Luke 13

အပြစ်က စိတ်လှည့်ရို့ လာဖို့စာ အကြောင်း

1ယင်းအချိန်ခါ ယင်းနေရာမာ ရောက်နီကတ်စာ လူလိုင်းကေယောက်စာ ယေရှုကို ဂါလိလဲပြည်နယ်က လူလိုင်းကေယောက် အကြောင်းကို ပြောပြကတ်လီရေ။ သူရို့ ပြောလီစာကား၊ ရောမ အုပ်ချုပ်သူကြီးပိလတ်စာ ထိုဂါလိလဲပြည်နယ်သားရို့ ယဇ်ပူဇော်နီရေခါ သူရို့ကို အသီသတ်လီရေ။ အရာ သူရို့ သွီးကို သူရို့ ယဇ်ပူဇော်စာ တိရစ္ဆာန်သွီးန ရောလီရေ။ 2သူရို့ စကားကို ကြားရို့ ယေရှုစာ ပြောလီရေ၊ “ထိုဂါလိလဲပြည်နယ်သားရို့စာ ယင်းပိုင် ဝေဒနာကို ခံရလီကတ်တေအတွက်န အခြား ဂါလိလဲပြည်နယ်သားရို့ထက် အပြစ် များရေ ဟို့ ကိုယ်ဘင်ရို့ ထင်ကတ်စာလော? 3ငါ ကိုယ်ဘင်ရို့ကို ပြောရေ၊ ယင်းပိုင် မဟုတ်၊ ယေကေလည်း အပြစ်က စိတ်လှည့်ရို့ မလာကတ်ဆိုကေ ကိုယ်ဘင်ရို့လည်း သူရို့ပိုင် ပျက်စီးခြင်းကို ခံရကတ်လိမည်။ 4ရှိလောင်မြို့မာ ကင်းစောင့်စာ စင်အမြင့်ကြီး ပြိုကျလားခရေအတွက်န လူတစ်ဆယ့်ရှစ်ယောက် သီလားခလီရေ။ သူရို့မာ အခြား ယေရုရှလင်မြို့သားရို့ထက် အပြစ် များရေ ဟို့ ကိုယ်ဘင်ရို့ ထင်ကတ်စာလော? 5ငါ ကိုယ်ဘင်ရို့ ပြောရေ၊ ယင်းပိုင် မဟုတ်၊ ယေကေလည်း အပြစ်က စိတ်လှည့်ရို့ မလာကတ်ဆိုကေ ကိုယ်ဘင်ရို့လည်း သူရို့ပိုင် ပျက်စီးခြင်းကို ခံရကတ်လိမည်။”

အသီးမသီးစာ အပင် ပုံဥပမာ

6ယင်းနောက် ယေရှုစာ သွန်သင်ပီးဖို့အတွက် ပုံဥပမာတစ်ခု တင်ပြလီရေ၊ “လူတစ်ယောက် စပျစ်ဥယျာဉ်မာ သဖန်းပင် တစ်ပင် စိုက်ထားလီရေ။ တစ်ရက်နိ သူစာ လာရို့ ထိုဥယျာဉ်ထဲမာဟိစာ သဖန်းပင်မာ သဖန်းသီး ရှာလီရေ၊ ယေကေလည်း သဖန်းသီး တစ်လုံးလည်း မရလီ။ 7ယင်းခါ သူစာ ဥယျာဉ် စောင့်သျှောက်သုတ်သင်သူကို ပြောလီရေ၊ ‘ကြည့်၊ ငါ သုံးနှစ်ပတ်လုံး ဒေ သဖန်းပင်မာ သဖန်းသီး ရှာနီရေ၊ ယေကေလည်း သဖန်းသီး တစ်လုံးလည်း မရသိ။ ယင်းအတွက်န နင် ဒေ သဖန်းပင်ကို ခွတ်ဘိုက်လိုက်ဖိ။ ဒေ သဖန်းပင်စာ ဇာဖို့ မြေပြင်ကို ဖျက်ရဖို့လည်း?’ 8ဥယျာဉ် စောင့်သျှောက်သုတ်သင်သူစာ ပြောလီရေ၊ ‘ဆရာ၊ ဒေ သဖန်းပင်ကို အရာတစ်နှစ်လှောက် ထားကြည့်ပါအုန့်သိ။ ဒေ သဖန်းပင် အရင်းမာ ဆွရို့ အကျွန် မြေဩဇာ ထည့်ပီးပါမည်။ 9ယင်းနောက် အသီးသီးရေဆိုကေ ကောင်းပါရေ၊ ယင်းပိုင် မဟုတ်ဆိုကေ ကိုယ်ဘင် ဒေ သဖန်းပင်ကို ခွတ်ဘိုက်လိုက်ပါ။’”

