စာရွီးဆရာ အကြောင်း

စာရွီးဆရာ နာမည် ယုဒ ဖြစ်ပါရေ (ယုဒ ၁:၁)။ သူစာ ယာကုပ်မာ ညီ ဖြစ်ပါရေ၊ အရာ သူလည်းသောက် အသျှင်ယေရှုမာ ညီ ဖြစ်ပါရေ (မာကု ၆:၃)။

စာရွီးစာ အချိန်န နေရာ

ခရစ်သက္ကရာဇ် ၇၀-၈၀ နှစ်အထဲတွင်းမာ ယေရုရှလင်မြို့ကနီရို့ ဒေ စာစောင် ရွီးလီပါရေ။

စာရွီးဆရာ၏ ရွယ်မှတ်ချက်

အယောင်ဆောင် ဆရာရို့ ဇာလှောက် ဆိုးယုတ်တေလည်းဆိုစာကို၊ အရာ သူရို့ ဇာပိုင် အပြစ်ဒါဏ်ကို ခံရဖို့လည်းဆိုစာကို ပြပီးဖို့အတွက် ပါလက်စတန်ပြည်န အာရှမိုင်နားဒေသမာဟိစာ ယုဒလူမျိုးအထဲက ကျုံသူရို့တို့ ယုဒ ဒေ စာစောင်ကို ရွီးလီပါရေ (ယုဒ ၁:၄-၁၅)။

စာအုပ် တူညီချက်

ဒေ စာစောင်မာ စာရွီးဆရာ ယုဒ အယောင်ဆောင် ဆရာရို့ကို ပုတ်ခတ်ရို့ စကားပြောလီစာပိုင် ၁ကောရိန္သု၊ ၂ကောရိန္သု အရာ ၂ပေတရု ဩဝါဒ စာစောင်မာလည်း ရွီးရို့ ဟိပါရေ။

အကြောင်းအရာ အကျဉ်းချုပ်

(က) နှုတ်ဆက်ခြင်း ၁:၁-၂

(ခ) အယောင်ဆောင် ဆရာရို့ကို သိရဖို့စာ အကြောင်း ၁:၃-၁၆

(ဂ) သစ္စာတရားန နီဖို့အတွက် ကျုံသူရို့ကို နှိုးဆော်ခြင်း ၁:၁၇-၂၃

(ဃ) ပဿိပီးခြင်း ၁:၂၄-၂၅

Jude

နှုတ်ဆက်ခြင်း

သို့၊ ကျုံသူညီအစ်ကိုမောင်နမှရို့။

1ငါ ယာကုပ်၏ ညီယုဒ၊ ငါစာ ယေရှုခရစ်တော်၏ ကျွန်တစ်ယောက် ဖြစ်တေ။ အဖထာဝရဘုရား၏ ရွီးကောက်ခြင်းကို ခံရသူရို့၊ သူ၏ ချစ်ခြင်းမေတ္တာကို ခံရသူရို့ အရာ ယေရှုခရစ်တော်၏ ကာကွယ်ခြင်းကို ခံရသူရို့တို့ ငါ ဒေ စာစောင်ကို ရွီးလိုက်တေ။ 2ထာဝရဘုရား၏ ကရုဏာ၊ ငြိမ်းချမ်းခြင်း အရာ ချစ်ခြင်းမေတ္တာ အရာလည်း အများကြီး နင်ရို့ဘားမာ ကျရောက်ပါစီ။

အယောင်ဆောင် ဆရာရို့ အကြောင်း

3ချစ်ခင်စာ မိတ်ဆွေရို့၊ ငါရို့ အားကုံးသူ ကယ်တင်ခြင်းကို ရကတ်ပျာဆိုစာ အကြောင်းကို နင်ရို့တို့ စာရွီးဖို့အတွက် ငါ ကောင်းကောင်း အားပါလီရေ။ ယေကေလည်း ငါ နင်ရို့ကို အားပီးဖို့အတွက် အခြား အကြောင်းကို နင်ရို့တို့ ရွီးဖို့ သင့်ရေ ဟို့ မှတ်လီရေ။ ထိုအကြောင်းတိစာ ဒေပိုင်၊ ထာဝရပတ်လုံးအတွက် ထာဝရဘုရား ကိုယ့်လူရို့ကို ပီးလီစာ ကျုံခြင်းတရားကို ကာကွယ်ဖို့အတွက် နင်ရို့ ကြိုးစားအားထုတ်ရို့ ဝိညာဉ်၏ စစ်ကိုတိုက်ရို့ လားကတ်၊ 4အကြောင်းကား တစ်ချိုး အယောင်ဆောင် ဆရာရို့စာ နင်ရို့အထဲတို့ အဆိတ်အခိုး ဝင်လာကတ်ပျာ။ အရာ ထာဝရဘုရား၏ သနားကြင်နာခြင်းစာ သူရို့ကို ဆိုးယုတ်စာ အလုပ်ကို လုပ်ဖို့အခွင့် ပီးရေ ဟို့ သူရို့စာ လူရို့ကို သွန်သင်ပီးနီကတ်တေ။ သူရို့စာ ထာဝရဘုရားကို ရိုသေကြောက်လန့်ခြင်း မထားကတ်။ အရာ ငါရို့မာ တစ်ပါးတည်း အပိုင်သျှင်န အသျှင်ဆိုစာ ယေရှုခရစ်တော်ကို သူရို့ လက်မခံကတ်။ သူရို့ အပြစ်ဒါဏ် ခံရဖို့စာ အကြောင်းကို ဘုရားသတင်းပို့သူရို့ အယင်ကပင် ကျမ်းစာမာ ရွီးရို့ ထားခလီကတ်တေ။

