Luke 6

သတင်းနိကို ပိုင်ဆိုင်စာအသျှင်

(မဿဲ ၁၂:၁-၈၊ မာကု ၂:၂၃-၂၈)

1 သတင်းနိမာ ယေရှုန သူ့တပည့်ရို့စာ ဂျုံခင်းအထဲက ဝင်ရို့ ကြွကတ်လီရေ။ ယင်းခါ သူ့တပည့်ရို့စာ ဂျုံအနှံတိကို ဆွတ်ရို့ အလက်န ခြွီရို့ စားကတ်လီရေ။ 2ယင်းခါ ဖာရိရှဲအဖွဲ့သား လိုင်းကေယောက်စာ ပြောကတ်လီရေ၊ “ဘာသာရေး ထုံးစဉ်အတိုင်း သတင်းနိမာ မလုပ်သင့်စာတိကို နင်ရို့ ဇာဖို့ လုပ်ကတ်စာလည်း?” 3ယေရှုစာ ပြောလီရေ၊ “ဒါဝိဒ်မင်းန သူ့အဖက်သားရို့ အဝမ်းဆာလီရေခါ ဇာ လုပ်လီကတ်တေလည်းဆိုစာကို ကိုယ်ဘင်ရို့ မဖတ်ဖူးကတ်လော? 4သူကား ထာဝရဘုရား၏ ကျောင်းထဲမာ ဝင်ရို့ သန့်ရှင်းစာ ပေါင်မုန့်ကို စားလီရေ အရာ သူစာ ကိုယ့်အဖက်သားရို့ကိုလည်း ပီးလီရေ။ ယေကေလည်း ထိုသန့်ရှင်းစာ ပေါင်မုန့်ကို ယဇ်ပုရောဟိတ်ရို့ကို ပယ်ရို့ အခြားတစ်ယောက်လည်း စားဖို့ မသင့်လီ။” 5ယင်းနောက် ယေရှုစာ ထိုဖာရိရှဲအဖွဲ့သားရို့ကို ပြောလီရေ၊ “မနုသသားတော်စာ သတင်းနိကို ပိုင်ဆိုင်စာအသျှင် ဖြစ်တေ။”

အလက်သောင်သူတစ်ယောက် အကောင်းဖြစ်ခြင်း

(မဿဲ ၁၂:၉-၁၄၊ မာကု ၃:၁-၆)

6အရာတစ်ရက် သတင်းနိမာ ယေရှုစာ တရားဇရပ်တို့ ကြွရို့ သွန်သင်ပီးလီရေ။ ထိုတရားဇရပ်မာ ညာဖက်အလက် သောင်သူတစ်ယောက် ဟိလီရေ။ 7ဘာသာရေး ဂေါင်းဆောင်ရို့န ဖာရိရှဲအဖွဲ့သားရို့စာ ယေရှုကို အပြစ်တင်ဖို့ အခွင့် ရှာနီကတ်လီရေ။ ယင်းအတွက်န သတင်းနိမာ ယေရှု ရောဂါသေရို့ကို အကောင်း လုပ်လော မလုပ်လောဆိုစာကို သူရို့စာ ယေရှုကို အလှပ မျက်စိချရို့ ထားကတ်လီရေ။

