Luke 7

စစ်ဗိုလ်မာ ကျွန် အကောင်းဖြစ်ခြင်း

(မဿဲ ၈:၅-၁၃)

1ထိုအကြောင်းအရာတိကို လူရို့ဘားမာ သွန်သင်ပီးရို့ ပြီးရေခါ ယေရှုစာ ကပေရနောင်မြို့သျှေတို့ ကြွလီရေ။ 2ထိုမြို့မာ ရောမ စစ်သရွဲတစ်ရာကိုပိုင်စာ စစ်ဗိုလ်တစ်ယောက် ဟိလီရေ။ သူ့မာ ကျွန်တစ်ယောက်စာ ခန္ဓာ မကောင်းဘိုင်းန သီလလုတ် ဖြစ်ရို့ ဟိလီရေ။ ထိုစစ်ဗိုလ်စာ ယင်းကျွန်ကို ကောင်းကောင်း ချစ်လီရေ။ 3သူစာ ယေရှု အကြောင်းကို ကြားရို့ ယုဒဂေါင်းဆောင်ဝါကြီး လိုင်းကေယောက်ကို ယေရှုတို့ တောင်းပန်ဖို့ ရွှတ်လိုက်လီရေ၊ အကြောင်းကား သူစာ ယေရှုကို လာရို့ ကိုယ့်ကျွန်ကို ကောင်းအောင် လုပ်စီချင်လီရေ။ 4ထိုဂေါင်းဆောင်ရို့စာ ယေရှုတို့ လာရို့ အရေးတကြီး တောင်းပန်ကတ်လီရေ၊ “ဆရာ၊ ထိုစစ်ဗိုလ် ကိုယ်ဘင်၏ ကျေးဇူးပြုခြင်းကို ခံထိုက်ပါရေ၊ 5အကြောင်းကား သူစာ အကျွန်ရို့ လူမျိုးကို ချစ်ပါရေ အရာ အကျွန်ရို့အတွက် တရားဇရပ် ဆောက်ပီးလီပါရေ။”

6ယင်းခါ ယေရှုစာ သူရို့နအတူ လိုက်လီရေ။ သူစာ စစ်သရွဲတစ်ရာကိုပိုင်စာ စစ်ဗိုလ် အိမ်နားတို့ ရောက်တေခါ ထိုစစ်ဗိုလ်စာ ကိုယ့်မိတ်ဆွေရို့ကို ပြောရို့ ရွှတ်လိုက်လီရေ၊ “အသျှင်၊ ကိုယ်တော် ဒုက္ခ မခံပါကေ့ဖိ၊ အကြောင်းကား အကျွန် ကိုယ်တော်ကို အိမ်တင်ခံဖို့ မထိုက်တန်ပါ။ 7ယင်းအတွက်န အကျွန် ကိုယ့်ကိုကိုယ် ကိုယ်တော်အနားတို့ လာဖို့ ထိုက်တန်ရေ ဟို့လည်း မမှတ်ပါ။ ကိုယ်တော် သက်သက် နှုတ်တော်န ပြောရေဆိုကေ အကျွန့်မာ ကျွန် ကောင်းပါလိမည်။ 8ကိုယ်တော်၏ တန်ခိုးအာဏာ အကြောင်းကို အကျွန် သိပါရေ၊ အကြောင်းကား အကျွန်လည်း အခြားတစ်ယောက် စကားကို လိုက်နာရပါရေ အရာ စစ်သားရို့လည်း အကျွန့်စကားကို လိုက်နာရပါရေ။ အကျွန် တစ်ယောက်ကို ‘လားခီ’ ဟို့ ပြောရေဆိုကေ သူစာ လားခပါရေ၊ အခြားတစ်ယောက်ကို ‘လာလတ်’ ဟို့ ပြောရေဆိုကေ သူစာ လာပါရေ၊ အရာ အကျွန့်မာ ကျွန်ကို ‘ဒေသျှင့် လုပ်’ ဟို့ ပြောရေဆိုကေ သူစာ လုပ်ပါရေ။” 9သူ့စကားကို ကြားရို့ ယေရှုစာ အံ့ဩလီရေ အရာ သူစာ ကိုယ့်နောက်က လိုက်လာကတ်စာ လူပရိတ်သတ်ရို့ဖက်တို့ လှည့်ကြည့်ရို့ ပြောလီရေ၊ “ငါ ကိုယ်ဘင်ရို့ကို ပြောရေ၊ ဣသရေလလူမျိုးအထဲမာလည်း ဒေလှောက် ကြီးကျယ်စာ ကျုံခြင်းတရားကို ငါ တစ်ခါလည်း မမြင်ဖူးသိ။”

