Luke 4

ယေရှုကို အပြစ်မာ ချဖို့ ကြိုးစားခြင်း

(မဿဲ ၄:၁-၁၁၊ မာကု ၁:၁၂-၁၃)

1– 2ယေရှုစာ သန့်ရှင်းသောဝိညာဉ်တော်န ပြည့်စုံရို့ ယော်ဒန်ချောင်းက ပြန်ရို့ ကြွလီရေ။ ယင်းခါ သန့်ရှင်းသောဝိညာဉ်တော်စာ သူ့ကို သဲကန္တာရတောပြင်တို့ ယူလားလီရေ။ ထိုသဲကန္တာရတောပြင်မာ မာရ်နတ်စာ ရက်ပေါင်း လေးဆယ်ပတ်လုံး သူ့ကို အပြစ်မာ ချဖို့ ကြိုးစားလီရေ။ ရက်ပေါင်း လေးဆယ်ပတ်လုံး ယေရှု တစ်ခုလည်း မစားမသောက်ဘိုင်းန နီလီရေ။ ယင်းအတွက်န ထို ရက်တိ ရွန်ရေခါ သူစာ အဝမ်းဆာလီရေ။ 3ယင်းခါ မာရ်နတ်စာ ယေရှုကို ပြောလီရေ၊ “နင် အမှန် ထာဝရဘုရား၏ သားတော် ဖြစ်တေဆိုကေ ဒေ ကျောက်လုံးကို ပေါင်မုန့် ဖြစ်လတ်အောင် အာဏာချလိုက်။” 4ယေကေလည်း ယေရှုစာ မာရ်နတ်ကို ပြောလီရေ၊ “‘လူစာ သက်သက် ပေါင်မုန့် စားရို့ အသက်မရှင်’ ဟို့ ကျမ်းစာမာ ရွီးရို့ ဟိရေ။”

5– 6ယင်းနောက် မာရ်နတ်စာ ယေရှုကို တောင်အမြင့်ကြီး တစ်တောင်တို့ ဆောင်ယူလားခလီရေ အရာ တစ်နားသျှေမာ လောကမာ ဟိသမျ တိုင်းနိုင်ငံတိကို ပြရို့ ပြောလီရေ၊ “ဒေ တိုင်းနိုင်ငံတိကို အုပ်ချုပ်ဖို့စာ အခွင့်အာဏာန ဒေ တိုင်းနိုင်ငံတိမာဟိစာ ပစ္စည်း-ဥစ္စာကို ငါ နင့်ကို ပီးဖို့၊ အကြောင်းကား ဒေ ဟိသမျ အားကုံးကို ငါ ရထားဗျာ။ ယင်းအတွက်န ဒေ ဟိသမျ အားကုံးကို ငါ ပီးချင်သူကို ပီးနိုင်ရေ။ 7ဒေဂု နင် ငါ့ကို ဒူးထောက်ရို့ ရှိခိုးရေဆိုကေ အရာ ငါ့ကို အသျှင် ဖြစ်တေ ဟို့ ဝန်ခံရေဆိုကေ ဒေ ဟိသမျ အားကုံးကို နင် ပိုင်ဆိုင်လိမည်။” 8ယေရှုစာ သူ့ကို ပြောလီရေ၊ “‘နင် သက်သက် နင့် အသျှင်ထာဝရဘုရားကိုရာ ရှိခိုးရဖို့ အရာ သူတစ်ပါးတည်းကိုရာ ဝတ်ပြုကိုးကွယ်ရဖို့’ ဟို့ ကျမ်းစာမာ ရွီးရို့ ဟိရေ။”

