Luke 22

ဂေါင်းဆောင်ရို့ ယေရှုကို အသီသတ်ဖို့ ကြံခြင်း

(မဿဲ ၂၆:၁-၅၊ မာကု ၁၄:၁-၂၊ ယောဟန် ၁၁:၄၅-၅၃)

1ယင်းအချိန်ခါ ယုဒလူမျိုးရို့မာ တဆီးမထည့်စာမုန့်ပွဲ ကျဖို့ ပါးလာလီရေ။ ဒေ ပွဲကို လွတ်မြောင့်ခြင်းပွဲလည်း ခေါ်ရေ။ 2ယဇ်ပုရောဟိတ်အကြီးရို့န ကျမ်းဆရာရို့စာ ယေရှုကို အထဲမာအထဲ အသီသတ်ဖို့အတွက် အခွင့်ရေး ရှာကတ်လီရေ၊ အကြောင်းကား သူရို့စာ လူပရိတ်သတ်ရို့ကို ကြောက်ကတ်လီရေ။

ယုဒ ယေရှုကို ဖမ်းပီးဖို့ အခွင့်ရေး ရှာခြင်း

(မဿဲ ၂၆:၁၄-၁၆၊ မာကု ၁၄:၁၀-၁၁)

3ယင်းခါ ယုဒရှကာရုတ် စိတ်နှလုံးမာ မာရ်နတ် ဝင်လီရေ။ ဒေ ယုဒရှကာရုတ်စာ ယေရှု တပည့်တစ်ဆယ့်နှစ်ယောက်အထဲက တစ်ယောက် ဖြစ်တေ။ 4အရာ သူစာ ယဇ်ပုရောဟိတ်အကြီးရို့န ဝိပဿနာကျောင်းမာ စောင့်သူရို့တို့ လားရို့ ယေရှုကို ဇာပိုင်ပျင်ရို့ သူရို့အလက်မာ ဖမ်းပီးဖို့လည်းဆိုစာကို သူရို့န တိုင်ဘင်လီရေ။ 5ယင်းခါ သူရို့စာ ကောင်းကောင်း ပျော်ရို့ ယုဒကို တန်းကား ပီးဖို့ အာမခံကတ်လီရေ။ 6အရာ ယုဒလည်းသောက် သဖေါတူပြီးကေ လူပရိတ်သတ်ရို့ ကွယ်ရာမာ ယေရှုကို ဖမ်းဖို့အတွက် အခွင့်ရေး ရှာရို့ နီလီရေ။

အဆုံးခေါက် လွတ်မြောင့်ခြင်းပွဲ စားခြင်း

(မဿဲ ၂၆:၁၇-၂၅၊ မာကု ၁၄:၁၂-၂၁)

7– 8တဆီးမထည့်စာမုန့်ပွဲနိမာ လွတ်မြောင့်ခြင်းပွဲအတွက် သိုးဆိတ်သျှေတိကို လှီးရို့ ထားရလီရေ။ ယင်းအတွက်န တဆီးမထည့်စာမုန့်ပွဲနိ ရောက်လာရေခါ ယေရှုစာ ပေတရုန ယောဟန်ကို ဒေပိုင် ပြောရို့ ရွှတ်လိုက်လီရေ၊ “လားခီ၊ ငါရို့ စားဖို့အတွက် လွတ်မြောင့်ခြင်းပွဲကို နင်ရို့ အဆင်သင့် လုပ်ခီကတ်။”

9ယင်းခါ သူရို့စာ ယေရှုကို မီးကတ်လီရေ၊ “အကျွန်ရို့ ဇာမာ ဒေ ပွဲကို အဆင်သင့် လုပ်ပါဖို့စာလည်း?”

