Luke 14

တိန်ပေါ်သူတစ်ယောက် အကောင်းဖြစ်ခြင်း

1အခြားတစ်ရက် သတင်းနိမာ ယေရှုစာ ဖာရိရှဲအဖွဲ့သား ဂေါင်းဆောင် အိမ်တို့ စားသောက်ဖို့ ကြွလီရေ။ အရာ ဖာရိရှဲအဖွဲ့သားရို့စာ ယေရှုကို ကောင်းကောင်း မျက်စိ ချထားကတ်လီရေ။ 2ယင်းခါ ယေရှု ရှိက တိန်ပေါ်သူတစ်ယောက် ဟိလီရေ။ သူ့မာ ခန္ဓာတစ်ကိုယ်လုံး ရော့ရို့ ဟိလီရေ။ 3ယေရှုစာ ကျမ်းဆရာရို့န ဖာရိရှဲအဖွဲ့သားရို့ကို မီးလီရေ၊ “သတင်းနိမာ ရောဂါသေကို အကောင်း လုပ်ဖို့အတွက် မောရှေ၏ ပညှတ်တရား အခွင့်ပီးရေလော?” 4ယေကေလည်း သူရို့စာ အဖြေမပီးဘိုင်းန တိန်းရို့ နီကတ်လီရေ။ ယင်းခါ ယေရှုစာ ထိုလူကို ကိုင်ရို့ ရောဂါကောင်းအောင် လုပ်ပြီးကေ အိမ်တို့ ရွှတ်လိုက်လီရေ။

5ယင်းနောက် သူစာ ထိုဂေါင်းဆောင်ရို့ကို ပြောလီရေ၊ “သတင်းနိမာ ကိုယ်ဘင်ရို့အထဲက လူတစ်ယောက်မာ သားသမီး မဟုတ်ကေ နွားတွီးစာ ရီတွင်းမာ ကျလားခရေဆိုကေ ကိုယ်ဘင်ရို့ ချက်ချင်း သူ့ကို ကောက်ရို့ တင်ကတ်တေ မဟုတ်လော?” 6ယေကေလည်း ထိုဂေါင်းဆောင်ရို့စာ စကားတစ်ခွန်းလည်း အဖြေပီးဖို့ မနိုင်ကတ်လီ။

စားပွဲမာ လာသူရို့ကို သွန်သင်ပီးခြင်း

7ထိုစားပွဲမာ ဖိတ်ခေါ်ထားသူရို့စာ အမြင့်မြတ်ဆုံးနေရာတိကို ရွီးရို့ ထိုင်ကတ်စာကို မြင်လီရေ။ အရာ ယေရှုစာ သူရို့ကို သွန်သင်ပီးဖို့အတွက် ဒေပိုင် ပြောလီရေ၊ 8“လူတစ်ယောက် ကိုယ်ဘင်ကို လက်ဆောင်ပွဲမာ ဖိတ်ခေါ်ရေခါ ကိုယ်ဘင် အမြင့်မြတ်ဆုံးနေရာမာ လားရို့ မထိုင်လီကေ့၊ အကြောင်းကား ကိုယ်ဘင်ထက် ကြီးမြတ်သူ အခြားတစ်ယောက်ကို ဖိတ်ခေါ်ရို့ ထားနိုင်စရာ ဟိရေ။ 9ယင်းပိုင်ဆိုကေ ကိုယ်ဘင်န အခြားလူကို ဖိတ်ခေါ်သူစာ လာရို့ ကိုယ်ဘင်ကို ပြောလိမည်၊ ‘ဒေ ထိုင်ရာကို ဒေ လူအတွက် လှတ်ပီးလိုက်ပါ။’ ယင်းခါ ကိုယ်ဘင်စာ အရှက်ကျရို့ အနိမ့်ဆုံးနေရာမာ လားရို့ ထိုင်ရလိမည်။ 10ကိုယ်ဘင်ကို ဖိတ်ခေါ်ရေခါ အနိမ့်ဆုံးနေရာမာ လားရို့ ထိုင်လီ။ ယင်းပိုင်ဆိုကေ ပွဲသျှင်စာ လာရို့ ကိုယ်ဘင်ကို ပြောလိမည်၊ ‘မိတ်ဆွေ၊ ဒေထက် အမြင့်မြတ်ဆုံးနေရာမာ လားရို့ ထိုင်ပါ။’ ယင်းခါ ကိုယ်ဘင်စာ အခြား ဟိသမျ အာဂန္တုရို့ ရှိထက်က ရိုသေခြင်းကို ရလိမည်။ 11ကိုယ့်ကို ချီးမြှောင့်သူစာ နှိမ့်ချခြင်းကို ခံရလိမည် အရာ ကိုယ့်ကို နှိမ့်ချသူစာ ချီးမြှောင့်ခြင်းကို ခံရလိမည်။”