9ယင်းခါ မာရ်နတ်စာ ယေရှုကို ယေရုရှလင်မြို့တို့ ဆောင်ယူလားခလီရေ အရာ သူ့ကို ဝိပဿနာကျောင်းထိပ်ဖျားမာ ရပ်စီလီရေ။ အရာ သူစာ ယေရှုကို ပြောလီရေ၊ “နင် အမှန် ထာဝရဘုရား၏ သားတော် ဖြစ်တေဆိုကေ အထက်ကနီရို့ အောက်တို့ ခုံဆင်းပြ၊ 10အကြောင်းကား၊ ‘နင့်ကို ကာကွယ်ဖို့အတွက် ထာဝရဘုရားစာ ကိုယ့်ဂေါင်းခင်နတ်သားရို့ကို အာဏာချလိမည်။ 11အရာ နင့်မာ အခြီ ကျောက်လုံးမာ အက်ကျရို့ အနာမရလတ်အောင် သူရို့စာ နင့်ကို အလက် ခံထားကတ်လိမည်’ ဟို့ ကျမ်းစာမာ ရွီးရို့ ဟိရေ။” 12ယင်းခါ ယေရှုစာ မာရ်နတ်ကို ပြောလီရေ၊ “‘နင် ကိုယ့်အသျှင်ထာဝရဘုရားကို မစုံစမ်းကေ့’ ဟို့ ကျမ်းစာမာ ရွီးရို့ ဟိရေ။”

13အမျိုးမျိုးပိုင် အပြစ်မာ ချဖို့ ကြိုးစားပြီးရေနောက် မာရ်နတ်စာ တစ်နားသျှေအတွက် ယေရှုကို ထားရို့ လားခလီရေ အရာ သူစာ အခါကာလ အကောင်းကို စောင့်နီလီရေ။

ယေရှု သာသနာပြုဖို့ စခြင်း

(မဿဲ ၄:၁၂-၁၇၊ မာကု ၁:၁၄-၁၅)

14ယင်းနောက် ယေရှုစာ သန့်ရှင်းသောဝိညာဉ်တော်န ပြည့်စုံရို့ ဂါလိလဲပြည်နယ်တို့ ပြန်ရို့ ကြွလီရေ။ ယေရှု ပြန်ရို့ ကြွလာဗျာဆိုစာ သတင်းကို ထိုတစ်ရပ်တစ်ဝန်းလုံးသားရို့ ကြားရကတ်လီရေ။ 15သူစာ အမျိုးမျိုး တရားဇရပ်တိမာ လည်ရို့ သွန်သင်ပီးဖို့ စလီရေ။ ယင်းခါ လူရို့ အားကုံးသူ သူ့ကို ချီမွမ်းကတ်လီရေ။

နာဇရက်မြို့သျှေမာ ဩဝါဒပီးခြင်း

(မဿဲ ၁၃:၅၃-၅၈၊ မာကု ၆:၁-၆)

16ယင်းနောက် သူစာ ကိုယ်ကြီးပြင်းခစာ နာဇရက်မြို့သျှေတို့ ကြွလီရေ။ ယင်းမာ သူစာ ကိုယ့်အလည့်အတိုင်း သတင်းနိမာ တရားဇရပ်တို့ ကြွလီရေ အရာ ကျမ်းစာ ဖတ်ဖို့အတွက် ရပ်လီရေ။ 17တရားဇရပ်မာ ကြည့်ရှုစောင့်သျှောက်သူစာ ယေရှုအလက်မာ ဘုရားသတင်းပို့သူ ဟေရှာယ ရွီးထားခစာ ကျမ်းစာလိပ် တစ်လိပ်ကို အပ်လီရေ။ သူစာ ကျမ်းစာလိပ်ကို ဖြန့်ကြည့်ရေခါ ကျမ်းချက်တစ်ခုကို တွိလီရေ။ ထိုကျမ်းချက်စာ ဒေပိုင်၊
18– 19“အသျှင်၏ ဝိညာဉ်တော် ငါ့ဘားမာ ဟိရေ၊
အကြောင်းကား ဆင်းရဲသားရို့ဘားမာ သတင်းကောင်းကို
ဟောပြောဖို့အတွက် သူစာ ငါ့ကို ခန့်ထားဗျာ။
အသျှင် ငါ့ကို ဒေပိုင် ကျော်ညာဖို့ ရွှတ်လိုက်တေ၊
ထောင်ကျသားရို့ လွတ်လပ်ခြင်းကို ရကတ်ဖို့၊
မျက်ကန်းရို့ ပြန်မြင်ရကတ်ဖို့၊
ညှဉ်းဆဲ ခံရသူရို့ လွတ်မြောင့်ခြင်းကို ရကတ်ဖို့၊
အရာ အသျှင်၏ သနားကြင်နာခြင်းကို ဖေါ်ပြဖို့စာအချိန် ရောက်နီဗျာ။”

