Luke 17
အပြစ်လမ်းတို့ ဆောင်ယူလားခြင်း
(မဿဲ ၁၈:၆-၉၊ မာကု ၉:၄၂-၄၈)
1ယေရှုစာ ကိုယ့်တပည့်ရို့ကို ပြောလီရေ၊ “လူရို့ကို အပြစ်လမ်းတို့ ဆောင်ယူလားစရာ အမှန် ရောက်လာလိမည်၊ ယေကေလည်း အခြားတစ်ယောက်ကို အပြစ်လမ်းတို့ ဆောင်ယူလားသူစာ အမင်္ဂလာဟိရေ။ 2အသူမဆို ဒေ လူသျှေရို့အထဲက တစ်ယောက်ကို အပြစ်လမ်းတို့ ဆောင်ယူလားရေဆိုကေ ယင်းသူ လိုင်ဖင်းမာ ကျောက်လုံးကြီးတစ်လုံးကို ဆွဲရို့ ပင်လယ်ထဲတို့ ဘိုက်ချခြင်းကို ခံရစာပင် သူ့အတွက် ပိုရို့ ကောင်းဖို့သိ။မတရားလုပ်စာ ကျုံသူညီအစ်ကိုန ဖြေရှင်းခြင်း
(မဿဲ ၁၈:၁၅-၂၀)
3“ယင်းအတွက်န နင်ရို့ သတိထားကတ်၊ နင့်မာ ညီစာ နင့်ကို မတရားလုပ်တေဆိုကေ နင် သူ့ကို စကားန ဆုံးမလိုက်။ အရာ သူစာ နောင်တရရေဆိုကေ နင် သူ့ကို ခွင့်ရွှတ်လိုက်။ 4သူစာ တစ်ရက်မာ ခုနစ်ခေါက်တိုင်အောင် နင့်ကို မတရားလုပ်တေဆိုကေ အရာ သူစာ ခုနစ်ခေါက်တိုင်အောင် လာရို့၊ ‘ငါ နောင်တရဗျာ’ ဟို့ ပြောရေဆိုကေ နင် သူ့ကို ခွင့်ရွှတ်ရဖို့။”ကျုံခြင်းတရား အကြောင်းကို သွန်သင်ခြင်း
5ယင်းခါ တမန်တော်ရို့စာ အသျှင်ကို ပြောလီရေ၊ “အကျွန်ရို့မာ ကျုံခြင်းတရားကို တိုးပွါးအောင် လုပ်ပါ။” 6အသျှင်စာ ပြောလီရေ၊ “နင်ရို့မာ ရဲစိသျှေတစ်စိလှောက် ကျုံခြင်းတရား ဟိရေဆိုကေ နင်ရို့ ဒေ အပင်တစ်ပင်ကို၊ ‘အမြစ်ကပင် နုတ်ရို့ ကိုယ့်ကိုကိုယ် ပင်လယ်မာ လားရို့ စိုက်ထား’ ဟို့ ပြောရေဆိုကေ နင်ရို့ ပြောရေအတိုင်း ဖြစ်လိမည်။အသုံးမကျစာ ကျွန်ရို့ အကြောင်း
7“ကိုင်လိုက်ဖိ၊ နင်ရို့အထဲက တစ်ယောက်မာ ကျွန်စာ လယ်ထွန်နီရေ၊ မဟုတ်ကေ သိုးဆိတ် ကျောင်းနီရေ။ ထိုကျွန် လယ်က ပြန်လာရေခါ သူ့မာ အပိုင်သျှင်စာ၊ ‘အယင်အမြန် စားဖို့ ထိုင်ခလိုက်’ ဟို့ သူ့ကို ပြောဖို့လော? 8ယင်းပိုင် ပြောဖို့ မဟုတ်၊ ယင်းထက်ပင် အပိုင်သျှင်စာ၊ ‘ငါ့အတွက် စားဖို့သောက်ဖို့ ယင်ဖိ အရာ ငါ စားရို့ မပြီးသကြား နင့်ခါးမာ ကိုယ်သုတ်ပိုင်း ချိုင်ရို့ ငါ့ကို ထမင်း-ဟင်း လောင်းပီး။ ယင်းနောက် ငါ စားပြီးရေခါ နင် ထိုင်ရို့ စား’ ဟို့ ပြောလိမည်။ 9ထိုကျွန် သူ့အပိုင်သျှင် အာဏာချရေအတိုင်း လုပ်ကိုင်ရေအတွက်န အပိုင်သျှင်စာ သူ့ကို ကျေးဇူးတင်ဖို့လော? ကျေးဇူးမတင်။ 10ယင်းပိုင်တထန် ထာဝရဘုရား၏ အာဏာအတိုင်း ဟိသမျ အားကုံးကို လုပ်ပြီးရေခါ နင်ရို့စာ ဒေပိုင် ပြောကတ်၊ ‘ငါရို့ အသုံးမကျစာ ကျွန် ဖြစ်ကတ်တေ၊ အကြောင်းကား ငါရို့ သက်သက် ထန်းဆောင်ဖို့သင့်စာ တာဝန်ဝတ္တရားကိုရာ ထန်းဆောင်လီကတ်တေ။’”အနူရောဂါသေ ဆယ်ယောက် အကောင်းဖြစ်ခြင်း