10စစ်ဗိုလ် ရွှတ်လိုက်သူရို့ အိမ်တို့ ပြန်လာကတ်တေခါ ထိုကျွန်ကို အကောင်းဖြစ်ရို့ မြင်ရကတ်လီရေ။

မဆမ သားတစ်ယောက် ပြန်ရှင်ခြင်း

11တစ်ရက်နှစ်ရက် ကြာရေခါ ယေရှုစာ နာဣနမြို့တို့ ကြွလီရေ။ သူ့တပည့်ရို့န အရာလည်း လူအများကြီး သူနအတူ လိုက်ကတ်လီရေ။ 12အရာ ယေရှုစာ ထိုမြို့လမ်းခဝနားတို့ ရောက်လီရေ။ ယင်းခါ လူရို့စာ လူအသီကောင်တစ်ကောင်ကို သင်္ဂြိုဟ်ဖို့အတွက် မြို့ပြင်တို့ ရွက်ရို့ ထုတ်ယူလားကတ်လီရေ။ သီလားခသူစာ မဆမမာ တစ်ယောက်တည်းသား ဖြစ်တေ။ ထိုမဆမနအတူ မြို့သူမြို့သား အများကြီး ပါကတ်လီရေ။ 13အသျှင်ယေရှုစာ ထိုမဆမကို မြင်ရို့ ကောင်းကောင်း သနားလီရေ အရာ သူစာ ထိုမဆမကို ပြောလီရေ၊ “အယွေ၊ မငိုကေ့ဖိ။” 14ယင်းနောက် ယေရှုစာ အနားတို့ လားရို့ တုန်းခေါင်းကို ကိုင်လီရေ။ ယင်းခါ အသီကောင်ကို ရွက်ယူလားသူရို့စာ တန့်ကတ်လီရေ။ အရာ ယေရှုစာ ပြောလီရေ၊ “အဝေး လူပျို၊ ငါ နင့်ကို ပြောရေ၊ ထ။”

15ယင်းခါ သီလားခသူစာ ထရို့ ထိုင်လီရေ အရာ စကား ပြောလီရေ။ ယေရှုစာ ယင်းသူကို အမိတို့ ပြန်အပ်လိုက်လီရေ။ 16ယင်းခါ ဟိသမျ လူရို့စာ ရိုသေကြောက်လန့်ကတ်လီရေ အရာ ထာဝရဘုရားကို ချီမွမ်းရို့ ပြောကတ်လီရေ၊ “ငါရို့အထဲမာ ကြီးမြတ်စာ ဘုရားသတင်းပို့သူတစ်ပါး ရောက်လာဗျာ။ ထာဝရဘုရား သနားရို့ ကိုယ့်လူရို့ဖက်တို့ မျက်နှာလှည့်ဗျာ။” 17ယေရှု၏ အကြောင်းကို ယုဒပြည်နယ်သားရို့န ထိုအပါးနီးဝန်းကျင်မာ ဟိကတ်စာ ဟိသမျ လူရို့ ကြားရကတ်လီရေ။

ယောဟန် တပည့်ရို့ ယေရှုန အတွိခံခြင်း

(မဿဲ ၁၁:၂-၆)

18ရီနှစ်မင်္ဂလာပီးသူ ယောဟန်မာ တပည့်ရို့စာ ထို ဟိသမျ အကြောင်းအရာကို ယောဟန်ဘားမာ ပြောပြကတ်လီရေ။ 19ယင်းခါ ယောဟန်စာ ကိုယ့်တပည့်နှစ်ယောက်ကို ယေရှုတို့ ဒေပိုင် မီးကြည့်ဖို့ ရွှတ်လိုက်လီရေ၊ “ကိုယ်တော် ကြွလာဖို့ စကားဟိစာ ခရစ်တော်ပါလော? မဟုတ်ကေ အခြားတစ်ပါးအတွက် အကျွန်ရို့ စောင့်နီရပါဖို့သိလော?”

20ယင်းခါ သူရို့စာ ယေရှုတို့ လာရို့ ပြောကတ်လီရေ၊ “ရီနှစ်မင်္ဂလာပီးသူ ယောဟန် အကျွန်ရို့ကို ကိုယ်တော်တို့ မီးကြည့်ဖို့ ရွှတ်လိုက်ပါရေ၊ ‘ကိုယ်တော် ကြွလာဖို့ စကားဟိစာ ခရစ်တော်ပါလော? မဟုတ်ကေ အခြားတစ်ပါးအတွက် အကျွန်ရို့ စောင့်နီရပါဖို့သိလော?’”