10– 11ယေရှုစာ ပြောလီရေ၊ “နားထောင်ကတ်၊ နင်ရို့ မြို့ထဲတို့ ဝင်ကတ်တေခါ ယောက်ျားတစ်ယောက် ရီအိုးခွက်တစ်လုံး ရွက်ရို့ လားစာကို မြင်ရကတ်လိမည်။ နင်ရို့ သူ့နောက်က လိုက်ရို့ သူဝင်ဖို့စာ အိမ်က အိမ်သျှင်ကို ပြောလီကတ်၊ ‘ကိုယ့်တပည့်ရို့နအတူ လွတ်မြောင့်ခြင်းပွဲကို စားဖို့အတွက် ဧည့်ခံစာ အိမ်ခန့် ဇာမာလည်း ဟို့ ဆရာ မီးလိုက်ပါရေ။’ 12ယင်းခါ သူစာ နင်ရို့ကို အထက်မာ ဆင်ထားစာ အိမ်ခန့်ကြီး တစ်ခန့်ကို ပြပီးလိမည်။ ထိုအိမ်ခန့်မာ အားကုံးစာ အဆင်သင့် လုပ်လီကတ်။” 13သူရို့ လားခကတ်တေခါ ယေရှု ပြောပြလိုက်စာပိုင်တထန် ဟိသမျ အားကုံးကို မြင်ရကတ်လီရေ အရာ လွတ်မြောင့်ခြင်းပွဲကို စားဖို့အတွက် အဆင်သင့် လုပ်ကတ်လီရေ။

အသျှင်၏ ပွဲတော်မင်္ဂလာ

(မဿဲ ၂၆:၂၆-၃၀၊ မာကု ၁၄:၂၂-၂၆၊ ၁ကောရိန္သု ၁၁:၂၃-၂၅)

14ယင်းနောက် အချိန်တိုင်ရေခါ ယေရှုစာ တမန်တော်ရို့နအတူ လွတ်မြောင့်ခြင်းပွဲကို စားသောက်ဖို့ ထိုင်လီရေ။ 15သူစာ သူရို့ကို ပြောလီရေ၊ “ငါ ဒုက္ခ-ဝေဒနာကို မခံယူခင်အယင်က နင်ရို့နအတူ ဒေ လွတ်မြောင့်ခြင်းပွဲကို ကောင်းကောင်း စားသောက်ခချင်ရေ။ 16ငါ နင်ရို့ကို ပြောရေ၊ ထာဝရဘုရား၏ နိုင်ငံတော် ရွယ်မှတ်ချက် မပြည့်စုံသကြား ငါ အရာ တစ်ခါလည်း ဒေ ပွဲကို မစားဗျာ။”

17ယင်းနောက် ယေရှုစာ စပျစ်ရည်ခွက်ကို ယူလီရေ အရာ ထာဝရဘုရားကို ကျေးဇူးတင်ရို့ တပည့်ရို့ကို ပြောလီရေ၊ “နင်ရို့အထဲမာ ဒေ စပျစ်ရည်ကို ဝီရို့ သောက်ကတ်၊ 18အကြောင်းကား ငါ နင်ရို့ကို ပြောရေ၊ ဒေဂုကပင် စရို့ ထာဝရဘုရား၏ နိုင်ငံတော် မတည်သကြား ငါ အရာတစ်ခါလည်း စပျစ်ရည် မသောက်ပျာ။”

19ယင်းနောက် သူစာ ပေါင်မုန့်ကို ယူရို့ ထာဝရဘုရားကို ကျေးဇူးတင်လီရေ။ အရာ သူစာ ထိုပေါင်မုန့်ကို ဖဲ့ပြီးကေ တပည့်ရို့ကို ပီးရို့ ပြောလီရေ၊ “ဒေ ပေါင်မုန့်စာ နင်ရို့အတွက် စွန့်ဖို့စာ ငါ့အသား ဖြစ်တေ။ ငါ့ကို အောက်မိဖို့အတွက် နင်ရို့ ဒေပိုင် လုပ်လီကတ်။”

