John 18:28-40

ယေရှုကို အုပ်ချုပ်သူကြီးပိလတ် စစ်ဆေးခြင်း

(မဿဲ ၂၇:၁-၂၊ ၂၇:၁၁-၃၁၊ မာကု ၁၅:၁-၁၅၊ လုကာ ၂၃:၁-၅၊ ၂၃:၁၃-၂၅)

28ယင်းနောက် ယုဒဂေါင်းဆောင်ရို့စာ ယေရှုကို ကာယာဖအိမ်ကနီရို့ ရောမအစိုးရ အုပ်ချုပ်သူကြီးပိလတ် အိမ်တို့ ယူလားခလီရေ။ ယင်းအချိန်စာ မိုးသောက်ထ အချိန် ဖြစ်တေ။ ယုဒဂေါင်းဆောင်ရို့စာ ကိုယ်ရို့ကို သသန့်စစင် ထားရို့ လွတ်မြောင့်ခြင်းပွဲမာ စားသောက်ဖို့ရလတ်အောင် သူရို့စာ အုပ်ချုပ်သူကြီးပိလတ် အိမ်တို့ မဝင်ကတ်လီ။ 29ယင်းခါ ပိလတ်စာ ပြင်တို့ ထွက်လာပြီးကေ သူရို့ကို မီးလီရေ၊ “နင်ရို့ ဒေသူကို ဇာ အပြစ်အကြောင်းန စစ်စွဲကတ်စာလည်း?” 30ယုဒဂေါင်းဆောင်ရို့စာ ပြောကတ်လီရေ၊ “ဒေသူ လူဆိုး မဟုတ်ကေ အကျွန်ရို့ ဒေသူကို ကိုယ်ဘင်ဘားမာ တင်အပ်လီဖို့ မဟုတ်ပါ။”

31ပိလတ်စာ သူရို့ကို ပြောလီရေ၊ “နင်ရို့ ဒေသူကို ယူလားရို့ နင်ရို့ ထုံးစဉ်အတိုင်း တရားစစ်ဆေးလီကတ်။” ယင်းခါ ယုဒဂေါင်းဆောင်ရို့စာ ပြောကတ်လီရေ၊ “ယေကေလည်း အသူ့ကိုမဆို သီဒါဏ်ပီးဖို့အတွက် ကိုယ်ဘင်ရို့ ရောမအစိုးရက အကျွန်ရို့ကို အခွင့် မပီးပါ။” 32ကိုယ် ဇာပိုင် သီရဖို့လည်းဆိုစာ အကြောင်းကို ယေရှု အယင်ကပင် ပြောထားလီရေ။ ထိုအကြောင်း ပြည့်စုံဖို့အတွက် ဒေပိုင် ဖြစ်ပျက်လာစာ ဖြစ်တေ။

33ယင်းခါ ပိလတ်စာ အရာတစ်ပြန် အိမ်ထဲတို့ ဝင်ပြီးကေ ယေရှုကို ခေါ်ရို့ မီးလီရေ၊ “နင် ယုဒလူမျိုးရို့မာ မင်းလော?” 34ယေရှုစာ သူ့ကို မီးလီရေ၊ “ကိုယ်ဘင် ဒေ စကားကို ကိုယ့် စိတ်သဖေါန ပြောစာလော၊ မဟုတ်ကေ အခြားလူရို့ ငါ့အကြောင်းကို ကိုယ်ဘင်ဘားမာ ပြောလီကတ်စာလော?”

35ယင်းခါ ပိလတ်စာ ယေရှုကို ပြောလီရေ၊ “ငါ့ စိတ်သဖေါန ပြောစာ မဟုတ်၊ အကြောင်းကား ငါ ယုဒလူမျိုး မဟုတ်! နင့် လူမျိုးရို့န နင်ရို့မာ ယဇ်ပုရောဟိတ်အကြီးရို့ရာ နင့်ကို ငါ့အလက်မာ အပ်ကတ်လီရေ။ နင် ဇာအပြစ် လုပ်လီစာလည်း?” 36ယေရှုစာ သူ့ကို ပြောလီရေ၊ “ငါ့ နိုင်ငံ ဒေ လောကမာ မဟုတ်။ ငါ့ နိုင်ငံ ဒေ လောကမာ ဖြစ်ဖို့ဆိုကေ ငါ့နောက်က လိုက်နီသူရို့ ငါ့ကို ယုဒလူမျိုးအလက်က ကယ်ဆယ်ဖို့အတွက် စစ်တိုက်ကတ်ဖို့၊ ယေကေလည်း ငါ့ နိုင်ငံစာ ဒေမာ မဟုတ်။”

