျိုးရို့မာ ဘာသာရေးပွဲတစ်ပွဲ ကျလီရေ။ ယင်းအတွက်န ယေရှုစာ ယေရုရှလင်မြို့တို့ ကြွလီရေ။ 2ယေရုရှလင်မြို့တို့ ဝင်ဖို့စာ လမ်းခဝတစ်ခု ဟိလီရေ။ လူရို့ ယင်းလမ်းခဝကို သိုးဆိတ်လမ်းခဝ ဟို့ ခေါ်ကတ်တေ။ ထိုလမ်းခဝနားမာ ကန်တစ်ကန် ဟိလီရေ။ ယင်းကန်ကို ဟေဗြဲဘာသာစကားန ဗေသေသဒ ဟို့ ခေါ်ရေ။ ထိုကန်ဘောင်မာ အခေါင် ငါးခုမိုးရို့ ဟိလီရေ။ 3ယင်းအခေါင်တိအောက်က မျက်ကန်း၊ အခြီသောင် အရာ ခန္ဓာပိန်စာ ရောဂါသေန အခြား ရောဂါသေရို့လည်း အများကြီး ဟိကတ်လီရေ။ 4 ▼▼ဒေ အခန့်ငယ် ၄-မာ စကားတိ ဂရိဘာသာ ကျမ်းစာအဟောင်းမာ ရွီးရို့ ဟိလော-မဟိလောဆိုစာကို အတိကျ မသိရပါ။
ဂေါင်းခင်နတ်သားတစ်ပါးစာ မကြာမကြာ ဆင်းလာရို့ ယင်းကန်မာ ရီကို လှုပ်လီရေ။ ယင်းကန်မာရီ လှုပ်တေခါ ပထမဆုံး ဆင်းနိုင်ရေလူမာ ဇာရောဂါပင်မဆို ကောင်းလားခလီရေ။ ရောဂါသေရို့စာ ယင်းပိုင် ရီလှုပ်ဖို့စာကို စောင့်ရို့ နီလီကတ်တေ။ 5ယင်းနေရာမာ သုံးဆယ်နရှစ်နှစ်ပတ်လုံး ရောဂါဖြစ်နီစာ လူတစ်ယောက် အိပ်နီရို့ ဟိလီရေ။ 6ယေရှု ယင်းသူ အိပ်နီစာကို မြင်လီရေ။ အရာ ရက်ပေါင်းများစွာ ရောဂါဖြစ်ရို့ ဟိရေဆိုစာကို သိရို့ ယေရှုစာ ယင်းသူကို မီးလီရေ၊ “မိတ်ဆွေ၊ နင့် ရောဂါ ကောင်းချင်ရေလော?” 7ယင်းရောဂါသေစာ ပြောလီရေ၊ “အသျှင်၊ ရီလှုပ်တေခါ အကျွန့်ကို ကန်တို့ ရွက်ရို့ချဖို့သူ တစ်ယောက်လည်း မဟိပါ။ အကျွန် ဆင်းဖို့ကြိုးစားနီစဉ် အခြားတစ်ယောက် အကျွန့်ထက် အယင် ကန်တို့ ဆင်းလားခပါရေ။” 8ယေရှုစာ သူ့ကို ပြောလီရေ၊ “ထ၊ နင့် အိပ်ရာကို ယူရို့ လားနီ။” 9ယင်းခါ ချက်ချင်း သူစာ ရောဂါကောင်းရို့ ကိုယ့်အိပ်ရာကို လိပ်ယူပြီးကေ ထရို့ လားနီလီရေ။ ယင်းနိစာ သတင်းနိ ဖြစ်တေ။ 10ယင်းအတွက်န ယုဒဂေါင်းဆောင်ရို့စာ ရောဂါကောင်းသူကို ပြောကတ်လီရေ၊ “ဒေနိ သတင်းနိ ဖြစ်တေ။ ယင်းအတွက်န နင် ကိုယ့်အိပ်ရာကို ရွက်ယူလားစာ အလုပ်တစ်ခု ဖြစ်တေ။ ဒေ အလုပ်စာ ဘာသာရေး ပညှတ်တရားကို ဆန့်ကျင်စာအလုပ် ဖြစ်တေ!” 11သူစာ ယုဒဂေါင်းဆောင်ရို့ကို ပြောလီရေ၊ “အကျွန့်ကို အကောင်းလုပ်သူစာ အိပ်ရာကို လိပ်ယူလားဖို့ ခိုင်းလီပါရေ။” 12ထိုဂေါင်းဆောင်ရို့စာ သူ့ကို မီးကတ်လီရေ၊ “နင့်ကို ယင်းပိုင် လုပ်ဖို့ အသူ ပြောလီစာလည်း?” 