Luke 11

အသျှင်၏ ဆုတောင်းခြင်း

(မဿဲ ၆:၅-၁၅)

1တစ်ချိန်ခါ ယေရှုစာ နေရာတစ်ခုမာ ဆုတောင်းရို့ နီလီရေ။ ဆုတောင်းရို့ ပြီးရေခါ သူ့မာ တပည့်တစ်ယောက် လာရို့ သူ့ကို ပြောလီရေ၊ “အသျှင်၊ ရီနှစ်မင်္ဂလာပီးသူ ယောဟန်ကား ကိုယ့်တပည့်ရို့ကို ဆုတောင်းဖို့ သင်လီပါရေ။ ယင်းပိုင်တထန် ကိုယ်တော်လည်းသောက် အကျွန်ရို့ကို ဆုတောင်းဖို့ သင်ပီးပါ။” 2ယေရှုစာ သူရို့ကို ပြောလီရေ၊ “နင်ရို့ ဆုတောင်းကတ်တေခါ ဒေပိုင် တောင်းကတ်၊
‘အိုး အကျွန်ရို့မာ ဂေါင်းခင်ဘုံသျှင် အဖ၊
ကိုယ်တော်၏ သန့်ရှင်းစာ နာမည် ရိုသေခြင်း ဟိပါစီ၊
ကိုယ်တော်၏ နိုင်ငံတော် တည်ထောင်ပါစီ။
3အကျွန်ရို့ လိုအပ်စာ အစားအစာကို
ကိုယ်တော် နိတိုင်း အကျွန်ရို့ကို ပီးသနားပါ။
4ကိုယ်တော် အကျွန်ရို့ အပြစ်ကို ခွင့်ရွှတ်ပါ၊
အကြောင်းကား အကျွန်ရို့ကို ဆန့်ကျင်ရို့
အပြစ်လုပ်သူရို့ကို အကျွန်ရို့ ခွင့်ရွှတ်ကတ်ပါရေ။
ကိုယ်တော် အကျွန်ရို့ကို အပြစ်မာ မကျပါစီကေ့။’”

ဆုတောင်းဖို့စာ ပုံဥပမာ

5ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “ကိုင်လိုက်ဖိ၊ နင်ရို့အထဲက လူတစ်ယောက်စာ ညဉ့်သိုင်ခေါင်မာ ကိုယ့်မိတ်ဆွေ အိမ်တို့ လားရို့ ပြောလီရေ၊ ‘မိတ်ဆွေ၊ ငါ့ကို ပေါင်မုန့် သုံးသျှက် ချီးဖိ။ 6ငါ့မာ မိတ်ဆွေတစ်ယောက် လမ်းမာ လားရို့ လားရို့ ငါ့အိမ်တို့ ရောက်ပါလတ်တေ။ ငါ့မာ သူ့ကို ကျွေးစရာ တစ်ခုလည်း မဟိ။’ 7ယင်းခါ သူ့မာ မိတ်ဆွေစာ အိမ်ထဲကနီရို့ အဖြေပီးလီရေ၊ ‘ငါ့ကို ဒုက္ခ မထည့်ကေ့ဖိ။ ဒေဂု အိမ်လမ်းခဝ ပိတ်ဘိုက်လိုက်ပျာ အရာ ငါ့ သားသမီးရို့လည်း ငါနအတူ အိပ်ရာမာ အိပ်နီကတ်ပျာ။ ယင်းအတွက်န ငါ ထရို့ နင့်ကို တစ်ခုလည်း မပီးနိုင်။’ 8ငါ နင်ရို့ကို ပြောရေ၊ သူစာ မိတ်ဆွေအနေန ထိုသူကို တစ်ခုလည်း မပီးချင်ကေလည်းသောက် အပြန်ပြန် တောင်းပန်ရေအတွက်န သူစာ အိပ်ရာက ထလာလိမည် အရာ ထိုသူ လိုအပ်စာ အားကုံးကို ထုတ်ပီးလိမည်။

တောင်းကေ ရဖို့စာ အကြောင်း

(မဿဲ ၇:၇-၁၁)