21ယင်းခါ ယေရှုစာ ရောဂါစွဲနီသူရို့န ကောင်းကောင်း ဝေဒနာ ခံရနီသူ အများကြီးကို အကောင်း လုပ်လီရေ၊ နတ်ဆိုးကိုင်သူရို့ကို အကောင်း လုပ်လီရေ အရာ မျက်ကန်း အများကြီးကိုလည်း မျက်စိ မြင်အောင် လုပ်လီရေ။ 22ထို ဟိသမျ အားကုံးကို လုပ်ပြီးရေခါ ယေရှုစာ ယောဟန် တပည့်ရို့ကို အဖြေပီးလီရေ၊ “နင်ရို့ ကြားရစာတိန မြင်ရစာတိကို ယောဟန်တို့ လားရို့ ပြောပြခီကတ်။ မျက်စိကန်းသူရို့ မြင်ရကတ်ပျာ၊ အခြီသောင်သူရို့ လားနိုင်ကတ်ပျာ၊ အနူရောဂါသေရို့ သန့်စင်ကတ်ပျာ၊ နားပင်းသူရို့ ကြားရကတ်ပျာ၊ သီသူရို့ ပြန်ရှင်ကတ်ပျာ အရာ ဆင်းရဲသားရို့ သတင်းကောင်းကို ကြားရကတ်ပျာ။ 23မယုံသင်္ခါစိတ် မဟိဘိုင်းန ငါ့ကို လက်ခံသူစာ မင်္ဂလာ ဟိရေ။”

ယောဟန် အကြောင်းကို ယေရှု ပြောပြခြင်း

(မဿဲ ၁၁:၇-၁၉)

24ယောဟန် တပည့်ရို့ ပြန်လားခကတ်တေခါ ယေရှုစာ ယောဟန် အကြောင်းကို လူရို့ဘားမာ ပြောဖို့ စလီရေ၊ “ကိုယ်ဘင်ရို့ ဇာကို ကြည့်ဖို့အတွက် သဲကန္တာရတောပြင်တို့ လားခီကတ်စာလည်း? လီထရို့ လုတ်စာ ပန်းဇင်ဂြည်အရုံကိုလော? 25မဟုတ်ကေ ဇာကို ကြည့်ဖို့ လားခီကတ်စာလည်း? လှပတင့်တယ်စာ အဝတ် ဝတ်သူကိုလော? အဝတ်ကောင်း-အစားကောင်းကို ဝတ်ရို့ စဉ့်စိမ်ခံရို့ စားသောက်နီသူရို့ကား မင်းနန်းမာရာ နီကတ်တေ။ 26မဟုတ်ကေ ဇာကို ကြည့်ဖို့ လားခီကတ်စာလည်း? ဘုရားသတင်းပို့သူကိုလော? ဟုတ်တေ၊ ငါ ကိုယ်ဘင်ရို့ကို ပြောရေ၊ ကိုယ်ဘင်ရို့ လားရို့ ကြည့်ခီသူစာ ဘုရားသတင်းပို့သူထက်လည်း ကြီးမြတ်တေ! 27ယောဟန် အကြောင်းကို ကျမ်းစာမာ ရွီးရို့ ဟိရေ၊
‘နားထောင်၊ ငါ နင့် ရှိက ငါ့မာ သတင်းပို့သူတစ်ယောက်ကို ရွှတ်လိုက်ဖို့၊
သူစာ နင် လားဖို့စာလမ်းကို အဆင်သင့် လုပ်လိမည်။’

28“ငါ ကိုယ်ဘင်ရို့ကို ပြောရေ၊ လူ့သားရို့အထဲမာ ယောဟန်ထက် ကြီးမြတ်သူ တစ်ယောက်လည်း မဟိ။ ယေကေလည်း ထာဝရဘုရား၏ နိုင်ငံတော်မာ အားကုံးသူထက် အသျှေဆုံး ဖြစ်သူလည်း ယောဟန်ထက် ကြီးမြတ်တေ။”

29ဟိသမျ လူရို့န ဖန်ဒါကောက်သမားရို့စာ ယောဟန် ဟောပြောစာ တရားတော်ကို နားထောင်ကတ်လီရေ အရာ ယောဟန်ဘားမာ ရီနှစ်မင်္ဂလာ ခံယူပြီးကေ ထာဝရဘုရားကို ရိုးသားသူအဖြစ် ဝန်ခံကတ်လီရေ။ 30ယေကေလည်း ဖာရိရှဲအဖွဲ့သားရို့န ကျမ်းဆရာရို့စာ ယောဟန်တို့ လာရို့ ရီနှစ်မင်္ဂလာ မခံယူလီကတ်၊ အကြောင်းကား သူရို့အတွက် စီစဉ်ထားစာ ထာဝရဘုရား၏ ရွယ်မှတ်ချက်ကို သူရို့ ငြင်းပယ်ကတ်လီရေ။