13ယင်းနေရာမာ လူအများကြီး ဟိလီရေအတွက်န ယေရှုစာ ထွက်လားခလီရေ။ ယင်းအတွက်န ရောဂါကောင်းသူစာ ကိုယ့်ကို အသူ အကောင်းလုပ်လီရေလည်းဆိုစာကို မသိလီ။ 14ယင်းနောက် ယေရှုစာ ရောဂါကောင်းသူကို ဝိပဿနာကျောင်းမာ တွိရို့ ပြောလီရေ၊ “ကြည့်၊ ဒေဂု နင့်မာ ရောဂါကောင်းလားခဗျာ။ နင် အရာ အပြစ် မလုပ်ကေ့ဖိ။ နင် အပြစ်လုပ်နီရေဆိုကေ နင့်ဘဝ ဒေထက် အရာလည်း ပျက်ဆုံးခြင်းကို ခံရလိမည်။” 15ယင်းခါ ရောဂါကောင်းသူစာ ကိုယ့်ရောဂါကို ယေရှု အကောင်းလုပ်လီရေဆိုစာကို ယုဒဂေါင်းဆောင်ရို့တို့ လားရို့ ပြောပြလီရေ။ 16ထိုအလုပ်ကို သတင်းနိမာ လုပ်လီရေအတွက်န ယုဒဂေါင်းဆောင်ရို့စာ ယေရှုကို ညှဉ်းဆဲဖို့ စကတ်လီရေ။ 17ယင်းခါ ယေရှုစာ ဂေါင်းဆောင်ရို့ကို ပြောလီရေ၊ “ငါ့အဖ အမြဲတိုင်း အလုပ်လုပ်နီရေအတွက်န ငါလည်းသောက် အလုပ်လုပ်နီရေ။” 18ယေရှု သက်သက် သတင်းနိနဆိုင်စာ ပညှတ်တရားကို ဖျက်နီစာ မဟုတ်သိ၊ ထာဝရဘုရားကိုလည်း ကိုယ့်အဖ ဟို့ ခေါ်ရို့ ကိုယ့်ကို ထာဝရဘုရားန တန်းတူချရို့ ပြောလီရေ။ ယင်းအတွက်န ယုဒဂေါင်းဆောင်ရို့စာ ယေရှုကို အသီသတ်ဖို့ ကြံကတ်လီရေ။ သားတော်၏ အခွင့်အာဏာ
19ယင်းခါ ယေရှုစာ ထိုဂေါင်းဆောင်ရို့ကို ပြောလီရေ၊ “ငါ ကိုယ်ဘင်ရို့ကို အမှန် ပြောရေ၊ သားတော် ကိုယ့်စိတ်တချင် တစ်ခုလည်း မလုပ်နိုင်။ အဖ လုပ်စာ အလုပ်တိကို မြင်ရို့ရာ သားတော် လုပ်တေ၊ အကြောင်းကား အဖ လုပ်စာ ဟိသမျ အလုပ်ကို သားတော်လည်း လုပ်တေ။ 20အဖစာ သားတော်ကို ချစ်တေ။ ယင်းအတွက်န ကိုယ်လုပ်စာ ဟိသမျ အလုပ်ကို သားတော်ကို ပြရေ။ အဖစာ ယင်းထက်မက အရာလည်း အများကြီး အကြီးအကျယ်အလုပ်တိကို သားတော်ကို ပြဖို့သိ။ ယင်းခါ သားတော် လုပ်စာ အလုပ်တိကို မြင်ရို့ ကိုယ်ဘင်ရို့ အံ့ဩကတ်လိမည်။ 21အဖစာ သီသူရို့ကို အသက် ပြန်ရှင်စီရေပိုင် သားတော်လည်း ကိုယ်လိုသူကို အသက် ပြန်ရှင်စီရေ။ 22အဖ တစ်ယောက်ကိုလည်း တရားမစစ်ဘိုင်းန ဟိသမျ တရားစစ်ဖို့စာ တာဝန်ကို သားတော်အလက်မာ အပ်ပီးဗျာ၊ 23အကြောင်းကား ဟိသမျ လူရို့ အဖကို ရိုသေကတ်စာပိုင် သားတော်ကိုလည်း ရိုသေစီချင်ရေ။ သားတော်ကို မရိုသေသူစာ သားတော်ကို ရွှတ်လိုက်စာ အဖကိုလည်း