Luke 2
ယေရှုခရစ်တော်၏ မွီးဖွားခြင်း
(မဿဲ ၁:၁၈-၂၅)
1ယင်းအချိန်ခါ ရောမဧကရာဇ်မင်း ▼▼ရောမဧကရာဇ်မင်း ရောမဧကရာဇ်မင်းဆိုစာ ကမ္ဘာမာ ဟိသမျ မင်းရို့ထက် အကြီးဆုံး မင်း ဖြစ်ပါရေ။ သူစာ ဒေ ကမ္ဘာမာ မင်းတကာရို့မာ မင်း ဟိလီပါရေ။
ကဲသာဩဂုတ္တုစာ ကိုယ်အုပ်ချုပ်စာ ဟိသမျ ပြည်သားရို့ကို နာမည်-စာရင်း သွင်းဖို့အတွက် အာဏာချလီရေ။ 2ရှုရိပြည်နယ်ကို အုပ်ချုပ်သူ ကုရေနိလက်ထက်မာ ပထမခေါက် ဒေပိုင် လူဦးရေ-စာရင်း ကောက်လီရေ။ 3ယင်းခါ ဟိသမျ လူရို့စာ နာမည်-စာရင်း သွင်းဖို့အတွက် ကိုယ့်ပြည် ကိုယ့်ရွာတိတို့ လားကတ်လီရေ။ 4– 5– 6ယောသပ်စာ ခိုက်ဟောင်းက ဒါဝိဒ်မင်း၏ အမျိုးအနွယ်သား ဖြစ်တေ။ ယင်းအတွက်န သူစာ ဂါလိလဲပြည်နယ် နာဇရက်မြို့သျှေကနီရို့ ဒါဝိဒ်မင်း၏ မွီးဖွားရာ ယုဒပြည်နယ် ဗက်လင်မြို့တို့ လားလီရေ။ ယောသပ်စာ ကိုယ်န နစပ်ဖို့စကားဟိစာ မယားသျှာ မာရိကို ယူရို့ နာမည်-စာရင်း သွင်းဖို့အတွက် လားလီရေ။ ယင်းခါ မာရိမာ ကိုယ်ဝန်တည်ရို့ ဟိလီရေ အရာ သူရို့နှစ်ယောက်စုံ ဗက်လင်မြို့မာ ဟိနီစဉ် မာရိမာ သားမွီးဖွားဖို့အချိန် စိလာလီရေ။ 7ယင်းနေရာမာ သူစာ သားဦးကို မွီးဖွားလီရေ အရာ သူစာ ထိုသားသျှေကို အဝတ်ရိုက်ရို့ နွားစာလောင်းဖျိုင်းမာ သိပ်ထားလီရေ၊ အကြောင်းကား ထိုမြို့မာ သူရို့အတွက် ဧည့်သေ တည်းခိုဖို့စာအခန့် အလပ် မဟိလီဗျာ။ ဂေါင်းခင်နတ်သားရို့ ပျော်စရာသတင်း ကျော်ညာခြင်း
8သိုးဆိတ်ကျောင်းသားရို့စာ ဗက်လင်မြို့ပြင်က တလင်းတစ်ခုမာ ကိုယ်ရို့ သိုးဆိတ်တိကို စောင့်ရို့ ဟိကတ်လီရေ။ 9ယင်းအချိန်ခါ အသျှင်၏ ဂေါင်းခင်နတ်သားတစ်ပါး ဗြုန်းခနိုင်းပျင်ရို့ သူရို့ ရှိက ပေါ်လာလီရေ။ ယင်းခါ အသျှင်၏ ဘုန်းရောင်ခြေတော်စာ သူရို့ လေးဖက်လက်စိမာ ထွန်းတောက်လီရေ။ ယင်းသျှင့်ကို မြင်ရို့ သူရို့စာ ကောင်းကောင်း ကြောက်ကတ်လီရေ။ 10ဂေါင်းခင်နတ်သားစာ သူရို့ကို ပြောလီရေ၊ “မကြောက်ကတ်ကေ့၊ အကြောင်းကား ငါ နင်ရို့တို့ ကောင်းကောင်း ဝမ်းမြောင့်ဖွယ်ရာ သတင်းတစ်ခု ယူလာရေ။ ဒေ ဝမ်းမြောင့်ဖွယ်ရာ သတင်းစာ ဟိသမျ လူရို့အတွက် ဖြစ်တေ။ 11ဒေနိခါ ဒါဝိဒ်မင်း၏ မြို့မာ နင်ရို့အတွက် ကယ်တင်သျှင်တစ်ပါး မွီးဖွားဗျာ။ သူစာ အသျှင်ခရစ်တော် ဖြစ်တေ။ 12ငါ့စကား မှန်ရေဆိုစာကို နင်ရို့အတွက် အမှတ်တရ ဖြစ်တေကား၊ နို့စို့သျှေတစ်ယောက်ကို အဝတ်ရိုက်ရို့ နွားစာလောင်းဖျိုင်းမာ သိပ်ထားစာကို နင်ရို့ မြင်ရကတ်လိမည်။” 13ယင်းအချိန်ခါ ဗြုန်းခနိုင်းပျင်ရို့ ထိုဂေါင်းခင်နတ်သားနအတူ အရာလည်း ဂေါင်းခင်နတ်သား အများကြီး ပေါ်လာကတ်လီရေ။ သူရို့စာ ထာဝရဘုရားကို ချီမွမ်းကတ်လီရေ၊14“ဂေါင်းခင်ဘုံသျှင် ထာဝရဘုရား၏ ဘုန်းကြီးပါစီ၊
ကမ္ဘာမာ ထာဝရဘုရား၏ နှစ်သက်ခြင်းကို
ခံရသူရို့ဘားမာ ငြိမ်းချမ်းခြင်း ကျရောက်ပါစီ။” 15ဂေါင်းခင်နတ်သားရို့ ဂေါင်းခင်ဘုံတို့ တက်လားခပြီးရေနောက် သိုးဆိတ်ကျောင်းသားရို့စာ ကိုယ်ရို့အချင်းချင်း ပြောကတ်လီရေ၊ “လား၊ ငါရို့ ဗက်လင်မြို့တို့ လားကတ်မည်၊ အသျှင် ငါရို့ဘားမာ ပြောပြခစာ ဖြစ်ပျက်ခြင်း အကြောင်းတိကို ကြည့်ကတ်မည်။” 16ယင်းခါ သူရို့စာ အယင်အမြန် လားခပြီးကေ မာရိ၊ ယောသပ် အရာ အဝတ်ရိုက်ရို့ နွားစာလောင်းဖျိုင်းမာ သိပ်ထားစာ အသျှေကို တွိကတ်လီရေ။ 17သူရို့စာ အသျှေကို တွိကတ်တေခါ အသျှေ အကြောင်းနပတ်သပ်ရို့ ကိုယ်ရို့ ကြားခစာ အကြောင်းအရာတိကို လူရို့ဘားမာ ပြောပြကတ်လီရေ။ 18သိုးဆိတ်ကျောင်းသားရို့ ပြောကတ်စာ စကားကို ကြားကတ်တေခါ အားကုံးသူ အံ့ဩကတ်လီရေ။ 19ယေကေလည်း မာရိစာ ဟိသမျ အကြောင်းအရာကို တစ်ယောက်ဘားမာလည်း ဖွင့်ရို့ မပြောဘိုင်းန စိတ်မာ မှတ်ထားလီရေ။ သူစာ ထိုအကြောင်းအရာတိကို ယူရို့ စဉ်းစားရို့ နီလီရေ။ 20သိုးဆိတ်ကျောင်းသားရို့စာ ဂေါင်းခင်နတ်သားရို့ ပြောပြခရေအတိုင်း ဟိသမျ အားကုံးကို ကြားရမြင်ရရေအတွက်န ထာဝရဘုရားကို ချီမွမ်းရို့ ပြန်လားခကတ်လီရေ။ 21ယင်းနောက် မွီးဖွားရို့ ရှစ်ရက်စိရေနိမာ ယုဒဘာသာတရားအတိုင်း သူရို့စာ ထိုအသျှေကို အရီဖျားလှီးမင်္ဂလာ လုပ်ကတ်လီရေ အရာ အသျှေကို ယေရှု ဟို့ နာမည် မှည့်ကတ်လီရေ။ အမိဝမ်းမာ ကိုယ်ဝန်မတည်ခင် အယင်ကပင် ဂေါင်းခင်နတ်သားစာ သူ့ကို ဒေ နာမည် မှည့်ခလီရေ။