20ယင်းနောက် သူစာ ကျမ်းစာလိပ်ကို အရာတစ်ပြန် လိပ်ပြီးကေ တရားဇရပ်ကို ကြည့်ရှုစောင့်သျှောက်သူအလက်မာ အပ်ရို့ ထိုင်လီရေ။ တရားဇရပ်ထဲမာ ရောက်ကတ်စာ ဟိသမျ လူရို့စာ ယေရှုကို စိတ်ရို့ ကြည့်နီကတ်လီရေ။ 21ယင်းခါ ယေရှုစာ လူရို့ကို ပြောလီရေ၊ “ဒေနိခါ ကိုယ်ဘင်ရို့ ကြားရေချက်ချင်း ဒေ ကျမ်းချက် ပြည့်စုံလာဗျာ။” 22လူရို့ အားကုံးသူ သူ့ကို ချီမွမ်းကတ်လီရေ အရာ သူ့ပစက လှပစာ စကားတိကို ကြားရို့ အံ့ဩကတ်လီရေ။ အရာ သူရို့စာ ပြောကတ်လီရေ၊ “ဒေသူ ယောသပ်သား မဟုတ်လော?”

23ယေရှုစာ သူရို့ကို ပြောလီရေ၊ “‘ဆီးဆရာ၊ နင် အယင်ဆုံး ကိုယ့်ကိုကိုယ် ကောင်းအောင် လုပ်အုန့်သိ’ ဟို့ စကားဌာ ဟိရေအတိုင်း ကိုယ်ဘင်ရို့ ငါ့ကို အမှန် ပြောကတ်လိမည်၊ အရာ ‘ကပေရနောင်မြို့သျှေမာ နင် လုပ်ခစာ ဟိသမျ အလုပ်အကြောင်းကို ငါရို့ ကြားရကတ်ပျာ။ ထို ဟိသမျ အံ့ဩဖွယ်အလုပ်ကို ဒေဂု နင် ကိုယ့်မြို့မာလည်း လုပ်ပြ’ ဟို့လည်း ကိုယ်ဘင်ရို့ ငါ့ကို ပြောကတ်လိမည်။” 24သူစာ အရာလည်း ပြောလီရေ၊ “ငါ ကိုယ်ဘင်ရို့ကို အမှန် ပြောရေ၊ ဘုရားသတင်းပို့သူ တစ်ယောက်ကိုလည်း ကိုယ့်ရွာသားရို့ အားမနာကတ်။ 25ငါ ကိုယ်ဘင်ရို့ကို အမှန် ပြောရေ၊ ဘုရားသတင်းပို့သူ ဧလိယလက်ထက်ခါ သုံးနှစ်န ခြောက်လပတ်လုံး မိုးခေါင်လီရေ၊ အရာ ဟိသမျ ပြည်မာ ငတ်မွတ်ခေါင်းပါးခြင်း ကျရောက်လီရေ။ ယင်းခါ ဣသရေလပြည်မာ မဆမ အများကြီး ဟိကတ်လီရေ။ 26ယေကေလည်း ထာဝရဘုရားစာ သူရို့အထဲက တစ်ယောက်တို့လည်း ဧလိယကို မရွှတ်လိုက်လီ။ ယင်းထက်ပင် ဇိဒုန်မြို့မာဟိစာ ဇရတ္တရွာမာ မဆမတစ်ယောက်တို့ ရွှတ်လိုက်လီရေ။ 27အရာ ဘုရားသတင်းပို့သူ ဧလိရှဲလက်ထက်ခါလည်း ဣသရေလပြည်မာ အနူရောဂါသေ အများကြီး ဟိကတ်လီရေ၊ ယေကေလည်း ဧလိရှဲစာ သူရို့အထဲက တစ်ယောက်ကိုလည်း ကောင်းအောင် မလုပ်လီ။ ယင်းထက်ပင် ရှုရိပြည်နယ်မာ နေမန်နာမည်န အနူရောဂါသေတစ်ယောက်ကိုရာ ကောင်းအောင် လုပ်လီရေ။”