5ယင်းအတွက်န ငါ တစ်ချိုး အကြောင်းတိကို နင်ရို့ကို အတွက်ဖေါ်ရို့ ပီးချင်ရေ၊ ယေကေလည်း နင်ရို့ကား ထိုအကြောင်းတိကို သိကတ်တေ။ ထိုအကြောင်းတိစာ ဒေပိုင်၊ အသျှင်စာ ဣသရေလလူမျိုးရို့ကို အီဂျစ်ပြည်က ထုတ်ယူခလီရေ။ ယင်းနောက် သူစာ မကျုံသူရို့ကို ဖျက်စီးဘိုက်လီရေ။ 6အရာ တစ်ချိုး ဂေါင်းခင်နတ်သားရို့ အကြောင်းကို နင်ရို့ မှတ်ထားကတ်။ သူရို့စာ ကိုယ်ရို့ အခွင့်အာဏာကို ယူရို့ မနှစ်သက်တေအတွက်န ကိုယ်ရို့နေရာကို စွန့်ရို့ လားခကတ်လီရေ။ ယင်းအတွက်န ထာဝရဘုရားစာ သူရို့ကို မဟာတရားစစ်ဆေးရေနိမာ စစ်ဆေးရို့ အပြစ်ဒါဏ် ပီးဖို့အတွက် အမိုက်မှောင်တွင်းထဲမာ ချိုင်ထားလိုက်လီရေ။ 7ယင်းသျှင့်ကိုအပယ် သောဒုံမြို့၊ ဂေါမောရမြို့ အရာ ထိုနှစ်မြို့အနားမာ နီထိုင်လီသူရို့ကိုလည်း နင်ရို့ မှတ်ထားကတ်။ သူရို့စာ ထိုဂေါင်းခင်နတ်သားရို့ပိုင် ဆိုးယုတ်စာ ကာမဂုဏ်အပြစ်ကို လုပ်ရို့ နီလီကတ်တေ။ ယင်းထက်မက သူရို့စာ သဘာဝန မကိုက်ညီစာ ဆိုးယုတ်စာ ကာမဂုဏ်ကို လိုက်စားရို့ နီလီကတ်တေ။ ယင်းအတွက်န သူရို့စာ ထာဝရမီးအိုင်မာ ကျရို့ အပြစ်ဒါဏ်ကို ခံရလီကတ်တေ။ သူရို့စာ ထာဝရမီးအိုင်မာ ကျရို့ အပြစ်ဒါဏ်ကို ခံရပြီးကေ ငါရို့အတွက် ပုံဥပမာ တစ်ခု ဖြစ်ရို့ ဟိရေ။