အသျှေကို ဝိပဿနာကျောင်းတို့ ယူလာခြင်း
22ယင်းနောက် မောရှေ၏ ပညှတ်တရားအတိုင်း ယောသပ်န မာရိမာ စင်ကြယ်ခြင်းမင်္ဂလာ လုပ်ဖို့စာအချိန် ကျလာလီရေ။ ယင်းခါ သူရို့စာ ယေရှုကို အသျှင်ဘားမာ အပ်ဖို့အတွက် ယေရုရှလင်မြို့တို့ ယူလားခကတ်လီရေ၊ 23အကြောင်းကား အသျှင်၏ ပညှတ်တရားမာ ရွီးရို့ ဟိရေ၊ “ပထမ မွီးဖွားစာ ဟိသမျ သားယောက်ျားသျှေကို အသျှင်ဘားမာ ဆက်ကပ်ရဖို့။” 24အရာ “ဂြိုးနှစ်ကောင် မဟုတ်ကေ ခေါ်သျှေနှစ်ကောင် ယဇ်ပူဇော်ရဖို့” ဟို့ အသျှင်၏ ပညှတ်တရားမာ ရွီးရို့ ဟိရေအတိုင်း သူရို့စာ ယဇ်ပူဇော်ဖို့ လားခကတ်လီရေ။သူတော်ကောင်း ရှုမောင် ယေရှုန တွိရခြင်း
25– 26ယင်းခါ ရှုမောင်နာမည်န ယေရုရှလင်မြို့မာ သူတော်ကောင်း တစ်ယောက် ဟိလီရေ။ သူစာ ထာဝရဘုရားကို ရိုသေကြောက်လန့်သူလည်း ဖြစ်တေ။ သူစာ ဣသရေလလူမျိုးရို့ကို ထာဝရဘုရား လွတ်မြောင့်ခြင်း ပီးဖို့စာအချိန်ကို စောင့်မျှော်ရို့ နီလီရေ။ သူစာ သန့်ရှင်းသောဝိညာဉ်တော်၏ ဆောင်ယူခြင်းကို ခံရို့ ဟိလီရေ အရာ သူစာ မသီခင်အယင်က အသျှင်၏ ခရစ်တော်ကို မြင်ခရဖို့ဆိုစာကို သန့်ရှင်းသောဝိညာဉ်တော်စာ သူ့ဘားမာ ဖေါ်ပြလီရေ။ 27ယင်းနိခါ ရှုမောင်စာ သန့်ရှင်းသောဝိညာဉ်တော်၏ ဆောင်ယူခြင်းကို ခံရပြီးကေ ဝိပဿနာကျောင်းတို့ လာလီရေ။ မောရှေ၏ ပညှတ်တရားကို လိုက်နာဖို့အတွက် ယေရှု အမိအဖရို့စာ ယေရှုကို ဝိပဿနာကျောင်းတို့ ယူလာကတ်လီရေ။ 28ယင်းခါ ရှုမောင်စာ အသျှေကို ရွက်လီရေ အရာ ထာဝရဘုရားကို ချီမွမ်းရို့ ပြောလီရေ၊29“အိုး အသျှင်၊ ကိုယ်တော်၏ ဂတိတော်အတိုင်း
ကိုယ်တော်၏ ကျွန်ကို စိတ်အီးချမ်းသာန ပြန်ခွင့်ပီးပါဖိ၊
30အကြောင်းကား အကျွန် ကိုယ်တော်၏ ကယ်တင်ခြင်းကို မြင်ရပါဗျာ။
31ထိုကယ်တင်ခြင်းကို ဟိသမျ လူမျိုးရို့ ရှိထက်က ကိုယ်တော် အဆင်သင့် လုပ်ထားပါဗျာ။
32သူစာ ယုဒမဟုတ်သူရို့အတွက် လမ်းပြဖို့စာ အလင်း ဖြစ်ပါလိမည်၊