12ယင်းနောက် ယေရှုစာ ကိုယ့်ကို ဖိတ်ခေါ်သူကို ပြောလီရေ၊ “ကိုယ်ဘင် စားပွဲ အစီစဉ် ချရေခါ ကိုယ်ဘင်မာ မိတ်ဆွေရို့ကို၊ ညီအစ်ကိုရို့ကို၊ အမျိုးအဆွီရို့ကို အရာ အိမ်နားပါးသား သူဌေးရို့ကို မဖိတ်ခေါ်လီကေ့။ ယင်းပိုင် လုပ်တေဆိုကေ သူရို့လည်း ကိုယ်ဘင်ကို ဖိတ်ခေါ်နိုင်စရာ ဟိရေ။ သူရို့စာ ကိုယ်ဘင်ကို ဖိတ်ခေါ်ရို့ ကိုယ်ဘင် ကျေးဇူးကို ဆပ်ကတ်လိမည်။ 13ယေကေလည်း ကိုယ်ဘင် စားပွဲ အစီစဉ် ချရေခါ ဆင်းရဲသားရို့ကို၊ အင်္ဂါပျက်ရို့ကို၊ အခြီသောင်ရို့ကို အရာ မျက်ကန်းရို့ကို ဖိတ်ခေါ်လီ။ 14ယင်းပိုင်ဆိုကေ ကိုယ်ဘင် ထာဝရဘုရား၏ ပဿိကို ခံရလိမည်၊ အကြောင်းကား သူရို့စာ ကိုယ်ဘင် ဖိတ်ခေါ်ခြင်း ကျေးဇူးကို ဆပ်နိုင်ကတ်လိမည် မဟုတ်။ ယင်းအတွက်န သူတော်ကောင်းရို့ သီရာက ပြန်ရှင်ထမြောင့်ကတ်တေခါ ကိုယ်ဘင် ထိုကျေးဇူးဆပ်ခြင်းကို ခံရလိမည်။”

စားပွဲကြီး တစ်ပွဲ ပုံဥပမာ

(မဿဲ ၂၂:၁-၁၄)

15စားသောက်ဖို့ ထိုင်သူရို့အထဲက တစ်ယောက်စာ ယေရှု ပြောစာစကားကို ကြားရို့ သူ့ကို ပြောလီရေ၊ “ထာဝရဘုရား၏ နိုင်ငံတော် စားပွဲမာ ထိုင်ဖို့သူစာ မင်္ဂလာဟိရေ။”