8ယင်းပိုင်တထန် ထိုအယောင်ဆောင် ဆရာရို့လည်း ကိုယ်ရို့ အိပ်မက်ကို အတည်ပြုရို့ ဆိုးယုတ်စာ အလုပ်ကို လုပ်ရို့ နီထိုင်ကတ်တေ၊ အသျှင်၏ အုပ်ချုပ်ခြင်းကို ငြင်းပယ်ကတ်တေ အရာ ဘုန်းကြီးစာ ဂေါင်းခင်ဘုံသားရို့ကို ပုတ်ခတ်ရို့ စကား ပြောကတ်တေ။ 9ယေကေလည်း မိက္ခေလနာမည်န ဂေါင်းခင်နတ်သားအကြီး တစ်ပါးစာ မောရှေ၏ အကောင်တော်ကို ယူရို့ မာရ်နတ်န အငြင်းအခုံ ဖြစ်လီရေခါ သူစာ မာရ်နတ်ကို ပုတ်ခတ်ရို့ စကားပြောဖို့ မဝံ့လီ။ ယင်းထက်ပင် သူစာ၊ “နင့်ကို ထာဝရဘုရား ဆုံးမပါစီ” ဟို့ ပြောလီရေ။ 10ယေကေလည်း ထိုအယောင်ဆောင် ဆရာရို့စာ ကိုယ်ရို့ နားမလည်စာ အကြောင်းတိကို ပုတ်ခတ်ရို့ စကား ပြောနီကတ်တေ။ သူရို့စာ အမိုက် တိရစ္ဆာန်တိပိုင် ပကတိအကျင့်ဇာရိတက နားလည်ရေအတိုင်း ပျက်စီးခြင်းတို့ ရောက်လားခကတ်တေ။ 11သူရို့စာ အမင်္ဂလာ ဟိကတ်တေ၊ အကြောင်းကား သူရို့စာ ကာဣန လားစာလမ်းမာ လားနီကတ်တေ၊ သူရို့စာ ဗာလမ်ပိုင် တန်းကား-ဖွေသျှာကို လောဖတတ်ရို့ မှားယွင်းစာ အလုပ်ကို လုပ်နီကတ်တေ အရာ ကောရပိုင် ဆန့်ကျင်ဖက် လုပ်ရို့ ပျက်စီးခြင်းတို့ ရောက်နီကတ်တေ။

12သူရို့စာ မရှက်မကြောက်ဘိုင်းန နင်ရို့ မိတ်သဟာယပွဲမာ ဝင်ရို့ နင်ရို့နအတူ စားသောက်တေခါ သူရို့စာ ပွဲကို ညစ်ညူးအောင် လုပ်တေ။ သူရို့စာ သက်သက် ကိုယ်ရို့အတွက် စဉ်းစားစာ သိုးဆိတ်ကျောင်းသားနတူကတ်တေ အရာ သူရို့စာ မိုးမကျဘိုင်းန လီတိုက်ရို့ ရွင့်လားခစာ မိုးရိပ်နတူကတ်တေ။ သူရို့စာ အသီးသီးချိန်မာ နှစ်ဖက်စုံက သီစာအပင်နတူကတ်တေ၊ အကြောင်းကား သူရို့မာ အသီးတစ်လုံးလည်း မသီး အရာ သူရို့စာ အမြစ်ကပင် အနုတ်ခံရရေ။ 13သူရို့စာ ကြောက်လန့်ဖို့ကောင်းစာ ပင်လယ် ရီလှိုင်းလုံးတိနတူကတ်တေ၊ အရာ သူရို့မာ ရှက်ကြောက်ဖွယ်ရာ အလုပ်တိစာ ပင်လယ်မာ မျိုးနီစာ ရီမြှုပ်တိပိုင် မြင်ရရေ။ သူရို့စာ ဂေါင်းခင်မာ အမှားလမ်းမာ လားနီစာ ကြယ်တိနတူကတ်တေ။ ယင်းအတွက်န ထာဝရဘုရားစာ သူရို့ကို ထာဝရပတ်လုံး အပြစ်ဒါဏ် ပီးဖို့အတွက် မမဲမမျက် အမိုက်မှောင်နေရာကို အဆင်သင့် လုပ်ထားရို့ ဟိရေ။

14– 15အာဒံ၏ အမျိုးအနွယ်က ဆင်းသက်လာစာ ခုနစ်ဆက်မြောင့်သူ ဧနောက်စာ ထိုသူရို့ အကြောင်းကို အယင်ကပင် ပြောခလီရေ၊ “ကြည့်ကတ်၊ အသျှင်စာ ကိုယ့်မာ ထောင်သောင်းမက သန့်ရှင်းစာ ဂေါင်းခင်နတ်သားရို့ကို ယူရို့ လောကသားရို့ကို တရားစစ်ဆေးဖို့အတွက် ကြွလာနီရေ။ အရာ အသျှင်စာ ဆိုးယုတ်စာ အလုပ်တိကို လုပ်ကတ်စာ ရိုသေကြောက်လန့်ခြင်း မဟိသူရို့န အသျှင်ကို ဆန့်ကျင်ရို့ စကားပြောကတ်စာ အပြစ်သေရို့ကို အပြစ်တင်ဖို့အတွက် ကြွလာနီရေ။” 16သူရို့စာ အမြဲတိုင်း အခြားလူရို့ အပြစ်ကို ပတ်ရို့ ရှာနီကတ်တေ၊ အခြားလူရို့ကို ပုတ်ခတ်ရို့ စကား ပြောကတ်တေ အရာ ကိုယ်ရို့ စိတ်နှလုံးမာ ဆိုးယုတ်စာ ကာမဂုဏ်အလိုဆန္ဒအတိုင်း နီထိုင်ကတ်တေ။ သူရို့စာ ကိုယ်ရို့ အကြောင်းကို ယူရို့ ဘော်ကြော့ကြင်းကတ်တေ အရာ ကိုယ်ရို့မာ လိုအပ်ချက် ပြည့်စုံဖို့အတွက် အခြားလူရို့ကို မြှောင့်ရို့ စကား ပြောကတ်တေ။