9“ယင်းအတွက်န ငါ နင်ရို့ကို ပြောရေ၊ တောင်းကတ်၊ တောင်းရေဆိုကေ နင်ရို့ ရကတ်လိမည်။ ရှာကတ်၊ ရှာရေဆိုကေ တွိကတ်လိမည်။ အရာ တန်ခါးပိတ်ကို ခေါက်ကတ်၊ ခေါက်တေဆိုကေ နင်ရို့အတွက် ဖွင့်ပီးလိမည်၊ 10အကြောင်းကား တောင်းရေလူတိုင်း ရကတ်တေ၊ ရှာရေလူတိုင်း တွိကတ်တေ အရာ တန်ခါးပိတ်ကို ခေါက်တေ လူတိုင်းအတွက် ဖွင့်ပီးရေ။ 11နင်ရို့အထဲမာ ကိုယ့်သား ထမင်းစားဖို့ တောင်းရေဆိုကေ ကျောက်စရစ်ကို ထုတ်ပီးစာ အဖ ဟိရေလော? မဟုတ်ကေ ငါးစားဖို့ တောင်းရေဆိုကေ မြိန်ကို ထုတ်ပီးစာ အဖ ဟိရေလော? 12အရာ ကြက်အု စားဖို့တောင်းရေဆိုကေ ကင်းကဏန်းကို ထုတ်ပီးစာ အဖ ဟိရေလော? 13နင်ရို့ ဆိုးယုတ်ကတ်ကေလည်းသောက် နင်ရို့စာ ကိုယ်ရို့မာ သားသမီးရို့ကို ကောင်းစာ ဝန်တိကို ပီးဖို့တတ်ကတ်တေ။ ယင်းပိုင်ဆိုကေ စဉ်းစားကြည့်ကတ်၊ နင်ရို့မာ ဂေါင်းခင်ဘုံသျှင် အဖစာ ကိုယ့်ဘားမာ တောင်းကတ်သူရို့ကို အရာလည်း ပိုရို့ သန့်ရှင်းသောဝိညာဉ်တော်ကို ပီးဖို့ မဟုတ်လော!”

ထာဝရဘုရား၏ တန်ခိုးကို တရိုက်ခြင်း

(မဿဲ ၁၂:၂၂-၃၂၊ မာကု ၃:၂၀-၂၇)

14အရာ တစ်ချိန်ခါ ယေရှုစာ လူတစ်ယောက်က ပပွါးနတ်ဆိုး တစ်ကောင်ကို နှင်ထုတ်လီရေ။ နတ်ဆိုး ထွက်လားခရေခါ ထိုပပွါးစာ စကားပြောဖို့ နိုင်လီရေ။ ယင်းခါ လူရို့စာ အံ့ဩကတ်လီရေ၊ 15ယေကေလည်း သူရို့အထဲက တစ်ချိုးလူရို့စာ ပြောကတ်လီရေ၊ “သူစာ နတ်ဆိုးရို့မာ မင်း ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်ဖို့ နိုင်စာရာ!” 16အခြား တစ်ချိုးလူရို့စာ ယေရှုကို စုံစမ်းဖို့အတွက် ဂေါင်းခင်ဘုံက နိမိတ်လက္ခဏာတစ်ခု ကြည့်ဖို့ တောင်းကတ်လီရေ။

17ယေရှုစာ သူရို့ စိတ်မာ စဉ်းစားချက်ကို သိရို့ ပြောလီရေ၊ “နိုင်ငံတစ်ခုမာ လူရို့စာ ကိုယ်ရို့အချင်းချင်း မသင့်မတင် ဖြစ်ရို့ ကွဲလားခရေဆိုကေ ယင်းနိုင်ငံစာ ပျက်စီးခြင်းတို့ ရောက်ရရေ။ အရာ အိမ်တစ်အိမ်မာ ကိုယ်ရို့အချင်းချင်း မသင့်မတင် ဖြစ်ရို့ ကွဲလားခရေဆိုကေ ယင်းအိမ်စာ ပျက်စီးခြင်းတို့ ရောက်ရရေ။ 18မာရ်နတ်လည်း ကိုယ့်ကိုကိုယ် ဆန့်ကျင်ရေဆိုကေ သူ့နိုင်ငံ ဇာပိုင်ပျင်ရို့ တည်မြဲနိုင်ဖို့သိလည်း? ကိုယ်ဘင်ရို့ ငါ့ကို ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်တေ ဟို့ ပြောကတ်တေ။ 19ကောင်းရေ၊ ငါ ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်တေဆိုကေ ကိုယ်ဘင်ရို့မာ တပည့်ရို့ အသူ့ တန်ခိုးကို အသုံးပြုရို့ နတ်ဆိုးတိကို နှင်ထုတ်ကတ်စာလည်း? ယင်းအတွက်န ကိုယ်ဘင်ရို့ ပြောစာစကား မှားရေဆိုစာကို ကိုယ်ဘင်ရို့မာ တပည့်ရို့ လုပ်ကတ်စာ အလုပ်တိကနီရို့ သက်သီပြရေ။ 20ယေကေလည်း ငါ အမှန် ထာဝရဘုရား၏ တန်ခိုးကို အသုံးပြုရို့ နတ်ဆိုးတိကို နှင်ထုတ်တေဆိုကေ ထာဝရဘုရား၏ နိုင်ငံတော်စာ ကိုယ်ဘင်ရို့အထဲမာ ရောက်နီဗျာ။

