Luke 5

ပထမ တပည့် ရွီးကောက်ခြင်း

(မဿဲ ၄:၁၇-၂၂၊ မာကု ၁:၁၄-၂၀)

1တစ်ရက်နိ ယေရှုစာ ဂင်္နေသရက်မြစ်ကမ်းနားမာ ရပ်ရို့ တရားဟောပြောရို့ ဟိလီရေ။ ယင်းခါ လူရို့စာ ထာဝရဘုရား၏ စကားတော်ကို နားထောင်ဖို့အတွက် သူ့လေးဖက်လက်စိမာ အခဲအကျိုင် စုကတ်လီရေ။ 2ယင်းခါ သူစာ မြစ်ကမ်းနားမာ လောင်းနှစ်စင်းကို မြင်ရလီရေ။ ထိုလောင်းနှစ်စင်းက ဆင်းရို့ ပိုက်သမားရို့စာ ကိုယ်ရို့မာ ပိုက်တိကို ဆီးရို့ ဟိကတ်လီရေ။ 3ယင်းခါ ယေရှုစာ လောင်းတစ်စင်းမာ တက်လီရေ။ ထိုလောင်းစာ ရှိမုန် လောင်း ဟိလီရေ အရာ လောင်းကို ကမ်းနားက တစ်ဖဲ့ အဝီးတို့ ယူလားဖို့အတွက် ယေရှုစာ သူ့ကို တောင်းပန်လီရေ။ ယင်းနောက် ယေရှုစာ လောင်းမာ ထိုင်ရို့ လူရို့ကို သွန်သင်ပီးဖို့ စလီရေ။

4သွန်သင်ပီးရို့ ပြီးရေခါ သူစာ ရှိမုန်ကို ပြောလီရေ၊ “ဒေဂု လောင်းကို ရီအနက်တို့ ယူလား အရာ ငါး ဖမ်းဖို့အတွက် နင်ရို့ ပိုက်ကို ချကတ်။” 5ရှိမုန်စာ ပြောလီရေ၊ “ဆရာ၊ အကျွန်ရို့ တစ်ညဉ့်လုံး ကြိုးစားအားထုတ်ရို့ ရှာရို့ပင် ငါးတစ်ကောင်လည်း မရလီပါ။ ယေကေလည်း ကိုယ်ဘင် ပြောရေအတိုင်း အကျွန် ပိုက်ကို ချပါမည်။” 6ပိုက်ကို ချလိုက်တေခါ ငါးအများကြီး ငြိမ့်ရေအတွက်န သူရို့မာ ပိုက်စာ စုတ်ဖို့ပျင်လီရေ။ 7ယင်းခါ သူရို့စာ ကူညီဖို့အတွက် အဖက်သားရို့ကို လက်ယတ်ရို့ ခေါ်လီရေ။ သူရို့စာ လာရို့ လောင်းနှစ်စင်းမာ ငါး ကောက်ရို့ တင်ကတ်တေခါ လောင်းတိစာ နစ်ဖို့ ပျင်လီရေ။ 8ယင်းသျှင့်ကို မြင်ရို့ ရှိမုန်-ပေတရုစာ ▼

▼ပေတရု ပေတရုနာမည်စာ နောက်က ယေရှု မှည့်စာနာမည်အသစ် ဖြစ်ပါရေ။

ယေရှု ရှိက ဒူးထောက်ရို့ ပြောလီရေ၊ “အသျှင်၊ အကျွန် အပြစ်သေတစ်ယောက် ဖြစ်ပါရေ။ ကိုယ်တော် အကျွန့် နိုင်ဗြင်းက ကြွလီပါ။” 9ငါးအများကြီး ငြိမ့်စာကို မြင်ရေခါ ရှိမုန်န သူ့အဖက်သားရို့ အားကုံးသူ အံ့ဩကတ်လီရေ။ 10ယာကုပ်န ယောဟန်ဆိုစာ ဇေဗေဒဲမာ သားနှစ်ယောက်လည်း အံ့ဩကတ်လီရေ။ သူရို့စာ ရှိမုန်န ကုန်လုပ်ဖက်သား ဖြစ်ကတ်တေ။

ယင်းခါ ယေရှုစာ ရှိမုန်ကို ပြောလီရေ၊ “မကြောက်ကေ့၊ ဒေဂုကပင်စရို့ နင် လူဆွယ်ရမည်။” 11ယင်းနောက် သူရို့စာ လောင်းတိကို မြစ်ကမ်းနားတို့ ယူခကတ်လီရေ အရာ ဟိသမျ အားကုံးကို ထားဘိုက်ခရို့ ယေရှု နောက်က လိုက်ကတ်လီရေ။