28ယေရှု ပြောစာစကားကို ကြားရို့ တရားဇရပ်မာ ဟိသမျ လူရို့စာ ကောင်းကောင်း မန်တက်ကတ်လီရေ။ 29အရာ သူရို့စာ ထရို့ ယေရှုကို မြို့ပြင်တို့ နှင်ထုတ်ယူလားကတ်လီရေ အရာ သူ့ကို တန်းရှင်ထက်က တိုးချလိုက်ဖို့အတွက် တောင်ထက်တို့ တင်ယူလားကတ်လီရေ။ သူရို့မာ မြို့စာ တောင်ထက်မာ တည်ရို့ ဟိလီရေ။ 30ယေကေလည်း သူစာ ထိုလူရို့အထဲက ထွက်ရို့ ကြွလီရေ။

နတ်ဆိုးကိုင်သူတစ်ယောက် အကောင်းဖြစ်ခြင်း

(မာကု ၁:၂၁-၂၈)

31ယင်းနောက် ယေရှုစာ ဂါလိလဲပြည်နယ်မာ ကပေရနောင်မြို့သျှေတို့ ကြွလီရေ အရာ သူစာ သတင်းနိမာ လူရို့ကို သွန်သင်ပီးလီရေ။ 32ယေရှု သွန်သင်ချက်ကို ကြားရို့ လူရို့စာ အံ့ဩကတ်လီရေ၊ အကြောင်းကား သူစာ အခွင့်အာဏာဟိသူတစ်ယောက်ပိုင် သွန်သင်ပီးလီရေ။

33ထိုတရားဇရပ်မာ နတ်ဆိုးကိုင်သူတစ်ယောက် ဟိလီရေ။ 34သူစာ အားန အော်ရို့ ပြောလီရေ၊ “အိုး နာဇရက်မြို့သျှေသား ယေရှု! ကိုယ်ဘင် အကျွန်ရို့ကို ဇာဖို့ နှောက်သျှက်ပါစာလည်း? ကိုယ်ဘင် အကျွန်ရို့ကို ဖျက်စီးဖို့ လာပါစာလော? ကိုယ်ဘင် အသူလည်းဆိုစာကို အကျွန် သိပါရေ။ ကိုယ်ဘင်စာ ထာဝရဘုရား၏ သန့်ရှင်းသူ ဖြစ်ပါရေ။” 35ယေရှုစာ ထိုနတ်ဆိုးကို ဟောက်ရို့ ပြောလီရေ၊ “တိန်းရို့ နီ! ဒေသူခန္ဓာက ထွက်လားလီ!” ထိုနတ်ဆိုးစာ သူ့ကို အားကုံးသူ ရှိက ခါချဘိုက်ခလီရေ အရာ သူ့ကို တစ်ခုလည်း ဘေးအန္တရာယ် မပီးဘိုင်းန သူ့ခန္ဓာက ထွက်လားခလီရေ။

36ယင်းခါ အားကုံးသူ အံ့ဩရို့ ကိုယ်ရို့အချင်းချင်း ပြောကတ်လီရေ၊ “ဒေ အကြောင်းအရာကား ဇာလည်း! ဒေသူ အခွင့်အာဏာန တန်ခိုးကို အသုံးပြုရို့ နတ်ဆိုးတိကို အာဏာချရေဆိုကေ နတ်ဆိုးတိ ထွက်လားခကတ်တေကား!” 37ယေရှု၏ သတင်းကို ထိုတစ်ရပ်တစ်ဝန်းလုံးသားရို့ ကြားရကတ်လီရေ။