21“အားသျှင်တစ်ယောက်စာ ဟိသမျ လက်နှက်တိကို ယူရို့ ကိုယ့်အိမ်ကို စောင့်ရေဆိုကေ သူ့မာ ပစ္စည်း-ဥစ္စာတိ လလုံချချုံ ဟိရေ။ 22ယေကေလည်း သူ့ထက် အားခွန်န ပြည့်စုံသူတစ်ယောက် လာပြီးကေ သူ့ကို တိုက်ဆိုင်ရို့ အနိုင်ယူရေဆိုကေ သူ့မာ လက်နှက် အားကုံးကို ထိုသူစာ လုယူလားခရေ အရာ လုယူခစာ ပစ္စည်း-ဥစ္စာတိကိုလည်း ဝီပီးရေ။ 23ငါ့ဖက်က မနီသူစာ ငါ့ကို ဆန့်ကျင်သူ ဖြစ်တေ အရာ ငါနအတူ မစုမသိမ်းသူစာ ကြဲဖြန့်သူ ဖြစ်တေ။

နတ်ဆိုး ပြန်လာခြင်း

(မဿဲ ၁၂:၄၃-၄၅)

24“နတ်ဆိုးတစ်ကောင် လူတစ်ယောက် ခန္ဓာက ထွက်လားခရေခါ သူစာ မြေပြင်အသွိမာ တည်းခိုဖို့အတွက် ပတ်ရို့ ရှာနီရေ။ ယေကေလည်း တည်းခိုဖို့စာနေရာကို ရှာရို့ မရရေခါ သူစာ ပြောရေ၊ ‘အယင် နီခစာအိမ်တို့ ငါ ပြန်လားဖို့ဗျာ။’ 25သူစာ ယင်းအိမ်တို့ ပြန်လာရေခါ တစ်ခုလည်း မဟိဘိုင်းန သသန့်ရှရှင်း ဆင်ထားစာကို မြင်ရရေ။ 26ယင်းခါ သူစာ လားပြီးကေ ကိုယ့်ထက် ပိုရို့ ဆိုးယုတ်စာ နတ်ဆိုးခုနစ်ကောင်ကို ခေါ်ယူခရေ အရာ ထိုလူခန္ဓာမာ ဝင်ရို့ နီကတ်တေ။ ယင်းအတွက်န ထိုလူအခြေအနေစာ အယင်ထက် ပိုရို့ ဆိုးလာရေ။”

အစစ် မင်္ဂလာဟိသူ

27ယေရှု စကားပြောနီတုံးမာ လူပရိတ်သတ်အထဲက မိန်းမတစ်ယောက် အားန အော်ရို့ ပြောလီရေ၊ “ကိုယ်တော်ကို မွီးဖွားရို့ နို့တိုက်စာ မိန်းမစာ မင်္ဂလာ ဟိပါရေ။” 28ယေကေလည်း ယေရှုစာ ပြောလီရေ၊ “ထာဝရဘုရား၏ စကားတော်ကို ကြားရေအတိုင်း လိုက်နာသူရို့စာ ယင်းထက် ပိုရို့ မင်္ဂလာ ဟိကတ်တေ။”

ဒေခိုက်မာ လူရို့ အပြစ်အတင်ခံဖို့စာ အကြောင်း

(မဿဲ ၁၂:၃၈-၄၂)