20ယင်းပိုင်တထန် စားသောက်ရို့ ပြီးရေခါ သူစာ စပျစ်ရည် ခွက်ကို ပီးရို့ တပည့်ရို့ကို ပြောလီရေ၊ “ဒေ ခွက်စာ ထာဝရဘုရား၏ စာချုပ်အသစ် အမှတ်တရ ဖြစ်တေ။ ထာဝရဘုရား၏ စာချုပ်အသစ်ကို ငါ့သွီးန ထိုးရေ။ အရာ ငါ့မာ ဒေ သွီးကို နင်ရို့အတွက် သွန်းလောင်းဖို့။ 21ယေကေလည်း သတိထားကတ်၊ ငါ့ကို ရန်သူရို့အလက်မာ ဖမ်းပီးဖို့သူစာ ငါနအတူ ဒေ စားပွဲခုံမာ အလက်တင်ရို့ ဟိရေ၊ 22အကြောင်းကား ထာဝရဘုရား စီစဉ်ရို့ ထားရေအတိုင်း မနုသသားတော်စာ အသီခံရဖို့၊ ယေကေလည်း မနုသသားတော်ကို ရန်သူရို့အလက်မာ ဖမ်းပီးဖို့သူစာ အမင်္ဂလာဟိရေ!” 23ယင်းခါ တပည့်ရို့စာ ကိုယ်ရို့အထဲမာ ဒေပိုင် အလုပ်ကို အသူ လုပ်ဖို့လည်း ဆိုပြီးကေ တစ်ယောက်ကို တစ်ယောက် မီးကြည့်ကတ်လီရေ။

အသူ အကြီးဆုံး ဖြစ်ဖို့လည်း?

24တပည့်ရို့စာ ကိုယ်ရို့အထဲမာ အကြီးဆုံး အသူ ဖြစ်ဖို့လည်းဆိုစာ အကြောင်းကို ယူရို့ အငြင်းအခုံ ဖြစ်ကတ်လီရေ။ 25ယင်းခါ ယေရှုစာ သူရို့ကို ပြောလီရေ၊ “ယုဒမဟုတ်သူရို့မာ မင်းရို့စာ တန်ခိုးအာဏာန သူရို့ကို အုပ်ချုပ်ကတ်တေ အရာ ထိုမင်းရို့စာ ကိုယ်ရို့ကို လူရို့မာ မိတ်ဆွေ ဟို့ မှတ်ကတ်တေ၊ 26ယေကေလည်း နင်ရို့အထဲမာ ယင်းပိုင် ဖြစ်ဖို့မသင့်။ နင်ရို့အထဲမာ အားကုံးသူထက် အကြီးဆုံး ဖြစ်သူစာ အားကုံးသူထက် အသျှေဆုံးပိုင် ဖြစ်ရဖို့ အရာ ဂေါင်းဆောင် ဖြစ်သူစာ ပြုဇုသူ ဖြစ်ရဖို့။ 27အသူ အကြီးဆုံးလည်း? စားဖို့ ထိုင်သူလော၊ မဟုတ်ကေ လောင်းပီးသူလော? စားဖို့ ထိုင်သူ အကြီးဆုံး မဟုတ်လော? ယေကေလည်း ငါစာ နင်ရို့အထဲမာ ပြုဇုသူတစ်ယောက်ပိုင် ဖြစ်ရို့လာဗျာ။

28“ငါ ဟိသမျ ဒုက္ခ-ဝေဒနာကို ခံရလီရေခါ နင်ရို့ ငါ့ကို စွန့်ရို့ မလားလီကတ်။ 29ငါ့အဖ ငါ့ကို အုပ်ချုပ်ဖို့ တန်ခိုး ပီးလီစာပိုင် ငါလည်းသောက် နင်ရို့ကို တန်ခိုး ပီးရေ။ 30ယင်းအတွက်န နင်ရို့စာ ငါ့နိုင်ငံတော်မာ ငါနအတူ စားသောက်ကတ်လိမည် အရာ တရားပလ္လင်မာ ထိုင်ရို့ ဣသရေလလူမျိုး တစ်ဆယ့်နှစ်စိုင်ကို တရားစစ်ဆေးကတ်လိမည်။