အရာ ကိုယ်တော်၏ ဣသရေလလူမျိုးအတွက် ဘုန်းတန်ခိုးရစရာ အကြောင်း ဖြစ်ပါလိမည်။” 33အသျှေ အမိအဖရို့စာ အသျှေ အကြောင်းနပတ်သပ်ရို့ ရှုမောင် ပြောစာစကားတိကို ကြားရေခါ အံ့ဩကတ်လီရေ။ 34ယင်းနောက် ရှုမောင်စာ သူရို့ကို ပဿိ ပီးလီရေ အရာ သူစာ မာရိကို ပြောလီရေ၊ “ဒေ အသျှေစာ ထာဝရဘုရား၏ ရွီးကောက်ခြင်းကို ခံရသူ ဖြစ်တေ။ သူ့အကြောင်းန ဣသရေလလူမျိုးအထဲမာ တစ်ချိုးလူရို့ ပျက်စီးခြင်းတို့ ရောက်ကတ်လိမည် အရာ တစ်ချိုးလူရို့ ကယ်တင်ခြင်းကို ရကတ်လိမည်။ သူစာ ထာဝရဘုရား၏ စီစဉ်ထားစာ နိမိတ်လက္ခဏာတစ်ခု ဖြစ်တေ၊ ယေကေလည်း လူအများကြီး သူ့ကို ဆန့်ကျင်ရို့ စကား ပြောကတ်လိမည်။ 35သူ့အကြောင်းန သူရို့ စိတ်နှလုံးမာ ဖုံးရွှက်စာ စဉ်းစားချက်တိ ပေါ်လာလိမည် အရာ ဒါးသျှေန အထိုး ခံရစာပိုင် နင့် စိတ်နှလုံးမာ ဒုက္ခ ရလိမည်။”
အန္န ယေရှုကို မြင်ရခြင်း
36– 37ယင်းနိခါ ဝိပဿနာကျောင်းမာ အန္နနာမည်န ဘုရားသတင်းပို့သူ မိန်းမလည်း တစ်ယောက် ဟိလီရေ။ သူစာ အာရှာ၏ အမျိုးအနွယ်သား ဖနွေလ သမီး ဖြစ်တေ။ သူ့မာ အသက်အရွှယ် ကောင်းကောင်း ကြီးလားခလီရေ။ သူစာ အိမ်ထောင်နီရို့ လင်န ခုနစ်နှစ် လုပ်စားပြီးရေနောက် အသက် ရှစ်ဆယ်နလေးနှစ်တိုင်အောင် မဆမ နီလီရေ။ သူစာ ဝိပဿနာကျောင်းက ထွက်ရို့ တစ်ရပ်တို့လည်း မလားလီ။ ယင်းထက်ပင် သူစာ အစားရှောင်ရို့ ဆုတောင်းပြီးကေ ညဉ့်ပါ-ရက်ပါ ထာဝရဘုရားကို ဝတ်ပြုကိုးကွယ်ရို့ နီလီရေ။ 38ရှုမောင် မာရိန စကားပြောနီတုံးမာ သူလည်းသောက် လာရို့ ထာဝရဘုရားကို ကျေးဇူးတင်လီရေ၊ အရာ ယေရုရှလင်မြို့ လွတ်မြောင့်ခြင်း ရဖို့အတွက် စောင့်နီသူရို့ဘားမာ ထိုအသျှေ အကြောင်းကို ပြောပြလီရေ။ 39အသျှင်၏ ပညှတ်တရားအတိုင်း ဟိသမျ အားကုံး အရေးချီရို့ ပြီးရေခါ ယောသပ်န မာရိစာ ဂါလိလဲပြည်နယ်မာ ကိုယ်ရို့ နီထိုင်စာ နာဇရက်မြို့သျှေတို့ လားခကတ်လီရေ။ 40ယင်းနောက် ထိုအသျှေစာ ကြီးပြင်းရို့ အားခွန်န ပြည့်စုံလာလီရေ အရာ ညာဏ်ပညာန ပြည့်စုံလာလီရေ။ သူစာ ထာဝရဘုရား၏ သနားကြင်နာခြင်းကို ခံနီရလီရေ။တောင့်ပြောင်သျှေ ယေရှုန ကျမ်းဆရာရို့
