Luke 1
ပူဇော်ခြင်း
1– 2ဆရာ သော်ဖိလု၊ အကျွန်ရို့အထဲမာ ဖြစ်ပျက်လီစာ အကြောင်းအရာတိကို ပထမဆုံးကပင် တစ်ချိုးလူရို့ ကိုယ်တိုင် မြင်ဖူးလီကတ်ပါရေ အရာ ထိုအကြောင်းအရာတိကို သက်သီပီးနီကတ်ပါရေ။ သူရို့စာ ထို ဟိသမျ အကြောင်းအရာကို အကျွန်ရို့ဘားမာ ပြောပြလီကတ်ပါရေ။ လူအများကြီး ထိုသူရို့ သက်သီပီးရေအတိုင်း ဟိသမျ အကြောင်းအရာကို ရွီးထားလီကတ်ပါရေ။ 3ယင်းအတွက်န အကျွန်စာ ထို ဟိသမျ အကြောင်းအရာတိကို ပထမဆုံးကပင် အတိကျ လေ့လာရို့ ကြည့်လီပါရေ။ အရာ ထို ဟိသမျ အကြောင်းအရာကို ကိုယ်ဘင်ဘားမာ ရှင်းပြကေ ကောင်းဖို့ ဆိုပြီးကေ အကျွန်လည်း ထင်လီပါရေ။ 4ယင်းပိုင်ဆိုကေ ကိုယ်ဘင် ကြားဖူးလီစာ အကြောင်းအရာတိကို အတိကျ သိရပါလိမည်။ရီနှစ်မင်္ဂလာပီးသူ ယောဟန် မွီးဖွားဖို့စာ အကြောင်း
5ဟေရုဒ်မင်း ယုဒပြည်နယ်ကို အုပ်ချုပ်လီရေခါ ဇာခရိနာမည်န ယဇ်ပုရောဟိတ်တစ်ယောက် ဟိလီရေ။ သူစာ ယဇ်ပုရောဟိတ်အဘိယအဖွဲ့မာ ပါဝင်သူတစ်ယောက် ဖြစ်တေ။ သူ့မယားနာမည်စာ ဧလိရှဗက် ဖြစ်တေ။ သူစာ ယဇ်ပုရောဟိတ် အာရုန်၏ အမျိုးအနွယ် မိန်းမတစ်ယောက် ဖြစ်တေ။ 6သူရို့ နှစ်ယောက်စုံ ထာဝရဘုရား၏ ရှိထက်မာ သူတော်ကောင်း ဟိကတ်လီရေ။ သူရို့စာ အသျှင်၏ ဟိသမျ ပညှတ်ချက်န ညွှန်ပြချက်ကို အပြည့်အစုံ လိုက်နာလီကတ်တေ။ 7ဧလိရှဗက်စာ အမြုံမ ဖြစ်တေအတွက်န သူရို့မာ သားသမီးတစ်ယောက်လည်း မဟိလီသိ။ အရာ သူရို့ နှစ်ယောက်စုံမာ အသက်အရွှယ်လည်း ကြီးလားခဗျာ။ 8တစ်ရက်နိ ဇာခရိစာ ကိုယ်ရို့အဖွဲ့ အလှည့်ကျရေခါ ဝိပဿနာကျောင်းထဲမာ ယဇ်ပုရောဟိတ် တာဝန်ကို ထန်းဆောင်ရို့ ဟိလီရေ။ 9ယင်းခါ အသျှင်၏ ဝိပဿနာကျောင်းထဲမာ သန့်ရှင်းစာနေရာတို့ ဝင်ရို့ နံသာဆီမီး ညှေ့ဖို့အတွက် ယဇ်ပုရောဟိတ် အလုပ်ထုံးစဉ်အတိုင်း သူ့ကို မဲဖေါက်ရို့ ရွီးကောက်ယူလီရေ။ 10ဇာခရိစာ ဝိပဿနာကျောင်းထဲမာ သန့်ရှင်းစာနေရာတို့ ဝင်ရို့ နံသာဆီမီး ညှေ့ရေခါ ပြင်က လူအများကြီး ဆုတောင်းရို့ ဟိကတ်လီရေ။ 11သူစာ နံသာဆီမီး ညှေ့နီတုံးမာ အသျှင်၏ ဂေါင်းခင်နတ်သားတစ်ပါးစာ နံသာဆီမီး ညှေ့စာ ပလ္လင် ညာဖက်က ဗြုန်းခနိုင်း ပေါ်လာရို့ ဇာခရိကို ကိုယ်ထင် ပြလီရေ။ 12ယင်းခါ သူစာ ဂေါင်းခင်နတ်သားကို မြင်ရို့ လန့်လီရေ အရာ ကောင်းကောင်း ကြောက်လီရေ။ 13ယေကေလည်း ဂေါင်းခင်နတ်သားစာ သူ့ကို ပြောလီရေ၊ “ဇာခရိ၊ နင် မကြောက်ကေ့၊ အကြောင်းကား နင် ဆုတောင်းစာကို ထာဝရဘုရား ကြားဗျာ။ နင့် မယားမာ သားယောက်ျား တစ်ယောက် မွီးဖွားလိမည်။ နင် သူ့ကို ယောဟန် ဟို့ နာမည် မှည့်လီ။ 14သူစာ နင့်ဘဝအတွက်မာ ကြီးကျယ်စာ ဝမ်းမြောင့်စရာ အကြောင်း ဖြစ်လိမည်၊ အရာ သူမွီးဖွားခြင်း အကြောင်းန အရာလည်း လူအများကြီး ဝမ်းသာကတ်လိမည်၊ 15အကြောင်းကား အသျှင်၏ ရှိထက်မာ ကြီးမြတ်သူတစ်ယောက် ဖြစ်လိမည်။ သူစာ တစ်ခါလည်း စပျစ်ရည် မဟုတ်ကေ အရက် သောက်လိမည် မဟုတ်။ အရာ သူစာ အမိဝမ်းထဲကပင် သန့်ရှင်းသောဝိညာဉ်တော်န ပြည့်စုံလိမည်။ 16သူစာ ဣသရေလလူမျိုးအထဲက လူအများကြီးကို သူရို့မာ အသျှင်ထာဝရဘုရားတို့ ပြန်ယူလာလိမည်။ 17အရာ သူစာ ဘုရားသတင်းပို့သူ ဧလိယပိုင် ရဲဝံ့သတ္တိန တန်ခိုးကို ယူရို့ အသျှင် ကြွမလာခင်အယင်က လာလိမည်။ သူစာ အဖန သားကို ပြန်ရို့ ပေါင်းပီးလိမည် အရာ လူဆိုးရို့ကို သူတော်ကောင်း စိတ်သွင်းပီးလိမည်။ ယင်းပိုင် သူစာ အသျှင်အတွက် လူရို့ကို အဆင်သင့် လုပ်လိမည်။” 18ယင်းခါ ဇာခရိစာ ဂေါင်းခင်နတ်သားကို ပြောလီရေ၊ “အမှန် ဒေပိုင် ဖြစ်ပျက်လာပါဖို့လော? အကျွန့်မာ အသက်အရွှယ် ကြီးလားခပါဗျာ အရာ အကျွန့် မယားမာလည်း အသက်အရွှယ် ကြီးလားခပါဗျာ။” 19ဂေါင်းခင်နတ်သားစာ သူ့ကို ပြောလီရေ၊ “ငါ့နာမည် ဂါဗြေလ၊ ▼▼ဂါဗြေလဆိုစာ အကြီးဆုံး ဂေါင်းခင်နတ်သားရို့အထဲက တစ်ပါးနာမည် ဖြစ်ပါရေ။ အခြားတစ်ပါး အကြီးဆုံး ဂေါင်းခင်နတ်သား အကြောင်းကို ဗျာဒိတ်ကျမ်း ၁:၈-မာ ကြည့်ပါ။
ငါစာ ထာဝရဘုရား၏ ရှိက ရပ်နီရေ။ နင်န စကားပြောဖို့အတွက် အရာ နင့်ကို ဒေ သတင်းကောင်းကို ပီးဖို့အတွက် ထာဝရဘုရား ငါ့ကို ရွှတ်လိုက်တေ။ 20မှတ်ထား၊ နင် ငါ့စကားကို မကျုံရေအတွက်န ဒေ ဟိသမျ အကြောင်းအရာ မဖြစ်ပျက်သကြား နင်စာ ပပွါး ဖြစ်ရို့ နီရလိမည်။ စကားတစ်ခွန်းလည်း ပြောဖို့ ရလိမည် မဟုတ်။ ယေကေလည်း အချိန်တိုင်ရေခါ ငါ့စကားတိ ပြည့်စုံလာလိမည်။” 21ယင်းခါ လူရို့စာ ဇာခရိကို ပြင်က စောင့်ရို့ နီကတ်လီရေ။ ဇာခရိ သန့်ရှင်းစာနေရာက ထွက်လာဖို့ ဇာဖို့ ဒေလှောက် ကြာရေလည်း ဆိုပြီးကေ သူရို့စာ စဉ်းစားကတ်လီရေ။ 22ဇာခရိ ပြင်တို့ ထွက်လာရေခါ လူရို့န စကားပြောဖို့ မရလီဗျာ၊ အကြောင်းကား သူစာ ပပွါး ဖြစ်လားခလီရေ။ ယင်းအတွက်န သူစာ လက်ရိတ်ပြရို့ လူရို့န စကားပြောဖို့ ကြိုးစားလီရေ။ ယင်းခါ သန့်ရှင်းစာနေရာမာ ဇာခရိ ကိုယ်ထင် မြင်ခလီရေဆိုစာကို လူရို့စာ သိရကတ်လီရေ။ 23ယင်းနောက် ဇာခရိစာ ယဇ်ပုရောဟိတ် အလုပ်တာဝန် ထန်းဆောင်ရို့ ပြီးရေခါ ကိုယ့်အိမ်တို့ ပြန်လားခလီရေ။ 24အများမကြာခင် သူ့မယား ဧလိရှဗက်မာ ကိုယ်ဝန်တည်လီရေ အရာ သူစာ ငါးလတိုင်အောင် အိမ်ထဲက မထွက်ဘိုင်းန နီလီရေ။ 25ဧလိရှဗက်စာ ပြောလီရေ၊ “အသျှင် ငါ့ကို သနားဗျာ! ငါ့မာ ရှက်စရာကို ပယ်ဖျောက်ဖို့အတွက် အသျှင် ဒေဂု ငါ့ကို သနားဗျာ။” ယေရှု မွီးဖွားလာဖို့စာ အကြောင်း
26– 27ဧလိရှဗက်မာ ကိုယ်ဝန်တည်ရို့ ခြောက်လတက်တေခါ ထာဝရဘုရားစာ ဂါလိလဲပြည်နယ် နာဇရက်မြို့သျှေမာ မာရိနာမည်န အပျိုမတစ်ယောက်တို့ ဂေါင်းခင်နတ်သား ဂါဗြေလကို ရွှတ်လိုက်လီရေ။ မာရိစာ ဒါဝိဒ်မင်း၏ အမျိုးအနွယ်သား ယောသပ်န အိမ်ထောင်နီဖို့စကား ဟိကတ်လီရေ။ 28ဂါဗြေလစာ မာရိတို့ လာရို့ ပြောလီရေ၊ “ကြီးမြတ်စာ ပဿိကို ခံရစာ မိန်းမ၊ အသျှင် နင်နအတူ ဟိရေ။” 29ယေကေလည်း သူ့စကားကို ကြားရို့ မာရိစာ ကောင်းကောင်း စိတ်ပူလီရေ။ အရာ သူစာ နှုတ်ဆက်စာ အဓိပ္ပါယ်ကား ဇာလည်းဆိုစာကို စဉ်းစားလီရေ။ 30ဂေါင်းခင်နတ်သားစာ ပြောလီရေ၊ “မာရိ၊ နင် မကြောက်ကေ့၊ အကြောင်းကား နင်စာ ထာဝရဘုရား၏ သနားကြင်နာခြင်းကို ခံရဗျာ။ 31နားထောင်၊ နင့်မာ ကိုယ်ဝန်တည်ရို့ သားယောက်ျား တစ်ယောက် မွီးဖွားလိမည်။ နင် ထိုသားကို ယေရှု ဟို့ နာမည် မှည့်လီ။ 32သူစာ ကြီးမြတ်သူတစ်ပါး ဖြစ်လိမည်။ သူစာ မြင့်မြတ်စာ ထာဝရဘုရား၏ သားတော် ဟို့ အခေါ်ခံရလိမည်။ သူ့အဖိုးအဖီးအစိုင်လာ ဒါဝိဒ်မင်း၏ ပလ္လင်ကို အသျှင်ထာဝရဘုရား သူ့ကို အပ်ပီးလိမည်။ 33သူစာ ယာကုပ်၏ အမျိုးအနွယ်သားရို့ကို ကမ္ဘာအဆက်ဆက် မင်းအဖြစ် အုပ်ချုပ်လိမည်။ အရာ သူ၏ နိုင်ငံတော်စာ တစ်ခါလည်း ဆုံးလိမည် မဟုတ်။” 34ယင်းခါ မာရိစာ ဂေါင်းခင်နတ်သားကို ပြောလီရေ၊ “ဇာပိုင် ဖြစ်နိုင်ပါဖို့လည်း? အကျွန်ကား ဒေဂုပင် အိမ်ထောင် မနီပါသိ!” 