Luke 12
ဖာရိရှဲအဖွဲ့သားရို့ ဟန်ဆောင်မှုကို ရှောင်ကတ်
1ယင်းအချိန်ခါ လူပေါင်းထောင်သောင်းမက စုလာကတ်လီရေ။ ယင်းအတွက်န သူရို့စာ တိုးရို့တွန်းရို့ တစ်ယောက်ထက်မာ တစ်ယောက် ဖိကျကတ်လီရေ။ ယင်းခါ ယေရှုစာ ပထမဆုံး ကိုယ့်တပည့်ရို့ကို ပြောလီရေ၊ “ဖာရိရှဲအဖွဲ့သားရို့ ဟန်ဆောင်မှုကို ရှောင်ကတ်၊ အကြောင်းကား တဆီးတစ်ဖဲ့သျှေ ဂျုံမုန့်အခဲကြီးတစ်ခဲကို ရော့တက်အောင် လုပ်စာပိုင် သူရို့မာ ဟန်ဆောင်မှုတစ်ဖဲ့သျှေလည်း လူအများကြီးကို ပျက်စီးအောင် လုပ်နိုင်ရေ။အသူ့ကို ကြောက်ရဖို့လည်း?
(မဿဲ ၁၀:၂၆-၃၁)
2“ဖုံးရွှက်ထားစာ အကြောင်းအရာ အားကုံး ပေါ်လာလိမည်၊ ကွယ်ထားစာ အကြောင်းအရာ အားကုံး ထွက်လာလိမည်။ 3နင်ရို့ အမိုက်မှောင်မာ ပြောစာစကားတိကို လူရို့စာ အလင်းမာ ကြားရကတ်လိမည်။ နင်ရို့ အိမ်ထဲမာ နားမာ ဟတ်ရို့ ပြောစာစကားတိကို အိမ်ခေါင်ထက်မာ တက်ရို့ ကျော်ညာလိမည်။ 4ငါ့ မိတ်ဆွေရို့၊ ငါ နင်ရို့ကို ပြောရေ၊ နင်ရို့ ခန္ဓာကို အသီသတ်ပြီးရေနောက် တစ်ခုလည်း မလုပ်နိုင်သူရို့ကို နင်ရို့ မကြောက်ကတ်ကေ့။ 5အသူ့ကို ကြောက်ရဖို့လည်းဆိုစာကို ငါ နင်ရို့ကို ပြောမည်။ နင်ရို့ကို အသီသတ်ပြီးရေနောက် ငရဲမီးအိုင်တို့ ဘိုက်ချဖို့စာ တန်ခိုး ဟိသူကိုရာ နင်ရို့ ကြောက်ကတ်။ ဟုတ်တေ၊ ငါ နင်ရို့ကို ပြောရေ၊ နင်ရို့ သူ့ကိုရာ ကြောက်ကတ်။ 6“အိမ်ပွတ်စာသျှေ ငါးကောင်ကို တန်ဖိုးအနည်းန ရောင်းရေ မဟုတ်လော? ယေကေလည်း ထာဝရဘုရားစာ ထိုစာသျှေ တစ်ကောင်မကျန်ကို မှတ်ထားရေ။ 7ယင်းထက်မက သူစာ နင်ရို့ အဂေါင်းမာ ဆံပင်တိကို တိုင်အောင်ပင် ရွီထားရေ။ မကြောက်ကတ်ကေ့၊ နင်ရို့ ထိုအိမ်ပွတ်စာသျှေ အများကြီးထက်လည်း ပိုရို့ တန်ဖိုး ဟိကတ်တေ။လူရို့ ရှိထက်က ယေရှုကို ဝန်ခံဖို့စာ အကြောင်း
8“ငါ နင်ရို့ကို ပြောရေ၊ အသူမဆို လူရို့ ရှိထက်က ငါ့ကို သူ့မာ အသျှင် ဖြစ်တေ ဟို့ ဝန်ခံရေဆိုကေ မနုသသားတော်လည်း သူ့ကို ထာဝရဘုရား၏ ဂေါင်းခင်နတ်သားရို့ ရှိထက်က ကိုယ့်တပည့် ဖြစ်တေ ဟို့ ဝန်ခံလိမည်။ 9ယေကေလည်း အသူမဆို လူရို့ ရှိထက်က ငါ့ကို ငြင်းရေဆိုကေ သူလည်း ထာဝရဘုရား၏ ဂေါင်းခင်နတ်သားရို့ ရှိထက်က အငြင်း ခံလိမည်။ 10အသူမဆို မနုသသားတော်ကို တရိုက်ရို့ စကား ပြောရေဆိုကေ သူစာ ခွင့်ရွှတ်ခြင်းကို ရလိမည်၊ ယေကေလည်း အသူမဆို သန့်ရှင်းသောဝိညာဉ်တော်ကို တရိုက်ရို့ စကား ပြောရေဆိုကေ သူစာ ခွင့်ရွှတ်ခြင်းကို ရလိမည် မဟုတ်။ 11လူရို့စာ နင်ရို့ကို တရားဇရပ်တို့ အရာ မင်းရို့န အာဏာပိုင်သျှင်ရို့ ရှိတို့ ခေါ်ယူလားကတ်လိမည်။ ယင်းခါ ဇာပိုင် စကား ပြောရဖို့လည်း အရာ ဇာပိုင် အဖြေပီးရဖို့လည်းဆိုစာကို နင်ရို့ မစဉ်းစားကတ်ကေ့၊ 12အကြောင်းကား နင်ရို့ ဇာ ပြောရဖို့လည်းဆိုစာကို သန့်ရှင်းသောဝိညာဉ်တော်စာ ယင်းအချိန်မာ နင်ရို့ကို သင်ပီးလိမည်။”လူဘော သူဌေးတစ်ယောက် ပုံဥပမာ
13လူပရိတ်သတ်အထဲက လူတစ်ယောက်စာ ယေရှုကို ပြောလီရေ၊ “ဆရာ၊ အကျွန်ရို့မာ အဖစာ အကျွန်ရို့အတွက် အမွီဥစ္စာ ထားဘိုက်ခပါရေ။ ထိုအမွီဥစ္စာကို အကျွန့်ကို ဝီပီးဖို့အတွက် အကျွန့် အစ်ကိုသေကို ခိုင်းလိုက်ပါ။” 14ယေကေလည်း ယေရှုစာ သူ့ကို ပြောလီရေ၊ “တရားစစ်ဆေးဖို့အတွက်န ကိုယ်ဘင်ရို့အထဲမာ အမွီဥစ္စာ ဝီပီးဖို့အတွက် ငါ့ကို အသူ ခန့်ထားစာလည်း?” 15ယင်းနောက် ယေရှုစာ လူရို့ကို ပြောလီရေ၊ “သတိထားကတ်! ဟိသမျ လောဖတတ်ခြင်းက ကိုယ်ရို့ကို ကယ်ဆယ်ကတ်၊ အကြောင်းကား လူဘဝ၏ တန်ဖိုးစာ အမွီဥစ္စာက မလာ။” 16အရာ ယေရှုစာ လူရို့ကို သွန်သင်ပီးဖို့အတွက် ဒေပိုင် ပုံဥပမာတစ်ခု တင်ပြလီရေ၊ “သူဌေးတစ်ယောက် လယ်မာ အသီးအနှံ အများကြီး သီးလီရေ။ 17ယင်းအတွက်န သူစာ စိတ်မာ စိတ်မာ ပြောလီရေ၊ ‘ဒေလှောက် အသီးအနှံ ထားဖို့အတွက် ငါ့မာ နေရာ မဟိ။ ငါ ဒေဂု ဇာ လုပ်ဖို့လည်း? 18အော်၊ ငါ အကြံတစ်ခု ရဗျာ။ ဒေဂု ငါ့မာဟိစာ စပါးတဲတိကို ဖြိုရို့ အရာလည်း အကြီးသန် စပါးတဲတိ ဆောက်ဖို့ဗျာ အရာ ငါ့မာ ဟိသမျ အသီးအနှံတိန ပစ္စည်း-ဥစ္စာတိကို ထိုစပါးတဲတိမာ ထားဖို့ဗျာ။ 19ယင်းနောက် ငါ ကိုယ့်ကိုကိုယ် ပြောမည်၊ “နှစ်ပေါင်းများစွာ စားဖို့အတွက် ပစ္စည်း-ဥစ္စာတိကို စုဆောင်းပြီးဗျာ။ စဉ့်စိမ် ခံပြီးကေ စိတ်အီးချမ်းသာန စားရို့သောက်ရို့ ပျော်နီဖိ။”’ 20ယေကေလည်း ထာဝရဘုရားစာ သူ့ကို ပြောလီရေ၊ ‘အဝေး လူဘော၊၊ နင် ဒေနိ ညဉ့်မာ သီရဖို့ဗျာ။ ယင်းပိုင်ဆိုကေ နင် စုဆောင်းထားစာ ပစ္စည်း-ဥစ္စာတိကို အသူ စားဖို့လည်း?’” 