Luke 9

တမန်တော်ရို့ကို တရားဟောဖို့ ရွှတ်ခြင်း

(မဿဲ ၁၀:၅-၁၅၊ မာကု ၆:၇-၂၉)

1ယင်းနောက် ယေရှုစာ ထိုတပည့်တစ်ဆယ့်နှစ်ယောက်ကို ခေါ်ရို့ စုလီရေ အရာ ဟိသမျ နတ်ဆိုးတိကို နှင်ထုတ်ဖို့စာ တန်ခိုးန အခွင့်အာဏာကို ပီးလီရေ။ အရာ သူစာ ရောဂါ ကောင်းအောင် လုပ်ဖို့စာ တန်ခိုးကိုလည်း သူရို့ကို ပီးလီရေ။ 2ယင်းနောက် သူစာ ထာဝရဘုရား၏ နိုင်ငံတော် အကြောင်းကို ဟောပြောဖို့အတွက်န ရောဂါသေရို့ကို ကောင်းအောင် လုပ်ဖို့အတွက် သူရို့ကို ရွှတ်လိုက်လီရေ။ 3သူစာ တပည့်ရို့ကို ပြောလီရေ၊ “နင်ရို့ လားရေလမ်းမာ အသုံးပြုဖို့အတွက် တောင်မိ၊ ရွယ်အိပ်၊ စားစရာ၊ မဟုတ်ကေ တန်းကား တစ်ပြားလည်း မယူလီကတ်ကေ့၊ ယင်းထက်မက အင်္ကျီလည်းသောက် တစ်လုံးထက် နှစ်လုံး မယူလီကတ်ကေ့။ 4နင်ရို့ အသူ့အိမ်မာမဆို တည်းရေဆိုကေ ထို ရွာက ထွက်မလားသကြား ယင်းအိမ်မာ နီလီကတ်။ 5နင်ရို့ကို လူရို့ လက်မခံကတ်ဆိုကေ သူရို့ ရွာက ထွက်လားကတ်တေခါ သူရို့ကို သတိပီးစာ အမှတ်တရအဖြစ် နင်ရို့ အခြီက ကျုပ်မုန့်ကို ခါချဘိုက်ခကတ်။” 6ယင်းခါ တပည့်ရို့စာ ရွာတိုင်း ရွာတိုင်း လည်ရို့ ထာဝရဘုရား၏ နိုင်ငံတော် သတင်းကောင်းကို ဟောပြောကတ်လီရေ အရာ ရောဂါကောင်းအောင် လုပ်ကတ်လီရေ။

ဟေရုဒ်မင်း စဉ်းစားရို့မရ ဖြစ်ခြင်း

(မဿဲ ၁၄:၁-၂၊ မာကု ၆:၁၄-၁၆)

7ယေရှု လုပ်လီစာ ဟိသမျ အလုပ်အကြောင်းကို ကြားရို့ အုပ်ချုပ်သူ ဟေရုဒ်မင်းစာ တစ်ခုလည်း စဉ်းစားရို့ မရ ဖြစ်လီရေ၊ အကြောင်းကား တစ်ယောက်တစ်ရီ ပြောကတ်လီရေ၊ “ရီနှစ်မင်္ဂလာပီးသူ ယောဟန် သီရာက ပြန်ရှင်ထမြောင့်ဗျာ။” 8အရာ တစ်ယောက်တစ်ရီ ပြောကတ်လီရေ၊ “ဧလိယ ကြွလာဗျာ။” အရာ တစ်ယောက်တစ်ရီ ပြောကတ်လီရေ၊ “ခိုက်ဟောင်းက ဘုရားသတင်းပို့သူတစ်ပါး ပြန်ရှင်ထမြောင့်ဗျာ။” 9ဟေရုဒ်မင်းစာ ပြောလီရေ၊ “ယောဟန် အဂေါင်းကိုကား ငါ ဖြတ်ဘိုက်လိုက်ပျာ။ ယင်းပိုင်ဆိုကေ အသူ့ အကြောင်းကို ငါ ကြားရစာလည်း?” ယင်းအတွက်န ဟေရုဒ်စာ ယေရှုကို ကြည့်ဖို့ ကြိုးစားလီရေ။