35ဂေါင်းခင်နတ်သားစာ ပြောလီရေ၊ “သန့်ရှင်းသောဝိညာဉ်တော်စာ နင့်ဘားမာ ကျရောက်လိမည် အရာ မြင့်မြတ်စာ ထာဝရဘုရား၏ တန်ခိုးစာ နင့်ကို ချုပ်ထားလိမည်။ ယင်းအတွက်န မွီးဖွားလာဖို့စာ သန့်ရှင်းစာ သားတော်စာ ထာဝရဘုရား၏ သားတော် ဟို့ အခေါ် ခံရလိမည်။ 36နားထောင်၊ အသက်အရွှယ် ကြီးလားခကေလည်းသောက် နင့်မာ အမျိုးတော်သူ ဧလိရှဗက်အဝမ်းမာ သားယောက်ျား တစ်ယောက် ကိုယ်ဝန်တည်နီဗျာ။ လူရို့ သူ့ကို အမြုံမ ဟို့ ခေါ်ကတ်ကေလည်းသောက် သူ့အဝမ်းမာ ကိုယ်ဝန်စာ ဒေဂု ခြောက်လတက်နီဗျာ၊ 37အကြောင်းကား ထာဝရဘုရား မလုပ်နိုင်စာ အလုပ်တစ်ခုလည်း မဟိ။” 38ယင်းခါ မာရိစာ ပြောလီရေ၊ “အကျွန် အသျှင်၏ ကျွန်မတစ်ယောက် ဖြစ်ပါရေ။ ကိုယ်တော် ပြောရေအတိုင်း ဖြစ်ပါစီ။” ယင်းနောက် ဂေါင်းခင်နတ်သားစာ မာရိနိုင်ဗြင်းက လားခလီရေ။ဧလိရှဗက်ရို့ အိမ်တို့ မာရိ အလည်လာခြင်း
39ယင်းနောက် မာရိစာ ယုဒပြည်နယ်ထဲမာ တောင်တန်းနယ်မာဟိစာ ရွာတစ်ရွာတို့ အယင်အမြန် လားခလီရေ။ 40အရာ သူစာ ဇာခရိအိမ်တို့ ဝင်ရို့ ဧလိရှဗက်ကို နှုတ်ဆက်လီရေ။ 41– 42ဧလိရှဗက်စာ မာရိ စကားကို ကြားရေခါ သူ့အဝမ်းမာဟိစာ အသျှေစာ ခုန်လီရေ။ သူစာ သန့်ရှင်းသောဝိညာဉ်တော်န ပြည့်စုံရို့ အားန ပြောလီရေ၊ “နင် ဟိသမျ မိန်းမရို့ထက် မင်္ဂလာ ဟိရေ အရာ နင့်မာ မွီးဖွားဖို့စာ သားလည်း မင်္ဂလာ ဟိရေ။ 43ငါ့အသျှင်၏ အမိစာ ငါ့တို့ ရောက်လာဗျာ။ အကျွန် ဇာဖို့ ဒေပိုင် ပဿိကို ခံရပါစာလည်း! 44အကြောင်းကား ငါ နင့်စကားကို ကြားရေကြားချင်း ငါ့အဝမ်းထဲမာဟိစာ အသျှေစာ ပျော်ရို့ ခုန်လီရေ။ 45နင်စာ မင်္ဂလာ ဟိရေ၊ အကြောင်းကား အသျှင် ပြောရေအတိုင်း ပြည့်စုံလာဖို့ဆိုစာကို နင် ကျုံလီရေ။”မာရိ ထာဝရဘုရားကို ချီမွမ်းခြင်း
46ယင်းခါ မာရိစာ ပြောလီရေ၊“အကျွန့် စိတ်နှလုံးစာ အသျှင်ကို ချီမွမ်းနီရေ!