16ယေရှုစာ ပြောလီရေ၊ “လူတစ်ယောက်စာ စားပွဲကြီး တစ်ပွဲ စီစဉ်ရို့ လူအများကြီးကို ဖိတ်ခေါ်လီရေ။ 17စားသောက်ဖို့ အချိန် ကျလာရေခါ သူစာ ဖိတ်ခေါ်ထားသူရို့ကို ခေါ်ဖို့အတွက် ဒေပိုင် ပြောရို့ ကိုယ့်ကျွန်ရို့ကို ရွှတ်လိုက်လီရေ၊ ‘လာကတ်ပါဖိ၊ ဒေဂု အားကုံးစာ အဆင်သင့် ဖြစ်ပါဗျာ။’ 18ယေကေလည်း သူရို့ အားကုံးသူ တစ်ယောက်ပြီးကေ တစ်ယောက် အကြောင်း ပြကတ်လီရေ။ ပထမ တစ်ယောက်စာ ထိုကျွန်ကို ပြောလီရေ၊ ‘ငါ လယ်တစ်ကွက် ဝယ်ထားရို့ ဟိရေ။ ယင်းအတွက်န ငါ လားရို့ ထိုလယ်ကို ကြည့်ခီရဖို့။ ကျေးဇူးပြုရို့ ငါ့ကို ခွင့်ရွှတ်ဖိ။’ 19ဒုတိယ တစ်ယောက်စာ ပြောလီရေ၊ ‘ငါ့မာ နွားတွီးငါးသျှဉ်း ဝယ်ထားရို့ ဟိရေ။ ယင်းအတွက်န ငါ ထိုနွားတွီးတိကို လားရို့ ကြည့်ခီရဖို့။ ကျေးဇူးပြုရို့ ငါ့ကို ခွင့်ရွှတ်ဖိ။’ 20တတိယ တစ်ယောက်စာ ပြောလီရေ၊ ‘ငါ မယားနစပ်ပျာ။ ယင်းအတွက်န ငါ လားဖို့ မရ။’

21“ထိုကျွန်စာ ပြန်လာပြီးကေ သူရို့ ပြောလိုက်စာ စကားတိကို ကိုယ့်အပိုင်သျှင်ဘားမာ ပြောပြလီရေ။ ယင်းခါ အပိုင်သျှင်စာ မန်တက်ရို့ ကိုယ့်ကျွန်ကို ပြောလီရေ၊ ‘မြို့လမ်းမတိန လက်ကြားတိတို့ နင် အယင်အမြန် လားရို့ ဆင်းရဲသားရို့ကို၊ အင်္ဂါပျက်ရို့ကို၊ မျက်ကန်းရို့ကို အရာ အခြီသောင်ရို့ကို ဒေ နေရာတို့ ခေါ်ယူခ။’ 22ကိုယ့်အပိုင်သျှင် ပြောရေအတိုင်း လုပ်ပြီးရေခါ ထိုကျွန်စာ ပြောလီရေ၊ ‘ဆရာ၊ ကိုယ်ဘင် အာဏာချရေအတိုင်း အားကုံးစာ လုပ်ပြီးပါဗျာ၊ ယေကေလည်း ဒေဂုလည်းသောက် နေရာအလတ် ဟိပါသိရေ။’ 23ယင်းခါ အပိုင်သျှင်စာ ကျွန်ကို ပြောလီရေ၊ ‘မြို့ပြင်က လမ်းမတိန ရွာလမ်းတိတို့ လားရို့ ဒေ နေရာတို့ လာဖို့အတွက် လူရို့ကို အားတင်ရို့ ခေါ်ယူခ။ ယင်းခါရာ ငါ့ အိမ်မာ တတင်းပြည့်လားလီဖို့။ 24ငါ နင်ရို့ကို ပြောရေ၊ ငါ ပထမ ဖိတ်ခေါ်ရို့ ထားသူရို့အထဲက တစ်ယောက်လည်း ဒေ စားပွဲမာ ဝင်ရို့ စားသောက်ဖို့ ရကတ်လိမည် မဟုတ်။’”

တပည့် ဖြစ်ရဖို့စာ ကုန်ကျဇရစ်

(မဿဲ ၅:၁၃၊ ၁၀:၃၇-၃၉၊ မာကု ၉:၅၀)