ခါးကုန်းစာ မိန်းမ အကောင်းဖြစ်ခြင်း

10အခြားတစ်ရက် သတင်းနိမာ ယေရှုစာ တရားဇရပ်တစ်ခုတို့ ကြွရို့ သွန်သင်ပီးနီလီရေ။ 11ယင်းနေရာမာ တစ်ဆယ့်ရှစ်နှစ်ပတ်လုံး နတ်ဆိုးကိုင်ရို့ ကုန်းနီစာ မိန်းမတစ်ယောက် ဟိလီရေ။ သူစာ တစ်ခါလည်း ခါးကို ဆန့်ဖို့ မနိုင်လီ။ 12ယေရှုစာ သူ့ကို မြင်ရေခါ ကိုယ့်အနားတို့ ခေါ်ရို့ ပြောလီရေ၊ “အယွေ၊ အယွေမာ ရောဂါကောင်းလားခဗျာ။” 13ထိုစကားကို ပြောရို့ ယေရှုစာ သူ့ဘားမာ အလက်တင်လီရေ။ ယေရှု အလက်တင်ရေ ချက်ချင်း ထိုမိန်းမစာ ခါးကို ဆန့်ရို့ ရပ်လီရေ အရာ ထာဝရဘုရားကို ချီမွမ်းလီရေ။

14တရားဇရပ်မာ ဂေါင်းဆောင်စာ သတင်းနိမာ ယေရှု ရောဂါကောင်းအောင် လုပ်လီရေအတွက်န မန်တက်ရို့ လူရို့ကို ပြောလီရေ၊ “အလုပ် လုပ်ဖို့အတွက် ခြောက်ရက်ပတ်လုံး ဟိရေ။ ယင်းအတွက်န သတင်းနိမာ မလာဘိုင်း ထိုခြောက်ရက်အထဲတွင်းမာ လာရို့ အကောင်း ဖြစ်ခလိုက်။” 15ယင်းခါ အသျှင်စာ ထိုဂေါင်းဆောင်ကို ပြောလီရေ၊ “ကိုယ်ဘင်ရို့ အယောင်ဆောင် ဖြစ်ကတ်တေ! သတင်းနိခါ ကိုယ်ဘင်ရို့မာ နွားကို မဟုတ်ကေ ဝန်ရွက်မြင်းကို ခြံက ထုတ်ရို့ ရီတိုက်ဖို့ ယူလားကတ်တေ မဟုတ်လော? 16ယေကေလည်း ဒေ အာဗြဟံ၏ အမျိုးအနွယ် မိန်းမစာ တစ်ဆယ့်ရှစ်နှစ်ပတ်လုံး မာရ်နတ်၏ ချိုင်နှောင်ခြင်းကို ခံရလီရေ။ သူ့ကို သတင်းနိမာ ထိုချိုင်နှောင်ခြင်းက ရွှတ်ဖို့ သင့်ရေ မဟုတ်လော?” 17သူစာ ထိုစကားကို ပြောရေခါ သူ့ကို ဆန့်ကျင်သူ တစ်ယောက်မကျန် အရှက်ကျကတ်လီရေ။ ယေကေလည်း အခြားလူရို့စာ ယေရှု လုပ်စာ ဟိသမျ အံ့ဩဖွယ် အလုပ်ကို မြင်ရို့ ပျော်ကတ်လီရေ။

ရဲစိန တဆီး ပုံဥပမာ

(မဿဲ ၁၃:၃၁-၃၃၊ မာကု ၄:၃၀-၃၂)