8ယေကေလည်း ယေရှုစာ သူရို့ စိတ်နှလုံးမာ စဉ်းစားချက်ကို သိလီရေ။ ယင်းအတွက်န သူစာ အလက်သောင်သူကို ပြောလီရေ၊ “အားကုံးသူ ရှိက လာရို့ ရပ်ခလိုက်။” ယင်းခါ သူစာ ထရို့ ရပ်လီရေ။ 9ယေရှုစာ သူရို့ကို ပြောလီရေ၊ “ကိုယ်ဘင်ရို့ကို ငါ စကားတစ်ခွန်း မီးမည်။ သတင်းနိမာ ကောင်းစာ အလုပ်ကို လုပ်ဖို့ သင့်ရေလော၊ မဟုတ်ကေ မကောင်းစာ အလုပ်ကို လုပ်ဖို့ သင့်ရေလော? အသက်ကို ကယ်ဆယ်ဖို့ သင့်ရေလော၊ မဟုတ်ကေ အသီသတ်ဖို့ သင့်ရေလော?” 10ယင်းနောက် ယေရှုစာ အားကုံးသူကို ဝန်းရို့-ယာရို့ ကြည့်ပြီးကေ အလက်သောင်သူကို ပြောလီရေ၊ “နင့်အလက်ကို ဆန့်။” သူစာ အလက်ကို ဆန့်ရေခါ ပကတိအကောင်း ဖြစ်လားခလီရေ။

11ယင်းခါ ထိုဂေါင်းဆောင်ရို့စာ ကောင်းကောင်း မန်တက်ကတ်လီရေ အရာ ယေရှုကို ဇာ လုပ်ရဖို့လည်း ဆိုပြီးကေ ကိုယ်ရို့အချင်းချင်း တိုင်ဘင်ကတ်လီရေ။

တပည့်တစ်ဆယ့်နှစ်ယောက်ကို တမန်တော်အရာ ပီးခြင်း

(မဿဲ ၄:၂၃-၂၅၊ ၁၀:၁-၁၁၊ မာကု ၃:၁၃-၁၉)

12တစ်ရက်နိ ယေရှုစာ ဆုတောင်းဖို့အတွက် တောင်တစ်တောင်တို့ တက်လီရေ အရာ တစ်ညဉ့်လုံး ထာဝရဘုရားဘားမာ ဆုတောင်းရို့ နီလီရေ။ 13မိုးလင်းရေခါ သူစာ ကိုယ့်တပည့်ရို့ကို ကိုယ့်အနားတို့ ခေါ်လီရေ အရာ သူရို့အထဲက တပည့်တစ်ဆယ့်နှစ်ယောက်ကို ရွီးကောက်ရို့ တမန်တော်အရာ ပီးလီရေ။ 14သူရို့ ဖြစ်တေကား၊ ရှိမုန် (ယေရှုစာ သူ့ကို ပေတရု ဟို့ နာမည်အသစ် မှည့်လီရေ)၊ သူ့မာညီ အန္ဒြေ၊ ယာကုပ်၊ ယောဟန်၊ ဖိလိပ္ပု၊ ဗာသောလမဲ၊ 15မဿဲ၊ သောမ၊ အာလဖဲသား ယာကုပ်၊ ကိုယ့်လူမျိုးကို ချစ်သူ ရှိမုန်၊ 16ယာကုပ်သား ယုဒ အရာ ယေရှုကို ရန်သူရို့အလက်မာ ဖမ်းပီးဖို့သူ ယုဒရှကာရုတ်လည်း ဖြစ်တေ။

အမျိုးမျိုး ရောဂါသေရို့ကို အကောင်းလုပ်ခြင်း

(မဿဲ ၄:၂၃-၂၅)

17ယေရှုစာ ကိုယ့်တပည့်ရို့နအတူ တောင်ထက်က ဆင်းလာရို့ နေရာပါဗတစ်ခုမာ ရပ်လီရေ။ ယင်းနေရာမာ သူ့မာ တပည့် အများကြီး လာရို့ စုကတ်လီရေ။ သူရို့ကိုအပယ် ယုဒပြည်နယ်၊ ယေရုရှလင်မြို့၊ အရာ ပင်လယ်ကမ်းနားမာဟိစာ တုရုမြို့န ဇိဒုန်မြို့ အရပ်ကလည်း လူအများကြီး ရောက်လာကတ်လီရေ။ 18သူရို့စာ ယေရှု စကားကို နားထောင်ဖို့အတွက်န ရောဂါကောင်းဖို့အတွက် ယင်းနေရာတို့ လာကတ်လီရေ။ ယင်းခါ နတ်ဆိုးကိုင်ရို့ ဒုက္ခ ရသူရို့စာ အကောင်း ဖြစ်ကတ်လီရေ၊ 19အကြောင်းကား ယေရှုက တန်ခိုး ထွက်ရို့ အားကုံးသူကို အကောင်း လုပ်လီရေ။ ယင်းအတွက်န လူရို့ အားကုံးသူ သူ့ကို ကိုင်ဖို့ ကြိုးစားကတ်လီရေ။

