Luk 14:15-24 | RmzSC | STEP | စားသောက်ဖို့ ထိုင်သူရို့အထဲက တစ်ယောက်စာ ယေရှု ပြောစာစကားကို ကြားရို့ သူ့ကို ပြောလီရေ၊ “ထာဝရဘုရား၏ နိုင်ငံတော် စားပွဲမာ ထိုင်ဖို့သူစာ မင်္ဂလာဟိရေ။”

Luke 14:15-24

စားပွဲကြီး တစ်ပွဲ ပုံဥပမာ

(မဿဲ ၂၂:၁-၁၄)

15 စားသောက်ဖို့ ထိုင်သူရို့အထဲက တစ်ယောက်စာ ယေရှု ပြောစာစကားကို ကြားရို့ သူ့ကို ပြောလီရေ၊ “ထာဝရဘုရား၏ နိုင်ငံတော် စားပွဲမာ ထိုင်ဖို့သူစာ မင်္ဂလာဟိရေ။”

16 ယေရှုစာ ပြောလီရေ၊ “လူတစ်ယောက်စာ စားပွဲကြီး တစ်ပွဲ စီစဉ်ရို့ လူအများကြီးကို ဖိတ်ခေါ်လီရေ။ 17 စားသောက်ဖို့ အချိန် ကျလာရေခါ သူစာ ဖိတ်ခေါ်ထားသူရို့ကို ခေါ်ဖို့အတွက် ဒေပိုင် ပြောရို့ ကိုယ့်ကျွန်ရို့ကို ရွှတ်လိုက်လီရေ၊ ‘လာကတ်ပါဖိ၊ ဒေဂု အားကုံးစာ အဆင်သင့် ဖြစ်ပါဗျာ။’ 18 ယေကေလည်း သူရို့ အားကုံးသူ တစ်ယောက်ပြီးကေ တစ်ယောက် အကြောင်း ပြကတ်လီရေ။ ပထမ တစ်ယောက်စာ ထိုကျွန်ကို ပြောလီရေ၊ ‘ငါ လယ်တစ်ကွက် ဝယ်ထားရို့ ဟိရေ။ ယင်းအတွက်န ငါ လားရို့ ထိုလယ်ကို ကြည့်ခီရဖို့။ ကျေးဇူးပြုရို့ ငါ့ကို ခွင့်ရွှတ်ဖိ။’ 19 ဒုတိယ တစ်ယောက်စာ ပြောလီရေ၊ ‘ငါ့မာ နွားတွီးငါးသျှဉ်း ဝယ်ထားရို့ ဟိရေ။ ယင်းအတွက်န ငါ ထိုနွားတွီးတိကို လားရို့ ကြည့်ခီရဖို့။ ကျေးဇူးပြုရို့ ငါ့ကို ခွင့်ရွှတ်ဖိ။’ 20 တတိယ တစ်ယောက်စာ ပြောလီရေ၊ ‘ငါ မယားနစပ်ပျာ။ ယင်းအတွက်န ငါ လားဖို့ မရ။’

21 “ထိုကျွန်စာ ပြန်လာပြီးကေ သူရို့ ပြောလိုက်စာ စကားတိကို ကိုယ့်အပိုင်သျှင်ဘားမာ ပြောပြလီရေ။ ယင်းခါ အပိုင်သျှင်စာ မန်တက်ရို့ ကိုယ့်ကျွန်ကို ပြောလီရေ၊ ‘မြို့လမ်းမတိန လက်ကြားတိတို့ နင် အယင်အမြန် လားရို့ ဆင်းရဲသားရို့ကို၊ အင်္ဂါပျက်ရို့ကို၊ မျက်ကန်းရို့ကို အရာ အခြီသောင်ရို့ကို ဒေ နေရာတို့ ခေါ်ယူခ။’ 22 ကိုယ့်အပိုင်သျှင် ပြောရေအတိုင်း လုပ်ပြီးရေခါ ထိုကျွန်စာ ပြောလီရေ၊ ‘ဆရာ၊ ကိုယ်ဘင် အာဏာချရေအတိုင်း အားကုံးစာ လုပ်ပြီးပါဗျာ၊ ယေကေလည်း ဒေဂုလည်းသောက် နေရာအလတ် ဟိပါသိရေ။’ 23 ယင်းခါ အပိုင်သျှင်စာ ကျွန်ကို ပြောလီရေ၊ ‘မြို့ပြင်က လမ်းမတိန ရွာလမ်းတိတို့ လားရို့ ဒေ နေရာတို့ လာဖို့အတွက် လူရို့ကို အားတင်ရို့ ခေါ်ယူခ။ ယင်းခါရာ ငါ့ အိမ်မာ တတင်းပြည့်လားလီဖို့။ 24 ငါ နင်ရို့ကို ပြောရေ၊ ငါ ပထမ ဖိတ်ခေါ်ရို့ ထားသူရို့အထဲက တစ်ယောက်လည်း ဒေ စားပွဲမာ ဝင်ရို့ စားသောက်ဖို့ ရကတ်လိမည် မဟုတ်။’”