လူငါးထောင်ကို ကျွေးခြင်း

(မဿဲ ၁၄:၁၃-၂၁၊ မာကု ၆:၃၀-၄၄၊ ယောဟန် ၆:၁-၁၅)

10ယေရှု ရွှတ်လိုက်လီစာ တပည့်ရို့ ပြန်လာကတ်လီရေ အရာ သူရို့စာ ကိုယ်ရို့ လုပ်ခကတ်စာ ဟိသမျ အကြောင်းကို ယေရှုဘားမာ ပြောပြကတ်လီရေ။ ယင်းခါ ယေရှုစာ သူရို့ကို ယူရို့ ဗက်ဇဲဒရွာအနားက တတိန်းဆဆိတ်နေရာ တစ်ခုတို့ ကြွလီရေ။ 11ယေကေလည်း လူရို့စာ ထိုသတင်းကို ကြားရို့ ယေရှု နောက်က နောက်က လိုက်ကတ်လီရေ။ ယေရှုစာ ထိုလူရို့ကို လက်ခံလီရေ အရာ သူရို့ဘားမာ ထာဝရဘုရား၏ နိုင်ငံတော် အကြောင်းကို ဟောပြောလီရေ။ အရာ ရောဂါကောင်းဖို့ လိုသူရို့ကို ကောင်းအောင် လုပ်လီရေ။ 12နီဝင်လာရေခါ ထိုတပည့်တစ်ဆယ့်နှစ်ယောက်စာ ယေရှုတို့ လာရို့ ပြောကတ်လီရေ၊ “ဒေဂု အကျွန်ရို့ ဟိစာနေရာစာ တတိန်းဆဆိတ်နေရာ ဖြစ်ပါရေ။ ယင်းအတွက်န ဒေ လူရို့ အပါးနီးဝန်းကျင်မာ ရွာတိတို့ လားရို့ အစားဝယ်ဖို့ ရလတ်အောင် အရာ ကိုယ်ရို့ တည်းခိုဖို့စာနေရာ ရှာဖို့ ရလတ်အောင် သူရို့ကို ရွှတ်လိုက်ပါဖိ။” 13ယေကေလည်း ယေရှုစာ သူရို့ကို ပြောလီရေ၊ “နင်ရို့ ကိုယ်တိုင် သူရို့ကို တစ်ခုမသာ စားဖို့ ပီးလိုက်ကတ်။” ယင်းခါ သူရို့စာ ပြောကတ်လီရေ၊ “ယေကေလည်း အကျွန်ရို့ဘားမာ ပေါင်မုန့် ငါးသျှက်န ငါးနှစ်ကောင်တောက်ရာ ဟိပါရေ။ အကျွန်ရို့ လားရို့ ဒေ ဟိသမျ လူရို့အတွက် အစားဝယ်ယူခဖို့ ရဖို့ဆိုကေ သူရို့ကို ကျွေးဖို့ ရပါဖို့။” 14အကြောင်းကား ယင်းနေရာမာ ယောက်ျား သက်သက် ငါးထောင်လှောက် ဟိလီရေ။ ယေရှုစာ ကိုယ့်တပည့်ရို့ကို ပြောလီရေ၊ “တစ်စုစီမာ အယောက်ငါးဆယ်၊ ငါးဆယ် ထိုင်စီကတ်။” 15တပည့်ရို့စာ ဟိသမျ လူရို့ကို ယင်းပိုင်တထန် ထိုင်စီကတ်လီရေ။ 16ယင်းခါ ယေရှုစာ ထိုပေါင်မုန့် ငါးသျှက်န ငါးနှစ်ကောင်ကို ယူရို့ ဂေါင်းခင်ဘုံတို့ မော်ကြည့်ရို့ ထာဝရဘုရားကို ကျေးဇူးတင်လီရေ။ ယင်းနောက် သူစာ ပေါင်မုန့်တိကို ဖဲ့ရို့ လူရို့ကို ဝီပီးဖို့အတွက် တပည့်ရို့အလက်မာ အပ်လီရေ။ 17ယင်းခါ လူရို့ အားကုံးသူ ဝအောင် စားကတ်လီရေ။ ယင်းနောက် ကျရို့ဟိစာ အပဲ့အခြမ်းတိကို တပည့်ရို့ ကောက်ကတ်တေခါ တစ်ဆယ့်နှစ်တောင်း ဖြစ်လီရေ။

