Luke 16

မရိုးသားစာ အလုပ်သမားဂေါင်း ပုံဥပမာ

1ယေရှုစာ ကိုယ့်တပည့်ရို့ကို ပြောလီရေ၊ “သူဌေးတစ်ယောက်မာ အလုပ်သမားဂေါင်း တစ်ယောက် ဟိလီရေ။ တစ်ရက်နိ အပိုင်သျှင်စာ ကိုယ့်ပစ္စည်း-ဥစ္စာကို ထိုအလုပ်သမားဂေါင်း ဖျက်ဘိုက်တေဆိုစာကို ကြားရလီရေ။ 2ယင်းခါ သူဌေးစာ သူ့ကို ခေါ်ရို့ မီးလီရေ၊ ‘ငါ နင့် အကြောင်းကို ကြားရစာကား ဇာအခြင်းအရာလည်း? နင့် အလုပ်စာရင်းကို ငါ့ဘားမာ ရှင်းပြခလိုက်၊ အကြောင်းကား နင် ဒေဂုကပင် စရို့ အလုပ်သမားဂေါင်းအဖြစ် အရာ မနီရဗျာ။’ 3ယင်းခါ ထိုအလုပ်သမားဂေါင်းစာ စိတ်မာ စိတ်မာ ပြောလီရေ၊ ‘ငါ ဒေဂု ဇာ လုပ်ရဖို့ရောင်? ငါ့မာ အပိုင်သျှင်ကား ငါ့ကို အလုပ် ဖြုတ်ဘိုက်လိုက်ဖို့ဗျာ။ ငါ မြေဘောက်ဖို့လည်း မနိုင် အရာ အလှူခံဖို့လည်း ရှက်တေ။ 4ဇာမဆိုဖြစ်ဖြစ်၊ ငါ့မာ အလုပ် ပြုတ်လားခပြီးရေနောက် လူရို့ ငါ့ကို အိမ်တင်ခံလတ်အောင် ဇာ လုပ်ရဖို့လည်းဆိုစာကို ငါ သိရေ။’

5“ယင်းခါ သူစာ သူဌေးက မြိန်ချီးရို့ ဟိသူတစ်ယောက်မကျန်ကို ခေါ်လီရေ အရာ သူစာ ပထမ တစ်ယောက်ကို မီးလီရေ၊ ‘နင် ငါ့အပိုင်သျှင်ကို မြိန်ဇာလှောက် ဆပ်ဖို့ ဟိရေလည်း?’ 6သူစာ အဖြေပီးလီရေ၊ ‘ဆီအသိုက်နှစ်ထောင် ဆပ်ဖို့ ဟိပါရေ။’ အလုပ်သမားဂေါင်းစာ သူ့ကို ပြောလီရေ၊ ‘နင့်မာ မြိန်ချီးစာ စာရင်းကို ယူခပြီးကေ အယင်အမြန် ထိုင်ရို့ ဆီအသိုက်တစ်ထောင် ရွီးဘိုက်လိုက်။’ 7ယင်းနောက် သူစာ အခြားတစ်ယောက်ကို မီးလီရေ၊ ‘နင့်မာ မြိန်ဇာလှောက် ဆပ်ဖို့ ဟိရေလည်း?’ သူစာ အဖြေပီးလီရေ၊ ‘ဂျုံစပါးတောင်းတစ်ထောင့်နှစ်ရာ ဆပ်ဖို့ ဟိပါရေ။’ အလုပ်သမားဂေါင်းစာ ပြောလီရေ၊ ‘နင့်မာ မြိန်ချီးစာ စာရင်းကို ယူခရို့ ဂျုံစပါးတောင်းရှစ်ရာ ရွီးဘိုက်လိုက်။’ 8ထိုအလုပ်သမားဂေါင်းစာ မရိုးသားကေလည်း ကိုယ့်ညာဏ်ကို အသုံးပြုရို့ အလုပ် လုပ်လီရေအတွက်န အပိုင်သျှင်စာ သူ့ကို ချီမွမ်းလီရေ။ ယင်းပိုင်ဆိုကေ ဒေ လောကသားရို့စာ ကိုယ်ရို့ အလုပ်တာဝန်ကို ထန်းဆောင်စာတိမာ အလင်း၏ နိုင်ငံသားရို့ထက် ပိုရို့ လိမ္မာကတ်တေဆိုစာကို သိရရေ။

9“ငါ နင်ရို့ကို ပြောရေ၊ ဒေ ဆိုးယုတ်စာ လောကမာ ပစ္စည်း-ဥစ္စာကို အသုံးပြုရို့ လူရို့န မိတ်ဆွေ မှန်းကတ်။ ယင်းပိုင်ဆိုကေ ပစ္စည်း-ဥစ္စာ ကုန်လားခရေခါ နင်ရို့စာ ထာဝရပတ်လုံး နီရဖို့စာ နေရာမာ ကြိုဆိုလက်ခံခြင်းကို ရကတ်လိမည်။ 10အလုပ်သျှေတစ်ခုမာ သစ္စာဟိသူစာ အလုပ်ကြီးတစ်ခုမာလည်း သစ္စာဟိရေ။ အလုပ်သျှေတစ်ခုမာ သစ္စာမဟိသူစာ အလုပ်ကြီးတစ်ခုမာလည်း သစ္စာ မဟိ။ 11ယင်းအတွက်န ဒေ လောကမာ ပစ္စည်း-ဥစ္စာ အကြောင်းနပတ်သပ်ရို့ နင်ရို့ သစ္စာမဟိဆိုကေ အသူ နင်ရို့ကို ကျုံရို့ ပစ္စည်း-ဥစ္စာ အစစ်ကို ပီးဖို့လည်း? 12အခြားတစ်ယောက် ပိုင်စာဝန်ကို အသုံးပြုဖို့စာ အကြောင်းနပတ်သပ်ရို့ နင်ရို့ သစ္စာမဟိဆိုကေ အသူတစ်ယောက် နင်ရို့ ပိုင်ဆိုင်ဖို့အတွက် ပစ္စည်း-ဥစ္စာကို နင်ရို့ကို အပ်ပီးဖို့လည်း?

13“ကျွန်တစ်ယောက်စာ အပိုင်သျှင် နှစ်ယောက်ဘားမာ ကျွန်မခံနိုင်၊ အကြောင်းကား သူစာ တစ်ယောက်ကို မုန်းရို့ အခြားတစ်ယောက်ကို ချစ်လိမည်၊ မဟုတ်ကေ သူစာ တစ်ယောက်ကို ရိုသေလေးစားရို့ အခြားတစ်ယောက်ကို အားမနာ လုပ်လိမည်။ နင်ရို့ တစ်ခါတည်းမာ ထာဝရဘုရားန ပစ္စည်း-ဥစ္စာဘားမာ ကျွန်မခံနိုင်။”

ပညှတ်တရားန ထာဝရဘုရား၏ နိုင်ငံတော်

14 ဖာရိရှဲအဖွဲ့သားရို့စာ တန်းကား-ဖွေသျှာကို အများ ချစ်ကတ်တေအတွက်န ယေရှု ပြောစာစကားတိကို ကြားရို့ သူ့ကို ကဲရဲကတ်လီရေ။ 15ယင်းခါ ယေရှုစာ သူရို့ကို ပြောလီရေ၊ “ကိုယ်ဘင်ရို့စာ လူရို့ ရှိက ကိုယ်ရို့ကို သူတော်ကောင်းပိုင် ဟန်ဆောင်ရို့ ပြနီကတ်တေ၊ ယေကေလည်း ထာဝရဘုရားစာ ကိုယ်ဘင်ရို့ စိတ်နှလုံးမာ အခြေအနေကို သိရေ။ လူရို့အတွက် ရိုသေလေးစားစရာ ဟို့ မှတ်စာတိစာ ထာဝရဘုရား၏ မျက်စိမာ ရွန်စရာ ဖြစ်တေ။