အနူရောဂါသေတစ်ယောက် အကောင်းဖြစ်ခြင်း

(မဿဲ ၈:၁-၄၊ ၉:၁-၈၊ မာကု ၁:၄၀-၂:၁၂)

12တစ်ရက်နိ ယေရှုစာ မြို့တစ်မြို့မာ ဟိလီရေ။ ထိုမြို့မာ ခန္ဓာတစ်ကိုယ်လုံး အနူပေါက်စာ ရောဂါသေတစ်ယောက် ဟိလီရေ။ သူစာ ယေရှုကို မြင်ရေခါ ဒူးထောက်ပြီးကေ တောင်းပန်ရို့ ပြောလီရေ၊ “အသျှင်၊ ကိုယ်တော် လိုရေဆိုကေ အကျွန့်ကို သန့်စင်အောင် လုပ်နိုင်ပါရေ။” 13ယင်းခါ ယေရှုစာ သူ့ကို ကိုင်ရို့ ပြောလီရေ၊ “ဟုတ်တေ၊ ငါ လိုရေ။ နင် သန့်စင်စီ။” ယင်းခါ ချက်ချင်း သူ့မာ အနူရောဂါစာ ကောင်းလားခလီရေ။ 14ယေရှုစာ သူ့ကို အာဏာချလီရေ၊ “ဒေ အကြောင်းကို တစ်ယောက်ဘားမာလည်း မပြောလီကေ့။ ယင်းထက်ပင် နင့် ခန္ဓာကို ယဇ်ပုရောဟိတ်ဘားမာ လားရို့ ပြခီ။ အရာ သန့်စင်ဖို့အတွက် မောရှေ ပညှတ်ထားရေအတိုင်း ထာဝရဘုရားဘားမာ ယဇ်ပူဇော်ခီ။ ယင်းပိုင်ဆိုကေ နင့်မာ ရောဂါကောင်းလားခဗျာဆိုစာကို လူရို့ မြင်ရကတ်လိမည်။”

15ယေကေလည်း ယေရှု၏ သတင်းစာ အရာလည်း ပြန့်ကျယ်လီရေ။ သူ့စကားကို နားထောင်ဖို့အတွက် အရာ ရောဂါကောင်းဖို့အတွက် လူအများကြီး ယေရှုတို့ လာကတ်လီရေ။ 16ယေကေလည်း ယေရှုစာ မကြာမကြာ တတိန်းဆဆိတ်နေရာမာ လားရို့ ဆုတောင်းလီရေ။

တစ်စိတ်နာရောဂါသေတစ်ယောက် အကောင်းဖြစ်ခြင်း

(မဿဲ ၉:၁-၈၊ မာကု ၂:၁-၁၂)

17တစ်ရက်နိ ယေရှု သွန်သင်ပီးရို့ နီလီရေခါ ဖာရိရှဲအဖွဲ့သားရို့န ကျမ်းဆရာရို့စာ ယင်းနေရာမာ ထိုင်ရို့ ဟိကတ်လီရေ။ သူရို့စာ ဂါလိလဲပြည်နယ်န ယုဒပြည်နယ်မာဟိစာ အမျိုးမျိုး မြို့ရွာတိက အရာ ယေရုရှလင်မြို့က လာသူရို့ ဖြစ်ကတ်တေ။ ရောဂါသေရို့ကို ကောင်းအောင် လုပ်ဖို့အတွက် အသျှင်၏ တန်ခိုးစာ ယေရှုဘားမာ ဟိလီရေ။

18ယင်းခါ လူလိုင်းကေယောက်စာ တစ်စိတ်နာရောဂါ ဖြစ်သူတစ်ယောက်ကို သယင်းန ရွက်ရို့ ယူလာကတ်လီရေ။ သူရို့စာ အိမ်ထဲတို့ သွင်းယူလားရို့ ယေရှု ရှိက ချဖို့ ကြိုးစားကတ်လီရေ၊ 19ယေကေလည်း လူပရိတ်သတ် အများကြီး ဟိလီရေအတွက်န အိမ်ထဲတို့ ယူလားဖို့လမ်း မရကတ်လီ။ ယင်းခါ သူရို့စာ အိမ်ခေါင်ထက်တို့ တက်ကတ်လီရေ အရာ အိမ်ခေါင်ကို ရွှာပြီးကေ သယင်းကို ကြိုးနချိုင်ရို့ ရောဂါသေကို ယေရှု ရှိက ချလိုက်ကတ်လီရေ။ 20ယေရှုစာ သူရို့မာ ကျုံခြင်းတရားကို မြင်ရို့ ပြောလီရေ၊ “မိတ်ဆွေ၊ နင့် အပြစ်ကို ခွင့်ရွှတ်လိုက်ပျာ။”

