Luke 10
တပည့်အယောက်ခုနစ်ဆယ်ကို တရားဟောဖို့ ရွှတ်ခြင်း
1ယင်းနောက် အသျှင်ယေရှုစာ အရာလည်း တပည့်အယောက် ခုနစ်ဆယ်ကို ▼▼ခုနစ်ဆယ် တစ်ချိုးဂရိဘာသာ ကျမ်းစာအဟောင်းမာ ခုနစ်ဆယ်န နှစ်ယောက် ရွီးရို့ ဟိပါရေ။
တရားဟောဖို့ ရွှတ်ဖို့အတွက် ရွီးကောက်ယူလီရေ။ သူကိုယ်တိုင် ကြွဖို့ ဆိုပြီးကေ စီစဉ်ရို့ထားလီစာ ဟိသမျ မြို့ရွာတိတို့ မကြွခင်အယင်က တပည့်နှစ်ယောက် နှစ်ယောက်စီ ရွှတ်လိုက်လီရေ။ 2သူစာ တပည့်ရို့ကို ပြောလီရေ၊ “အသီးအနှံ အများကြီး ဟိရေ၊ ယေကေလည်း ရိတ်သိမ်းဖို့သူ နည်းရေ။ ယင်းအတွက်န အသီးအနှံတိကို ရိတ်သိမ်းဖို့အတွက် အလုပ်သမားရို့ကို ရွှတ်ပီးလတ်အောင် အသီးအနှံ အပိုင်သျှင်ဘားမာ ဆုတောင်းကတ်။ 3နင်ရို့ လားလီကတ်၊ တောခွီးအရွီထဲတို့ သိုးဆိတ်တိကို ရွှတ်စာပိုင် ငါ နင်ရို့ကို ရွှတ်တေ။ 4တန်းကားအိပ်၊ ရွယ်အိပ် မဟုတ်ကေ ဖနပ်အပို မယူလီကတ်ကေ့ အရာ လမ်းမာ တွိသူရို့ကို နှုတ်မဆက်လီကတ်ကေ့။ 5နင်ရို့ အသူ့အိမ်မာမဆို တက်ကတ်တေခါ၊ ‘ဒေ အိမ်မာ ငြိမ်းချမ်းခြင်း ဟိပါစီ’ ဟို့ ပထမဆုံး မေတ္တာပို့လီကတ်။ 6အရာ ထိုအိမ်မာ အသူမဆို ငြိမ်းချမ်းခြင်းကို နှစ်သက်တေဆိုကေ နင်ရို့ ငြိမ်းချမ်းခြင်းစာ ယင်းသူဘားမာ ကျရောက်လိမည်၊ ယေကေလည်း ငြိမ်းချမ်းခြင်းကို နှစ်သက်သူ မဟိဆိုကေ နင်ရို့ ငြိမ်းချမ်းခြင်းစာ နင်ရို့တို့ ပြန်လာလိမည်။ 7နင်ရို့ ထိုအိမ်မာ နီလီကတ် အရာ သူရို့ ချပီးစာကို စားလီကတ်၊ အကြောင်းကား အလုပ်သမား တစ်ယောက်စာ ကိုယ့်လုပ်ခကို ရဖို့ထိုက်တန်ရေ။ တစ်အိမ်က ဆင်းရို့ အခြားတစ်အိမ်မာ မတက်လီကတ်ကေ့။ 8ဇာ ရွာတို့မဆို လားရေဆိုကေ အရာ ထို ရွာသားရို့စာ နင်ရို့ကို လက်ခံကတ်တေဆိုကေ နင်ရို့ကို စားဖို့ ပီးစာတိကို နင်ရို့ စားလီကတ်။ 9ထို ရွာမာ ရောဂါသေ ဟိရေဆိုကေ ကောင်းအောင် လုပ်လီကတ် အရာ ‘ထာဝရဘုရား၏ နိုင်ငံတော် နင်ရို့ အနားမာ ရောက်နီဗျာ’ ဟို့ သူရို့ဘားမာ ဟောပြောလီကတ်။ 10ယေကေလည်း ဇာ ရွာတို့မဆို ဝင်ရေဆိုကေ အရာ ထို ရွာသားရို့စာ နင်ရို့ကို လက်မခံကတ်ဆိုကေ ထို ရွာလမ်းအနှူး သျှောက်ရို့ ဒေပိုင် ပြောလီကတ်၊ 11‘နင်ရို့ ရွာက ငါရို့ အခြီမာ ကပ်ရို့ပါစာ ကျုပ်မုန့်ကိုပင် နင်ရို့ကို သတိပီးစာ အမှတ်တရအဖြစ် ခါချဘိုက်ခဗျာ။ ယေကေလည်း ထာဝရဘုရား၏ နိုင်ငံတော် အပါးမာ ရောက်နီဗျာဆိုစာကို နင်ရို့ မှတ်ထားကတ်။’ 12ငါ နင်ရို့ကို ပြောရေ၊ ထို ရွာသားရို့စာ တရားစစ်ဆေးရေနိမာ သောဒုံမြို့သားရို့ထက် ပိုရို့ ကြောက်လန့်ဖို့ကောင်းစာ အပြစ်ဒါဏ်ကို ခံရကတ်လိမည်။” အပြစ်က စိတ်လှည့်ရို့ မလာစာမြို့သားရို့
(မဿဲ ၁၁:၂၀-၂၄)
13“အိုး ခေါရာဇိန်မြို့သားရို့န ဗက်ဇဲဒမြို့သားရို့၊ နင်ရို့အတွက် အမင်္ဂလာဟိရေ! နင်ရို့ ရှိထက်က လုပ်လီစာ အံ့ဩဖွယ်အလုပ်တိကို တုရုမြို့သားရို့န ဇိဒုန်မြို့သားရို့ ရှိထက်က လုပ်လီဖို့ဆိုကေ သူရို့စာ နှစ်ပေါင်းများစွာ အယင်ကပင် ခြယ်ဘောက်သာဝတ်ပြီးကေ ပြာဘုံမာ ထိုင်ရို့ အပြစ်က စိတ်လှည့်လီကတ်ဖို့။ 14နင်ရို့ အမှန် တရားစစ်ဆေးရေနိမာ တုရုမြို့သားရို့န ဇိဒုန်မြို့သားရို့ထက် ပိုရို့ ကြောက်လန့်ဖို့ကောင်းစာ အပြစ်ဒါဏ်ကို ခံရကတ်လိမည်။ 15“အရာ အိုး ကပေရနောင်မြို့သျှေသားရို့! နင်ရို့ ဂေါင်းခင်ဘုံမာ ရိုသေခြင်းကို ခံရဖို့ ဟို့ မှတ်ကတ်စာလော? တစ်ခါလည်း ခံရမည် မဟုတ်! နင်ရို့စာ သီသူရို့နိုင်ငံတို့ ဘိုက်ချခြင်းကို ခံရကတ်လိမည်။ 16“ယေရှုစာ အရာတစ်ပြန် တပည့်ရို့ကို ပြောလီရေ၊ ‘နင်ရို့ စကားကို နားထောင်သူရို့စာ ငါ့စကားကို နားထောင်ကတ်တေ။ နင်ရို့ကို ငြင်းပယ်သူရို့စာ ငါ့ကို ငြင်းပယ်ကတ်တေ။ အရာ ငါ့ကို ငြင်းပယ်သူရို့စာ ငါ့ကို ရွှတ်လိုက်သူကို ငြင်းပယ်ကတ်တေ။’”တပည့်အယောက်ခုနစ်ဆယ် ပြန်လာခြင်း