16“ပညှတ်တရားန ဘုရားသတင်းပို့သူရို့ ရွီးထားခစာ ကျမ်းတိစာ ရီနှစ်မင်္ဂလာပီးသူ ယောဟန်လက်ထက် တိုင်အောင် လူရို့ကို ထိန်းရို့ထားလီရေ။ ယင်းနောက် ယောဟန် ရောက်လာရေလှောက်ကပင် ထာဝရဘုရား၏ နိုင်ငံတော် သတင်းကောင်းကို ကျော်ညာဖို့ စလီရေ အရာ လူရို့ အားကုံးသူ ထိုနိုင်ငံတော်တို့ အားဒမ ဝင်နီကတ်တေ။ 17ယေကေလည်း ပညှတ်တရားအထဲက အက္ခရာသျှေတစ်လုံး ပျောက်လားဖို့စာထက်ပင် ဂေါင်းခင်န ကမ္ဘာ ပျက်စီးလားဖို့စာ ရွယ်သိရေ။

18“ကိုင်လိုက်ဖိ၊ အသူမဆို ကိုယ့်မယားကို ခွါရို့ အခြားမိန်းမတစ်ယောက်ကို နစပ်တေဆိုကေ သူစာ ကာမဂုဏ် ပြစ်မှားရေ။ အရာ အသူမဆို လင်ကွာစာ မိန်းမကို နစပ်တေဆိုကေ သူလည်းသောက် ကာမဂုဏ် ပြစ်မှားရေ။”

လာဇရုန သူဌေးတစ်ယောက် ပုံဥပမာ

19ယေရှုစာ ပုံဥပမာ တစ်ခု တင်ပြလီရေ၊ “တစ်ချိန်ခါ သူဌေးတစ်ယောက် ဟိလီရေ။ သူစာ ခရန်းရောင်အဝတ်န အမျိုးမျိုး တန်ဖိုးဟိစာ အဝတ်တိကို ဝတ်ရို့ နီလီရေ။ သူစာ နိတိုင်း စဉ့်စိမ်ခံပြီးကေ စားရို့သောက်ရို့ ပျော်နီလီရေ။ 20လူရို့စာ ထိုသူဌေး အိမ်လမ်းခဝနားမာ လာဇရုနာမည်န အလှူခံသား တစ်ယောက်ကို ယူခရို့ ချထားကတ်လီရေ။ လာဇရု ခန္ဓာတစ်ကိုယ်လုံးမာ အနာစိမ်းပေါက်ရို့ ဟိလီရေ။ 21သူစာ ထိုသူဌေး စားပွဲခုံက ကျစာ စားဖတ်သောက်ဖတ်တိကို စားရဖို့အတွက် တောင်းတလီရေ အရာ ခွီးတိစာ သူ့ခန္ဓာမာ အနာကို ယက်ကတ်လီရေ။ 22တစ်ရက်နိခါ အလှူခံသား လာဇရုစာ သီလားခလီရေ။ ယင်းခါ ဂေါင်းခင်နတ်သားရို့စာ လာရို့ သူ့ကို အာဗြဟံတို့ တင်ယူလားခကတ်လီရေ။ ယင်းနောက် အရာတစ်ရက်နိ ထိုသူဌေးလည်းသောက် သီလားခလီရေ အရာ လူရို့စာ သူ့ကို သင်္ဂြိုဟ်ကတ်လီရေ။ 23သူ့အသက်စာ ငရဲပြည်တို့ ဆင်းလားခလီရေ။ အရာ သူစာ ယင်းနေရာမာ ကောင်းကောင်း ဝေဒနာကို ခံရလီရေ။ သူစာ ငရဲပြည်ထဲကနီရို့ အထက်တို့ မော်ကြည့်လီရေ။ ယင်းခါ သူစာ အဝီးကနီရို့ အာဗြဟံန သူ့အနားမာ လာဇရုကို မြင်ရလီရေ။ 24ယင်းခါ သူစာ အားန အော်ရို့ ပြောလီရေ၊ ‘အိုး အဖ အာဗြဟံ၊ အကျွန့်ကို သနားပါ။ လက်ညှိုးကို ရီမာ နှစ်ရို့ အကျွန့် လျှာကို မြရို့ကျအောင် လုပ်ဖို့အတွက် အကျွန့်တို့ လာဇရုကို ရွှတ်လိုက်ပါ၊ အကြောင်းကား အကျွန် ဒေ မီးဖေါ်အထဲမာ ကောင်းကောင်း ဝေဒနာကို ခံနီရပါရေ။’

25“ယေကေလည်း အာဗြဟံစာ ပြောလီရေ၊ ‘ငါ့သား၊ နင် စဉ်းစားကြည့်။ နင် အသက်အရှင် ဟိလီရေခါ ကောင်းကောင်း စဉ့်စိမ်ခံရို့ နီလီရေ အရာ လာဇရုစာ ကောင်းကောင်း ဒုက္ခ-ဝေဒနာကို ခံရလီရေ။ ယေကေလည်း ဒေဂု သူစာ ဒေမာ စဉ့်စိမ်ကို ခံရနီရေ အရာ နင်စာ ဝေဒနာကို ခံရနီရေ။ 26ယင်းသျှင့်ကိုအပယ် နင်ရို့န ငါရို့ကြားမာ ဂျိုင့်ကြီးတစ်ဂျိုင့် ဟိရေ။ ယင်းအတွက်န လားချင်ရေဆိုကေလည်း ဒေကနီရို့ နင်ရို့တို့ လားရို့ မရောက်နိုင် အရာ ယင်းကနီရို့ ငါရို့တို့ လာရို့ မရောက်နိုင်။’

27“ယင်းခါ ထိုသူဌေးစာ ပြောလီရေ၊ ‘ယင်းပိုင်ဆိုကေ အိုး အဖ၊ ကျေးဇူးပြုရို့ လာဇရုကို အကျွန့် အဖအိမ်တို့ ရွှတ်လိုက်ပါ။ 28ယင်းပိုင်ဆိုကေ သူစာ အကျွန့်မာ ညီငါးယောက်ကို သတိပီးဖို့ ရပါဖို့။ ယင်းပိုင် မဟုတ်ဆိုကေ သူရို့လည်းသောက် ဒေ ဝေဒနာ ခံရစာနေရာတို့ ရောက်လာကတ်ပါဖို့။’

29“ယေကေလည်း အာဗြဟံစာ ပြောလီရေ၊ ‘မောရှေ၏ ပညှတ်တရားန ဘုရားသတင်းပို့သူရို့ ရွီးထားခစာ ကျမ်းစာအုပ်တိ သူရို့ဘားမာ ဟိရေ။ သူရို့စာ မောရှေန ဘုရားသတင်းပို့သူရို့ စကားတိကို လိုက်နာကတ်ပတ်စီ။’

30“သူဌေးစာ ပြောလီရေ၊ ‘အဖ အာဗြဟံ၊ ယင်းပိုင် မဟုတ်ပါ၊ သီသူရို့အထဲက တစ်ယောက် ပြန်ရှင်ထမြောင့်ရို့ သူရို့တို့ လားခရေဆိုကေ သူရို့စာ အပြစ်က စိတ်လှည့်ရို့ လာကတ်ပါဖို့။’

31“ယင်းခါ အာဗြဟံစာ ပြောလီရေ၊ ‘မောရှေန ဘုရားသတင်းပို့သူရို့ စကားတိကို သူရို့ နားမထောင်ကတ်ဆိုကေ သီသူရို့အထဲက တစ်ယောက် ပြန်ရှင်ထမြောင့်ကေလည်းသောက် သူရို့ ကျုံကတ်ဖို့ မဟုတ်။’”