21အဆုံးမာ ယေရှုစာ ပြောလီရေ၊ “ကိုယ့်အတွက် ပစ္စည်း-ဥစ္စာ စုဆောင်းသူစာ ထာဝရဘုရား၏ မျက်စိမာ သူဌေးအစစ် မဟုတ်။ သူစာ ထိုသူဌေးနတူရေ။”အစားအစာထက် အသက် အရေးကြီးခြင်း
(မဿဲ ၆:၂၅-၃၄)
22ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “ယင်းအတွက်န ငါ နင်ရို့ကို ပြောရေ၊ နင်ရို့ ဇာ စားသောက်ဖို့လည်း ဆိုပြီးကေ အသက်ရှင်ဖို့စာ အကြောင်း၊ မဟုတ်ကေ ဇာ ဝတ်ဖို့လည်း ဆိုပြီးကေ ခန္ဓာ အကြောင်းကို ယူရို့ မစဉ်းစားကတ်ကေ့။ 23အကြောင်းကား အသက်စာ အစားအစာထက် အရေးကြီးရေ အရာ ခန္ဓာစာ အဝတ်ထက် အရေးကြီးရေ။ 24ကျီးကန်းတိကို ကြည့်ကတ်။ သူရို့စာ စိုက်လည်း မစိုက်ကတ်၊ ရိတ်လည်း မရိတ်ကတ်။ သူရို့မာ စပါးတဲ၊ မဟုတ်ကေ စပါးရိုင်လည်း မဟိကတ်၊ ယေကေလည်း ထာဝရဘုရား သူရို့ကို ကျွေးထားရေ။ နင်ရို့ ထိုငှက်တိထက်လည်း ပိုရို့ တန်ဖိုး ဟိကတ်တေ။ 25နင်ရို့အထဲမာ အသူတစ်ယောက် စဉ်းစား-ဆင်ခြင်ရို့ ကိုယ့်အသက်ကို တစ်တောင်လှောက် ရှည်အောင် လုပ်နိုင်ရေလည်း? 26ဒေ အလုပ်သျှေ တစ်ခုကိုပင် နင်ရို့ မလုပ်နိုင်ကတ်ဆိုကေ အခြား အကြောင်းအရာတိကို ယူရို့ ဇာဖို့ စဉ်းစားကတ်စာလည်း? 27“ထိုတောပန်းတိ ဇာပိုင်ပျင်ရို့ ပွင့်ကတ်တေလည်းဆိုစာကို နင်ရို့ စဉ်းစားကြည့်ကတ်။ ယင်းသျှင့်တိစာ အလုပ်လည်း မလုပ်ကတ်၊ ဗိုင်းလည်း မဝင့်ကတ်။ ယေကေလည်း ငါ နင်ရို့ကို ပြောရေ၊ ရှောလမုန်မင်းကြီး ဒေလှောက် ချမ်းသာကြွယ်ဝရို့လည်း ထိုတောပန်းတိအထဲက တစ်ပွင့်လှောက်ပင် ကိုယ့်ကို ဆင်ဖို့မနိုင်ခလီ။ 28အဝေး ကျုံခြင်းတရား အားနည်းသူရို့! ထိုမြက်တိကိုတိုင်အောင် ထာဝရဘုရား ဆင်ရေဆိုကေ နင်ရို့ကို အရာလည်း ပိုရို့ လှပအောင် ဆင်ဖို့ မဟုတ်လော? ယေကေလည်း ထိုမြက်တိစာ ဒေနိခါ အသက်ရှင်ရို့ ဟိကေလည်းသောက် နှက်ဖြန်ခါ မီးဖေါ်ထဲတို့ ဘိုက်ချခြင်းကို ခံရကတ်ဖို့။ 29ဇာ စားသောက်ဖို့လည်း ဆိုပြီးကေ မစဉ်းစားကတ်ကေ့ အရာ စိတ်မပူကတ်ကေ့၊ 30အကြောင်းကား လောကမာ ဟိသမျ လူမျိုးရို့စာ ထို ဟိသမျ အကြောင်းအရာကို လိုက်ရို့ ရှာနီကတ်တေ။ အရာ ထိုအကြောင်းအရာတိကို နင်ရို့ လိုအပ်တေဆိုစာကို နင်ရို့မာ အဖ သိရေ။ 31ယင်းထက်ပင် ထာဝရဘုရား၏ နိုင်ငံတော်ကို ရှာကတ်။ ယင်းပိုင်ဆိုကေ ထိုသျှင့်တိကိုလည်း နင်ရို့ ရကတ်လိမည်။ပစ္စည်း-ဥစ္စာ စုဆောင်းဖို့စာ အကြောင်း