18ယင်းနောက် ယေရှုစာ ပြောလီရေ၊ “ထာဝရဘုရား၏ နိုင်ငံတော်စာ ဇာနတူရေလည်း? ငါ ဇာန နှိုင်းယှဉ်ရဖို့လည်း? 19ထာဝရဘုရား၏ နိုင်ငံတော်စာ ရဲစိတစ်စိနတူရေ။ လူတစ်ယောက်စာ ထို ရဲစိကို ယူရို့ ကိုယ့်ဥယျာဉ်မာ စိုက်လီရေ။ ယင်းနောက် အညှောင့် ထွက်ရို့ ကြီးလာရေခါ ပကတိအပင်တစ်ပင် ဖြစ်လီရေ။ ယင်းခါ ငှက်တိ လာရို့ ထိုအပင်အခက်အလက်တိမာ တင်းတည်ကတ်လီရေ။”

20ယေရှုစာ အရာတစ်ပြန် ပြောလီရေ၊ “ထာဝရဘုရား၏ နိုင်ငံတော်ကို ဇာန နှိုင်းယှဉ်ရဖို့လည်း? 21ထာဝရဘုရား၏ နိုင်ငံတော်စာ တဆီးနတူရေ။ မိန်းမတစ်ယောက်စာ ထိုတဆီးကို ယူရို့ ဂျုံမုန့်တစ်ဆယ့်ရှစ်သိုက်မာ ရောလီရေ။ ယင်းအတွက်န ဟိသမျ ဂျုံမုန့်တိစာ ရော့တက်လီရေ။”

ကယ်တင်ခြင်း ရဖို့စာအကြောင်း

(မဿဲ ၇:၁၃-၁၄၊ ၂၁-၂၃၊ မာကု ၃:၂၀-၂၇)

22ယေရှုစာ မြို့ရွာတိမာ လည်ရို့ သွန်သင်ပီးပြီးကေ ယေရုရှလင်မြို့ဖက်တို့ ဆက်ရို့ ကြွလီရေ။ 23ယင်းခါ လူတစ်ယောက်စာ ယေရှုကို မီးလီရေ၊ “ဆရာ၊ လူအနည်းသျှေရာ ကယ်တင်ခြင်းကို ရကတ်ပါဖို့စာလော?” 24ယေရှုစာ လူရို့ကို ပြောလီရေ၊ “ကျဉ်းစာလမ်းခဝကနီရို့ ဝင်ဖို့စာကို ကြိုးစားကတ်။ ငါ ကိုယ်ဘင်ရို့ကို ပြောရေ၊ လူအများကြီး ဝင်ဖို့ ကြိုးစားကတ်လိမည်၊ ယေကေလည်း နိုင်ကတ်လိမည် မဟုတ်။ 25အိမ်သျှင် ထရို့ တန်ခါးပိတ် ပိတ်တေခါ ကိုယ်ဘင်ရို့စာ ပြင်က ရပ်ရို့ တန်ခါးပိတ်ကို ခေါက်ပြီးကေ ပြောကတ်လိမည်၊ ‘အသျှင်၊ အကျွန်ရို့ကို တန်ခါးပိတ် ဖွင့်ပီးပါ။’ ယေကေလည်း သူစာ ကိုယ်ဘင်ရို့ကို ဒေပိုင် ပြောလိမည်၊ ‘နင်ရို့ ဇာက လာကတ်တေလည်းဆိုစာကို ငါ မသိ။’ 26ယင်းခါ ကိုယ်ဘင်ရို့စာ ပြောကတ်လိမည်၊ ‘အကျွန်ရို့ကား ကိုယ်တော်နအတူ စားသောက်လီကတ်ပါရေ အရာ ကိုယ်တော်ကား လမ်းတိမာ လည်ရို့ အကျွန်ရို့ကို သွန်သင်ပီးလီပါရေ။’ 27ယင်းခါ သူစာ ကိုယ်ဘင်ရို့ကို ပြောလိမည်၊ ‘နင်ရို့ ဇာက လာကတ်တေလည်းဆိုစာကို ငါ မသိ။ လူယုတ်ရို့၊ နင်ရို့ တစ်ယောက်မကျန် ငါ့နိုင်ဗြင်းက ပျောက်လီကတ်။’