ပေတရု ငြင်းဖို့စာ အကြောင်း

(မဿဲ ၂၆:၃၁-၃၅၊ မာကု ၁၄:၂၇-၃၁၊ ယောဟန် ၁၃:၃၆-၃၈)

31“ရှိမုန်၊ ရှိမုန်၊ သတိထား။ ဂျုံဆန်ကို စန်ဂိုးမာ တင်ရို့ ပြာစာပိုင် မာရ်နတ် နင်ရို့ကို ပြာကြည့်ဖို့ တောင်းရေ။ 32ယေကေလည်း နင့်မာ ကျုံခြင်းတရား မပျက်ရအောင် ငါ နင့်အတွက် ဆုတောင်းရို့ လာဗျာ။ နင် နောင်တရရို့ ပြန်လာရေခါ နင့်မာ ဒေ ညီအစ်ကိုရို့ကို ကျုံခြင်းတရား ခိုင်မာအောင် လုပ်လီ။”

33ယင်းခါ ပေတရုစာ ယေရှုကို ပြောလီရေ၊ “အသျှင်၊ အကျွန် ကိုယ်တော်နအတူ ထောင်အကျခံဖို့မဆိုကေ အသီခံဖို့လည်း အဆင်သင့် ဟိပါရေ။”

34ယေရှုစာ ပြောလီရေ၊ “ပေတရု၊ ငါ နင့်ကို ပြောရေ၊ ဒေနိ ညဉ့်မာ ကြက်မတွန်ခင်အယင်က နင် ငါ့ကို မသိ ဟို့ သုံးခေါက်တိုင်အောင် ငြင်းလိမည်။”

35ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “ငါ နင်ရို့ကို တန်းကားအိပ်၊ ရွယ်အိပ် အရာ ဖနပ် မပါဘိုင်းန ရွှတ်လိုက်တေခါ နင်ရို့မာ ခေါင်းပါးခြင်း ဟိလီရေလော?” တပည့်ရို့စာ ပြောကတ်လီရေ၊ “မဟိလီပါ။”

36ယေရှုစာ ပြောလီရေ၊ “ယေကေလည်း ဒေဂု ငါ ပြောရေ၊ အသူ့မာမဆို တန်းကားအိပ်န ရွယ်အိပ် ဟိရေဆိုကေ ဆောင်ယူလား။ အသူ့မာမဆို ဒါးရှည် မဟိဆိုကေ သူ့မာ ကိုယ်ရုံကို ရောင်းရို့ ဒါးရှည် ဝယ်ယူ။ 37ကျမ်းစာမာ ရွီးရို့ ဟိရေ၊ ‘သူစာ အပြစ်သေရို့နအတူ ရွီရာမာ ပါလီရေ။’ ငါ နင်ရို့ကို ပြောရေ၊ ထိုစကားတိစာ ငါ့ကနီရို့ ပြည့်စုံရဖို့၊ အကြောင်းကား ငါ့အကြောင်းနပတ်သပ်ရို့ ရွီးထားစာ စကားတိ ပြည့်စုံရဖို့။”

38ယင်းခါ တပည့်ရို့စာ ပြောကတ်လီရေ၊ “အသျှင်၊ ကြည့်ပါ၊ ဒေမာ ဒါးရှည်နှစ်စင်း ဟိပါရေ။”

ယေရှုစာ ပြောလီရေ၊ “လုံလောက်ပျာ အရာ မယူသားဗျာ။”

သံလွင်တောင်မာ ယေရှု ဆုတောင်းခြင်း

(မဿဲ ၂၆:၃၆-၄၆၊ မာကု ၁၄:၃၂-၄၂)