21ယင်းခါ ကျမ်းဆရာရို့န ဖာရိရှဲအဖွဲ့သားရို့စာ စိတ်မာ စိတ်မာ စဉ်းစားကတ်လီရေ၊ “ဒေလူ အသူလည်း? ဒေလူ ထာဝရဘုရားကို တရိုက်တေကား! ထာဝရဘုရားကို ပယ်ရို့ အသူ အပြစ်ကို ခွင့်ရွှတ်နိုင်ရေလည်း?” 22ယေရှုစာ သူရို့ စိတ်မာ စဉ်းစားချက်ကို သိရို့ ပြောလီရေ၊ “ကိုယ်ဘင်ရို့ စိတ်ထဲမာ ဇာဖို့ ဒေပိုင် စဉ်းစားနီကတ်စာလည်း? 23ဇာပိုင် ပြောကေ ရွယ်ဖို့လည်း၊ ‘နင့် အပြစ်ကို ခွင့်ရွှတ်လိုက်ပျာ’ ဟို့ ပြောကေ ရွယ်ဖို့လော၊ မဟုတ်ကေ ‘နင် ထရို့ လားနီ’ ဟို့ ပြောကေ ရွယ်ဖို့လော? 24ယေကေလည်း ဒေ ကမ္ဘာမာ လူအပြစ်ကို ခွင့်ရွှတ်ဖို့စာ တန်ခိုး မနုသသားတော်မာ ဟိရေဆိုစာကို ကိုယ်ဘင်ရို့ သိလတ်အောင် ငါ ကိုယ်ဘင်ရို့ကို ပြမည်။” ယင်းပိုင် ပြောရေအတိုင်း သူစာ ရောဂါသေကို ပြောလီရေ၊ “ငါ နင့်ကို ပြောရေ၊ ထ၊ နင့် အိပ်ရာကို ယူရို့ အိမ်တို့ လားလီ။”

25ယင်းခါ သူစာ ချက်ချင်း အားကုံးသူ ရှိက ထရို့ ရပ်လီရေ အရာ ကိုယ့်အိပ်ရာကို လိပ်ယူပြီးကေ ထာဝရဘုရားကို ချီမွမ်းရို့ အိမ်တို့ ပြန်လားခလီရေ။ 26ယင်းသျှင့်ကို မြင်ရို့ လူရို့ အားကုံးသူ အံ့ဩကတ်လီရေ အရာ ရိုသေကြောက်လန့်ခြင်းန ထာဝရဘုရားကို ချီမွမ်းရို့ ပြောကတ်လီရေ၊ “ငါရို့ ဒေနိခါ ကောင်းကောင်း အကြီးအကျယ် အံ့ဩဖွယ်တစ်ခုကို မြင်ရကတ်ပျာ!”

ဖန်ဒါကောက်သမား လေဝိကို ခေါ်ခြင်း

(မဿဲ ၉:၉-၁၃၊ မာကု ၂:၁၃-၁၇)

27ယင်းနောက် ယေရှုစာ ယင်းနေရာက ထွက်ရို့ ကြွရေခါ လေဝိနာမည်န ဖန်ဒါကောက်သမား တစ်ယောက်ကို တွိလီရေ။ သူစာ ဖန်ဒါကောက်စာ ယုံးမာ ထိုင်ရို့ ဟိလီရေ။ ယေရှုစာ သူ့ကို၊ “လာ၊ ငါ့နောက်က လိုက်” ဟို့ ခေါ်လီရေ။ 28ယင်းခါ လေဝိစာ ဟိသမျ အားကုံးကို ထားဘိုက်ခပြီးကေ ထရို့ ယေရှုနောက်က လိုက်လီရေ။