ယေရှုကို ခရစ်တော် ဟို့ ဝန်ခံခြင်း

(မဿဲ ၁၆:၁၃-၂၀၊ မာကု ၈:၂၇-၃၀)

18တစ်ရက်နိ ယေရှုစာ တတိန်းဆဆိတ် နေရာတစ်ခုတို့ ကြွရို့ ဆုတောင်းလီရေ။ ယင်းခါ သူနအတူ သက်သက် သူ့တပည့်ရို့ရာ ဟိကတ်လီရေ။ သူစာ တပည့်ရို့ကို မီးလီရေ၊ “လူရို့ ငါ့ကို အသူ ဖြစ်တေ ဟို့ ပြောကတ်တေလည်း?” 19တပည့်ရို့စာ အဖြေပီးကတ်လီရေ၊ “တစ်ယောက်တစ်ရီ ပြောကတ်ပါရေ၊ ကိုယ်တော် ရီနှစ်မင်္ဂလာပီးသူ ယောဟန် ဖြစ်တေ။ တစ်ယောက်တစ်ရီ ပြောကတ်ပါရေ၊ ဧလိယ ဖြစ်တေ။ အရာ တစ်ယောက်တစ်ရီ ပြောကတ်ပါရေ၊ ခိုက်ဟောင်းက ဘုရားသတင်းပို့သူတစ်ပါး ပြန်ရှင်ထမြောင့်ဗျာ။” 20ယင်းခါ ယေရှုစာ သူရို့ကို မီးလီရေ၊ “ယေကေလည်း နင်ရို့ကား ငါ့ကို အသူဖြစ်တေ ဟို့ ပြောကတ်တေလည်း?” ပေတရုစာ အဖြေပီးလီရေ၊ “ကိုယ်တော် ထာဝရဘုရား၏ ခရစ်တော် ဖြစ်ပါရေ။”

ကိုယ်သီဖို့စာ အကြောင်းကို ပထမခေါက် ပြောပြခြင်း

(မဿဲ ၁၆:၂၁-၂၃၊ မာကု ၈:၃၁-၃၃)

21ယင်းခါ ကိုယ့်အကြောင်းကို တစ်ယောက်ဘားမာလည်း မပြောရအောင် ယေရှုစာ တပည့်ရို့ကို တတင်းရရင်း ဟန့်လိုက်လီရေ။ 22သူစာ တပည့်ရို့ကို အရာလည်း ပြောလီရေ၊ “မနုသသားတော်စာ ဒုက္ခ-ဝေဒနာ အများကြီး ခံရလိမည်။ ဂေါင်းဆောင်ဝါကြီးရို့၊ ယဇ်ပုရောဟိတ်အကြီးရို့ အရာ ကျမ်းဆရာရို့စာ သူ့ကို ငြင်းပယ်ကတ်လိမည်၊ သူ့ကို အသီသတ်ကတ်လိမည် အရာ သူစာ သုံးရက်နိမာ သီရာက ပြန်ရှင်ထမြောင့်လိမည်။”

နင့်ကားတိုင်ကို ရွက်ရို့ ငါ့နောက်က လိုက်ရဖို့

(မဿဲ ၁၆:၂၄-၂၈၊ မာကု ၈:၃၄-၉:၁)