မရိုသေ။ 24“ငါ ကိုယ်ဘင်ရို့ကို အမှန် ပြောရေ၊ ငါ့စကားကို နားထောင်ရို့ ငါ့ကို ရွှတ်လိုက်စာ အဖကို ကျုံသူစာ ထာဝရအသက်ကို ရလားခဗျာ။ သူစာ တရားစစ်ဆေးခြင်းကို မခံရဗျာ၊ အကြောင်းကား သူစာ သီခြင်းက ရွတ်ရို့ အသက်ရှင်ခြင်းတို့ ကူးရို့ ရောက်လားခဗျာ။ 25ငါ ကိုယ်ဘင်ရို့ကို အမှန် ပြောရေ၊ ဝိညာဉ်ဖက်က သီရို့ ဟိသူရို့စာ ထာဝရဘုရား၏ သားတော် စကားသံကို ကြားကတ်လိမည်၊ အရာ ကြားသူရို့ အသက်ရှင်ဖို့စာအချိန် ရောက်လာလိမည်။ ထိုအချိန်စာ ဒေဂုပင် ရောက်နီဗျာ။ 26အဖစာ ကိုယ့်မာ အသက်ပီးဖို့ အခွင့်အာဏာဟိစာပိုင် သူစာ သားတော်ကိုလည်း အသက်ပီးဖို့စာ အခွင့်အာဏာကို အပ်ပီးဗျာ။ 27“လူရို့ကို တရားစစ်ဖို့စာ အခွင့်အာဏာကို အဖစာ သားတော်အလက်မာ အပ်ပီးဗျာ၊ အကြောင်းကား သူစာ မနုသသားတော် ဖြစ်တေ။ 28– 29ဒေ စကားကို ကြားရို့ ကိုယ်ဘင်ရို့ မအံ့ဩကတ်ကေ့၊ သင်္ချိုင်းမာ သီရို့ဟိသူရို့ အားကုံးသူ သားတော်၏ စကားသံကို ကြားရို့ ထွက်လာဖို့စာအချိန် ရောက်လာလိမည်။ ယင်းခါ ကောင်းမြတ်စာ အလုပ်ကို လုပ်နီခသူရို့စာ ထာဝရအသက်ကို ရဖို့အတွက် သီရာက ပြန်ရှင်ထမြောင့်ကတ်လိမည်၊ ယေကေလည်း ဆိုးယုတ်စာ အလုပ်ကို လုပ်နီခသူရို့စာ အပြစ်ဒါဏ်ကို ခံဖို့အတွက် သီရာက ပြန်ရှင်ထမြောင့်ကတ်လိမည်။ 30ငါ ကိုယ့်စိတ်တချင် တစ်ခုလည်း မလုပ်နိုင်။ အဖက ကြားရေအတိုင်း ငါ တရားစစ်ဆေးရေ။ ငါ ကိုယ့်စိတ်တချင် အလုပ် မလုပ်။ ယင်းအတွက်န ငါ စစ်ဆေးစာတရား မှန်ရေ။ ငါ့ကို ရွှတ်လိုက်စာ အဖ၏ အလိုတော်ကို ငါ ဖြည့်ပီးနီရေ။ယောဟန် သက်သီပီးခြင်း
31“ငါ ကိုယ့်အကြောင်းကို သက်သီပီးရေဆိုကေ ငါပီးစာ သက်သီကို လူရို့ လက်ခံကတ်ဖို့ မဟုတ်။ 32ယေကေလည်း ငါ့အကြောင်းကို သက်သီပီးနီသူ အခြားတစ်ယောက် ဟိရေ။ အရာ သူပီးစာ သက်သီ မှန်ရေဆိုစာကို ငါ သိရေ။ 33ကိုယ်ဘင်ရို့ ယောဟန်ကို မီးဖို့အတွက် လူရွှတ်လိုက်ကတ်လီရေ။ ယင်းခါ ယောဟန်စာ ငါ့အကြောင်းကို အမှန် သက်သီ ပီးလီရေ။ 34လူပီးစာ သက်သီကို ငါ အလိုမဟိ၊ ယေကေလည်း ကိုယ်ဘင်ရို့ ကယ်တင်ခြင်းကို ရကတ်ပတ်စီအတွက် ယောဟန်ပီးစာ သက်သီအကြောင်းကို ငါ ပြောပြစာ ဖြစ်တေ။ 35ယောဟန်စာ အလင်းပီးစာ ဆီမီးခွက်နတူရေ။ အရာ ယောဟန်ပီးစာ သက်သီကို နားထောင်ဖို့ လိုလီရေခါ ကိုယ်ဘင်ရို့ တစ်နားသျှေအတွက်ရာ ထိုအလင်းမာ ပျော်ကတ်လီရေ။ 36“ငါ့ကို အဖက ပြီးဆုံးအောင် လုပ်ဖို့အတွက် ပီးစာ အလုပ်တိကို ငါ လုပ်နီရေ။ အရာ ထိုအလုပ်တိစာ အဖ ငါ့ကို ရွှတ်လိုက်တေ ဟို့ သက်သီပီးရေ။ ယင်းသက်သီစာ ယောဟန်ပီးစာ သက်သီထက် ကြီးမြတ်တေ။ 37ငါ့ကို ရွှတ်လိုက်စာ အဖ ကိုယ်တိုင် ငါ့အကြောင်းကို သက်သီ ပီးလီရေ။ ကိုယ်ဘင်ရို့ အဖ၏ စကားအသံကို တစ်ခါလည်း မကြားဖူးကတ်၊ သူ့အရုပ်ကိုလည်း မမြင်ဖူးကတ်။ 38အဖ ရွှတ်လိုက်စာ သားတော်ကို ကိုယ်ဘင်ရို့ မကျုံကတ်။ ယင်းအတွက်န ကိုယ်ဘင်ရို့ စိတ်နှလုံးမာ အဖ၏ စကားတော် မဟိ။ 39ကျမ်းစာကနီရို့ ထာဝရအသက်ကို ရဖို့ ဟို့ ကိုယ်ဘင်ရို့ မှတ်နီကတ်တေ။ ယင်းအတွက်န ကျမ်းစာကို စိတ်ဝင်စားရို့ ဖတ်နီကတ်တေ၊ အရာ ထိုကျမ်းစာတိစာ ငါ့အကြောင်းကို သက်သီပီးရေ။ 40ယေကေလည်း ကိုယ်ဘင်ရို့ ထာဝရအသက်ကို ရဖို့အတွက် ငါ့တို့ လာဖို့ မလိုကတ်။ 41“ငါ လူရို့ ချီမွမ်းခြင်းကို လက်မခံ၊ 42ယေကေလည်း ကိုယ်ဘင်ရို့ ထာဝရဘုရားကို မချစ်ကတ်ဆိုစာကို ငါ သိရေ။ 43ငါ့အဖ၏ အခွင့်အာဏာန ငါ ကြွလာဗျာ၊ ယေကေလည်း ကိုယ်ဘင်ရို့ ငါ့ကို လက်မခံကတ်။ အခြားတစ်ယောက် ကိုယ့်အခွင့်အာဏာန လာရေဆိုကေ ကိုယ်ဘင်ရို့ သူ့ကို လက်ခံကတ်ဖို့။ 44ကိုယ်ဘင်ရို့ကား တစ်ယောက်က တစ်ယောက် ချီမွမ်းခြင်း ရဖို့စာကို လိုကတ်တေ၊ ယေကေလည်း ထာဝရဘုရား တစ်ပါးတည်းပီးစာ ချီမွမ်းခြင်းကို ကိုယ်ဘင်ရို့ မလိုကတ်။ ယင်းအတွက်န ကိုယ်ဘင်ရို့ ငါ့ကို မကျုံကတ်စာ ဖြစ်တေ။ 45အဖရှိက ငါ ကိုယ်ဘင်ရို့ကို အပြစ်တင်ဖို့ ဟို့ မမှတ်ကတ်ကေ့။ ကိုယ်ဘင်ရို့ကို အပြစ်တင်ဖို့သူ အခြားတစ်ယောက် ဟိရေ။ သူစာ ဘုရားသတင်းပို့သူ မောရှေ ဖြစ်တေ။ ယင်းမောရှေစာ ကိုယ်ဘင်ရို့ကို ကယ်တင်ဖို့ ဟို့ ကိုယ်ဘင်ရို့ မျှော်လင်းနီကတ်တေ။ 46မောရှေကား ငါ့ အကြောင်းကိုရာ ရွီးခလီရေ။ ကိုယ်ဘင်ရို့ မောရှေ ရွီးထားစာ ကျမ်းစာကို ကျုံရေဆိုကေ ငါ့ကိုလည်း ကျုံကတ်ဖို့။ 47ကိုယ်ဘင်ရို့ မောရှေ ရွီးထားခစာ ကျမ်းစာကို မကျုံကတ်တေခါ ငါ ပြောစာစကားတိကို ဇာပိုင်ပျင်ရို့ ကျုံကတ်ဖို့လည်း?”
Copyright information for
RmzSC