41ယေရှု အမိအဖရို့စာ လွတ်မြောင့်ခြင်းပွဲကို ကျင့်ပဖို့အတွက် နှစ်တိုင်း ယေရုရှလင်မြို့တို့ လားလီကတ်တေ။ 42ယေရှု အသက်တစ်ဆယ့်နှစ်နှစ် ပြည့်ရေခါ သူရို့စာ ကိုယ်ရို့အလည့်အတိုင်း လွတ်မြောင့်ခြင်းပွဲတို့ လားခကတ်လီရေ။ 43လွတ်မြောင့်ခြင်းပွဲ ဆုံးရေခါ သူရို့စာ အိမ်တို့ ပြန်လားကတ်လီရေ။ ယင်းခါ ယေရှု ယေရုရှလင်မြို့မာ ကျန်ဟိလိုက်လီရေ၊ ယေကေလည်း ယေရှု ကျန်ဟိလိုက်တေဆိုစာကို သူ့မာ အမိအဖရို့စာ မသိကတ်လီ။ 44ယေရှုကို အမျိုးအဆွီရို့န သိကျွမ်းရို့အထဲမာ ပါရေ ဟို့ ထင်ရို့ သူရို့စာ တစ်ရက် လမ်းခရီး လားလီကတ်ပျာ။ ယင်းနောက် ယောသပ်န မာရိစာ ထိုလူရို့အထဲမာ ယေရှုကို ရှာကြည့်ကတ်လီရေ။ 45ယေကေလည်း ယေရှုကို ရှာရို့ မတွိရေအတွက်န သူရို့စာ အရာတစ်ပြန် ယေရုရှလင်မြို့တို့ ပြန်လားခကတ်လီရေ။ 46နောက်ဆုံးပြီးမာ သုံးရက် ရွန်ရေခါရာ သူရို့စာ ယေရှုကို ဝိပဿနာကျောင်းမာ တွိကတ်လီရေ။ သူစာ ကျမ်းဆရာရို့ အလယ်မာ ထိုင်ပြီးကေ သူရို့ စကားကို နားထောင်ရို့ ဟိလီရေ အရာ သူရို့န စကား အမီးအဖြေ လုပ်ရို့ ဟိလီရေ။ 47ယေရှု စကားကို နားထောင်သူရို့ အားကုံးသူ သူ့ညာဏ်ပညာန သူအဖြေပီးစာကို ကြားရို့ မြင်ရို့ အံ့ဩကတ်လီရေ။ 48ယေရှု အမိအဖရို့စာ ယေရှုကို မြင်ရေခါ အံ့ဩကတ်လီရေ။ အမိစာ ယေရှုကို ပြောလီရေ၊ “အဗုသျှေ၊ နင် ငါရို့ကို ဇာဖို့ ဒေပိုင် ဒုက္ခထည့်စာလည်း? နင့်အဘာန ငါန ကောင်းကောင်း ကြောင်းကြရို့ နင့်ကို ရှာနီကတ်လီရေ။” 49ယေရှုစာ သူရို့ကို ပြောလီရေ၊ “အမိန အဘာ အကျွန့်ကို ဇာဖို့ လိုက်ရို့ ရှာနီကတ်စာလည်း? အကျွန် ကိုယ့်အဖ အိမ်မာ နီရဖို့ဆိုစာကို အမိန အဘာ မသိကတ်လော?” 50ယေကေလည်း သူ့အမိအဖရို့စာ ယေရှု ပြောစာစကား အဓိပ္ပါယ်ကို နားမလည်ကတ်လီ။ 51ယင်းနောက် သူစာ ကိုယ့်အမိအဖနအတူ နာဇရက်မြို့သျှေတို့ ပြန်လားခလီရေ အရာ ကိုယ့်အမိအဖ စကားကို နာခံရို့ နီလီရေ။ သူ့အမိစာ ဟိသမျ အကြောင်းအရာကို စိတ်မာ မှတ်ထားပြီးကေ စဉ်းစားရို့ နီလီရေ။ 52ယေရှုစာ ညာဏ်ပညာနအတူ အလုံးနအရပ်န ကြီးလာလီရေ အရာ ထာဝရဘုရားန လူရို့ ရှိထက်မာ မျက်နှာသာလန်း ပွင့်လာလီရေ။
Copyright information for
RmzSC