25တစ်ရက်နိ ယေရှုနအတူ လူအများကြီး လိုက်ကတ်လီရေ။ ယင်းခါ ယေရှုစာ ထိုလူရို့ဖက်တို့ လှည့်ကြည့်ရို့ ပြောလီရေ၊ 26“ငါ့နောက်က လိုက်ချင်သူစာ ကိုယ့်အမိအဖ၊ သားမယား အရာ ညီအစ်ကိုမောင်နမှကို၊ ယင်းထက်မက ကိုယ့်ကို တိုင်အောင်ပင် ငါ့ကိုထက် ပိုရို့ မချစ်ရ။ ငါ့ကိုထက် ပိုရို့ ချစ်တေဆိုကေ သူစာ ငါ့တပည့် မဖြစ်နိုင်။ 27ကိုယ့်ကားတိုင်ကို ရွက်ရို့ ငါ့နောက်က မလိုက်သူစာ ငါ့တပည့် မဖြစ်နိုင်။ 28ကိုယ်ဘင်ရို့အထဲမာ အသူမဆို အိမ်အမြင့်တစ်ဆောင် ဆောက်ချင်ရေဆိုကေ ယင်းသူစာ အယင်ဆုံး ထိုင်ပြီးကေ ကုန်ကျဇရစ်ကို တွက်ရို့ ကြည့်ရေ။ သူစာ အိမ်တစ်ဆောင် ကျီအောင်ဆောက်ဖို့အတွက် တန်းကား ကုန်ကျဇရစ် ဇာလှောက် ဝင်ဖို့လည်းဆိုစာကို သူစာ ကြည့်ချင်ရေ။ 29ယင်းပိုင် မဟုတ်ဆိုကေ သူစာ အုပ်မြစ် ချပြီးရေနောက် ထိုအိမ်ကို အဆုံးသတ်ဖို့ မနိုင်ဆိုကေ ထိုအိမ်ကို မြင်ကတ်သူရို့ အားကုံးသူ သူ့ကို ရယ်သွန်းပြုကတ်လိမည်။ 30သူရို့စာ ပြောကတ်လိမည်၊ ‘ဒေလူ အုပ်မြစ်ချဖို့ စလီကေလည်း အဆုံးသတ်ဖို့ မနိုင်လီ။’

31“မင်းတစ်ပါးစာ အခြားမင်းတစ်ပါးကို စစ်ဆိုင်ဖို့ လားရေဆိုကေ သူစာ၊ ‘စစ်သရွဲ နှစ်သောင်းကို ယူရို့ ငါန စစ်ဆိုင်ဖို့ လာသူကို ငါ စစ်သရွဲ တစ်သောင်းတောက်န ရင်ဆိုင်နိုင်ဖို့လော’ ဆိုပြီးကေ ပထမဆုံး ထိုင်ရို့ စဉ်းစားဖို့သိ။ 32သူစာ ရင်ဆိုင်ဖို့ မနိုင်ဆိုကေ အခြားမင်းတစ်ပါးစာ အဝီးမာ ဟိရေခါ သူ့တို့ လူရွှတ်လိုက်ရို့ စစ်ငြိမ်းချမ်းရေး အကြောင်းကို ယူရို့ ဆွေးနေးတိုင်ဘင်လိမည်။” 33နောက်ဆုံးမာ ယေရှုစာ ပြောလီရေ၊ “ယင်းပိုင်တထန် ကိုယ်ဘင်ရို့အထဲမာ အသူမဆို စဉ်းစား-ဆင်ခြင်ရို့ ဟိသမျ အားကုံးကို စွန့်ရို့ မလာဆိုကေ သူစာ ငါ့တပည့် မဖြစ်နိုင်။

အငန်ဓါတ် ပျက်စာဆား

(မာကု ၉:၅၀၊ မဿဲ ၅:၁၃)

34“ဆားစာ အကောင်း ဝန်တစ်ဦး ဖြစ်တေ၊ ယေကေလည်း ဆားမာ အငန်ဓါတ် ပျက်လားခရေဆိုကေ ယင်းအငန်ဓါတ်ကို အရာတစ်ပြန် ဇာပိုင်ပျင်ရို့ ရနိုင်ဖို့သိလည်း? 35ထိုဆားစာ လယ်အတွက်လည်း အသုံးမဝင်ဗျာ အရာ မြေဩဇာအတွက်လည်း အသုံးမဝင်ဗျာ။ ယင်းအတွက်န လူရို့စာ အသုံးမဝင်စာ ဆားကို ပြင်တို့ ဝဲဘိုက်လိုက်ကတ်တေ။ ငါ့စကားကို နားထောင်ချင်သူရို့ နားထောင်ကတ်။”