23ယင်းနောက် သူစာ အားကုံးသူကို ပြောလီရေ၊ “အသူမဆို ငါ့နောက်က လိုက်ချင်ရေဆိုကေ သူစာ ကိုယ့်ကို ငြင်းပယ်ရဖို့ အရာ သူစာ နိတိုင်း ကိုယ့်ကားတိုင်ကို ရွက်ရို့ ငါ့နောက်က လိုက်ရဖို့။ 24အရာ အသူမဆို ကိုယ့်အသက်ကို ကယ်ဆယ်ချင်ရေဆိုကေ သူစာ ကိုယ့်မာ ထာဝရအသက်ကို ဆုံးရလိမည်၊ ယေကေလည်း အသူမဆို ငါ့အကြောင်းန ကိုယ့်အသက်ကို အဆုံးခံရေဆိုကေ သူစာ ကိုယ့်မာ ထာဝရအသက်ကို ကယ်ဆယ်လိမည်။ 25အသူမဆို တစ်လောကလုံးကို အနိုင်ရရို့ပင်လည်း ကိုယ့်မာ ထာဝရအသက်ကို ဆုံးရရေဆိုကေ ယင်းသူမာ ဇာအမြတ် ဟိရေလည်း? 26အသူမဆို ငါန ငါ့စကားကို ယူရို့ ရှက်တေဆိုကေ မနုသသားတော်လည်း ကိုယ့်ဘုန်းတန်ခိုး၊ အဖ၏ ဘုန်းတန်ခိုး အရာ သန့်ရှင်းစာ ဂေါင်းခင်နတ်သားရို့ ဘုန်းတန်ခိုးကို ဆောင်ရို့ ကြွလာရေခါ ယင်းသူကို ယူရို့ ရှက်လိမည်။ 27ငါ နင်ရို့ကို အမှန် ပြောရေ၊ ထာဝရဘုရား၏ နိုင်ငံတော်ကို မမြင်ရသကြား တစ်ခုပိုင်လည်း သီရဖို့ မဟုတ်စာ လူလိုင်းကေယောက် ဒေ နေရာမာ ဟိကတ်တေ။”

ယေရှု မျက်နှာက ဘုန်းရောင်ခြေတော် ထွက်ခြင်း

(မဿဲ ၁၇:၁-၁၃၊ မာကု ၉:၂-၁၃)

28ထိုစကားတိကို ပြောရို့ တစ်ပတ်လှောက် ကြာရေခါ ယေရှုစာ ဆုတောင်းဖို့အတွက် တောင်တစ်တောင်တို့ တက်လီရေ။ ယင်းခါ သူစာ ပေတရု၊ ယောဟန် အရာ ယာကုပ်ကို ကိုယ်နအတူ ခေါ်ယူလီရေ။ 29ယေရှု ဆုတောင်းရေခါ သူ့မာ မျက်နှာစာ ပြောင်းလှဲလားခလီရေ အရာ သူ့မာ အဝတ်အစားတိစာ ဖဖွီးဆဆွ ဖြစ်ရို့ တောက်ပြောင်လီရေ။ 30အရာ လူနှစ်ယောက် ပေါ်လာရို့ သူနအတူ စကား ပြောကတ်လီရေ။ ထိုလူနှစ်ယောက်စာ မောရှေန ဧလိယ ဖြစ်ကတ်တေ။ 31သူရို့စာ ဘုန်းရောင်ခြေတော်နအတူ ပေါ်လာကတ်လီရေ။ သူရို့စာ ရှိတို့ ယေရုရှလင်မြို့မာ ယေရှု အသီခံရဖို့စာ အကြောင်းကို ယူရို့ တိုင်ဘင်ကတ်လီရေ။ 32ယင်းခါ ပေတရုန သူ့အဖက်သားရို့စာ ငိုက်ရို့ ငိုက်ရို့ အိပ်မောကျကတ်လီရေ။ သူရို့ နိုးကတ်တေခါ ယေရှု၏ ဘုန်းရောင်ခြေတော်ကို မြင်ရကတ်လီရေ အရာ သူနအတူ လူနှစ်ယောက်ကိုလည်း မြင်ရကတ်လီရေ။ 33ထိုလူနှစ်ယောက် ယေရှုနိုင်ဗြင်းက လားကတ်တေခါ ပေတရုစာ ယေရှုကို ပြောလီရေ၊ “ဆရာ၊ အကျွန်ရို့ ဒေ နေရာမာ ဟိကတ်စာ ကောင်းပါရေ။ အကျွန်ရို့ ဒေ နေရာမာ တဲသုံးဆောင် ဆောက်ကတ်ပါမည်၊ ကိုယ်ဘင်အတွက် တစ်ဆောင်၊ မောရှေအတွက် တစ်ဆောင် အရာ ဧလိယအတွက် တစ်ဆောင် ဆောက်ကတ်ပါမည်။” သူစာ ကိုယ် ဇာ ပြောလီရေလည်းဆိုစာကို သူကိုယ်တိုင် နားမလည်လီ။ 34ပေတရု စကားပြောနီတုံးမာ မိုးရိပ်တစ်ခဲ လာရို့ သူရို့ကို ချုပ်ဘိုက်လီရေ။ သူရို့စာ ထိုမိုးရိပ်အောက်မာ ပါလားခရေခါ ကြောက်ကတ်လီရေ။ 35ထိုမိုးရိပ်အထဲက ဒေပိုင် စကားပြောသံကို ကြားရလီရေ၊ “ဒေသူ ငါ့အချစ်သား ဖြစ်တေ။ ငါ သူ့ကို ရွီးကောက်ယူဗျာ။ နင်ရို့ သူ့စကားကို နားထောင်ကတ်။” 36စကားပြောရို့ တန့်လားခရေခါ တပည့်ရို့စာ ယေရှု တစ်ပါးတည်းကိုရာ မြင်ရကတ်လီရေ။ တပည့်ရို့စာ ကိုယ်ရို့ မြင်ရလီကတ်စာ အကြောင်းတိကို ယင်းအချိန်ခါ တစ်ယောက်ဘားမာလည်း မပြောဘိုင်းန တိန်းရို့ နီကတ်လီရေ။

