John 6:1-15
လူငါးထောင်ကို ကျွေးခြင်း
(မဿဲ ၁၄:၁၃-၂၁၊ မာကု ၆:၃၀-၄၄၊ လုကာ ၉:၁၀-၁၇)
1ယင်းနောက် ယေရှုစာ ဂါလိလဲမြစ်ကမ်းတစ်ဖက်တို့ ကူးလီရေ။ ယင်းမြစ်ကို တိဗေရိမြစ်လည်း ခေါ်ရေ။ 2ရောဂါသေရို့ကို ယေရှု အကောင်းလုပ်စာ အံ့ဩဖွယ်-နိမိတ်လက္ခဏာတိကို လူအများကြီး မြင်ရကတ်လီရေ။ ယင်းအတွက်န သူရို့စာ ယေရှု နောက်က လိုက်ကတ်လီရေ။ 3ယေရှုစာ ကိုယ့်တပည့်ရို့ကို ယူပြီးကေ တောင်ထက်တို့ တက်ရို့ ထိုင်လီရေ။ 4ယင်းအချိန်ခါ ယုဒလူမျိုးရို့မာ လွတ်မြောင့်ခြင်းပွဲ ကျဖို့ပါးလာလီရေ။ 5ယေရှု ကြည့်လိုက်တေခါ လူအများကြီး ကိုယ့်တို့ လာကတ်စာကို မြင်လီရေ။ ယင်းခါ သူစာ ဖိလိပ္ပုနာမည်န ကိုယ့်မာ တပည့်တစ်ယောက်ကို မီးလီရေ၊ “ဒေလူရို့ စားဖို့အတွက် ငါရို့ စားစရာ ဇာက ဝယ်ဖို့လည်း?” 6ယေရှု ကိုယ်တိုင် ဇာလုပ်ရဖို့လည်းဆိုစာကို အယင်ကပင် သိထားလီရေ၊ ယေကေလည်း သူစာ ဖိလိပ္ပုကို စိတ်စမ်းဖို့အတွက် ထိုစကားကို မီးလီစာ ဖြစ်တေ။ 7ယင်းခါ ဖိလိပ္ပုစာ အဖြေပီးလီရေ၊ “ဒေ လူရို့ အားကုံးသူကို ပေါင်မုန့် တစ်ဖဲ့တစ်ဖဲ့ ငအောင် ပီးရေဆိုကေလည်း ငွေသားတန်းကား အချပ်နှစ်ရာဖိုးနပင် လောက်ဖို့ မဟုတ်ပါ။” 8ယေရှု တပည့်ရို့အထဲမာ အန္ဒြေနာမည်န ပေတရုမာ ညီတစ်ယောက် ဟိလီရေ။ 9အန္ဒြေစာ ယေရှုကို ပြောလီရေ၊ “အသျှင်၊ ဒေမာ အသျှေတစ်ယောက် ဟိပါရေ။ ဒေ အသျှေဘားမာ ပေါင်မုန့်ငါးသျှက်န ငါးနှစ်ကောင် ဟိပါရေ၊ ယေကေလည်း ဒေလှောက်လူ စားဖို့အတွက် ပေါင်မုန့်ငါးသျှက်န ငါးနှစ်ကောင် ဇာပိုင်ပျင်ရို့ လောက်ပါဖို့လည်း?” 10ထိုလူရို့ စုကတ်စာ နေရာမာ မြက်အများကြီး ဟိလီရေ။ ယေရှုစာ လူရို့ကို ထိုမြက်တောမာ ထိုင်ဖို့ ခိုင်းလီရေ။ အရာ လူရို့ အားကုံးသူ မြက်တောမာ ထိုင်ကတ်လီရေ။ ယင်းနေရာမာ ယောက်ျား သက်သက် ငါးထောင်လှောက် ဟိလီရေ။ 11ယင်းနောက် ယေရှုစာ ပေါင်မုန့်ငါးသျှက်ကို ယူရို့ ထာဝရဘုရားကို ကျေးဇူးတင်လီရေ။ အရာ ထိုပေါင်မုန့်ငါးသျှက်ကို ထိုင်ရို့ ဟိကတ်စာ လူရို့ကို ဝိပီးလီရေ။ အရာ ငါးနှစ်ကောင်ကိုလည်း ယင်းပိုင်တထန် ဝိပီးလီရေ။ ယင်းခါ လူရို့စာ စိတ်တချင် ဝအောင် စားကတ်လီရေ။ 12လူရို့ ဝအောင် စားရို့ပြီးရေခါ ယေရှုစာ တပည့်ရို့ကို ပြောလီရေ၊ “စားရို့ ကျန်စာ အပဲ့အခြမ်းတိကို မပျက်မသိုးရအောင် တစ်နေရာတည်းမာ စုရို့ထားကတ်။” 13ပေါင်မုန့်ငါးသျှက်က စားရို့ကျန်စာ အပဲ့အခြမ်းတိကို တပည့်ရို့ ကောက်ရို့ စုကတ်တေခါ တစ်ဆယ့်နှစ်တောင်း ဖြစ်လီရေ။ 14ယင်းနောက် လူရို့စာ ယေရှု လုပ်စာ ဒေ အံ့ဩဖွယ်အလုပ်ကို မြင်ရို့ ပြောကတ်လီရေ၊ “ဒေ လောကတို့ ကြီးမြတ်စာ ဘုရားသတင်းပို့သူတစ်ပါး ကြွလာဖို့စာ အကြောင်းကို ကျမ်းစာမာ ရွီးရို့ ဟိရေ။ ဒေလူ အမှန် ထိုဘုရားသတင်းပို့သူ ဖြစ်တေ။” 15ယင်းခါ ယေရှုစာ ထိုလူရို့ ကိုယ့်ကို ခေါ်ယူလားရို့ အားဒမ မင်းတင်ဖို့ အကြံချကတ်တေဆိုစာကို သိလီရေ။ ယင်းအတွက်န သူစာ လူရို့က ရှောင်ရို့ နူးချင်းတည်း တောင်ထက်တို့ တက်လီရေ။
Copyright information for
RmzSC