37ယင်းခါ ပိလတ်စာ ယေရှုကို ပြောလီရေ၊ “ယင်းပိုင်ဆိုကေ နင် မင်းလော?” ယေရှုစာ သူ့ကို ပြောလီရေ၊ “ငါ မင်း ဖြစ်တေ ဟို့ ကိုယ်ဘင် ပြောရေ။ မှန်ကန်ခြင်းဖက်က သက်သီပီးဖို့အတွက် ငါ မွီးဖွားခြင်းကို ခံယူရို့ ဒေ လောကတို့ ကြွလာလီရေ။ မှန်ကန်ခြင်းဖက်က ဟိသူစာ ငါ့စကားကို နားထောင်ရေ။”

38ပိလတ်စာ သူ့ကို၊ “မှန်ကန်ခြင်းဆိုစာ ဇာလည်း” ဟို့ မီးရို့ ပြင်တို့ ထွက်လားခလီရေ။ အရာ သူစာ ယုဒဂေါင်းဆောင်ရို့အနားတို့ လားရို့ ပြောလီရေ၊ “ငါ ဒေသူမာ အပြစ် တစ်ခုလည်း မမြင်။ 39ယေကေလည်း နင်ရို့ ထုံးစဉ်အတိုင်း ငါ လွတ်မြောင့်ခြင်းပွဲနိမာ ထောင်ကျသား တစ်ယောက်စီကို ရွှတ်ပီးနီရေ။ ငါ ဒေ ယုဒလူမျိုးရို့မာ မင်းကို နင်ရို့အတွက် ရွှတ်ပီးဖို့စာကို နင်ရို့ လိုကတ်တေလော?”

40ယင်းခါ လူရို့ အားကုံးသူ အားန အော်ရို့ ပြောကတ်လီရေ၊ “ယင်းသူကို မရွှတ်ပါကေ့၊ ဗာရဗ္ဗကို ရွှတ်ပီးပါ။” ဗာရဗ္ဗစာ ဒါးမြတစ်ယောက် ဟိလီရေ။

John 19:1-16

1ယင်းခါ အုပ်ချုပ်သူကြီးပိလတ်စာ ယေရှုကို ယူလားရို့ စက်ကျာကြိုးန သတ်ဖို့အတွက် အာဏာချလိုက်လီရေ။ 2စစ်သားရို့စာ စူးခက်ကို သရဖူတစ်ခု လုပ်ရို့ ယေရှုအဂေါင်းမာ ဆောင်းကတ်လီရေ။ ယင်းနောက် သူရို့စာ ယေရှုခန္ဓာမာ ခရန်းရောင်အဝတ်ကို ဝတ်ပီးကတ်လီရေ။ 3ယင်းနောက် သူရို့စာ ယေရှုအနားတို့ လားရို့၊ “အိုး၊ ယုဒလူမျိုးရို့မာ မင်း အောင်မြင်ပါစီ” ဟို့ ပြောရို့ ယေရှုကို ပါးသတ်ကတ်လီရေ။

4ပိလတ်စာ အရာတစ်ပြန် ပြင်တို့ ထွက်လာရို့ ယုဒလူရို့ကို ပြောလီရေ၊ “ကြည့်ကတ်၊ ဒေသူမာ အပြစ် တစ်ခုလည်း မဟိဆိုစာကို နင်ရို့ သိကတ်ပတ်စီအတွက် ငါ ဒေသူကို နင်ရို့တို့ ထုတ်ယူခရေ။” 5ယင်းနောက် ယေရှုစာ ပြင်တို့ ထွက်လာလီရေ။ ယင်းခါ သူ့အဂေါင်းမာ စူးသရဖူ ဆောင်းရို့ ဟိလီရေ အရာ ခန္ဓာမာလည်း ခရန်းရောင်အဝတ် ဝတ်ရို့ ဟိလီရေ။ ပိလတ်စာ ယုဒလူရို့ကို ပြောလီရေ၊ “ဒေသူကို ကြည့်ကတ်။”

6 ယဇ်ပုရောဟိတ်အကြီးရို့န အစောင့်သားရို့စာ ယေရှုကို မြင်ကတ်တေခါ၊ “ယင်းသူကို ကားတိုင်မာ တင်ရို့ သတ်ဘိုက်လိုက်ပါ၊ ယင်းသူကို ကားတိုင်မာ တင်ရို့ သတ်ဘိုက်လိုက်ပါ” ဟို့ အားန အော်ရို့ ပြောကတ်လီရေ။

ပိလတ်စာ သူရို့ကို ပြောလီရေ၊ “ငါ ဒေသူမာ အပြစ် တစ်ခုလည်း မမြင်၊ နင်ရို့ ကိုယ်တိုင် ဒေသူကို ယူလားရို့ ကားတိုင်မာ တင်ရို့ သတ်ဘိုက်လိုက်ကတ်။”