နတ်ဆိုးကိုင်စာ ယောက်ျားသျှေ အကောင်းဖြစ်ခြင်း

(မဿဲ ၁၇:၁၄-၂၁၊ မာကု ၉:၁၄-၂၉)

37နောက်တစ်ရက်နိ ယေရှုန တပည့်သုံးယောက်စာ တောင်ထက်က ဆင်းလာကတ်လီရေ။ ယင်းခါ လူအများကြီး ယေရှုန အတွိခံဖို့ လာကတ်လီရေ။ 38ယင်းခါ လူကျိုင်ထဲက လူတစ်ယောက်စာ အားန အော်ရို့ ယေရှုကို ပြောလီရေ၊ “ဆရာ၊ ကျေးဇူးပြုရို့ အကျွန့် သားကို တစ်ခေါက် ကြည့်ပါ။ သူစာ အကျွန့်မာ တစ်ယောက်တည်း သား ဖြစ်ပါရေ။ 39သူ့ကို နတ်ဆိုးတစ်ကောင် ကိုင်ထားပါရေ အရာ သူစာ ဗြုန်းခနိုင်းပျင်ရို့စီ အော်ပါရေ။ နတ်ဆိုးစာ သူ့ကို တုန်တက်အောင် လုပ်တေခါ သူ့ပစက အမြှုပ်ထွက်ပါရေ။ ယင်းနောက် နတ်ဆိုးစာ သူ့ကို အနာရအောင် ညှဉ်းဆဲရို့ ပြီးရေခါ ထွက်လားခပါရေ။ နတ်ဆိုးစာ သူ့ကို အမြဲတိုင်း ယင်းပိုင် ညှဉ်းဆဲရို့ထားလီပါရေ။ 40နတ်ဆိုးကို နှင်ထုတ်ဖို့အတွက် အကျွန် ကိုယ်ဘင်မာ တပည့်ရို့ကို တောင်းပန်လီပါရေ၊ ယေကေလည်း သူရို့ နှင်ထုတ်ဖို့ မနိုင်လီကတ်ပါ။” 41ယင်းခါ ယေရှုစာ ပြောလီရေ၊ “အိုး မကျုံသူရို့န လမ်းမှားသူရို့! ငါ နင်ရို့နအတူ ဇာမျှရက် နီဖို့သိလည်း? အရာ နင်ရို့ကို ဇာမျှရက် သည်းခံရို့ နီဖို့သိလည်း? နင့် သားကို ငါ့တို့ ယူခ။” 42ထိုသူစာ ယေရှုတို့ လာရေခါ နတ်ဆိုးစာ သူ့ကို မြေပြင်မာ လှဲချလိုက်ရို့ ပပြန်းတုန်တက်အောင် လုပ်လီရေ။ ယေကေလည်း ယေရှုစာ ထိုနတ်ဆိုးကို ဟောက်လီရေ အရာ ထိုသူကို ကောင်းအောင် လုပ်ရို့ သူ့အဖတို့ ပြန်ပီးလိုက်လီရေ။ 43ယင်းခါ ဟိသမျ လူရို့စာ ထာဝရဘုရား၏ မဟာတန်ခိုးကို မြင်ရို့ အံ့ဩကတ်လီရေ။