လူအများကြီးကို ယေရှု သွန်သင်ပီးခြင်း

(လုကာ ၆:၂၀-၄၉)

မင်္ဂလာဟိသူရို့ အကြောင်း

(မဿဲ ၅:၁-၁၂)

20ယင်းနောက် ယေရှုစာ တပည့်ရို့တို့ ကြည့်ရို့ ပြောလီရေ၊
“စိတ်နှလုံး ဆင်းရဲသူရို့၊ နင်ရို့ မင်္ဂလာ ဟိကတ်တေ၊
အကြောင်းကား ထာဝရဘုရား၏ နိုင်ငံတော်စာ နင်ရို့ နိုင်ငံ ဖြစ်တေ။
21ဒေဂု ငတ်မွတ်နီသူရို့၊ နင်ရို့ မင်္ဂလာ ဟိကတ်တေ၊
အကြောင်းကား နင်ရို့ ဝအောင် စားရကတ်လိမည်။
ဒေဂု ငိုရသူရို့၊ နင်ရို့ မင်္ဂလာ ဟိကတ်တေ၊
အကြောင်းကား နင်ရို့ ရယ်ရကတ်လိမည်။

22“နင်ရို့ မနုသသားတော်အကြောင်းန လူရို့ဘားမာ မုန်းခြင်း၊ နှင်ထုတ်ခြင်း၊ ပုတ်ခတ်ခြင်း အရာ အသရေရှုတ်ချခြင်းကို ခံရရေခါ မင်္ဂလာ ဟိကတ်တေ။ 23ယင်းခါ နင်ရို့ ပျော်ကတ် အရာ ဝမ်းသာရို့ ကကတ်၊ အကြောင်းကား နင်ရို့အတွက် ဂေါင်းခင်ဘုံမာ မဟာဆုမြတ် ဟိရေ။ ထို ဟိသမျ လူရို့မာ အဖိုးအဖီးအစိုင်လာရို့စာ ဘုရားသတင်းပို့သူရို့ကိုလည်း ယင်းပိုင် ညှဉ်းဆဲလီကတ်တေ။”

အမင်္ဂလာဟိသူရို့ အကြောင်း

24ယေရှုစာ အရာလည်း ပြောလီရေ၊
“ယေကေလည်း သူဌေးရို့၊ နင်ရို့အတွက် အမင်္ဂလာ ဟိရေ!
အကြောင်းကား နင်ရို့ အပြည့်စုံ ချမ်းသာခြင်း စဉ့်စိမ်ကို ခံရနီကတ်တေ။
25ဒေဂု ဝအောင် စားရသူရို့၊ နင်ရို့အတွက် အမင်္ဂလာ ဟိရေ!
အကြောင်းကား နင်ရို့ ငတ်မွတ်ခြင်းကို ခံရကတ်လိမည်။
ရယ်သူရို့၊ နင်ရို့အတွက် အမင်္ဂလာ ဟိရေ!
အကြောင်းကား နင်ရို့ ဝမ်းနည်းရို့ ငိုရကတ်လိမည်။
26လူရို့က ချီမွမ်းခြင်းကို ခံရသူရို့၊ နင်ရို့အတွက် အမင်္ဂလာ ဟိရေ!
အကြောင်းကား ထို ဟိသမျ လူရို့မာ အဖိုးအဖီးအစိုင်လာရို့စာ
အယောင်ဆောင် ဘုရားသတင်းပို့သူရို့ကိုလည်း ချီမွမ်းလီကတ်တေ။