39ယင်းနောက် ယေရှုစာ ထိုမြို့က ထွက်ရို့ ကိုယ့်အလည့်အတိုင်း သံလွင်တောင်တို့ တက်လီရေ။ အရာ တပည့်ရို့လည်း သူနအတူ ပါကတ်လီရေ။ 40သူစာ ထိုတောင်တို့ တက်ရို့ ရောက်တေခါ တပည့်ရို့ကို ပြောလီရေ၊ “အပြစ်သွေးဆောင်ခြင်းမာ မကျရအောင် ဆုတောင်းကတ်။”

41ယင်းနောက် ယေရှုစာ တပည့်ရို့န တစ်ဖဲ့ အဝီးတို့ ကြွပြီးကေ ဒူးထောက်ရို့ ဆုတောင်းလီရေ၊ 42“အိုး အဖ၊ ကိုယ်တော် အလိုဟိရေဆိုကေ အကျွန် ခံရဖို့စာ ဒုက္ခ-ဝေဒနာကို ပျောက်ကင်းစီပါ။ ယေကေလည်း အကျွန့် အလိုအတိုင်း မဟုတ်ပါ၊ ကိုယ်တော်၏ အလိုတော်အတိုင်း ဖြစ်ပါစီ။”

43ယင်းခါ ဂေါင်းခင်ဘုံက ဂေါင်းခင်နတ်သားတစ်ပါး ဆင်းလာရို့ ယေရှုကို အားပီးလီရေ။ 44ယေရှုစာ စိတ်ဒုက္ခန အရာလည်း အားထည့်ရို့ ဆုတောင်းလီရေ။ သူ့ခန္ဓာက ချွေးပေါက်တိစာ သွီးပိုင် ဖြစ်ရို့ မြေပြင်မာ ကျလီရေ။

45– 46သူစာ ဆုတောင်းရို့ ပြီးရေခါ ထရို့ ကိုယ့်တပည့်ရို့တို့ လာလီရေ။ တပည့်ရို့စာ စိတ်ဒုက္ခန ပင်ပန်းရို့ အိပ်မောပါလားခကတ်လီရေ။ ယင်းသျှင့်ကို မြင်ရို့ ယေရှုစာ သူရို့ကို ပြောလီရေ၊ “နင်ရို့ ဇာဖို့ အိပ်ကတ်စာလည်း? ထ၊ အပြစ်သွေးဆောင်ခြင်းမာ မကျရအောင် ဆုတောင်းကတ်။”

ယေရှုကို ရန်သူရို့ ဖမ်းခြင်း

(မဿဲ ၂၆:၄၇-၅၆၊ မာကု ၁၄:၄၃-၅၀၊ ယောဟန် ၁၈:၁-၁၂)

47ယေရှု စကားပြောနီတုံးမာ လူအများကြီး ယင်းနေရာတို့ ရောက်လာကတ်လီရေ။ တပည့်တစ်ဆယ့်နှစ်ယောက်အထဲက ယုဒနာမည်န တပည့်တစ်ယောက်စာ ထိုလူရို့ ရှိက ရှိက ပါလတ်လီရေ။ သူစာ ယေရှုကို နမ်းဖို့အတွက် သူ့အနားတို့ လာလီရေ။ 48ယင်းခါ ယေရှုစာ သူ့ကို ပြောလီရေ၊ “ယုဒ၊ နင် မနုသသားတော်ကို နမ်းရို့ သစ္စာဖေါက်စာလော?”

49ယေရှုမာ တပည့်ရို့စာ ဇာ ဖြစ်ဖို့ပျင်ရေလည်းဆိုစာကို သိကတ်လီရေ။ ယင်းအတွက်န သူရို့စာ ယေရှုကို ပြောကတ်လီရေ၊ “အသျှင်၊ အကျွန်ရို့ ဒါးရှည်န ခွတ်ပါဖို့စာလော?”