29ယင်းနောက် အရာလည်း လူအများကြီး သူ့အနားတို့ စုလာကတ်လီရေ။ ယင်းခါ သူစာ ပြောလီရေ၊ “ဒေခိုက်မာ လူရို့ ဆိုးယုတ်ကတ်တေ။ သူရို့စာ နိမိတ်လက္ခဏာကို လိုက်ရို့ ရှာနီကတ်တေ၊ ယေကေလည်း သူရို့ကို ဘုရားသတင်းပို့သူ ယောန၏ နိမိတ်လက္ခဏာကို ပယ်ရို့ အခြားနိမိတ်လက္ခဏာ တစ်ခုကိုလည်း ပြလိမည် မဟုတ်။ 30ဘုရားသတင်းပို့သူ ယောန ကိုယ်တိုင် နိနေဝေမြို့သားရို့အတွက် နိမိတ်လက္ခဏာ ဖြစ်လီရေ။ ယင်းပိုင်တထန် မနုသသားတော်လည်း ဒေခိုက်မာ လူရို့အတွက် နိမိတ်လက္ခဏာ ဖြစ်လိမည်။ 31တောင်ဖက်ပြည်က မင်းမစာ တရားစစ်ဆေးရေနိမာ ရပ်ရို့ ဒေခိုက်မာ လူရို့ကို အပြစ်တင်လိမည်၊ အကြောင်းကား သူစာ ရှောလမုန်မင်းကြီး ပြောစာ ညာဏ်ပညာစကားတိကို နားထောင်ဖို့အတွက် ကမ္ဘာအစွမ်းကနီရို့ လာလီရေ။ အရာ ကြည့်ကတ်၊ ရှောလမုန်မင်းကြီးထက်လည်း ပိုရို့ ကြီးမြတ်သူတစ်ပါး ဒေမာ ဟိရေ။ 32နိနေဝေမြို့သားရို့စာ တရားစစ်ဆေးရေနိမာ ရပ်ရို့ ဒေခိုက်မာ လူရို့ကို အပြစ်တင်ကတ်လိမည်၊ အကြောင်းကား နိနေဝေမြို့သားရို့စာ ဘုရားသတင်းပို့သူ ယောန ဟောပြောစာတရားကို ကြားရို့ အပြစ်က စိတ်လှည့်ရို့ လာလီကတ်တေ။ အရာ ကြည့်ကတ်၊ ယောနထက်လည်း ပိုရို့ ကြီးမြတ်သူတစ်ပါး ဒေမာ ဟိရေ။

မျက်စိစာ ကိုယ်ခန္ဓာ၏ ဆီမီးခွက် ဖြစ်ခြင်း

(မဿဲ ၅:၁၅၊ ၆:၂၂-၂၃)

33“ဆီမီးခွက်ကို ထွန်းရို့ တစ်ယောက်လည်း ကွယ်ရာမာ မထား မဟုတ်ကေ တောင်းချုပ်ရို့ မထား။ ယင်းထက်ပင် အိမ်ထဲတို့ ဝင်လာသူရို့ အလင်းကို ရကတ်ပတ်စီအတွက် ဆီမီးခွက်ကို ခုံထက်မာရာ တင်ထားရေ။ 34ကိုယ်ဘင်မာ မျက်စိစာ ကိုယ်ဘင် ခန္ဓာ၏ ဆီမီးခွက် ဖြစ်တေ။ ကိုယ်ဘင်မာ မျက်စိ ကောင်းရေဆိုကေ ကိုယ်ဘင်မာ ခန္ဓာတစ်ကိုယ်လုံး အလင်းနပြည့်စုံလိမည်၊ ယေကေလည်း ကိုယ်ဘင်မာ မျက်စိ မကောင်းဆိုကေ ကိုယ်ဘင်မာ ခန္ဓာတစ်ကိုယ်လုံး မှောင်မိုက်လိမည်။ 35ယင်းအတွက်န ကိုယ်ဘင် ခန္ဓာမာဟိစာ အလင်းစာ အမိုက်မှောင် မဖြစ်လတ်အောင် သတိထားရဖို့။ 36ကိုယ်ဘင်မာ ခန္ဓာတစ်ကိုယ်လုံး အလင်းန ပြည့်စုံရေဆိုကေ အရာ အမိုက်မှောင် တစ်ဖဲ့လည်း မဟိဆိုကေ ကိုယ်ဘင်မာ ခန္ဓာတစ်ကိုယ်လုံး တောက်ပြောင်လိမည်။ ယင်းခါ ဆီမီးခွက် အလင်းရောင်ပိုင် ကိုယ်ဘင်မာ ခန္ဓာတစ်ကိုယ်လုံး တောက်ပြောင်လိမည်။”

ဘာသာရေး ဂေါင်းဆောင်ရို့ကို အပြစ်တင်ခြင်း

(မဿဲ ၂၃:၁-၃၆၊ မာကု ၁၂:၃၈-၄၀၊ လုကာ ၂၀:၄၅-၄၇)