ရန်သူကို ချစ်ရဖို့စာ အကြောင်း

(မဿဲ ၅:၄၃-၄၈)

27“ငါ့စကားကို နားထောင်သူရို့၊ ငါ နင်ရို့ကို ပြောရေ၊ နင်ရို့စာ ကိုယ်ရို့မာ ရန်သူရို့ကို ချစ်ကတ်။ နင်ရို့ကို မုန်းသူရို့ကို နင်ရို့ ကျေးဇူးပြုကတ်။ 28နင်ရို့ကို ကျိန်ဆဲထည့်သူရို့ကို နင်ရို့ မေတ္တာပို့ကတ်။ အရာ နင်ရို့ကို ပုတ်ခတ်ရို့ စကားပြောသူရို့အတွက် နင်ရို့ ဆုတောင်းပီးကတ်။ 29အသူမဆို နင့် တစ်ဖက်ပါးကို သတ်တေဆိုကေ အခြားတစ်ဖက်ပါးကိုလည်း သတ်ပတ်စီ လှည့်ပီးလိုက်။ အရာ အသူမဆို အားဒမ နင့် ကိုယ်ရုံကို ချွတ်ယူရေဆိုကေ နင့် အင်္ကျီကိုလည်း ချွတ်ပီးလိုက်။ 30အသူမဆို နင့်က တစ်ခုမသာ တောင်းရေဆိုကေ နင် ယင်းသူကို ထုတ်ပီးလိုက်။ အရာ အသူမဆို နင့် ဝန်ကို အားဒမ လုယူလားခရေဆိုကေ ယင်းဝန်ကို ပြန်မတောင်းကေ့ဖိ။ 31နင်ရို့စာ အခြားလူရို့က ကျေးဇူးပြုခြင်းကို ရချင်ရေပိုင် နင်ရို့လည်း သူရို့ကို ကျေးဇူးပြုကတ်။

32“နင်ရို့စာ သက်သက် ကိုယ်ရို့ကို ချစ်သူရို့ကိုရာ ချစ်ကတ်တေဆိုကေ နင်ရို့အတွက် ချီမွမ်းခြင်း ရစရာ ဇာ ဟိရေလည်း? အကြောင်းကား လူဆိုးရို့လည်း ယင်းပိုင် ချစ်နီကတ်တေ။ 33အရာ နင်ရို့စာ သက်သက် ကိုယ်ရို့ကို ကောင်းကျိုး လုပ်သူရို့ကိုရာ နင်ရို့ ကောင်းကျိုး လုပ်နီကတ်တေဆိုကေ နင်ရို့အတွက် ချီမွမ်းခြင်း ရစရာ ဇာ ဟိရေလည်း? အကြောင်းကား လူဆိုးရို့လည်း ယင်းပိုင် လုပ်နီကတ်တေ။ 34နင်ရို့စာ ပြန်ရဖို့ ဟို့ မှတ်ပြီးကေ အခြားတစ်ယောက်ကို အချီးပီးရေဆိုကေ နင်ရို့အတွက် ချီမွမ်းခြင်း ရစရာ ဇာ ဟိရေလည်း? အကြောင်းကား လူဆိုးရို့လည်း ယင်းပိုင် မှတ်ရို့ ကိုယ်ရို့မာ လူဆိုးရို့ကို အချီးပီးနီကတ်တေ။ 35ယေကေလည်း နင်ရို့စာ ကိုယ်ရို့မာ ရန်သူရို့ကို ချစ်ကတ် အရာ သူရို့ကို ကူညီကတ်။ တစ်ခုကိုလည်း ပြန်ရဖို့စာကို မမျှော်လင်းဘိုင်းန လူရို့ကို အချီးပီးကတ်။ ယင်းပိုင်ဆိုကေ နင်ရို့ ကြီးမြတ်စာ ဆုကို ရကတ်လိမည် အရာ နင်ရို့ မြင့်မြတ်စာ ထာဝရဘုရား၏ သားသမီး ဖြစ်ကတ်လိမည်၊ အကြောင်းကား သူစာ ကျေးဇူးကို မသိတတ်သူရို့န လူဆိုးရို့ကိုလည်း သနားရေ။ 36နင်ရို့မာ အဖ သနားကြင်နာရေပိုင် နင်ရို့လည်း သနားကြင်နာကတ်။