(မဿဲ ၆:၁၉-၂၁)
32“အိုး ငါ့ သိုးဆိတ်အရွီသျှေ၊ နင်ရို့ မကြောက်ကတ်ကေ့၊ အကြောင်းကား နင်ရို့မာ အဖစာ ကိုယ့်နိုင်ငံတော်ကို နင်ရို့ကို ပီးချင်ရေ။ 33နင်ရို့မာ အမွီဥစ္စာတိကို ရောင်းရို့ ဆင်းရဲသားရို့ကို လှူကတ်။ တစ်ခါလည်း မဟောင်းမနွမ်းစာ တန်းကားအိပ်ကို ကိုယ်ရို့အတွက် ရက်ကတ်။ ယင်းအဓိပ္ပါယ်ကား တစ်ခါလည်း မကုန်မခန်းနိုင်စာ ဥစ္စာကို ဂေါင်းခင်ဘုံမာ စုဆောင်းကတ်။ ယင်းနေရာမာ သူခိုးလည်း မရောက် အရာ ခြလည်း မစား၊ 34အကြောင်းကား နင်ရို့ ဥစ္စာ ဟိစာနေရာမာ နင်ရို့ စိတ်လည်း ဟိလိမည်။အဆင်သင့် စောင့်နီဖို့စာ အကြောင်း
(မဿဲ ၁၀:၃၄-၃၆၊ ၁၆:၂-၃၊ ၂၄:၄၅-၅၁)
35“နင်ရို့ အဝတ်အစား ဝတ်ပြီးကေ ဆီမီးခွက် ထွန်းရို့ အဆင်သင့် စောင့်နီကတ်။ 36နင်ရို့စာ လက်ဆောင်ပွဲက ပြန်လာဖို့အတွက် ကိုယ်ရို့မာ အပိုင်သျှင်ကို စောင့်နီစာ ကျွန်ရို့ပိုင် စောင့်နီကတ်။ ထိုကျွန်ရို့စာ ကိုယ်ရို့မာ အပိုင်သျှင် ပြန်လာရို့ တန်ခါးပိတ်ကို ခေါက်တေခါ တန်ခါးပိတ် ဖွင့်ပီးကတ်တေ။ 37အပိုင်သျှင် ရောက်လာရေခါ ကျွန်ရို့ အနိုး စောင့်နီကတ်စာကို မြင်ရေဆိုကေ သူရို့အတွက် မင်္ဂလာဟိရေ။ ငါ နင်ရို့ကို အမှန် ပြောရေ၊ ထိုအပိုင်သျှင်စာ ကိုယ့်အဝတ်အစား လှဲရို့ သူရို့ကို စားပွဲမာ ထိုင်စီလိမည် အရာ သူကိုယ်တိုင် သူရို့ကို ကျွေးမွေးလိမည်။ 38ညဉ့်သိုင်ခေါင်မာ ဖြစ်စီ၊ မိုးလင်းလုတ်မာ ဖြစ်စီ၊ အပိုင်သျှင် ရောက်လာရေခါ အနိုးစောင့်နီကတ်စာ ဟိသမျ ကျွန်ရို့စာ မင်္ဂလာ ဟိကတ်တေ။ 39ယေကေလည်း နင်ရို့ မှတ်ထားကတ်၊ သူခိုး ဇာ အချိန်မာ ရောက်လာဖို့လည်းဆိုစာကို အိမ်သျှင် သိရေဆိုကေ အနိုးစောင့်နီဖို့ အရာ ထိုသူခိုးကို အိမ်ထဲတို့ ဝင်စီဖို့ မဟုတ်။ 40ယင်းပိုင်တထန် နင်ရို့လည်း အဆင်သင့် စောင့်နီကတ်၊ အကြောင်းကား မနုသသားတော်စာ နင်ရို့ မစဉ်းစားဘိုင်းန နီစာအချိန်မာ ကြွလာလိမည်။”ကျွန်နှစ်ယောက် ပုံဥပမာ
