Luk 18:18-30 | RmzSC | STEP | ယုဒလူမျိုးရို့မာ ဂေါင်းဆောင်တစ်ယောက်စာ ယေရှုကို မီးလီရေ၊ “ဆရာ၊ ကိုယ်ဘင်ကား လူကောင်းတစ်ယောက် ဖြစ်ပါရေ။ အကျွန့်ကို ပြောပါ၊ ထာဝရအသက်ကို ရဖို့အတွက် အကျွန် ဇာ လုပ်ရပါဖို့လည်း?”

Luke 18:18-30

သူဌေးတစ်ယောက် အကြောင်း

(မဿဲ ၁၉:၁၆-၃၀၊ မာကု ၁၀:၁၇-၃၁)

18 ယုဒလူမျိုးရို့မာ ဂေါင်းဆောင်တစ်ယောက်စာ ယေရှုကို မီးလီရေ၊ “ဆရာ၊ ကိုယ်ဘင်ကား လူကောင်းတစ်ယောက် ဖြစ်ပါရေ။ အကျွန့်ကို ပြောပါ၊ ထာဝရအသက်ကို ရဖို့အတွက် အကျွန် ဇာ လုပ်ရပါဖို့လည်း?” 19 ယေရှုစာ သူ့ကို ပြောလီရေ၊ “ငါ့ကို ဇာဖို့ လူကောင်း ပြောစာလည်း? ထာဝရဘုရား တစ်ပါးတည်းကို ပယ်ရို့ လူကောင်း တစ်ယောက်လည်း မဟိ။ 20 ကိုယ်ဘင်ကား ပညှတ်ချက်တိကို သိရေ၊ ‘ကာမဂုဏ် မလိုက်စားရ၊ လူအသက်ကို မသတ်ရ၊ မခိုးရ၊ မုတ်သား သက်သီ မပီးရ အရာ နင့် အမိအဖကို ရိုသေလေးစားရဖို့။’” 21 ထိုဂေါင်းဆောင်စာ ပြောလီရေ၊ “အကျွန် အသျှေကပင် ထို ဟိသမျ အားကုံးကို လိုက်နာရို့ လာပါဗျာ။”

22 ထိုစကားကို ကြားရို့ ယေရှုစာ သူ့ကို ပြောလီရေ၊ “ကိုယ်ဘင်မာ ဒေဂုလည်း အလုပ်တစ်ခု ကျန်သိရေ။ ကိုယ်ဘင်မာ ဟိသမျ အမွီဥစ္စာကို ရောင်းရို့ ဆင်းရဲသားရို့ကို လှူဘိုက်ခီ။ ယင်းပိုင်ဆိုကေ ကိုယ်ဘင် ဂေါင်းခင်ဘုံမာ ဥစ္စာဘဏ္ဍာကို ရလိမည်။ ယင်းနောက် ပြန်လာရို့ ငါ့တပည့် ဖြစ်ခလိုက်။” 23 ယေရှု စကားကို ကြားရို့ ထိုဂေါင်းဆောင်စာ ကောင်းကောင်း စိတ်ဆိုးလီရေ၊ အကြောင်းကား သူစာ ကောင်းကောင်း ချမ်းသာလီရေ။

24 ယေရှုစာ ထိုဂေါင်းဆောင်တို့ ကြည့်ရို့ ပြောလီရေ၊ “သူဌေးရို့အတွက် ထာဝရဘုရား၏ နိုင်ငံတော်တို့ ဝင်ဖို့ ကောင်းကောင်း ခက်ခဲရေ! 25 သူဌေးရို့ ထာဝရဘုရား၏ နိုင်ငံတော်တို့ ဝင်ဖို့စာထက် ကုလားအုပ်တစ်ကောင် အပ်နဖားက ဝင်လားဖို့စာပင် ရွယ်သိရေ။” 26 ယေရှု စကားကို ကြားသူရို့စာ ပြောကတ်လီရေ၊ “ယင်းပိုင်ဆိုကေ အသူ ကယ်တင်ခြင်းကို ရနိုင်ပါဖို့လည်း?” 27 ယေရှုစာ ပြောလီရေ၊ “လူအတွက် မဖြစ်နိုင်စာတိ ထာဝရဘုရားအတွက် ဖြစ်နိုင်ရေ။”

28 ယင်းခါ ပေတရုစာ ပြောလီရေ၊ “အကျွန်ရို့ကား ဟိသမျ အားကုံးကို စွန့်ဘိုက်ခရို့ ကိုယ်တော်၏ တပည့် ဖြစ်ကတ်ပါဗျာ။” 29 – 30 ယေရှုစာ ကိုယ့်တပည့်ရို့ကို ပြောလီရေ၊ “ငါ နင်ရို့ကို အမှန် ပြောရေ၊ ထာဝရဘုရား၏ နိုင်ငံတော်အတွက် အိမ်-ယာ၊ မယား၊ ညီအစ်ကိုမောင်နမှ အရာ သားသမီးရို့ကို စွန့်ရို့ လာသူရို့ အားကုံးသူ ဒေ ဘဝမာ အများကြီး ရကတ်လိမည်၊ အရာ သူရို့စာ နောင်ဘဝမာ ထာဝရအသက်ကို ရကတ်လိမည်။”