37ယေရှု စကားပြောရို့ ပြီးရေခါ ဖာရိရှဲအဖွဲ့သားတစ်ယောက် စားသောက်ဖို့အတွက် ယေရှုကို ဖိတ်ခေါ်လီရေ။ ယင်းခါ ယေရှုစာ အိမ်ထဲတို့ ဝင်ရို့ စားသောက်ဖို့ ထိုင်လီရေ။ 38မစားခင်အယင်က ဘာသာရေး ထုံးစဉ်အတိုင်း ယေရှု အလက် မဆီးစာကို မြင်ရို့ ထိုဖာရိရှဲအဖွဲ့သားစာ အံ့ဩလီရေ။ 39အသျှင်စာ သူ့ကို ပြောလီရေ၊ “နားထောင်ကတ်၊ ကိုယ်ဘင်ရို့ ဖာရိရှဲအဖွဲ့သားရို့စာ လောင်ပန်း-ဟင်းစားအပြင်ကို စင်အောင် ပွတ်နီကတ်တေ၊ ယေကေလည်း ကိုယ်ဘင်ရို့အထဲမာ လောဖတတ်ခြင်းန ဆိုးယုတ်ခြင်း ပြည့်နီရေ။ 40ကိုယ်ဘင်ရို့ ပညာတုံး ဖြစ်ကတ်တေ! ပြင်ဖက်ကို ဖန်ဆင်းသူစာ အထဲတွင်းကိုလည်း ဖန်ဆင်းလီရေ မဟုတ်လော? 41ကိုယ်ဘင်ရို့မာ လောင်ပန်း-ဟင်းစားအထဲမာ ဟိစာတိကို ဆင်းရဲသားရို့ကို အလှူပီးကတ်။ ယင်းပိုင်ဆိုကေ ဟိသမျ အားကုံး ကိုယ်ဘင်ရို့အတွက် စင်ကြယ်လိမည်။

42“ဖာရိရှဲအဖွဲ့သားရို့၊ ကိုယ်ဘင်ရို့အတွက် အမင်္ဂလာဟိရေ! အကြောင်းကား ကိုယ်ဘင်ရို့စာ နှုန်း၊ ဇာတဖြူရွက် အရာ ဟိသမျ ဟင်းသီး-ဟင်းရွက်တိကို ထာဝရဘုရားဘားမာ ဆယ်ဖို့တစ်ဖို့ လှူနီကတ်တေ၊ ယေကေလည်း လူရို့ကို ကျေးဇူးပြုဖို့စာန ထာဝရဘုရားကို ချစ်ဖို့စာ အကြောင်းကို ကိုယ်ဘင်ရို့ အရေးမစိုက်ကတ်။ အယင်စာတိကို လိုက်နာရေ ချက်ချင်း နောက်ဆုံးစာတိကိုလည်း ကိုယ်ဘင်ရို့ လိုက်နာဖို့ သင့်ကတ်တေ။

43“ဖာရိရှဲအဖွဲ့သားရို့၊ ကိုယ်ဘင်ရို့အတွက် အမင်္ဂလာဟိရေ! အကြောင်းကား ကိုယ်ဘင်ရို့စာ တရားဇရပ်မာ အမြင့်မြတ်ဆုံးနေရာမာ ထိုင်ဖို့စာကို နှစ်သက်ကတ်တေ အရာ ဈီးဆိုင်တိမာ လူရို့က ရိုသေခြင်း ရဖို့စာကို နှစ်သက်ကတ်တေ။ 44ကိုယ်ဘင်ရို့အတွက် အမင်္ဂလာဟိရေ! အကြောင်းကား ကိုယ်ဘင်ရို့စာ အမှတ်မထည့်စာ သင်္ချိုင်းတွင်းနတူကတ်တေ။ လူရို့စာ မသိဘိုင်းန ထိုသင်္ချိုင်းတွင်းကို ကျော်ရို့ နင်းရို့ လားကတ်တေ။”

45ယင်းခါ ကျမ်းဆရာရို့အထဲက တစ်ယောက် ယေရှုကို ပြောလီရေ၊ “ဆရာ၊ ကိုယ်ဘင် ဒေပိုင် စကားကို ပြောရို့ အကျွန်ရို့ကိုလည်း အသရေရှုတ်ချပါရေ။”

