Luk 19:28-40 | RmzSC | STEP | ထိုစကားတိကို ပြောပြီးရေနောက် ယေရှုစာ တပည့်ရို့ ရှိက ရှိက ယေရုရှလင်မြို့ဖက်တို့ ကြွလီရေ။

Luke 19:28-40

ယေရှု ယေရုရှလင်မြို့တို့ ဝင်ခြင်း

(မဿဲ ၂၁:၁-၁၁၊ မာကု ၁၁:၁-၁၁၊ ယောဟန် ၁၂:၁၂-၁၉)

28 ထိုစကားတိကို ပြောပြီးရေနောက် ယေရှုစာ တပည့်ရို့ ရှိက ရှိက ယေရုရှလင်မြို့ဖက်တို့ ကြွလီရေ။ 29 သူစာ သံလွင်တောင်ခြီရင်းမာဟိစာ ဗက်ဖာဂေရွာန ဗေသနိရွာနားတို့ ရောက်တေခါ ကိုယ့်တပည့်နှစ်ယောက်ကို ဒေပိုင် ပြောရို့ ရွှတ်လိုက်လီရေ၊ 30 “နင်ရို့ ထိုရှိကဟိစာ ရွာတို့ လားခီကတ်။ နင်ရို့ ယင်းရွာတို့ ဝင်ရေခါ တစ်ယောက်လည်း မစီးဖူးစာ ဝန်ရွက်မြင်းသျှေ တစ်ကောင်ကို ချိုင်ရို့ တွိကတ်လိမည်။ ထိုဝန်ရွက်မြင်းသျှေကို ဖြီရို့ ငါ့တို့ ယူခကတ်။ 31 အသူမဆို၊ ‘ယင်းဝန်ရွက်မြင်းသျှေကို ဇာဖို့ ဖြီစာလည်း’ ဟို့ နင်ရို့ကို မီးရေဆိုကေ ‘ဒေ ဝန်ရွက်မြင်းသျှေကို အသျှင် အလိုဟိရေ’ ဟို့ ပြောခကတ်။”

32 ရွှတ်လိုက်စာ တပည့်ရို့စာ လားခကတ်တေခါ ယေရှု ပြောပြလိုက်တေအတိုင်း ဟိသမျ အားကုံးကို မြင်ရကတ်လီရေ။ 33 သူရို့ ထိုဝန်ရွက်မြင်းသျှေကို ဖြီကတ်တေခါ အပိုင်သျှင်ရို့စာ သူရို့ကို မီးကတ်လီရေ၊ “နင်ရို့ ယင်းဝန်ရွက်မြင်းသျှေကို ဇာဖို့ ဖြီကတ်စာလည်း?”

34 သူရို့စာ အဖြေပီးကတ်လီရေ၊ “ဒေ ဝန်ရွက်မြင်းသျှေကို အသျှင် အလို ဟိပါရေ။” 35 ယင်းခါ တပည့်ရို့စာ ထိုဝန်ရွက်မြင်းသျှေကို ဖြီရို့ ယေရှုတို့ ယူလာကတ်လီရေ အရာ ထိုဝန်ရွက်မြင်းသျှေထက်မာ ကိုယ်ရို့ ကိုယ်ရုံကို ခင်းရို့ ယေရှုကို ထိုင်စီကတ်လီရေ။ 36 ယေရှုစာ ဝန်ရွက်မြင်းသျှေကို စီးရို့ ကြွလီရေခါ လူရို့စာ ကိုယ်ရို့ ကိုယ်ရုံကို လမ်းမာ ခင်းပီးကတ်လီရေ။

37 အရာ ယေရှုစာ သံလွင်တောင်က ဆင်းဖို့စာလမ်းတို့ ရောက်လာလီရေ။ ယင်းခါ ယေရှုနအတူ တပည့် အများကြီး ပါကတ်လီရေ။ ထိုတပည့်ရို့စာ ယေရှု လုပ်လီစာ ဟိသမျ အံ့ဩဖွယ် အလုပ်တိကို မြင်ရလီရေအတွက်န ဝမ်းသာပြီးကေ အားန အော်ရို့ ထာဝရဘုရားကို ချီမွမ်းကတ်လီရေ၊
38 “အသျှင်၏ နာမည်န ကြွလာစာ မင်း၏ ဘုန်းကြီးပါစီ!
ဂေါင်းခင်ဘုံမာ ငြိမ်းချမ်းခြင်း ဟိပါစီ၊
အရာ ထာဝရဘုရား၏ ဘုန်းကြီးပါစီ!”

39 လူကျိုင်ထဲက ဖာရိရှဲအဖွဲ့သား လိုင်းကေယောက်စာ ယေရှုကို ပြောကတ်လီရေ၊ “ဆရာ၊ ကိုယ်ဘင်မာ တပည့်ရို့ကို တိန်းရို့ နီဖို့ ခိုင်းလိုက်ပါ။” 40 ယေရှုစာ သူရို့ကို ပြောလီရေ၊ “ငါ ကိုယ်ဘင်ရို့ကို ပြောရေ၊ ဒေသူရို့ တိန်းရို့ နီကတ်တေဆိုကေ ကျောက်လုံးတိ အော်ကတ်လိမည်။”