ကိုယ်သီဖို့စာ အကြောင်းကို ဒုတိယခေါက် ပြောပြခြင်း

(မဿဲ ၁၇:၂၂-၂၃၊ မာကု ၉:၃၀-၃၂)

ယေရှု လုပ်လီစာ အကြောင်းအရာကို မြင်ရို့ အားကုံးသူ အံ့ဩရို့ စဉ်းစားနီကတ်တေခါ သူစာ ကိုယ့်တပည့်ရို့ကို ပြောလီရေ၊ 44“ငါ့စကားကို စိတ်ဝင်စားရို့ နားထောင်ကတ်၊ မနုသသားတော်စာ လူရို့အလက်မာ အဖမ်းခံရလိမည်။” 45ယေကေလည်း တပည့်ရို့စာ ယေရှု ပြောစာစကားကို နားမလည်လီကတ်၊ အကြောင်းကား သူရို့ နားမလည်လတ်အောင် ထာဝရဘုရားစာ ထိုအကြောင်းကို သူရို့က ဖုံးရွှက်ရို့ ထားလီရေ။ တပည့်ရို့စာ ထိုအကြောင်းနပတ်သပ်ရို့ ယေရှုကို စကားတစ်ခွန်းလည်း မီးဖို့ မဝံ့ကတ်လီ။

တပည့်ရို့အထဲမာ အကြီးဆုံး အသူလည်း?

(မဿဲ ၁၈:၁-၅၊ ၁၉-၂၂၊ မာကု ၉:၃၃-၄၀)

46တပည့်ရို့စာ ကိုယ်ရို့အထဲမာ အကြီးဆုံး အသူလည်းဆိုစာ အကြောင်းကို ယူရို့ ကိုယ်ရို့အချင်းချင်း အငြင်းအခုံ ဖြစ်ကတ်လီရေ။ 47ယေရှုစာ သူရို့ စိတ်နှလုံးမာ စဉ်းစားချက်ကို သိရေခါ အသျှေတစ်ယောက်ကို ခေါ်ရို့ ကိုယ့်အနားမာ ရပ်စီလီရေ။ 48အရာ သူစာ တပည့်ရို့ကို ပြောလီရေ၊ “အသူမဆို ငါ့နာမည်န ဒေ အသျှေကို လက်ခံရေဆိုကေ သူစာ ငါ့ကို လက်ခံရေ။ အရာ ငါ့ကို လက်ခံသူစာ ငါ့ကို ရွှတ်လိုက်သူကို လက်ခံရေ။ နင်ရို့အထဲမာ အားကုံးသူထက် အသျှေဆုံး ဖြစ်သူစာ အားကုံးသူထက် အကြီးဆုံး ဖြစ်တေ။”

ငါရို့ကို မဆန့်ကျင်သူစာ ငါရို့အဖွဲ့သား

(မာကု ၉:၃၈-၄၁)

49ယောဟန်စာ ယေရှုကို ပြောလီရေ၊ “ဆရာ၊ ကိုယ်ဘင်နာမည်န လူတစ်ယောက် နတ်ဆိုး နှင်ထုတ်စာကို အကျွန်ရို့ မြင်ခပါရေ။ သူစာ အကျွန်ရို့အဖွဲ့သား မဟုတ်ပါ။ ယင်းအတွက်န အကျွန်ရို့ သူ့ကို ဟန့်ဘိုက်ခပါရေ။” 50ယေရှုစာ သူ့ကို ပြောလီရေ၊ “သူ့ကို မဟန့်ကတ်ကေ့၊ အကြောင်းကား နင်ရို့ကို မဆန့်ကျင်သူစာ နင်ရို့အဖွဲ့သား ဖြစ်တေ။”