46ယေရှုစာ ပြောလီရေ၊ “ကျမ်းဆရာရို့၊ ကိုယ်ဘင်ရို့အတွက် အမင်္ဂလာဟိရေ! အကြောင်းကား ကိုယ်ဘင်ရို့စာ လူရို့ဘားမာ လီးနိုင်သရိ ဝန်ထုပ်တိကို တင်ပီးကတ်တေ၊ ယေကေလည်း သူရို့ကို ကူညီဖို့အတွက် ကိုယ်ဘင်ရို့ ကိုယ်တိုင် ထိုဝန်ထုပ်တိမာ လက်ညှိုးသျှေ တစ်ချောင်းပင် မတို့ကတ်။

47“ကိုယ်ဘင်ရို့အတွက် အမင်္ဂလာဟိရေ! အကြောင်းကား ကိုယ်ဘင်ရို့စာ ဘုရားသတင်းပို့သူရို့ သင်္ချိုင်းတိကို အသစ်ပျင်ရို့ ဆင့်နီကတ်တေ၊ ယေကေလည်း ကိုယ်ဘင်ရို့မာ အဖိုးအဖီးအစိုင်လာရို့ကား သူရို့ကို အသီသတ်လီကတ်တေ။ 48ယင်းအတွက်န ကိုယ်ဘင်ရို့မာ အဖိုးအဖီးအစိုင်လာရို့ လုပ်ခကတ်စာ အလုပ်တိမာ ကိုယ်ဘင်ရို့ ကိုယ်တိုင် သက်သီခံ ဖြစ်ကတ်တေ။ အရာ သူရို့ လုပ်ခကတ်စာ အလုပ်တိကို မှန်ရေ ဆိုပြီးကေ ကိုယ်ဘင်ရို့ လက်ခံကတ်တေ၊ အကြောင်းကား သူရို့စာ ဘုရားသတင်းပို့သူရို့ကို အသီသတ်လီကတ်တေ အရာ ကိုယ်ဘင်ရို့စာ သူရို့ သင်္ချိုင်းတိကို အသစ်ပျင်ရို့ ဆင့်နီကတ်တေ။ 49ယင်းအတွက်န ထာဝရဘုရားစာ ကိုယ့်ရွယ်မှတ်ချက်အတိုင်း ပြောလီရေ၊ ‘ငါ သူရို့တို့ ဘုရားသတင်းပို့သူရို့န တမန်တော်ရို့ကို ရွှတ်လိုက်ဖို့။ ယေကေလည်း သူရို့စာ ထိုသူရို့အထဲက တစ်ယောက်တစ်ရီကို အသီသတ်ကတ်လိမည် အရာ တစ်ယောက်တစ်ရီကို ညှဉ်းဆဲကတ်လိမည်။’ 50ယင်းအတွက်န ကမ္ဘာကို ဖန်ဆင်းရေလှောက်ကပင် စရို့ ဟိသမျ ဘုရားသတင်းပို့သူရို့ကို အသီသတ်ခြင်း အကြောင်းန ဒေခိုက်မာ လူရို့စာ အပြစ်အတင် ခံရကတ်လိမည်။ 51ဟုတ်တေ၊ ငါ ကိုယ်ဘင်ရို့ကို ပြောရေ၊ အာဗေလကပင်စရို့ ယဇ်ပလ္လင်န သန့်ရှင်းစာနေရာကြားမာ အသီအသတ် ခံရလီစာ ဇာခရိတိုင်အောင် ဟိသမျ အသီသတ်ခြင်း အကြောင်းန ဒေခိုက်မာ လူရို့စာ အပြစ်အတင် ခံရကတ်လိမည်။

52“ကျမ်းဆရာရို့၊ ကိုယ်ဘင်ရို့အတွက် အမင်္ဂလာဟိရေ! ကိုယ်ဘင်ရို့စာ ပညာ၏ သွပွတ်ကို သိမ်းထားကတ်တေ။ ယေကေလည်း ကိုယ်ဘင်ရို့ ကိုယ်တိုင် ထိုသွပွတ်ကို အသုံးပြုရို့ နိုင်ငံတော်တို့ မဝင်ကတ် အရာ ဝင်ဖို့ လိုသူရို့ကိုလည်း မဝင်စီကတ်။”

53– 54ယေရှု ထိုနေရာက ထွက်ရို့ ကြွလီရေခါ ကျမ်းဆရာရို့န ဖာရိရှဲအဖွဲ့သားရို့စာ ကြိုးစားအားထုတ်ရို့ သူ့ကို မန်မြှောင့်ပီးကတ်လီရေ။ သူရို့စာ ယေရှုကို အပြစ်တင်ဖို့ အခွင့်ရလတ်အောင် သူ့ကို အမျိုးမျိုး စကားမီးဖို့အတွက် စောင့်နီကတ်လီရေ။