Luke 24

ယေရှု သီရာက ပြန်ရှင်ထမြောင့်ခြင်း

(မဿဲ ၂၈:၁-၁၁၊ မာကု ၁၆:၁-၈၊ ယောဟန် ၂၀:၁-၉)

1တလင်္ဂနွီနိ မိုးသောက်စောစောက ထိုမိန်းမရို့စာ အမွှီးနံသာတိကို ယူရို့ သင်္ချိုင်းဂူတို့ လားကတ်လီရေ။ 2သူရို့ ယင်းမာ ရောက်ကတ်တေခါ သင်္ချိုင်းဂူဝမာ ပိတ်ထားစာ ကျောက်လုံး ရွိရို့ ဟိစာကို မြင်ရကတ်လီရေ၊ 3ယေကေလည်း သင်္ချိုင်းဂူအထဲတို့ ဝင်လားခရေခါ သူရို့စာ အသျှင်ယေရှု၏ အကောင်တော်ကို မမြင်ရကတ်လီဗျာ။ 4သူရို့စာ အံ့ဩရို့ ထိုအကြောင်းကို စဉ်းစားနီကတ်တေခါ လျှပ်ပြက်စာပိုင် ဖဖွီးဆဆွ အဝတ်ဝတ်ရို့ လူနှစ်ယောက် သူရို့အနားမာ ပေါ်လာရို့ ရပ်ကတ်လီရေ။ 5ယင်းခါ မိန်းမရို့စာ ကြောက်ပြီးကေ အပြားဝပ်ရို့ နီကတ်လီရေ။ ထိုလူနှစ်ယောက်စာ သူရို့ကို ပြောကတ်လီရေ၊ “အသက်အရှင်ဟိသူကို အသီကောင် ထားစာနေရာမာ ဇာဖို့ ရှာနီကတ်စာလည်း? 6သူကား ဒေမာ မဟိဗျာ၊ ပြန်ရှင်ထမြောင့်လားခဗျာ။ သူစာ ဂါလိလဲပြည်နယ်မာ ဟိလီရေခါ နင်ရို့ဘားမာ ပြောခလီစာ စကားတိကို နင်ရို့ အတွက်ချရို့ ကြည့်ကတ်။ 7သူစာ ပြောခလီရေ၊ ‘မနုသသားတော်စာ လူဆိုးရို့အလက်မာ ဖမ်းရို့ အပ်ခံဖို့။ ယင်းနောက် သူစာ ကားတိုင်မာ တင်ရို့ အသီအသတ်ခံရဖို့ အရာ သူစာ သုံးရက်နိမာ သီရာက ပြန်ရှင်ထမြောင့်ရဖို့။’”

8ယင်းခါ သူရို့စာ ယေရှု ပြောခစာစကားကို တွက်ရကတ်လီရေ။ 9သူရို့စာ သင်္ချိုင်းဂူအနားက ပြန်လားခပြီးကေ ထိုတပည့်တစ်ဆယ့်တစ်ယောက်န အခြား အားကုံးသူဘားမာ ဟိသမျ ဖြစ်ပျက်ခြင်းကို ပြောပြကတ်လီရေ။ 10ထိုမိန်းမရို့အထဲမာ မာဂဒလမြို့သမ မာရိ၊ ယောဟန္န၊ ယာကုပ်၏ အမိ မာရိ အရာ အခြားမိန်းမရို့လည်း ဟိကတ်လီရေ။ သူရို့စာ ထို ဟိသမျ စကားတိကို တမန်တော်ရို့ဘားမာ ပြောပြကတ်လီရေ၊ 11ယေကေလည်း သူရို့စာ ထိုစကား အားကုံးကို မုတ်သားစကားပိုင် မှတ်ကတ်လီရေ။ ယင်းအတွက်န သူရို့စာ ထိုမိန်းမရို့ ပြောစာစကားတိကို မကျုံကတ်လီ။ 12ယေကေလည်း ပေတရုစာ သင်္ချိုင်းဂူအနားတို့ ဗြီးလားခလီရေ အရာ သူစာ ငုံ့ရို့ ကြည့်ရေခါ သက်သက် ခြေသားအဝတ်တိကိုရာ မြင်ရလီရေ။ ယင်းခါ သူစာ ဖြစ်ပျက်ခြင်းတိကို မြင်ခရို့ အံ့ဩပြီးကေ အိမ်တို့ ပြန်လာလီရေ။