31ယေရှုစာ အရာလည်း ပြောလီရေ၊ “ယင်းပိုင်ဆိုကေ ဒေခိုက်မာ လူရို့ကို ငါ အသူ့န နှိုင်းယှဉ်ရဖို့လည်း? သူရို့ ဇာပိုင်ဇတ် လူရို့လည်း? 32သူရို့စာ ဈီးတလင်းမာ ထိုင်နီကတ်စာ အသျှေရို့နတူကတ်တေ။ သူရို့စာ အခြား အသျှေတစ်တိုင်ကို ခေါ်ရို့ ပြောကတ်တေ၊
‘ငါရို့ နင်ရို့အတွက် နှဲမှုတ်လီကတ်တေ၊
ယေကေလည်း နင်ရို့ မကလီကတ်။
အရာ ငါရို့ ဝမ်းနည်းစာ တေးခြင်းကို ဆိုလီကတ်တေ၊
ယေကေလည်း နင်ရို့ ဝမ်းနည်းခြင်း ပြန်ရို့ မငိုလီကတ်။’

33“အကြောင်းကား ယောဟန်စာ ရောက်လာရေခါ အခြားလူရို့ပိုင် ပေါင်မုန့်န စပျစ်ရည် မစားမသောက်လီ။ ယင်းအတွက်န ကိုယ်ဘင်ရို့၊ ‘သူ့ကို နတ်ဆိုး ကိုင်နီဗျာ’ ဟို့ ပြောကတ်တေ။ 34အရာ မနုသသားတော် ကြွလာရေခါ အခြားလူရို့ပိုင် စားသောက်လီရေ။ ယင်းအတွက်န ကိုယ်ဘင်ရို့ ပြောကတ်တေ၊ ‘ထိုမာ စားကြူး-သောက်ကြူးသူတစ်ယောက်ကို ကြည့်လိုက်ကတ်! သူစာ ဖန်ဒါကောက်သမားရို့န လူဆိုးရို့မာ မိတ်ဆွေ ဖြစ်တေ။’ 35ယေကေလည်း အသူ့မာမဆို ညာဏ်ပညာ ကောင်းရေ မကောင်းဆိုစာကို သူ့အလုပ်ကနီရို့ သိရရေ။”

ပြည်တန်းဆာမ အပြစ်ကို ခွင့်ရွှတ်ခြင်း

36တစ်ရက်နိ ရှိမုန်နာမည်န ဖာရိရှဲအဖွဲ့သားတစ်ယောက်စာ ကိုယ်နအတူ စားသောက်ဖို့အတွက် ယေရှုကို ဖိတ်ခေါ်လီရေ။ ယင်းခါ ယေရှုစာ သူ့အိမ်တို့ ကြွရို့ စားပွဲမာ ထိုင်လီရေ။ 37ယင်းရွာမာ ပြည်တန်းဆာမ တစ်ယောက် ဟိလီရေ။ သူစာ ဖာရိရှဲအဖွဲ့သား အိမ်မာ ယေရှု စားသောက်ဖို့ ရောက်နီရေဆိုစာကို သိလီရေ။ ယင်းခါ သူစာ ကောင်းကောင်း တန်ဖိုးဟိစာ ရီမွှီးဆီကို တန်ဖိုးဟိစာ ကျောက်ဖြူဗူးတစ်လုံးမာ ထည့်ရို့ ယူလာလီရေ။ 38အရာ သူစာ နောက်ကနီရို့ ယေရှုအခြီရင်းမာ ရပ်လီရေ အရာ ငိုရို့ ယေရှုအခြီကို ကိုယ့်မျက်ရည်န စွတ်အောင် လုပ်လီရေ။ ယင်းနောက် သူစာ ကိုယ့်ဆံပင်န ယေရှုအခြီကို ပွတ်လီရေ အရာ ယေရှုအခြီကို နမ်းရို့ ထို ရီမွှီးဆီကို အခြီမာ သွန်လီရေ။