17ထိုတပည့်အယောက် ခုနစ်ဆယ်စာ ပျော်ရို့ ပြန်လာပြီးကေ ပြောကတ်လီရေ၊ “အသျှင်၊ ကိုယ်တော်၏ နာမည်ကို ပြောရေဆိုကေ နတ်ဆိုးတိ တိုင်အောင်ပင် အကျွန်ရို့ စကားကို နားထောင်ကတ်ပါရေ။” 18ယေရှုစာ သူရို့ကို ပြောလီရေ၊ “မာရ်နတ်ကို လျှပ်ပြက်စာပိုင် ဂေါင်းခင်က ကျလားခစာကို ငါ မြင်လိုက်တေ။ 19ကြည့်ကတ်၊ မြိန်န ကင်းကဏန်းကို နင်းရို့ လားဖို့ နိုင်လတ်အောင် အရာ နင်ရို့မာ ရန်သူဆိုစာ မာရ်နတ်၏ ဟိသမျ တန်ခိုးကိုလည်း ဖိနင်းဖို့ နိုင်လတ်အောင် ငါ နင်ရို့ကို တန်ခိုး ပီးလီရေ။ ယင်းအတွက်န နင်ရို့ကို တစ်ခုလည်း ဘေးအန္တရာယ် ပီးနိုင်လိမည် မဟုတ်။ 20ယေကေလည်း နတ်ဆိုးတိ နင်ရို့ စကားကို နားထောင်ကတ်တေ ဆိုပြီးကေ နင်ရို့ မပျော်ကတ်ကေ့။ ယင်းထက်ပင် ဂေါင်းခင်ဘုံမာ နင်ရို့ နာမည် စာရင်းဝင်ဗျာ ဆိုပြီးကေ ပျော်ကတ်။”ယေရှု ဝမ်းသာရို့ အဖကို ချီမွမ်းခြင်း
(၁၁:၂၅-၂၇)
21ယင်းခါ ယေရှုစာ သန့်ရှင်းသောဝိညာဉ်တော်ပီးစာ ဝမ်းသာခြင်းန ပြည့်စုံရို့ ပြောလီရေ၊ “အိုး အဖ၊ ကိုယ်တော်စာ ဂေါင်းခင်ဘုံန ကမ္ဘာကို အုပ်စိုးစာ အသျှင် ဖြစ်ပါရေ။ အကျွန် ကိုယ်တော်ကို ချီမွမ်းပါရေ၊ အကြောင်းကား ဒေ ဟိသမျ အကြောင်းအရာတိကို ပညာသျှင်ရို့န ညာဏ်သျှင်ရို့က ဖုံးရွှက်ထားပါရေ၊ ယေကေလည်း အသျှေပိုင် နုညံ့ခြင်းစိတ် ဟိသူရို့ဘားမာ ဖေါ်ပြပါရေ။ ဟုတ်ပါရေ အဖ၊ ကိုယ်တော်၏ အလိုတော်အတိုင်း ဒေပိုင် ဖြစ်လာပါရေ။ 22ငါ့အဖစာ ဟိသမျ အားကုံးကို ငါ့အလက်မာ အပ်ပီးဗျာ။ သားတော် အသူလည်းဆိုစာကို အဖတစ်ပါးတည်းရာ သိရေ။ အရာ အဖ အသူလည်းဆိုစာကို သားတော်န သားတော် အသူရို့ဘားမာ အဖကို ဖေါ်ပြရေလည်း ယင်းသူရို့ရာ အဖကို သိကတ်တေ။” 23ယင်းနောက် သူစာ တပည့်ရို့ဖက်တို့ လှည့်ကြည့်လီရေ အရာ သူရို့န စကား ပြောလီရေ၊ “နင်ရို့ မြင်ဖူးကတ်စာတိကို မြင်ဖူးသူရို့စာ မင်္ဂလာ ဟိကတ်တေ။ 24ငါ နင်ရို့ကို ပြောရေ၊ နင်ရို့ မြင်ဖူးကတ်စာတိကို အများကြီး ဘုရားသတင်းပို့သူရို့န မင်းရို့တိုင်အောင်ပင် မြင်ချင်ခရို့လည်း မမြင်ဖူးခကတ် အရာ နင်ရို့ ကြားဖူးကတ်စာတိကို ကြားချင်ခရို့လည်း မကြားဖူးခကတ်။”သနားကြင်နာတတ်စာ ရှမာရိပြည်နယ်သား ပုံဥပမာ
