John 13:21-30
အဆုံးခေါက် လွတ်မြောင့်ခြင်းပွဲ စားခြင်း
(မဿဲ ၂၆:၂၀-၂၅၊ မာကု ၁၄:၁၇-၂၁၊ လုကာ ၂၂:၂၁-၂၃)
21ထိုစကားတိကို ပြောပြီးရေနောက် ယေရှုစာ စိတ်ဒုက္ခ ရောက်လီရေ။ ယင်းအတွက်န သူစာ ပပွင့်လလင်း ပြောလီရေ၊ “ငါ နင်ရို့ကို အမှန် ပြောရေ၊ နင်ရို့အထဲက တစ်ယောက် ငါ့ကို ရန်သူရို့အလက်မာ ဖမ်းပီးလိမည်။” 22အသျှင်ယေရှု အသူ့အကြောင်းကို ပြောရေလည်းဆိုစာကို တပည့်ရို့ နားမလည်ကတ်လီ။ ယင်းအတွက်န သူရို့စာ တစ်ယောက် မျက်နှာကို တစ်ယောက် ကြည့်ရို့ နီကတ်လီရေ။ 23ယင်းခါ တပည့်ရို့အထဲမာ အသျှင်ယေရှု ချစ်စာ တပည့် တစ်ယောက် ဟိလီရေ။ သူစာ အသျှင်ယေရှုဘားမာ နှီရို့ ဟိလီရေ။ 24ပေတရုစာ ယင်းတပည့်ကို မျက်ရိပ် ပြရို့ ပြောလီရေ၊ “အသျှင် အသူ့အကြောင်းကို ပြောစာလည်း တစ်ခေါက် မီးကြည့်လိုက်။” 25ယင်းခါ သူစာ အသျှင်ယေရှု နားမာ ဟတ်ရို့ မီးလီရေ၊ “အသျှင်၊ ယင်းသူ အသူပါလည်း?” 26ယေရှုစာ ပြောလီရေ၊ “ငါ ဒေ ပေါင်မုန့်တစ်ဖဲ့ကို ခွက်မာ နှစ်ရို့ အသူ့ကို ပီးဖို့လည်း ယင်းသူစာ ငါ့ကို ရန်သူရို့အလက်မာ အပ်ပီးဖို့သူ ဖြစ်တေ။” ယင်းနောက် ယေရှုစာ ပေါင်မုန့်တစ်ဖဲ့ကို ခွက်မာ နှစ်ရို့ ရှိမုန်ရှကာရုတ်မာသား ယုဒရှကာရုတ်ကို ပီးလီရေ။ 27ယုဒရှကာရုတ် ပေါင်မုန့်တစ်ဖဲ့ ယူရေချက်ချင်း သူ့ဘားမာ မာရ်နတ် ဝင်လီရေ။ ယင်းနောက် ယေရှုစာ ယုဒရှကာရုတ်ကို ပြောလီရေ၊ “နင် လုပ်ဖို့စာ အလုပ်ကို အယင်လုပ်။” 28ယုဒရှကာရုတ်ကို အသျှင်ယေရှု ဇာဖို့ ပြောရေလည်းဆိုစာကို စားပွဲမာ ထိုင်ရို့ စားသောက်နီသူရို့အထဲက တစ်ယောက်လည်း နားမလည်ကတ်လီ။ 29ယုဒရှကာရုတ်စာ တန်းကားအိပ် ကိုင်သူတစ်ယောက် ဟိလီရေ။ ယင်းအတွက်န တစ်ချိုးတပည့်ရို့စာ လွတ်မြောင့်ခြင်းပွဲအတွက်မာ လိုအပ်စာ ဝတ်ထုဝန်ဆန်တိကို ဝယ်ဖို့အတွက်၊ မဟုတ်ကေ ဆင်းရဲသားရို့ကို တန်းကားဖွေသျှာ အလှူပီးဖို့အတွက် အသျှင်ယေရှု ယုဒရှကာရုတ်ကို ပြောရို့ ရွှတ်လိုက်စာ ဟို့ ထင်ကတ်လီရေ။ 30ယုဒရှကာရုတ်စာ ပေါင်မုန့်တစ်ဖဲ့ကို ယူရေချက်ချင်း ပြင်တို့ ထွက်လားခလီရေ။ ယင်းခါ ညဉ့်မိုက်လားခဗျာ။
Copyright information for
RmzSC