39စားသောက်ဖို့အတွက် ယေရှုကို ဖိတ်ခေါ်လီစာ ဖာရိရှဲအဖွဲ့သားစာ ယင်းသျှင့်ကို မြင်ရို့ စိတ်မာ စိတ်မာ ပြောလီရေ၊ “ဒေလူ ဘုရားသတင်းပို့သူ ဖြစ်ဖို့ဆိုကေ သူ့အခြီကို ကိုင်စာ မိန်းမ အသူလည်းဆိုစာကို အရာ ဇာပိုင်ဇာတ် မိန်းမလည်းဆိုစာကို သိဖို့ကောင်းရေ၊ အကြောင်းကား ဒေ မိန်းမကား အပြစ်သေရာ။”

40ယေရှုစာ ထိုဖာရိရှဲအဖွဲ့သားကို ပြောလီရေ၊ “ရှိမုန်၊ နင့်ကို ငါ ပြောစရာတစ်ခု ဟိရေ။” ရှိမုန်စာ ပြောလီရေ၊ “ပြောပါ၊ ဆရာ။”

41ယေရှုစာ ပြောလီရေ၊ “လူနှစ်ယောက်စာ သူဌေးတစ်ယောက်က တန်းကား ချီးကတ်လီရေ။ တစ်ယောက်စာ ငွေသားတန်းကား ငါးရာ ချီးလီရေ အရာ အခြားတစ်ယောက်စာ ငွေသားတန်းကား ငါးဆယ် ချီးလီရေ။ 42သူရို့ အကြွီးဆပ်ဖို့ မနိုင်ရေအတွက်န သူဌေးစာ သနားရို့ သူရို့နှစ်ယောက်စုံကို ခွင့်ရွှတ်လိုက်လီရေ။ ယင်းပိုင်ဆိုကေ နင် ပြောကြည့်န၊ သူရို့နှစ်ယောက်မာ ထိုသူဌေးကို အသူ အများ ချစ်ဖို့လည်း?” 43ရှိမုန်စာ ပြောလီရေ၊ “အကြွီးအများကြီး ဆပ်ဖို့ရွတ်သူရာ အများကြီး ချစ်ဖို့ ထင်ပါရေ။” ယေရှုစာ သူ့ကို ပြောလီရေ၊ “နင့်စကား မှန်ရေ။”

44ယင်းနောက် ယေရှုစာ ထိုမိန်းမဖက်တို့ လှည့်ရို့ ရှိမုန်ကို ပြောလီရေ၊ “နင် ဒေ မိန်းမကို မြင်လော? ငါ နင့်အိမ်တို့ ဝင်ရေခါ နင် ငါ့ကို အခြီဆီးဖို့ ရီမပီးလီ၊ ယေကေလည်း ဒေ မိန်းမ ကိုယ့်မျက်ရည်န ငါ့အခြီကို ဆီးလီရေ အရာ ကိုယ့်ဆံပင်န ငါ့အခြီကို ပွတ်လီရေ။ 45နင် ငါ့ကို နမ်းရို့ နှုတ်မဆက်လီ၊ ယေကေလည်း ငါ နင့်အိမ်တို့ ဝင်ရေလှောက်ကပင် သူစာ ငါ့အခြီကို နမ်းနီရေ။ 46နင် ငါ့အဂေါင်းမာ ဆီမထည့်လီ၊ ယေကေလည်း သူစာ ငါ့အခြီမာ ရီမွှီးဆီ သွန်လီရေ။ 47ယင်းအတွက်န နင့်ကို ငါ ပြောရေ၊ သူ့မာ အပြစ်များကေလည်းသောက် သူစာ အပြစ် ခွင့်ရွှတ်ခြင်းကို ခံရဗျာ၊ အကြောင်းကား သူစာ ချစ်ခြင်းမေတ္တာ အများကြီး ဖေါ်ပြလီရေ။ ယေကေလည်း အပြစ်အနည်းသျှေ ခွင့်ရွှတ်ခြင်းကို ခံရသူစာ အနည်းသျှေရာ ချစ်တေ။”

48ယင်းနောက် ယေရှုစာ ထိုမိန်းမကို ပြောလီရေ၊ “နင့်အပြစ်ကို ခွင့်ရွှတ်လိုက်ပျာ။” 49ယေရှုနအတူ စားပွဲမာ ထိုင်လီသူရို့စာ စိတ်မာ စိတ်မာ မှတ်ကတ်လီရေ၊ “လူအပြစ်ကို တိုင်အောင်ပင် ခွင့်ရွှတ်ဖို့ နိုင်လတ်အောင် ဒေသူ အသူလည်း?” 50ယင်းခါ ယေရှုစာ ထိုမိန်းမကို ပြောလီရေ၊ “နင့် ကျုံခြင်းတရားစာ နင့်ကို ကယ်တင်ခြင်း ပီးဗျာ။ နင် စိတ်အီးချမ်းသာန ပြန်လားလီဖိ။”