ရှမာရိပြည်နယ်သားရို့ ယေရှုကို ငြင်းပယ်ခြင်း

51ယေရှုစာ ကိုယ်ဂေါင်းခင်ဘုံတို့ ကြွဖို့စာအချိန် ကျလာရေခါ ယေရုရှလင်မြို့တို့ ဝင်ဖို့အတွက် စိတ်က ဆုံးဖြတ်လီရေ။ 52သူစာ အယင်ဆုံး ထိုနေရာတို့ လူရွှတ်လိုက်လီရေ။ သူရို့စာ ယေရှုအတွက် အားကုံးစာ အဆင်သင့် လုပ်ဖို့ရလတ်အောင် ရှမာရိပြည်နယ်မာ ရွာတစ်ရွာတို့ ဝင်ကတ်လီရေ၊ 53ယေကေလည်း ထို ရွာသားရို့စာ ယေရှု ယေရုရှလင်မြို့တို့ ကြွရေအတွက်န သူ့ကို လက်မခံလီကတ်။ 54ယင်းသျှင့်ကို မြင်ရို့ ယာကုပ်န ယောဟန် သူ့မာ တပည့်နှစ်ယောက်စာ ပြောလီရေ၊ “အသျှင်၊ ဧလိယပိုင် အကျွန်ရို့ ဂေါင်းခင်ဘုံက မီးချရို့ သူရို့ကို ဖျက်စီးဘိုက်လိုက်ဖို့စာကို ကိုယ်တော် လိုပါရေလော?” 55ယင်းခါ ယေရှုစာ လှည့်ရို့ သူရို့ကို ဟောက်လီရေ။ 56ယင်းနောက် သူရို့စာ အခြားတစ်ရွာတို့ ကြွလီရေ။

တပည့်အစစ် ဖြစ်ရဖို့စာ အကြောင်း

(မဿဲ ၈:၁၉-၂၂)

57သူရို့ လမ်းမာ လားကတ်တေခါ လူတစ်ယောက် လာရို့ ယေရှုကို ပြောလီရေ၊ “ကိုယ်ဘင် လားစာနေရာတို့ အကျွန်လည်း လိုက်ပါဖို့။” 58ယေရှုစာ သူ့ကို ပြောလီရေ၊ “ခဲဝါမာ တွင်းဟိရေ အရာ ငှက်မာလည်း တင်းဟိရေ၊ ယေကေလည်း မနုသသားတော်မာ အဂေါင်းချစရာ တစ်ရပ်မာလည်း မဟိ။”

59ယင်းနောက် ယေရှုစာ အခြားတစ်ယောက်ကို ပြောလီရေ၊ “ငါ့နောက်က လိုက်။” ယေကေလည်း ထိုလူစာ ပြောလီရေ၊ “အသျှင်၊ အကျွန် အယင်ဆုံး လားရို့ အကျွန့် အဖကို သင်္ဂြိုဟ်ဖို့ အခွင့်ပီးပါ။” 60ယေရှုစာ သူ့ကို ပြောလီရေ၊ “လူသီရို့စာ ကိုယ်ရို့မာ လူသီရို့ကို သင်္ဂြိုဟ်ကတ်ပတ်စီ၊ ယေကေလည်း နင် လာရို့ ထာဝရဘုရား၏ နိုင်ငံတော် အကြောင်းကို ဟောပြောခလိုက်။”

61အရာ တစ်ယောက် ပြောလီရေ၊ “အသျှင်၊ အကျွန် ကိုယ်တော် နောက်က လိုက်ပါမည်၊ ယေကေလည်း အကျွန် အယင်ဆုံး အိမ်တို့ လားရို့ ပြောပါခိမည်။” 62ယေရှုစာ သူ့ကို ပြောလီရေ၊ “အပ်ကိုင်းကို ကိုင်ရို့ နောက်တို့ လှည့်ကြည့်သူစာ ထာဝရဘုရား၏ နိုင်ငံတော်န မထိုက်တန်။”