ဧမောက်ရွာတို့ လားရေလမ်းမာ

(မာကု ၁၆:၁၂-၁၃)

13ယင်းနိခါ တပည့်နှစ်ယောက်စာ ဧမောက်နာမည်န ရွာတစ်ရွာတို့ လားကတ်လီရေ။ ထို ရွာစာ ယေရုရှလင်မြို့န ခုနစ်မိုင်လှောက် အဝီး ဟိလီရေ။ 14သူရို့စာ ဖြစ်ပျက်ခြင်းတိကို ယူရို့ စကားပြောရို့ လားကတ်လီရေ။ 15ယင်းခါ ယေရှု ကိုယ်တိုင် သူရို့အနားမာ ရောက်ရို့ သူရို့နအတူ လားဖို့ စလီရေ။ 16အရာ ထာဝရဘုရားစာ သူရို့ကို ယေရှုကို အမှတ်မကျလတ်အောင် လုပ်လီရေ။ 17ယင်းခါ ယေရှုစာ သူရို့ကို ပြောလီရေ၊ “ကိုယ်ဘင်ရို့ ဇာ အကြောင်းအရာကို ဆွေးနေးရို့ လားကတ်စာလည်း?”

ယေရှု စကားကို ကြားရို့ ထိုတပည့်နှစ်ယောက်စာ မျက်နှာညှညှိုးန ရပ်နီကတ်လီရေ။ 18သူရို့နှစ်ယောက်မာ ကလောဖနာမည်န တစ်ယောက်စာ ယေရှုကို ပြောလီရေ၊ “ယေရုရှလင်မြို့သားရို့အထဲမာ ကိုယ်ဘင် တစ်ယောက်တည်းရာ ဒေ လိုင်းကေရက်အထဲမာ ဖြစ်ပျက်စာတိကို မသိဘိုင်းန ကျန်ပါစာလော?”

19ယေရှုစာ သူရို့ကို မီးလီရေ၊ “ဇာ ဇာ ဖြစ်ပျက်လီရေလည်း?”