အခြားတစ်ယောက်ကို တရားစစ်ဆေးခြင်း

(မဿဲ ၇:၁-၆)

37“အရာ နင်ရို့ အခြားတစ်ယောက်ကို တရားမစစ်ဆေးကတ်ကေ့။ ယင်းပိုင်ဆိုကေ နင်ရို့လည်း တရားစစ်ဆေးခြင်းကို ခံရကတ်လိမည် မဟုတ်။ အခြားတစ်ယောက်ကို အပြစ်မတင်ကတ်ကေ့။ ယင်းပိုင်ဆိုကေ နင်ရို့လည်း အပြစ်တင်ခြင်းကို ခံရကတ်လိမည် မဟုတ်။ အခြားတစ်ယောက်ကို ခွင့်ရွှတ်ကတ်။ ယင်းပိုင်ဆိုကေ နင်ရို့လည်း ခွင့်ရွှတ်ခြင်းကို ခံရကတ်လိမည်။ 38အခြားတစ်ယောက်ကို ပီးကတ်။ ယင်းပိုင်ဆိုကေ အခြားတစ်ယောက်လည်း နင်ရို့ကို ပီးလိမည်။ လူရို့စာ အရာလည်း အများကြီး နှိပ်ရို့ နှိပ်ရို့ လှုပ်ရို့ လှုပ်ရို့ ရွန်ကျအောင် နင်ရို့ကို သွန်ပီးကတ်လိမည်၊ အကြောင်းကား နင်ရို့ အခြားတစ်ယောက်ကို ခြင်ရို့ ပီးကတ်စာပိုင် နင်ရို့လည်း ခြင်ရို့ ရကတ်လိမည်။”

39အရာ သူစာ ကိုယ့်တပည့်ရို့ဘားမာ ပုံဥပမာ တစ်ခု တင်ပြလီရေ၊ “မျက်ကန်းတစ်ယောက်စာ အခြားမျက်ကန်း တစ်ယောက်ကို လမ်းပြနိုင်ရေလော? လမ်းပြရေဆိုကေ သူရို့နှစ်ယောက်စုံ တွင်းမာ ကျလားလီဖို့ မဟုတ်လော? 40ဆရာထက် တပည့် မကြီး၊ ယေကေလည်း သူစာ အပြည့်အစုံ သွန်သင်ချက်ကို ရရေဆိုကေ ဆရာန အရှိရှိ ဖြစ်နိုင်ရေ။ 41နင် ကိုယ့်မျက်စိမာ မျက်ချီးတစ်ပုံကို မမြင်ဘိုင်းန နင့် ညီအစ်ကို မျက်စိမာ မျက်ချီးတစ်ဖဲ့သျှေကို ဇာဖို့ မြင်နီစာလည်း? 42နင့် မျက်စိမာ မျက်ချီးတစ်ပုံကို မမြင်ဘိုင်းန နင် ဇာပိုင်ပျင်ရို့ နင့် ညီအစ်ကိုကို၊ ‘လာလတ်၊ ငါ နင့် မျက်စိက မျက်ချီးကို ထွတ်ဘိုက်လိုက်မည်’ ဟို့ ပြောနိုင်စာလည်း? နင် ကိုယ့်မျက်စိမာ မျက်ချီးတစ်ပုံကိုကား မကြည့်! အဝေး အယောင်ဆောင်! အယင်ဆုံး နင့် မျက်စိက မျက်ချီးတစ်ပုံကို ထွတ်ဘိုက်လိုက်အုန့်သိ။ ယင်းပြီးခါရာ နင့် ညီအစ်ကို မျက်စိက မျက်ချီးတစ်ဖဲ့သျှေကို ထွတ်ဖို့အတွက် ကကြင်းလလင်း မြင်ရလိမည်။