50တပည့်ရို့အထဲက တစ်ယောက်စာ မဟာယဇ်ပုရောဟိတ်၏ ကျွန်မာ ညာဖက်က နားရွက်ကို ဒါးရှည်န ဖြတ်ချလိုက်လီရေ။ 51ယင်းခါ ယေရှုစာ၊ “ဟုတ်ပျာ” ဟို့ ပြောလီရေ။ အရာ သူစာ ထိုကျွန် နားရွက်ကို ကိုင်ရို့ အကောင်း လုပ်လီရေ။

52ယင်းနောက် ယေရှုစာ ကိုယ့်ကို ဖမ်းဖို့ လာကတ်စာ ယဇ်ပုရောဟိတ်အကြီးရို့၊ ဝိပဿနာကျောင်းမာ အစောင့်သားရို့ အရာ ဂေါင်းဆောင်ဝါကြီးရို့ကို ပြောလီရေ၊ “ကိုယ်ဘင်ရို့ ဒါးမြကို ဖမ်းဖို့ လာစာပိုင် ငါ့ကို ဖမ်းဖို့အတွက် ဒုတ်န ဒါးန လာကတ်တေကား! 53ငါ နိတိုင်း ဝိပဿနာကျောင်းမာ ကိုယ်ဘင်ရို့ ရှိက ဟိလီရေ။ ယင်းခါ ကိုယ်ဘင်ရို့ ငါ့ကို မဖမ်းလီကတ်ကား။ ယေကေလည်း ဒေဂု ကိုယ်ဘင်ရို့ အုပ်ချုပ်ဖို့စာအချိန် ဖြစ်တေ အရာ အမိုက်မှောင်၏ တန်ခိုး အုပ်ချုပ်ဖို့စာအချိန် ဖြစ်တေ။”

ယေရှုကို ပေတရု ငြင်းခြင်း

(မဿဲ ၂၆:၆၉-၇၅၊ မာကု ၁၄:၆၆-၇၂၊ ယောဟန် ၁၈:၁၅-၁၈၊ ၁၈:၂၅-၂၇)

54ယင်းခါ သူရို့စာ ယေရှုကို ဖမ်းရို့ မဟာယဇ်ပုရောဟိတ် အိမ်တို့ ယူလားခကတ်လီရေ။ အရာ ပေတရုစာ မနီးမဝီးပျင်ရို့ သူရို့ နောက်က နောက်က လိုက်လီရေ။ 55တစ်ချိုးလူရို့စာ အိမ်တတ်ဂွင်းအလယ်မာ ထိုင်ပြီးကေ မီးနှူရို့ ဟိကတ်လီရေ။ ပေတရုစာ လာရို့ သူရို့ကြားမာ ဝင်ရို့ ထိုင်လီရေ။ 56ယင်းခါ ကျွန်မသျှေ တစ်ယောက်စာ မီးရောင်မာ ပေတရုကို မြင်ရလီရေ အရာ သူစာ အလှပ ကြည့်ရို့ ပြောလီရေ၊ “ဒေ အမောင်လည်းသောက် ထိုလူနအတူ ပါလီရေ။”

57ယေကေလည်း ပေတရုစာ ငြင်းရို့ ပြောလီရေ၊ “ငါ ယင်းသူကို မသိ။”

58တစ်နားနီရေခါ အရာတစ်ယောက်စာ သူ့ကို မြင်ရို့ ပြောလီရေ၊ “နင်လည်းသောက် ထိုလူရို့အထဲက တစ်ယောက်ရာ။”

ပေတရုစာ အရာလည်း ငြင်းရို့ ပြောလီရေ၊ “ငါ မဟုတ်ကား။”

59တစ်နာရီလှောက် ကြာရေခါ အရာတစ်ယောက်စာ အတိကျသိရို့ ပြောလီရေ၊ “ဒေသူစာ အမှန် ထိုလူနအတူ ပါလီရေ၊ အကြောင်းကား ဒေသူ ဂါလိလဲပြည်နယ်သား တစ်ယောက် ဖြစ်တေ။”

60ပေတရုစာ နောက်ဆုံးခေါက် အရာလည်း ငြင်းရို့ ပြောလီရေ၊ “ကြည့်၊ နင် ဇာ ပြောစာလည်း ငါ တစ်ခုလည်း နားမလည်။”