သူရို့စာ အဖြေပီးကတ်လီရေ၊ “နာဇရက်မြို့သျှေသား ယေရှု အကြောင်းနပတ်သပ်ရို့ ဖြစ်ပျက်ခြင်း ဖြစ်ပါရေ။ သူစာ ထာဝရဘုရားန လူရို့ ရှိမာ အလုပ်န စကားတိမာ အားခွန်နပြည့်စုံစာ ဘုရားသတင်းပို့သူတစ်ပါး ဟိလီပါရေ။ 20အကျွန်ရို့မာ ယဇ်ပုရောဟိတ်အကြီးရို့န ကျမ်းဆရာရို့စာ သူ့ကို တရားစစ်ဆေးရို့ သီဒါဏ်ပီးဖို့အတွက် ရောမလူမျိုးရို့အလက်မာ အပ်ပီးလီကတ်ပါရေ။ ယင်းနောက် ယုဒဂေါင်းဆောင်ရို့စာ သူ့ကို ကားတိုင်မာ တင်ရို့ အသီသတ်ကတ်လီပါရေ။ 21သူစာ ဣသရေလလူမျိုးကို လွတ်မြောင့်ခြင်း ပီးမည် ဟို့ အကျွန်ရို့ မျှော်လင်းလီကတ်ပါရေ။ ထို ဟိသမျ ပြဿနာဖြစ်လီစာ ဒေနိ သုံးရက် ဖြစ်နီပါဗျာ။ 22ယေကေလည်း အကျွန်ရို့အထဲက မိန်းမ လိုင်းကေယောက် အကျွန်ရို့ကို အံ့ဩအောင် လုပ်လီကတ်ပါရေ။ သူရို့စာ မိုးသောက်စောစောက ယေရှု၏ အကောင်တော် ထားစာ သင်္ချိုင်းဂူတို့ လားခီကတ်ပါရေ၊ 23ယေကေလည်း သူရို့စာ သင်္ချိုင်းဂူအထဲမာ ယေရှု၏ အကောင်တော်ကို မမြင်ခလီကတ်ပါ။ သူရို့ ပြန်လာရေခါ ပြောလီကတ်စာကား၊ သူရို့စာ ဂေါင်းခင်နတ်သားရို့န တွိခကတ်ပါရေ အရာ ထိုဂေါင်းခင်နတ်သားရို့စာ၊ ယေရှု အရှင် ဟိရေ ဟို့ ပြောလိုက်ကတ်ပါရေ။ 24ယင်းနောက် အကျွန်ရို့နအတူ ဟိလီကတ်သူရို့အထဲက လိုင်းကေယောက် သင်္ချိုင်းဂူတို့ လားခကတ်လီပါရေ။ ယင်းခါ ထိုမိန်းမရို့ ပြောလိုက်စာပိုင်တထန် မြင်ရလီကတ်ပါရေ၊ ယေကေလည်း သူရို့စာ ယေရှုကို မမြင်ရလီကတ်ပါ။”

25ယင်းခါ ယေရှုစာ သူရို့ကို ပြောလီရေ၊ “ကိုယ်ဘင်ရို့ တစ်ခုလည်း နားလည်ခြင်း မဟိ။ ကိုယ်ဘင်ရို့မာ စိတ် ထိုင်းလားခဗျာ၊ ယင်းအတွက်န ဘုရားသတင်းပို့သူရို့ စကားတိကို ကိုယ်ဘင်ရို့ မကျုံကတ်။ 26ခရစ်တော်စာ ထို ဟိသမျ ဒုက္ခ-ဝေဒနာကို ခံယူရို့ ဘုန်းတန်ခိုးကို ရဖို့စကား ဟိလီရေ မဟုတ်လော?” 27ယင်းနောက် သူစာ မောရှေန ဘုရားသတင်းပို့သူရို့ ကျမ်းစာကပင် စရို့ ဟိသမျ ကျမ်းစာမာ ကိုယ့်အကြောင်းနပတ်သပ်ရို့ ရွီးထားခစာ ဟိသမျ စကား အဓိပ္ပါယ်ကို သူရို့ဘားမာ ရှင်းပြလီရေ။

28သူရို့ လားကတ်စာ ရွာအနားတို့ ရောက်တေခါ ယေရှုစာ ယင်းရွာကို ကျော်ရို့ အရာလည်း ရှိတို့ လားဖို့စာပိုင် ဟန်ဆောင်ရို့ ပြလီရေ။ 29ယင်းခါ သူရို့စာ ယေရှုကို ကောင်းကောင်း တောင်းပန်ရို့ ပြောကတ်လီရေ၊ “ဒေဂု နီဝင်လာပါဗျာ၊ မှိုင်းလားခပါဗျာ။ ကိုယ်ဘင် အကျွန်ရို့နအတူ နီခပါဖိ။” ယင်းအတွက်န သူစာ ထိုသူရို့နအတူ နီဖို့အတွက် အိမ်ထဲတို့ ဝင်လီရေ။ 30သူစာ ထိုသူရို့နအတူ စားသောက်ဖို့ ထိုင်လီရေခါ ပေါင်မုန့်ကို ယူရို့ ထာဝရဘုရားဘားမာ ကျေးဇူးတင်လီရေ အရာ ထိုပေါင်မုန့်ကို ဖဲ့ရို့ သူရို့ကို ပီးလီရေ။ 31ယင်းခါ ချက်ချင်း သူရို့မာ မျက်စိ ပွင့်လားခလီရေ အရာ ယေရှုကို မှတ်ရကတ်လီရေ၊ ယေကေလည်း သူစာ ဗြုန်းခနိုင်းပျင်ရို့ ပျောက်လားခလီရေ။ 32ယင်းခါ သူရို့စာ တစ်ယောက်ကို တစ်ယောက် ပြောကတ်လီရေ၊ “သူ ငါရို့န လမ်းမာ စကားပြောလီရေခါ အရာ ကျမ်းစာကို ရှင်းပြလီရေခါ ငါရို့ အားပါးရို့ ရင်ခုံလီရေနှော?”