သတိပီးခြင်းန ညွှန်ပြခြင်း

17ယေကေလည်း ချစ်ခင်စာ မိတ်ဆွေရို့၊ ငါရို့မာ အသျှင်ယေရှုခရစ်တော်၏ တမန်တော်ရို့ ဟောပြောခစာ စကားတိကို နင်ရို့ မှတ်ထားကတ်။ 18သူရို့စာ နင်ရို့ဘားမာ ဟောပြောခလီရေ၊ “နောက်ဆုံးကာလမာ လူရို့စာ ကောင်းမြတ်စာ အကြောင်းအရာတိကို ယူရို့ ရယ်သွန်းပြုကတ်လိမည်။ အရာ သူရို့စာ ကိုယ်ရို့မာ ဆိုးယုတ်စာ ကာမဂုဏ်အလိုဆန္ဒအတိုင်း နီထိုင်ကတ်လိမည်။” 19သူရို့စာ နင်ရို့အထဲမာ တစ်ယောက်န တစ်ယောက် ကွဲအောင် လုပ်ကတ်တေ။ သူရို့စာ ကိုယ်ရို့မာ အကျင့်ဇာရိတ အလိုဆန္ဒအတိုင်း နီထိုင်ကတ်တေ၊ အကြောင်းကား သူရို့ စိတ်နှလုံးမာ သန့်ရှင်းသောဝိညာဉ်တော် မဟိ။

20ယေကေလည်း ချစ်ခင်စာ မိတ်ဆွေရို့၊ နင်ရို့စာ နင်ရို့မာ အသန့်ရှင်းဆုံး ကျုံခြင်းတရားအထက်မာ ကိုယ်ရို့ကို တည်ဆောက်ကတ် အရာ သန့်ရှင်းသောဝိညာဉ်တော်၏ တန်ခိုးန ဆုတောင်းကတ်။ 21နင်ရို့စာ ထာဝရဘုရား၏ ချစ်ခြင်းမေတ္တာမာ နီထိုင်ကတ် အရာ ထာဝရအသက်ကို ရဖို့အတွက် ယေရှုခရစ်တော်၏ ကျေးဇူးတော်ကို စောင့်နီကတ်။ 22နင်ရို့အထဲမာ ကျုံခြင်းတရား အားနည်းသူရို့ကို နင်ရို့ သနားကြင်နာကတ်။ 23အခြားလူရို့ကို ငရဲမီးအထဲက ကောက်ယူခရို့ ကယ်တင်ကတ်။ အရာ အခြားလူရို့ကို ကယ်တင်ရေခါ နင်ရို့ အပြစ်မာ မကျလတ်အောင် ကိုယ်ရို့ကို သတိထားကတ်။ အရာ သူရို့ကို ညစ်ညူးအောင် လုပ်စာအပြစ်ကို နင်ရို့ ရွန်ကတ်။

ထာဝရဘုရားကို ချီမွမ်းခြင်း

24– 25နင်ရို့ ထာဝရဘုရားကို စွန်ရို့ ပြန်လားချင်ရေဆိုကေ သူစာ နင်ရို့ကို တည်းထားနိုင်ရေ အရာ သူစာ တစ်ခုလည်း မှားယွင်းခြင်း မဟိဘိုင်း ဝမ်းသာခြင်းနအတူ ကိုယ့်ဘုန်းတန်ခိုး ရှိက နင်ရို့ကို အပြစ်နကင်းသူအဖြစ် ရပ်စီနိုင်ရေ။ သူစာ ငါရို့မာ တစ်ပါးတည်း ထာဝရဘုရား ဖြစ်တေ အရာ သူတစ်ပါးတည်းရာ ငါရို့မာ အသျှင်ယေရှုခရစ်တော်ကနီရို့ ငါရို့ကို ကယ်တင်ရေ။ ယင်းအတွက်န ထာဝရဘုရား၏ ဟိသမျ ချီမွမ်းခြင်း၊ ဘုန်းတန်ခိုး၊ အားခွန် အရာ အုပ်ချုပ်ခြင်းစာ အယင်ကပင်၊ ဒေဂု အရာ ထာဝရပတ်လုံး ဟိပါစီ။ အာမန်။