7ယုဒဂေါင်းဆောင်ရို့စာ ပိလတ်ကို ပြောကတ်လီရေ၊ “ဒေသူ ကိုယ့်ကိုကိုယ် ထာဝရဘုရား၏ သားတော် ဟို့ ခံပါရေ။ ယင်းအတွက်န သူစာ အကျွန်ရို့ ထုံးစဉ်အတိုင်း သီဒါဏ် ခံဖို့ထိုက်တန်ပါရေ။” 8ပိလတ်စာ ထိုစကားကို ကြားရို့ အရာလည်း အများ ကြောက်လီရေ။ 9ယင်းခါ သူစာ အိမ်ထဲတို့ ဝင်ရို့ ယေရှုကို မီးလီရေ၊ “နင် ဇာက လာစာလည်း?” ယေကေလည်း ယေရှုစာ သူ့ကို တစ်ခုလည်း အဖြေမပီးလီ။

10ယင်းအတွက်န သူစာ ယေရှုကို ပြောလီရေ၊ “နင် ငါန စကား မပြောချင်စာလော? နင့်ကို ရွှတ်ပီးဖို့စာန ကားတိုင်မာ တင်ရို့ သတ်ဖို့စာ အခွင့်အာဏာ ငါ့မာ ဟိရေဆိုစာကို နင် မသိလော?” 11ယင်းခါ ယေရှုစာ သူ့ကို ပြောလီရေ၊ “ထာဝရဘုရား ကိုယ်ဘင်ကို အခွင့်အာဏာ မပီးကေ ကိုယ်ဘင် ငါ့ကို တစ်ခုလည်း လုပ်နိုင်မည် မဟုတ်။ ယင်းအတွက်န ငါ့ကို ကိုယ်ဘင်အလက်မာ အပ်ပီးသူစာ အရာလည်း ပိုရို့ အပြစ်ကြီးသူ ဖြစ်တေ။”

12ပိလတ်စာ ယေရှု ပြောစာစကားကို ကြားရို့ ယေရှုကို ရွှတ်ဖို့ ကြိုးစားလီရေ။ ယေကေလည်း ယုဒလူရို့စာ အားန အော်ရို့ ပြောကတ်လီရေ၊ “ကိုယ်ဘင် သူ့ကို ရွှတ်တေဆိုကေ ကိုယ်ဘင် ရောမကဲသာမင်းကြီးမာ မိတ်ဆွေ မဟုတ်ပါ။ အသူမဆို ကိုယ့်ကို မင်း ဟို့ ပြောရေဆိုကေ သူစာ ကဲသာမင်းကြီးကို ဆန့်ကျင်ပါရေ။”

13ယုဒဂေါင်းဆောင်ရို့ ပြောစာစကားကို ကြားရေခါ အုပ်ချုပ်သူကြီးပိလတ်စာ ယေရှုကို ပြင်တို့ ထုတ်ယူခလီရေ။ ယင်းနောက် သူစာ “ကျောက်ခင်း” ဟို့ ခေါ်စာ နေရာအမြင့်တစ်ခုမာ တည်ရို့ထားစာ တရားပလ္လင်မာ ထိုင်လီရေ။ (ယင်းနေရာကို ဟေဗြဲဘာသာစကားန “ဂဗ္ဗသ” ဟို့ ခေါ်ရေ)။ 14ယင်းနိစာ လွတ်မြောင့်ခြင်းပွဲအတွက် အစီစဉ်ချစာနိ ဖြစ်တေ။ ယင်းခါ မွန်းတည့် တစ်ဆယ့်နှစ်နာရီလှောက် ဟိလီရေ။

ပိလတ်စာ ယုဒဂေါင်းဆောင်ရို့ကို ပြောလီရေ၊ “နင်ရို့မာ မင်းကို ကြည့်ကတ်။”

15ယင်းခါ အားကုံးသူ အားန အော်ရို့ ပြောကတ်လီရေ၊ “သတ်ဘိုက်လိုက်ပါ! သူ့ကို သတ်ဘိုက်လိုက်ပါ! သူ့ကို ကားတိုင်မာ တင်ရို့ သတ်ဘိုက်လိုက်ပါ!”

ပိလတ်စာ သူရို့ကို ပြောလီရေ၊ “နင်ရို့မာ မင်းကို ငါ ကားတိုင်မာ တင်ရို့ သတ်ဖို့စာလော?”

ယဇ်ပုရောဟိတ်အကြီးရို့စာ ပြောကတ်လီရေ၊ “ကဲသာမင်းကြီးကို ပယ်ရို့ အကျွန်ရို့မာ အရာတစ်ယောက်လည်း မင်း မဟိပါ။” 16ယင်းခါ ပိလတ်စာ ယေရှုကို ကားတိုင်မာ တင်ရို့ သတ်ဖို့အတွက် သူရို့အလက်မာ အပ်လိုက်လီရေ။ ယင်းအတွက်န စစ်သားရို့စာ ယေရှုကို ယူလားခကတ်လီရေ။