25တစ်ရက်နိ ကျမ်းဆရာတစ်ယောက်စာ ယေရှုတို့ လာလီရေ။ သူစာ ယေရှုကို စုံစမ်းဖို့အတွက် မီးလီရေ၊ “ဆရာ၊ ထာဝရအသက်ကို ရဖို့အတွက် အကျွန် ဇာ လုပ်ရပါဖို့လည်း?” 26ယေရှုစာ သူ့ကို မီးလီရေ၊ “မောရှေ၏ ပညှတ်တရားမာ ဇာ ရွီးရို့ ဟိရေလည်း? ထိုပညှတ်တရားမာ ဇာပိုင် ဖတ်ဖူးရေလည်း?” 27ထိုကျမ်းဆရာစာ ယေရှုကို အဖြေပီးလီရေ၊ “နင်ရို့စာ ကိုယ်ရို့မာ ဟိသမျ နှလုံး၊ ဟိသမျ အသက်၊ ဟိသမျ အားခွန် အရာ ဟိသမျ စိတ်န နင်ရို့မာ အသျှင်ထာဝရဘုရားကို ချစ်ကတ်ရဖို့။ အရာ နင့် အိမ်နားပါးသားကို ကိုယ့်ကိုပိုင် ချစ်ရဖို့။” 28ယေရှုစာ သူ့ကို ပြောလီရေ၊ “ကိုယ်ဘင် အဖြေပီးစာ မှန်ရေ။ ကိုယ်ဘင် ယင်းပိုင် လုပ်နီရေဆိုကေ ထာဝရအသက်ကို ရလိမည်။” 29ထိုကျမ်းဆရာစာ ကိုယ်သိက္ခာ မကျရအောင် ယေရှုကို မီးလီရေ၊ “အကျွန့် အိမ်နားပါးသားကား အသူပါလည်း?” 30ယေရှုစာ သူ့ကို အဖြေပီးလီရေ၊ “လူတစ်ယောက်စာ ယေရုရှလင်မြို့ကနီရို့ ယေရိခေါမြို့တို့ လားလီရေ။ ယင်းခါ သူစာ ဒါးမြရို့န တွိလီရေ အရာ ဒါးမြရို့စာ သူ့အဝတ်ကို ချွတ်ရို့ သူ့ကို ဘုတ်ရို့ မသီတသီ ထားဘိုက်ခကတ်လီရေ။ 31ယင်းနောက် ယဇ်ပုရောဟိတ် တစ်ယောက်စာ ယင်းလမ်းကနီရို့ လားလီရေ။ သူစာ ထိုလူကို မြင်ရေခါ ကက်ရို့ လားခလီရေ။ 32ယင်းပိုင်တထန် လေဝိအမျိုးအနွယ်သား တစ်ယောက်စာ ယင်းလမ်းအနှူး လာလီရေ အရာ သူ့ကို မြင်ရေခါ ကက်ရို့ လားခလီရေ။ 33ယင်းနောက် ရှမာရိပြည်နယ်သား တစ်ယောက်လည်း ယင်းလမ်းကနီရို့ လာရို့ ထိုလူအနားတို့ ရောက်လီရေ အရာ သူ့ကို မြင်ရို့ ကောင်းကောင်း သနားလီရေ။ 34သူစာ ထိုလူအနားတို့ လားရို့ သူ့အနာမာ ဆီန စပျစ်ရည် လိမ်းရို့ အဝတ်ရိုက်လီရေ။ ယင်းနောက် သူစာ ထိုလူကို ကိုယ့်ဝန်ရွက်မြင်းထက်မာ တင်ရို့ တဲခိုခန့်တစ်ခန့်တို့ ယူခလီရေ အရာ သူ့ကို ပြုဇုသုတ်သင်လီရေ။ 35နောက်တစ်ရက်နိ သူစာ တဲခိုခန့်အပိုင်သျှင်ကို ငွေသားတန်းကား နှစ်ချပ် ထုတ်ပီးရို့ ပြောလီရေ၊ ‘ဒေ လူကို ပြုဇုသုတ်သင်လီ။ ကုန်ကျဇရစ် ဒေထက် ပိုရေဆိုကေ ငါ ပြန်လာရေခါ ပီးမည်။’” 36အဆုံးပြီးမာ ယေရှုစာ မီးလီရေ၊ “ဒေဂု ကိုယ်ဘင် ဇာပိုင် မှတ်တေလည်း? ဒေ လူသုံးယောက်အထဲက ထိုဒါးမြအတိုက်ခံသူမာ အိမ်နားပါးသား အသူလည်း?” 37ထိုကျမ်းဆရာစာ အဖြေပီးလီရေ၊ “သူ့ကို သနားသူစာ သူ့အိမ်နားပါးသား ဖြစ်ပါရေ။” ယင်းခါ ယေရှုစာ သူ့ကို ပြောလီရေ၊ “ယင်းပိုင်ဆိုကေ ကိုယ်ဘင်လည်းသောက် လားရို့ ယင်းပိုင်တထန် လုပ်လီ။”ညီအစ်မာနှစ်ယောက် ယေရှုကို အိမ်တင်ခံခြင်း
38ယင်းနောက် ယေရှုစာ ကိုယ့်တပည့်ရို့နအတူ လမ်းမာ လားရို့ လားရို့ ရွာတစ်ရွာတို့ ဝင်လီရေ။ ယင်းရွာမာ မာသနာမည်န မိန်းမတစ်ယောက်စာ ပျော်ရို့ ယေရှုကို အိမ်တင်ခံလီရေ။ 39သူ့မာ မာရိနာမည်န ညီမတစ်ယောက် ဟိလီရေ။ သူစာ အသျှင်၏ အခြီရင်းမာ ထိုင်ရို့ သူ့စကားကို နားထောင်နီလီရေ။ 40ယေကေလည်း မာသစာ စားသောက်ဖို့ အစီစဉ် လုပ်ရို့ ဟိလီရေ။ ယင်းအတွက်န သူစာ လာရို့ ပြောလီရေ၊ “အသျှင်၊ ကိုယ်တော်ကား မြင်ပါရေ၊ အကျွန့် ညီမသျှေစာ ဟိသမျ အလုပ်တာဝန်ကို အကျွန် တစ်ယောက်တည်းကိုရာ ပီးပါရေ! အကျွန့်ကို ကူညီလတ်အောင် ကိုယ်တော် တစ်ချက် သူ့ကို ပြောလိုက်ပါ။” 41ယင်းခါ ယေရှုစာ မာသကို ပြောလီရေ၊ “မာသ၊ မာသ၊ နင် အလုပ် အများကြီးကို ယူရို့ စဉ်းစား-ဝေဖန်နီရေ၊ 42ယေကေလည်း လိုအပ်စာ အကြောင်းအရာ တစ်ခုတည်းရာ ဟိရေ။ မာရိစာ ထိုအရေးကြီးစာ အကြောင်းအရာကို ရွီးကောက်ယူဗျာ။ ထိုအကြောင်းအရာကို သူ့က တစ်ယောက်လည်း လုယူလိမည် မဟုတ်။”
Copyright information for
RmzSC