ပေတရု စကားပြောရို့ မဆုံးခင် ကြက်ဖတစ်ကောင် တွန်လီရေ။ 61အသျှင်စာ ပေတရုဖက်တို့ လှည့်ရို့ ကြည့်လီရေ။ ယင်းခါ ပေတရုစာ၊ “ဒေနိ ညဉ့်မာ ကြက်မတွန်ခင်အယင်က နင် ငါ့ကို မသိ ဟို့ သုံးခေါက်တိုင်အောင် ငြင်းလိမည်” ဟို့ အသျှင် ပြောစာစကားကို တွက်ရလီရေ။ 62ယင်းခါ ပေတရုစာ ပြင်တို့ ထွက်ရို့ ကောင်းကောင်း ဝမ်းနည်းရို့ ငိုလီရေ။

ယေရှုကို ရယ်သွန်းပြုခြင်း

63ယေရှုကို စောင့်သူရို့စာ သူ့ကို ရယ်သွန်းပြုရို့ ဘုတ်ကတ်လီရေ။ 64သူရို့စာ ယေရှု မျက်နှာကို ဖုံးရို့ ပြောကတ်လီရေ၊ “နင့်ကို အသူ ဘုတ်စာလည်း ပြောကြည့်န?” 65သူရို့စာ အရာလည်း အများကြီး သူ့ကို အသရေရှုတ်ချရို့ စကား ပြောကတ်လီရေ။

မဟာတိုင်ဘင်အဖွဲ့သားရို့ ယေရှုကို စစ်ဆေးခြင်း

(မဿဲ ၂၆:၅၇-၆၈၊ မာကု ၁၄:၅၃-၆၅၊ ယောဟန် ၁၈:၁၃-၁၄၊၁၉-၂၄)

66မိုးလင်းရေခါ ဂေါင်းဆောင်ဝါကြီးရို့၊ ကျမ်းဆရာရို့ အရာ ယဇ်ပုရောဟိတ်အကြီးရို့စာ တစ်ရပ်တည်းမာ စုကတ်လီရေ အရာ သူရို့စာ ယေရှုကို ယုဒလူမျိုး မဟာတိုင်ဘင်အဖွဲ့သားရို့ ရှိတို့ ယူခရို့ ပြောကတ်လီရေ၊ 67– 68“နင် အမှန် ခရစ်တော် ဖြစ်တေဆိုကေ ငါရို့ကို ပြော!”

ယေရှုစာ သူရို့ကို ပြောလီရေ၊ “ငါ ပြောရေဆိုကေလည်း ကိုယ်ဘင်ရို့ ကျုံကတ်ဖို့ မဟုတ် အရာ ငါ ကိုယ်ဘင်ရို့ကို တစ်ခုမသာ မီးကေလည်း ကိုယ်ဘင်ရို့ ငါ့ကို အဖြေပီးကတ်ဖို့ မဟုတ်။ 69ယေကေလည်း မနုသသားတော်စာ ဒေဂုကပင်စရို့ အနန္တတန်ခိုးနပြည့်စုံစာ ထာဝရဘုရား၏ ညာဖက်က ထိုင်ရို့ ဟိဖို့ဗျာ။”

70ယင်းခါ အားကုံးသူ မီးကတ်လီရေ၊ “ယင်းပိုင်ဆိုကေ နင် ထာဝရဘုရား၏ သားတော်လော?”

သူစာ ထိုလူရို့ကို အဖြေပီးလီရေ၊ “ကိုယ်ဘင်ရို့ ပြောရေအတိုင်း ဖြစ်တေ။”

71ယင်းခါ ဂေါင်းဆောင်ရို့စာ ပြောကတ်လီရေ၊ “ငါရို့မာ အရာ သက်သီပီးဖို့ ဇာလိုသိယလည်း? ငါရို့ ကိုယ်တိုင် သူပြောစာ စကားကို ကြားရကတ်ပျာ။”