အသီးကနီရို့ အပင်ကို သိရခြင်း

(မဿဲ ၇:၁၅-၂၀၊ ၁၂:၃၃-၃၇)

43“ကောင်းစာအပင်မာ မကောင်းစာအသီး မသီးနိုင် အရာ မကောင်းစာအပင်မာလည်း ကောင်းစာအသီး မသီးနိုင်။ 44အသီးကနီရို့ရာ အပင်ကို သိရရေ။ လူရို့စာ စူးခြုံက သဖန်းသီး မဆွတ်ကတ် အရာ စူးပင်က စပျစ်သီး မဆွတ်ကတ်။ 45လူကောင်းစာ ကောင်းမြတ်စာတိကို ကိုယ့်စိတ်နှလုံးထဲမာ စုဆောင်းရို့ ထားရေ အရာ သူစာ ကိုယ့်စိတ်နှလုံးထဲက ကောင်းမြတ်စာ စကားတိကိုရာ ထုတ်ရို့ ပြောရေ။ ယေကေလည်း လူဆိုးစာ ဆိုးယုတ်စာတိကို ကိုယ့်စိတ်နှလုံးထဲမာ စုဆောင်းရို့ ထားရေ အရာ သူစာ ကိုယ့်စိတ်နှလုံးထဲက ဆိုးယုတ်စာ စကားတိကိုရာ ထုတ်ရို့ ပြောရေ။ အကြောင်းကား လူရို့စာ ကိုယ်ရို့ စိတ်နှလုံးထဲမာ ပြည့်ရို့ဟိစာတိကိုရာ ပစကနီရို့ ဖေါ်ပြရေ။

တည်ဆောက်သူနှစ်မျိုး အကြောင်း

(မဿဲ ၅:၂၄-၂၉)

46“နင်ရို့ ငါ့စကားကို မကိုင်ဘိုင်းန ဇာဖို့ ငါ့ကို၊ ‘အသျှင်၊ အသျှင်’ ဟို့ ခေါ်ကတ်စာလည်း? 47ငါ့တို့ လာရို့ ငါ့စကားကို ကြားရေအတိုင်း လိုက်နာသူစာ အသူနတူရေလည်းဆိုစာကို ငါ နင်ရို့ကို ပြောပြမည်။ 48သူစာ ကျောက်ပြင်မာ တွင်းအနက်တူးပြီးကေ အုပ်မြစ်ချရို့ အိမ်ဆောက်သူတစ်ယောက်နတူရေ။ ယင်းနောက် ရီမင်းကြီးရို့ ရီလုံးတိ ထိုအိမ်မာ အက်ကျလီရေ၊ ယေကေလည်း ရီလုံးတိစာ ထိုအိမ်ကို လှုတ်ရို့ပင် မလုတ်လီ၊ အကြောင်းကား ထိုအိမ်ကို တတိုင်းမမြိုင်း တည်ဆောက်လီစာ ဖြစ်တေ။ 49ယေကေလည်း ငါ့စကားကို ကြားရေအတိုင်း မလိုက်နာသူစာ မြေပြင်ထက်မာ အုပ်မြစ် မတည်ဘိုင်း အိမ်ဆောက်သူတစ်ယောက်နတူရေ။ နောက်က ရီမင်းကြီးရို့ ရီလုံးတိ အိမ်မာ အက်ကျရေခါ ထိုအိမ်စာ ကကြွန်းဆာရို့ ပြိုကျလားခလီရေ။”