28“အာဗြဟံ၊ ဣဇာက်၊ ယာကုပ် အရာ ဘုရားသတင်းပို့သူရို့ အားကုံးသူ ထာဝရဘုရား၏ နိုင်ငံတော်ထဲမာ ရောက်နီစာကို ကိုယ်ဘင်ရို့ မြင်ရကတ်လိမည်၊ ယေကေလည်း ကိုယ်ဘင်ရို့စာ ငရဲပြည်တို့ ဘိုက်ချခြင်းကို ခံရကတ်လိမည်။ ယင်းခါ ကိုယ်ဘင်ရို့စာ ဝေဒနာကို ခံရရေအတွက်န သွားချင်းသွား ကြိတ်ပြီးကေ အော်ရို့ ငိုကတ်လိမည်။ 29အရှိ၊ အနောက်၊ တောင်၊ မြောက်က လူရို့စာ လာရို့ ထာဝရဘုရား၏ နိုင်ငံတော်မာ စားသောက်ဖို့ ထိုင်ကတ်လိမည်။ 30ဒေဂု အနိမ့်ဆုံးနေရာကို ရသူရို့အထဲက တစ်ချိုးလူရို့စာ အမြင့်ဆုံးနေရာကို ရကတ်လိမည် အရာ ဒေဂု အမြင့်ဆုံးနေရာကို ရသူရို့အထဲက တစ်ချိုးလူရို့စာ အနိမ့်ဆုံးနေရာကို ရကတ်လိမည်။”

ယေရှုကို အသီသတ်ဖို့ ကြံခြင်း

31ယင်းအချိန်ခါ ဖာရိရှဲအဖွဲ့သား လိုင်းကေယောက် ယေရှုတို့ လာရို့ ပြောကတ်လီရေ၊ “ဆရာ၊ ကိုယ်ဘင် ဒေ နေရာက ထွက်လားလီပါ၊ အကြောင်းကား ဟေရုဒ်မင်း ကိုယ်ဘင်ကို အသီသတ်ဖို့ ကြည့်နီပါရေ။” 32ယေရှုစာ သူရို့ကို ပြောလီရေ၊ “ကိုယ်ဘင်ရို့ လားရို့ ထိုခဲဝါကို ပြောခီကတ်၊ ‘ဒေနိန နှက်ဖြန်ခါ ငါ နတ်ဆိုးတိကို နှင်ထုတ်ဖို့သိ အရာ ရောဂါသေရို့ကို ကောင်းအောင် လုပ်ဖို့သိ။ တတိယနိမာရာ ငါ့အလုပ်ကို အဆုံးသတ်ဖို့။’ 33ဇာမဆိုဖြစ်ဖြစ်၊ ဒေနိခါ၊ နှက်ဖြန်ခါ အရာ သန်ဖက်ခါ ငါ ဆက်ရို့ လားရဖို့သိ၊ အကြောင်းကား ယေရုရှလင်မြို့ကို ပယ်ရို့ အခြားတစ်နေရာမာလည်း ဘုရားသတင်းပို့သူ တစ်ယောက်လည်း အသီအသတ်ခံရဖို့ မဟုတ်ပျာ။

ယေရုရှလင်မြို့သားရို့အတွက် ဝမ်းနည်းခြင်း

(မဿဲ ၂၃:၃၇-၃၉)

34“ယေရုရှလင်မြို့သားရို့! အိုး ယေရုရှလင်မြို့သားရို့! နင်ရို့စာ ဘုရားသတင်းပို့သူရို့ကို အသီသတ်နီကတ်တေ အရာ နင်ရို့တို့ ရွှတ်လိုက်သူရို့ကို ကျောက်လုံး ဘိုက်ရို့ သတ်နီကတ်တေ။ ကြက်မစာ ကြက်သျှေတိကို ကိုယ့်အတောင်အောက်က စုထားစာပိုင် ငါလည်းသောက် နင်ရို့မာ သားသမီးရို့ကို အပြန်ပြန် ကိုယ့်အနားမာ စုထားဖို့ ကြည့်လီရေ၊ ယေကေလည်း နင်ရို့ သဖေါမတူလီကတ်။ 35ယင်းအတွက်န နင်ရို့ ကြည့်ကတ်! နင်ရို့မာ ဝိပဿနာကျောင်းကို ထာဝရဘုရား စွန့်ဘိုက်လိုက်ပျာ။ အရာ ငါ နင်ရို့ကို ပြောရေ၊ ‘အသျှင်၏ နာမည်န ကြွလာသူစာ မင်္ဂလာ ဟိပါစီ’ ဟို့ နင်ရို့ မပြောသကြား နင်ရို့ ငါ့ကို အရာ မြင်ရကတ်လိမည် မဟုတ်ပျာ။”