11ယေရှု ယေရုရှလင်မြို့တို့ ကြွရေခါ ရှမာရိပြည်နယ်န ဂါလိလဲပြည်နယ် ကြားကနီရို့ ကြွလီရေ။ 12– 13အရာ သူစာ ရွာတစ်ရွာတို့ ဝင်ရေခါ အနူရောဂါသေ ဆယ်ယောက်ကို မြင်ရလီရေ။ သူရို့စာ အဝီးက ရပ်ပြီးကေ အားန အော်ရို့ ပြောကတ်လီရေ၊ “အိုး အသျှင်ယေရှု! အကျွန်ရို့ကို သနားပါ!” 14ယေရှုစာ ထိုရောဂါသေရို့တို့ ကြည့်ရို့ ပြောလီရေ၊ “နင်ရို့ ခန္ဓာကို ယဇ်ပုရောဟိတ်ရို့တို့ လားရို့ ပြခီကတ်။” သူရို့စာ လမ်းမာ လားရို့ လားရို့ ရောဂါကောင်းလားခလီရေ။ 15– 16သူရို့အထဲက ရှမာရိလူမျိုး တစ်ယောက်စာ ကိုယ့်မာ ရောဂါကောင်းလားခစာကို မြင်ရေခါ အားန အော်ရို့ ထာဝရဘုရားကို ချီမွမ်းပြီးကေ ယေရှုတို့ ပြန်လာလီရေ အရာ သူစာ ယေရှု အခြီရင်းမာ ဒူးထောက်ရို့ သူ့ကို ကျေးဇူးတင်လီရေ။ 17ယင်းခါ ယေရှုစာ ပြောလီရေ၊ “ရောဂါသေဆယ်ယောက်ကို အကောင်း လုပ်လီရေ မဟုတ်လော? ယင်းပိုင်ဆိုကေ အရာကိုးယောက် ဇာမာလည်း? 18ထာဝရဘုရားကို ချီမွမ်းဖို့အတွက် ဒေ လူမျိုးခြားတစ်ယောက်ကို ပယ်ရို့ အရာတစ်ယောက်လည်း ပြန်ရို့ မလာကတ်လော?” 19ယင်းနောက် ယေရှုစာ ထိုလူကို ပြောလီရေ၊ “နင် ထရို့ လားလီဖိ။ နင့် ကျုံခြင်းတရားစာ နင့်ကို ကောင်းအောင် လုပ်ပျာ။”နိုင်ငံတော် တည်ထောင်ဖို့စာ အကြောင်း
(မဿဲ ၂၄:၂၃-၂၈၊ ၂၄:၃၆-၄၄၊ မာကု ၁၃:၂၁-၂၃၊ ၁၃:၃၂-၃၇)
20 ဖာရိရှဲအဖွဲ့သား လိုင်းကေယောက်စာ ယေရှုကို မီးကတ်လီရေ၊ “ဆရာ၊ ထာဝရဘုရား၏ နိုင်ငံတော် ဇာခါ တည်ထောင်ပါဖို့လည်း?” ယေရှုစာ အဖြေပီးလီရေ၊ “ထာဝရဘုရား၏ နိုင်ငံတော် တည်ထောင်ရေခါ နိမိတ်လက္ခဏာ တစ်ခုလည်း မမြင်ရ။ 21‘ကြည့်လိုက်၊ ထာဝရဘုရား၏ နိုင်ငံတော် ဒေမာ ဟိရေ၊’ မဟုတ်ကေ ‘ထိုမာ ဟိရေ’ ဟို့ တစ်ယောက်လည်း ပြောကတ်လိမည် မဟုတ်၊ အကြောင်းကား ထာဝရဘုရား၏ နိုင်ငံတော်စာ ကိုယ်ဘင်ရို့အထဲမာရာ ဟိရေ။” 22ယင်းနောက် သူစာ ကိုယ့်တပည့်ရို့ကို ပြောလီရေ၊ “မနုသသားတော် ပြန်ရို့ ကြွလာဖို့စာနိရက်ကို နင်ရို့ မြင်ချင်ဖို့စာအချိန် ရောက်လာလိမည်၊ ယေကေလည်း ထိုနိရက်ကို နင်ရို့ မြင်ရကတ်လိမည် မဟုတ်။ 23လူရို့စာ နင်ရို့ကို ပြောကတ်လိမည်၊ ‘ကြည့်လိုက်ကတ်၊ မနုသသားတော် ထိုမာ ဟိရေ၊’ မဟုတ်ကေ ‘ဒေမာ ဟိရေ။’ ယင်းခါ နင်ရို့ ပြင်တို့ ထွက်ရို့ မလိုက်လီကတ်ကေ့ အရာ သူရို့ နောက်ကလည်း ဗြီးရို့ မလိုက်လီကတ်ကေ့၊ 