33သူရို့ နှစ်ယောက်စာ ချက်ချင်း ထရို့ ယေရုရှလင်မြို့တို့ ပြန်လားခကတ်လီရေ အရာ ထိုတပည့်တစ်ဆယ့်တစ်ယောက်န အခြားတပည့်ရို့ကို တစ်နေရာတည်းမာ စုရို့ တွိကတ်လီရေ။ 34အသျှင် အမှန် သီရာက ပြန်ရှင်ထမြောင့်လားခဗျာ အရာ ရှိမုန်ဘားမာ အမြင်ခံလီရေဆိုစာ အကြောင်းကို ယူရို့ သူရို့စာ တိုင်ဘင်ရို့ ဟိကတ်လီရေ။ 35ယင်းခါ ထိုတပည့်နှစ်ယောက်စာ လမ်းမာ ဖြစ်ပျက်လီစာတိကို သူရို့ဘားမာ ပြောပြကတ်လီရေ။ အရာ ပေါင်မုန့် ဖဲ့ရို့ ပီးရေခါ ယေရှုကို ကိုယ်ရို့ ဇာပိုင် မှတ်ရလီရေလည်းဆိုစာကိုလည်း သူရို့စာ ပြောပြကတ်လီရေ။

ကိုယ့်တပည့်ရို့ဘားမာ ယေရှု အမြင်ခံခြင်း

(မဿဲ ၂၈:၉-၁၀၊ ၂၈:၁၆-၂၀၊ မာကု ၁၆:၁၄၊ ယောဟန် ၂၀:၁၉-၂၀၊ တမန်တော် ၁:၆-၈)

36တပည့်ရို့ တိုင်ဘင်နီကတ်တုံးမာ ယေရှု ကိုယ်တိုင် သူရို့အလယ်မာ လာရို့ ရပ်လီရေ အရာ သူရို့ အားကုံးသူကို ပြောလီရေ၊ “နင်ရို့မာ ငြိမ်းချမ်းခြင်း ဟိစီ!”

37သူရို့စာ ယေရှုကို နတ်ထင်ရို့ ကောင်းကောင်း ကြောက်ကတ်လီရေ။ 38ယေရှုစာ သူရို့ကို ပြောလီရေ၊ “နင်ရို့ ဇာဖို့ စိတ်ပူနီကတ်စာလည်း အရာ ဇာဖို့ မယုံသင်္ခါ ဖြစ်နီကတ်စာလည်း? 39ငါ့အလက်န ငါ့အခြီကို ကြည့်ကတ်။ ငါ ကိုယ်တိုင် ရောက်ရို့ ဟိရေ၊ ငါ့ကို ကိုင်ရို့ ကြည့်ကတ်၊ အကြောင်းကား နတ်တိမာကား ငါ့ပိုင် အရိုး-အသား မဟိ။”