47ကိုယ့်ကယ်တင်သျှင် ထာဝရဘုရား အကြောင်းန အကျွန် ဝမ်းသာရေ!
48အကြောင်းကား သူစာ အကျွန့်ပိုင် အသုံးမကျစာ ကျွန်မသျှေကို သနားကြင်နာလီရေ။
ဟုတ်တေ၊ ဒေဂုကပင် နောက်အနာဂါတ်မာ အားကုံးသူ အကျွန့်ကို မင်္ဂလာဟိသူ ဟို့ ခေါ်ကတ်လိမည်၊
49အကြောင်းကား တန်ခိုးသျှင် ထာဝရဘုရားစာ အကျွန့်အတွက် အံ့ဩဖွယ် အလုပ်ကို လုပ်လီရေ၊
သူစာ သန့်ရှင်းစာ ဘုရား ဖြစ်တေ။
50သူ့ကို ကိုးကွယ်သူရို့စာ သူ၏ သနားကြင်နာခြင်းကို ခံရကတ်တေ၊
သူရို့စာ သားစဉ်မြိန်းဆက် သူ၏ သနားကြင်နာခြင်းကို ခံရကတ်တေ။
51သူစာ အလက်ဆန့်ရို့ မဟာတန်ခိုးန အလုပ်လုပ်လီရေ၊
အရာ သူစာ ဘဝင်မြင့်သူရို့ကို ကွဲကြင်းအောင် လုပ်လီရေ။
52ထာဝရဘုရားစာ မင်းရို့ကို နန်းချလီရေ၊
ယေကေလည်း နုညံ့သူရို့ကို ချီးမြှောင့်လီရေ။
53သူစာ ငတ်မွတ်သူရို့ကို ကောင်းမြတ်စာ ဝန်တိန ပြည့်စုံအောင် လုပ်လီရေ၊
ယေကေလည်း ချမ်းသာသူရို့ကို လက်ခစည်းသသန့် ရွှတ်လိုက်လီရေ။
54– 55သူစာ အကျွန်ရို့ အဖိုးအဖီးအစိုင်လာရို့ဘားမာ ဂတိခံထားလီရေ၊
သူစာ ကိုယ့်ဂတိတော်အတိုင်း ကိုယ့်ကျွန် ဣသရေလလူမျိုးကို ကူညီမစားဗျာ။
အာဗြဟံန သူ့အမျိုးအနွယ်သားရို့ကို ထာဝရပတ်လုံး သနားကြင်နာဖို့စာကို မှတ်ထားဗျာ။” 56မာရိစာ ဧလိရှဗက်ရို့ အိမ်မာ သုံးလလှောက် နီပြီးရေခါ ကိုယ့်အိမ်တို့ ပြန်လားခလီရေ။
ရီနှစ်မင်္ဂလာပီးသူ ယောဟန် မွီးဖွားခြင်း
57ယင်းနောက် အချိန်စီရေခါ ဧလိရှဗက်မာ သားယောက်ျား တစ်ယောက် မွီးဖွားလီရေ။ 58ဧလိရှဗက်ကို အသျှင် ကောင်းကောင်း သနားရေဆိုစာကို ကြားရို့ သူ့အိမ်နားပါးသားရို့န သူ့အမျိုးအဆွီရို့စာ သူနအတူ ပျော်ကတ်လီရေ။ 59သူရို့စာ ယုဒဘာသာရေး ထုံးစဉ်အတိုင်း မွီးဖွားရို့ ရှစ်ရက်စိရေနိမာ ထိုသားသျှေကို အရီဖျားလှီးမင်္ဂလာ လုပ်ဖို့စာပွဲမာ လာကတ်လီရေ။ သူရို့စာ ထိုသားသျှေကို သူ့အဖနာမည်န တတူတည်း ဇာခရိ ဟို့ နာမည် မှည့်ချင်ကတ်လီရေ၊ 60ယေကေလည်း သူ့အမိစာ ပြောလီရေ၊ “မမှည့်၊ သူ့ကို ယောဟန် ဟို့ နာမည် မှည့်ဖို့။” 61ယင်းခါ ထိုလူရို့စာ ဧလိရှဗက်ကို ပြောကတ်လီရေ၊ “ထိုနာမည် ကိုယ်ဘင် အမျိုးအဆွီရို့အထဲမာ တစ်ယောက်မာလည်း မဟိ။” 62သူရို့စာ သားသျှေကို ဇာပိုင်ဇတ် နာမည် မှည့်ချင်ရေလည်း ဆိုပြီးကေ သူ့အဖကို လက်ရိတ်ပြရို့ မီးကတ်လီရေ။ 63ဇာခရိစာ ရွီးစရာတစ်ခု တောင်းရို့၊ “သူ့နာမည် ယောဟန် ဖြစ်တေ” ဟို့ ရွီးပြလီရေ။ ယင်းခါ သူရို့ အားကုံးသူ အံ့ဩကတ်လီရေ။ 64ယင်းခါ ချက်ချင်း ဇာခရိစာ ပြန်ရို့ စကားပြောနိုင်လီရေ အရာ ထာဝရဘုရားကို ချီမွမ်းဖို့ စလီရေ။ 65ယင်းသျှင့်ကို မြင်ရို့ အိမ်နားပါးသားရို့ အားကုံးသူ ကြောက်ကတ်လီရေ၊ အရာ ထိုအကြောင်းအရာစာ ယုဒပြည်နယ်ထဲမာဟိစာ ဟိသမျ တောင်တန်းနယ်အရပ်မာ ပြန့်ကျယ်လားခလီရေ။ 66ထိုစကားတိကို ကြားသူရို့ အားကုံးသူ စိတ်မာ စိတ်မာ စဉ်းစားရို့ ပြောကတ်လီရေ၊ “ဒေ အသျှေ ကြီးကေ ဇာတစ်ခု ဖြစ်မည်လည်း!” အသျှင်၏ တန်ခိုးစာ သူ့ဘားမာ ဟိလီရေအတွက်န ထိုသူရို့ ဒေပိုင် စကားကို ပြောလီကတ်စာ ဖြစ်တေ။ဇာခရိ ထာဝရဘုရားကို ချီမွမ်းခြင်း
67ယင်းနောက် ထိုအသျှေ အဖ ဇာခရိစာ သန့်ရှင်းသောဝိညာဉ်တော်န ပြည့်စုံရို့ ဒေပိုင် အနာဂတ္တိစကားကို ပြောလီရေ၊68“ဣသရေလလူမျိုးမာ အသျှင်ထာဝရဘုရား၏ ဘုန်းကြီးပါစီ၊
အကြောင်းကား သူစာ ကိုယ့်လူရို့တို့ ကူညီမစားဖို့ ကြွလာဗျာ၊
အရာ သူရို့ကို လွတ်မြောင့်ခြင်း ပီးဗျာ။
69သူစာ ငါရို့အတွက် တန်ခိုးနပြည့်စုံစာ ကယ်တင်သျှင်တစ်ပါးကို ရွှတ်လိုက်ပျာ၊
ထိုကယ်တင်သျှင်စာ သူ့ကျွန် ဒါဝိဒ်မင်း၏ အမျိုးအနွယ်က ဆင်းလာစာ ဖြစ်တေ။
70နှစ်ပေါင်းများစွာ အယင်ကပင် သူစာ ထိုဂတိတော်ကို ခံထားလီရေ၊