(မဿဲ ၂၄:၄၅-၅၁)
41ယင်းခါ ပေတရုစာ မီးလီရေ၊ “အသျှင်၊ ဒေ သွန်သင်ချက် အကျွန်ရို့ကို ပီးပါစာလော၊ မဟုတ်ကေ အားကုံးသူကို ပီးပါစာလော?” 42အသျှင်စာ အဖြေပီးလီရေ၊ “အခြားကျွန်ရို့ကို အချိန်တိုင်း အစားအစာ ပီးဖို့အတွက် ကိုယ့်အပိုင်သျှင်က တာဝန် ရလီစာ သစ္စာန အလိမ္မာဟိစာ ကျွန် အသူလည်း? 43ကိုယ့်အပိုင်သျှင် ရောက်လာရေခါ ကိုယ့်တာဝန်ကို သစ္စာန ထန်းဆောင်ရို့ တွိဖို့စာ ကျွန်စာ မင်္ဂလာဟိရေ။ 44ငါ နင်ရို့ကို အမှန် ပြောရေ၊ အပိုင်သျှင်စာ ကိုယ့်မာ ဟိသမျ အမွီဥစ္စာကို ကြည့်ရှုစောင့်သျှောက်ဖို့အတွက် ထိုကျွန်ကို တာဝန် ပီးလိမည်။ 45– 46ယေကေလည်း ကိုင်လိုက်ဖိ၊ ထိုကျွန်စာ စိတ်မာ စိတ်မာ၊ ‘ငါ့အပိုင်သျှင် ပြန်လာဖို့ ကြာဖို့သိ’ ဟို့ ပြောရေဆိုကေ၊ ယင်းအတွက်န သူစာ ကိုယ့်အဖက်သား ကျွန်ရို့ကို ဘုတ်တေဆိုကေ အရာ သူစာ စားသောက်ပြီးရေနောက် အရက်သောက်ရို့ ယစ်တေဆိုကေ သူ့အပိုင်သျှင်စာ ထိုကျွန် သတိမထား မစဉ်းစားစာအချိန်န နိရက်မာ သူ့အပိုင်သျှင် ရောက်လာလိမည်။ ယင်းခါ အပိုင်သျှင်စာ သူ့ကို အတိုက် အတိုက် စိုင်းရို့ သစ္စာမဟိသူရို့ကို ဘိုက်ချဖို့စာနေရာတို့ ဘိုက်ချလိမည်။ 47“ကိုယ့်အပိုင်သျှင် အလိုဆန္ဒကို သိရို့အတိုင်းလည်း အဆင်သင့် စောင့်ရို့ မနီစာ ကျွန်၊ မဟုတ်ကေ ကိုယ့်အပိုင်သျှင် အလိုကို မလိုက်စာ ကျွန်စာ အပြစ်ဒါဏ် အများကြီး ခံရလိမည်။ 48ယေကေလည်း ကိုယ့်အပိုင်သျှင် အလိုဆန္ဒကို မသိဘိုင်းန ကြိမ်ဒါဏ် ခံရဖို့စာ အလုပ်ကို လုပ်သူစာ ကြိမ်ဒါဏ် အနည်းသျှေ ခံရလိမည်။ အသူမဆို တာဝန် အများကြီး ရရေဆိုကေ ယင်းသူမာ တာဝန် ပိုရို့ များလိမည်။ လူရို့စာ အသူ့ဘားမာမဆို တာဝန် အများကြီး အပ်ထားရေဆိုကေ ယင်းသူက အများကြီး စာရင်းတောင်းကတ်တေ။ယေရှု ငြိမ်းချမ်းခြင်း ပီးဖို့ကြွလာစာ မဟုတ်
(မဿဲ ၁၀:၃၄-၃၆၊ ၁၆:၂-၃)
49“ငါ ဒေ ကမ္ဘာမာ မီးတိုက်ဖို့ လာစာ ဖြစ်တေ။ ဒေဂုပင် ငါ မီးလောင်စီချင်ရေ! 50ငါ ရီနှစ်မင်္ဂလာ ▼▼ရီနှစ်မင်္ဂလာ ယေရှု အစစ် ရီမာ ရီနှစ်မင်္ဂလာ ခံယူဖို့စာ စကားကို ပြောလီစာ မဟုတ်ပါ။ ဒေ ရီနှစ်မင်္ဂလာ ခံယူဖို့စာ အဓိပ္ပါယ်ကား ရှိတို့ ဒုက္ခ-ဝေဒနာကို ခံရို့ အသီခံရဖို့စာ စကားကို ပြောလီစာ ဖြစ်ပါရေ။