40ယင်းပိုင် ပြောရို့ ယေရှုစာ ကိုယ့်အလက်န အခြီကို သူရို့ကို ပြလီရေ။ 41ယေကေလည်း သူရို့စာ ကောင်းကောင်း အံ့ဩရို့ ဝမ်းသာပြီးကေ ကျုံဖို့ မရကတ်လီ။ ယင်းခါ ယေရှုစာ သူရို့ကို ပြောလီရေ၊ “နင်ရို့မာ တစ်ခုမသာ စားစရာ ဟိရေလော?” 42သူရို့စာ ယေရှုကို ကင်ပြီးသား ငါးတစ်ပိုင်း ပီးကတ်လီရေ။ 43သူစာ ထိုငါးတစ်ပိုင်း ယူရို့ တပည့်ရို့ ရှိထက်က စားလီရေ။

44ယင်းနောက် ယေရှုစာ သူရို့ကို ပြောလီရေ၊ “ငါ နင်ရို့နအတူ ဟိလီရေခါ မောရှေ၏ ပညှတ်တရားန ဘုရားသတင်းပို့သူရို့ ရွီးထားခစာ ကျမ်းစာမာ အရာ ဆာလံကျမ်းမာ ငါ့အကြောင်းနပတ်သပ်ရို့ ရွီးထားခစာ စကားအားကုံး ပြည့်စုံရဖို့ ဟို့ ငါ ပြောလီရေ။”

45– 46ကျမ်းစာကို နားလည်ပတ်စီအတွက် သူစာ တပည့်ရို့မာ ညာဏ်မျက်စိကို ဖွင့်ပီးလီရေ အရာ သူရို့ကို ပြောလီရေ၊ “ကျမ်းစာမာ ရွီးရို့ ဟိစာကား၊ ခရစ်တော်စာ ဒုက္ခ-ဝေဒနာကို ခံရဖို့ အရာ သုံးရက်နိမာ သီရာက ပြန်ရှင်ထမြောင့်ရဖို့။ 47အပြစ်က စိတ်လှည့်ရို့ လာရေဆိုကေ အပြစ် ခွင့်ရွှတ်ခြင်းကို ခံရရေ ဟို့ ယေရုရှလင်မြို့သားရို့ကပင် စရို့ ဟိသမျ လူမျိုးရို့ဘားမာ ခရစ်တော်၏ နာမည်န ဟောပြောရဖို့။ 48နင်ရို့စာ ထို ဟိသမျ အကြောင်းအရာတိမာ သက်သီခံ ဖြစ်ကတ်တေ။ 49နားထောင်ကတ်၊ ငါ့အဖ ပီးဖို့ ဂတိခံလီစာကို ငါ နင်ရို့တို့ ရွှတ်လိုက်မည်။ ဂေါင်းခင်ဘုံက တန်ခိုးကို မရသကြား နင်ရို့ ဒေမြို့မာ နီလီကတ်။”

ယေရှု ဂေါင်းခင်ဘုံတို့ ကြွခြင်း

(မာကု ၁၆:၁၉-၂၀၊ တမန်တော် ၁:၉-၁၁)

50ယင်းနောက် သူစာ ကိုယ့်တပည့်ရို့ကို ဗေသနိရွာတို့ တိုင်အောင် ခေါ်ယူလားခလီရေ။ အရာ ယင်းနေရာမာ သူစာ အလက်ဆန့်ရို့ တပည့်ရို့ကို ပဿိ ပီးလီရေ။ 51ယင်းပိုင် ပဿိ ပီးနီစဉ် သူစာ တပည့်ရို့ကို ထားဘိုက်ခရို့ ဂေါင်းခင်ဘုံတို့ ကြွလီရေ။ 52ယင်းအတွက်န တပည့်ရို့စာ သူ့ကို ရှိခိုးကတ်လီရေ အရာ ကောင်းကောင်း ဝမ်းသာရို့ ယေရုရှလင်မြို့တို့ ပြန်လားခကတ်လီရေ။ 53သူရို့စာ နိတိုင်း ဝိပဿနာကျောင်းမာ နီရို့ ထာဝရဘုရားကို ချီမွမ်းကတ်လီရေ။