24အကြောင်းကား လျှပ်ပြက်တေခါ ဂေါင်းခင်မာ ထိုဖက်-ဒေဖက် အရောင်ချင်းစာပိုင် မနုသသားတော် ကြွလာရေခါလည်း ယင်းပိုင် ဖြစ်လိမည်။ 25ယေကေလည်း သူစာ ပထမဆုံး ဒုက္ခ-ဝေဒနာ အများကြီး ခံရဖို့သိ အရာ ဒေခိုက်မာ လူရို့စာ သူ့ကို ငြင်းပယ်ကတ်လိမည်။ 26“နောဧလက်ထက်ခါ ဖြစ်ပျက်လီစာပိုင် မနုသသားတော် ကြွလာရေအချိန်မာလည်း ယင်းပိုင်တထန် ဖြစ်ပျက်လိမည်။ 27နောဧ သင်္ဘောမာ မတက်သကြား အရာ ရီမင်းကြီး လာရို့ ဟိသမျ လူရို့ကို မဖျက်စီးသကြား လူရို့စာ ပကတိအတိုင်း စားရို့သောက်ရို့ ဟိကတ်လီရေ၊ အိမ်ထောင်ပြုရို့ ဟိကတ်လီရေ အရာ အိမ်ထောင်ချရို့ ဟိကတ်လီရေ။ 28“အရာ လောတ လက်ထက်ခါလည်း ယင်းပိုင်တထန် ဖြစ်ပျက်လီရေ။ ယင်းအချိန်ခါ လူရို့စာ ပကတိအတိုင်း စားရို့သောက်ရို့ ဟိကတ်လီရေ၊ အရောင်း-အဝယ်လုပ်ရို့ ဟိကတ်လီရေ၊ အခင်းအပြင်လုပ်ရို့ ဟိကတ်လီရေ အရာ အိမ်-ယာ ဆောက်ရို့ ဟိကတ်လီရေ။ 29ယေကေလည်း လောတ သောဒုံမြို့က ထွက်ရို့ လားရေနိမာ ဂေါင်းခင်က မီးမိုးန ကန့်ကျောက် မိုးရွာရို့ ဟိသမျ လူရို့ကို ဖျက်စီးဘိုက်လိုက်လီရေ။ 30မနုသသားတော် ကြွလာရေနိမာလည်း ယင်းပိုင်တထန် ဖြစ်ပျက်လိမည်။ 31ယင်းနိခါ အိမ်ခေါင်ထက်မာ တက်ရို့ ဟိသူစာ ဝန်ဆန်ထုတ်ယူခဖို့အတွက် အောက်တို့ ဆင်းလာရို့ အိမ်ထဲတို့ မဝင်လီကေ့။ ယင်းပိုင်တထန် လယ်ပြင်မာ အလုပ်လုပ်နီသူစာ အိမ်တို့ ပြန်မလာလီကေ့။ 32လောတ၏ မယား အကြောင်းကို စဉ်းစားကြည့်ကတ်။ 33“အသူမဆို ကိုယ့်အသက်ကို ကယ်ဆယ်ဖို့ ကြိုးစားရေဆိုကေ သူ့မာ ထာဝရအသက်ကို ဆုံးရလိမည်။ ယေကေလည်း အသူမဆို ကိုယ့်အသက်ကို အဆုံးခံရေဆိုကေ သူစာ ထာဝရအသက်ကို ကယ်ဆယ်လိမည်။ 34ငါ နင်ရို့ကို ပြောရေ၊ ယင်းနိညဉ့်မာ တစ်အိပ်ရာတည်းမာ အိပ်ရို့ဟိကတ်စာ လူနှစ်ယောက်အထဲက တစ်ယောက်ကို ထားဘိုက်ခရို့ အခြားတစ်ယောက်ကို တင်ယူလိမည်။ 35ယင်းခါ ဆုံမာ စပါးထောင်းနီစာ မိန်းမနှစ်ယောက်အထဲက တစ်ယောက်ကို ထားဘိုက်ခရို့ အခြားတစ်ယောက်ကို တင်ယူလိမည်။ 36 ▼▼ပထမဆုံး ရွီးလီစာ ဂရိဘာသာ ကျမ်းစာအဟောင်းတိမာ ဒေ အခန့်ငယ် ၃၆-မာ စကားတိ ရွီးရို့ မဟိပါ။
လယ်ပြင်မာ အလုပ်လုပ်နီစာ လူနှစ်ယောက်အထဲက တစ်ယောက်ကို ထားဘိုက်ခရို့ အခြားတစ်ယောက်ကို တင်ယူလိမည်။” 37တပည့်ရို့စာ မီးကတ်လီရေ၊ “အသျှင်၊ ဇာမာ ဖြစ်ပျက်ပါဖို့စာလည်း?” ယေရှုစာ အဖြေပီးလီရေ၊ “အသီကောင် ဟိစာနေရာမာ လင်းတတိ လာရို့ စုကတ်လိမည်။”
Copyright information for
RmzSC