တစ်ခေါက် ခံယူရဖို့သိ။ အရာ ငါ ရီနှစ်မင်္ဂလာ မခံယူသကြား ငါ့မာ စိတ်ဒုက္ခ ကင်းဖို့ မဟုတ်။ 51နင်ရို့ ငါ့ကို ဒေ ကမ္ဘာမာ ငြိမ်းချမ်းခြင်း ပီးဖို့လာစာ ဟို့ ထင်ကတ်စာလော? ငါ ငြိမ်းချမ်းခြင်း ပီးဖို့လာစာ မဟုတ်။ ယင်းထက်ပင် ငါ လူချင်း လူကို ရန်တိုက်ဖို့အတွက် လာစာ ဖြစ်တေ။ 52ဒေဂုကပင် အိမ်တစ်အိမ်မာ အိမ်သား ငါးယောက် ဟိရေဆိုကေ သုံးယောက် တစ်ဖက် အရာ နှစ်ယောက် တစ်ဖက် ကွဲကတ်လိမည်။ 53သူရို့ ကွဲကတ်ဖို့စာကား ဒေပိုင်၊ အဖစာ သားကို ဆန့်ကျင်လိမည်၊ သားစာ အဖကို ဆန့်ကျင်လိမည် အရာ အမိစာ သမီးကို ဆန့်ကျင်လိမည်၊ သမီးစာ အမိကို ဆန့်ကျင်လိမည် အရာ ယောက္ခမစာ ခမြကို ဆန့်ကျင်လိမည်၊ ခမြစာ ယောက္ခမကို ဆန့်ကျင်လိမည်။” 54ယင်းနောက် ယေရှုစာ လူရို့ကို ပြောလီရေ၊ “ကိုယ်ဘင်ရို့ အနောက်ဖက်က မိုးရိပ်တက်စာကို မြင်ရေခါ၊ ‘မိုးကျဖို့’ ဟို့ ပြောကတ်တေ အရာ ယင်းပိုင်တထန် မိုးကျလာရေ။ 55အရာ တောင်လီ လာစာကို မြင်ရေခါ၊ ‘ကောင်းကောင်း နီပူဖို့’ ဟို့ ပြောကတ်တေ အရာ ယင်းပိုင်တထန် နီပူလာရေ။ 56ကိုယ်ဘင်ရို့ အယောင်ဆောင် ဖြစ်ကတ်တေ! ကိုယ်ဘင်ရို့ ကမ္ဘာန ဂေါင်းခင်ကို ကြည့်ရို့ မိုးလီဝါသ အကြောင်းကို ပြောနိုင်ကတ်တေ၊ ယေကေလည်း ဒေခိုက်ကာလ အခြေအနေကို ကိုယ်ဘင်ရို့ ဇာ အကြောင်းန နားမလည်ကတ်စာလည်း? တရားစွဲသူန ဖြေရှင်းဖို့စာ အကြောင်း
57“မှန်ကန်စာ အလုပ်ကို လုပ်ဖို့အတွက် ကိုယ်ဘင်ရို့ ကိုယ်တိုင် ဇာ အကြောင်းန မဆုံးဖြတ်ကတ်စာလည်း? 58ကိုယ်ဘင်ရို့ ကိုယ်ရို့ကို တရားစွဲသူနအတူ တရားသူကြီးတို့ လားရေခါ လမ်းတစ်ပိုင်းမာ သူန ဖြေရှင်းဖို့စာကို ကြိုးစားကတ်။ ယင်းပိုင် မဟုတ်ဆိုကေ သူစာ ကိုယ်ဘင်ကို တရားသူကြီးတို့ ယူလားလိမည်။ ယင်းခါ တရားသူကြီးစာ ကိုယ်ဘင်ကို ရဲသားဘားမာ တင်အပ်လိမည် အရာ ရဲသားစာ ကိုယ်ဘင်ကို ထောင်မာ ထည့်လိမည်။ 59ငါ ကိုယ်ဘင်ကို ပြောရေ၊ အယော်တန်းကား မပီးသကြား ကိုယ်ဘင် တစ်ခါလည်း ထောင်က ရွတ်လိမည် မဟုတ်။”
Copyright information for
RmzSC