29ယင်းနောက် လေဝိစာ ယေရှုအတွက် ကိုယ့်အိမ်မာ စားပွဲကြီးတစ်ပွဲ စီစဉ်လီရေ။ အများကြီး ဖန်ဒါကောက်သမားရို့န အခြားလူရို့လည်း သူရို့နအတူ စားသောက်ဖို့ ထိုင်ကတ်လီရေ။ 30ယင်းခါ ဖာရိရှဲအဖွဲ့သားရို့န သူရို့အဖွဲ့မာ ကျမ်းဆရာရို့စာ မနာလိုစိတ် ဖြစ်ရို့ ယေရှု တပည့်ရို့ကို အပြစ်တင်စကား ပြောကတ်လီရေ၊ “ဖန်ဒါကောက်သမားရို့န အရာ လူဆိုးရို့နအတူ ထိုင်ရို့ နင်ရို့ ဇာဖို့ စားသောက်ကတ်စာလည်း?” 31ယေရှုစာ သူရို့ကို ပြောလီရေ၊ “ကျန်းမာသူရို့အတွက် ဆီးဆရာကို အလိုမဟိ၊ ယေကေလည်း မကျန်းမာသူရို့အတွက်ရာ ဆီးဆရာကို အလိုဟိရေ။ 32အပြစ်က စိတ်လှည့်ရို့ လာဖို့အတွက် ငါ သူတော်ကောင်းရို့ကို ခေါ်ဖို့ လာစာ မဟုတ်၊ ယေကေလည်း ငါ လူဆိုးရို့ကို ခေါ်ဖို့ လာစာ ဖြစ်တေ။”

အစားရှောင်ဖို့စာ အကြောင်းကို သွန်သင်ခြင်း

(မဿဲ ၉:၁၄-၁၇၊ မာကု ၂:၁၈-၂၂)

33ယင်းနောက် ထိုဘာသာရေး ဂေါင်းဆောင်ရို့စာ ယေရှုကို ပြောကတ်လီရေ၊ “ယောဟန် တပည့်ရို့န ဖာရိရှဲအဖွဲ့သားရို့မာ တပည့်ရို့စာ မကြာမကြာ အစားရှောင်ရို့ ဆုတောင်းနီကတ်ပါရေ၊ ယေကေလည်း ကိုယ်ဘင်မာ တပည့်ရို့ကား အမြဲတိုင်း စားသောက်နီကတ်ပါရေ။” 34ယေရှုစာ သူရို့ကို ပြောလီရေ၊ “သမက်သျှာနအတူ ဟိရို့အတိုင်းလည်း သမက်သျှာမာ အဖက်သားရို့ကို အစားရှောင်ဖို့ ခိုင်းနိုင်ရေလော? 35ယေကေလည်း သမက်သျှာကို သူရို့က တင်ယူလားဖို့စာအချိန် ရောက်လာလိမည်။ ယင်းအချိန်ခါရာ သူရို့ အစားရှောင်ကတ်လိမည်။”

36ယင်းနောက် ယေရှုစာ သူရို့ကို သွန်သင်ပီးဖို့အတွက် ဒေပိုင် ပုံဥပမာ တင်ပြလီရေ၊ “တစ်ယောက်လည်း အင်္ကျီအသစ်ကို ဆုတ်ရို့ အင်္ကျီအဟောင်းမာ မဖာ။ ဖာရေဆိုကေ သူစာ ထိုအင်္ကျီအသစ်ကို ဆုတ်ဘိုက်လိုက်တေ။ အရာ ထိုအင်္ကျီအသစ်က အဝတ်သျှာလည်းသောက် အင်္ကျီအဟောင်းန မလိုက်။ 37အရာ တစ်ယောက်လည်း သရီအိပ်အဟောင်းမာ စပျစ်ရည်အသစ်ကို ထည့်ရို့ မထား။ ထားရေဆိုကေ သရီအိပ်အဟောင်းစာ စုတ်ရို့ စပျစ်ရည် ယိုဆင်းလားခရေ အရာ အိပ်တိလည်း ပျက်လားခရေ။ 38စပျစ်ရည်အသစ်ကို သရီအိပ်အသစ်မာ ထားဖို့ သင့်ရေ။ 39စပျစ်ရည်အဟောင်းကို သောက်ပြီးရေခါ တစ်ယောက်လည်း စပျစ်ရည်အသစ်ကို မသောက်ချင်၊ အကြောင်းကား ‘စပျစ်ရည်အဟောင်းရာ ကောင်းရေ’ ဟို့ သူစာ ပြောရေ။”