သူစာ ထိုဂတိတော်ကို ကိုယ့်မာ သန့်ရှင်းစာ ဘုရားသတင်းပို့သူရို့ကနီရို့ ခံထားလီရေ။
71ထိုဂတိတော်အတိုင်း သူစာ ငါရို့ကို ရန်သူရို့အလက်က ကယ်ဆယ်ဖို့ဗျာ၊
အရာ ငါရို့ကို မုန်းသူရို့အလက်ကလည်း ကယ်ဆယ်ဖို့ဗျာ။
72သူပြောလီစာကား ငါရို့မာ အဖိုးအဖီးအစိုင်လာရို့ကို ကျေးဇူးပြုဖို့၊
အရာ ကိုယ့်သန့်ရှင်းစာ စာချုပ်ကို အောက်မိဖို့။
73– 74– 75သူစာ ထိုဂတိတော်ကို ငါရို့မာ အဖိုးအဖီးအစိုင်လာ အာဗြဟံဘားမာ ခံထားလီရေ။
သူစာ ငါရို့ကို အသက်အရှင် ဟိသရိကာလပတ်လုံး သူ့ရှိက ရပ်ရို့ ဝတ်ပြုစီချင်ရေ၊
အရာ သူစာ သန့်ရှင်း-ရိုးသားခြင်းန မကြောက်မလန့်ဘိုင်း ဝတ်ပြုစီချင်ရေ။
ယင်းအတွက်န သူစာ ငါရို့ကို ရန်သူရို့အလက်က ကယ်ဆယ်လာဗျာ။
76ငါ့သား၊ နင်စာ မြင့်မြတ်စာ ထာဝရဘုရား၏ ဘုရားသတင်းပို့သူ ဟို့ အခေါ် ခံရလိမည်၊
အကြောင်းကား နင်စာ အသျှင် ကြွလာဖို့စာလမ်းကို အဆင်သင့် လုပ်ဖို့အတွက် သူ့ရှိက လားလိမည်။
77– 78ငါရို့မာ ထာဝရဘုရား၏ ကျေးဇူးတော် အကြောင်းန အပြစ် ခွင့်ရွှတ်ခြင်းကို ခံရကတ်ဖို့၊
အရာ ထိုခွင့်ရွှတ်ခြင်းကနီရို့ ကယ်တင်ခြင်းကို ရကတ်ဖို့။
ထိုအကြောင်းကို နင်စာ သူ၏ လူရို့ဘားမာ ဟောပြောရလိမည်၊
အကြောင်းကား သူ၏ ကျေးဇူးတော် အကြောင်းန ဂေါင်းခင်ဘုံက နီအာရုဏ် ထွက်လာလိမည်၊
အရာ ထိုနီရောင်စာ ငါရို့ဘားမာ ကျလာလိမည်။
79ယင်းခါ အမိုက်မှောင်န သီခြင်းတရား၏ အရိပ်အောက်မာ နီသူရို့စာ ထိုနီရောင်ကို ရကတ်လိမည်၊
အရာ ထိုနီရောင်စာ ငါရို့ကို ငြိမ်းချမ်းရာလမ်းတို့ ဆောင်ယူလိမည်။” 80ယင်းနောက် ယောဟန်စာ ကြီးပြင်းလာလီရေ အရာ သူ့မာ စိတ်နှလုံးလည်း အားခွန်န ပြည့်စုံလာလီရေ။ သူစာ ဣသရေလလူမျိုး ရှိတို့ ပပွင့်လလင်း ထွက်ရို့ မလာသကြား သဲကန္တာရတောပြင်မာ နီထိုင်လီရေ။
Copyright information for
RmzSC