ရောဂါသေ အများကြီး အကောင်းဖြစ်ခြင်း

(မဿဲ ၈:၁၄-၁၇၊ မာကု ၁:၂၉-၃၄)

38ယင်းနောက် ယေရှုစာ တရားဇရပ်က ထွက်ရို့ ရှိမုန် အိမ်တို့ ကြွလီရေ။ ရှိမုန်မာ ယောက္ခမအမသူစာ အဖျားကြီးတက်ရို့ ဟိလီရေ။ သူ့ကို ကောင်းအောင် လုပ်ဖို့အတွက် ယေရှုကို တောင်းပန်လီရေ။ 39ယင်းခါ ယေရှုစာ ရှိမုန် ယောက္ခမအနားမာ ရပ်ရို့ အဖျားကို ဟောက်လီရေ။ ယင်းခါ သူ့ခန္ဓာက အဖျားဆုတ်လားခလီရေ အရာ သူစာ ချက်ချင်း ထရို့ သူရို့ စားသောက်ဖို့အတွက် စီစဉ်လီရေ။

40ယင်းနိ နီဝင်လာရေခါ လူရို့စာ ဟိသမျ ရောဂါသေရို့ကို ယေရှုတို့ ယူလာကတ်လီရေ။ သူရို့စာ အမျိုးမျိုး ရောဂါစွဲရို့ ဟိကတ်လီရေ။ ယေရှုစာ သူရို့ အားကုံးသူ ခန္ဓာမာ အလက်တင်ရို့ အကောင်း လုပ်လီရေ။ 41ယင်းခါ လူအများကြီး ခန္ဓာက နတ်ဆိုးတိလည်း ထွက်လားခကတ်လီရေ။ ထိုနတ်ဆိုးတိစာ အော်ရို့ ပြောကတ်လီရေ၊ “ကိုယ်ဘင် ထာဝရဘုရား၏ သားတော် ဖြစ်ပါရေ။” ယေကေလည်း သူစာ ထိုနတ်ဆိုးတိကို စကားတစ်ခွန်းလည်း မပြောလတ်အောင် ဟောက်လီရေ၊ အကြောင်းကား ယေရှုကို ခရစ်တော် ဖြစ်တေ ဟို့ သူရို့ သိကတ်လီရေ။

ဂါလိလဲပြည်နယ်မာ လည်ရို့ တရားဟောပြောခြင်း

(မာကု ၁:၃၅-၃၉)

42မိုးလင်းရေခါ ယေရှုစာ ကပေရနောင်မြို့သျှေက ထွက်ရို့ ဆဆိတ်ကွယ်ရာ နေရာတစ်ခုတို့ ကြွလီရေ။ ယင်းခါ လူရို့စာ သူ့ကို လိုက်ရို့ ရှာကတ်လီရေ။ ယေရှု သူရို့ကို စွန့်ရို့ မလားရအောင် သူရို့စာ ယေရှုကို ဟန့်ထားဖို့ ကြိုးစားကတ်လီရေ။ 43ယင်းခါ ယေရှုစာ သူရို့ကို ပြောလီရေ၊ “ငါ အရာလည်း အများကြီး နေရာမာ လည်ရို့ ထာဝရဘုရား၏ နိုင်ငံတော် သတင်းကောင်းကို ဟောပြောရဖို့သိ၊ အကြောင်းကား သတင်းကောင်းကို ဟောပြောဖို့အတွက်နရာ ထာဝရဘုရား ငါ့ကို ရွှတ်လိုက်စာ ဖြစ်တေ။” 44ယင်းနောက် သူစာ ယုဒလူမျိုးရို့ ပြည်မာ အမျိုးမျိုး တရားဇရပ်တိမာ လည်ရို့ တရားဟောပြောရို့ နီလီရေ။