Luke 20:27-40
အိမ်ထောင်မပြုဖို့စာ အကြောင်း
(မဿဲ ၂၂:၂၃-၃၃၊ မာကု ၁၂:၁၈-၂၇)
27ယင်းနောက် ဇဒ္ဒုကဲအဖွဲ့သားရို့အထဲက လိုင်းကေယောက် ယေရှုတို့ လာကတ်လီရေ။ ဇဒ္ဒုကဲအဖွဲ့သားရို့မာ သီရာက ပြန်ရှင်ထမြောင့်ခြင်းဆိုစာ တစ်ခုလည်း မဟိ။ 28သူရို့စာ ယေရှုကို မီးကတ်လီရေ၊ “ဆရာ၊ အကျွန်ရို့အတွက် မောရှေ ဒေပိုင် ရွီးထားခပါရေ၊ ‘အသူမဆို အိမ်ထောင်ပြုပြီးရေနောက် သားသမီး မမြင်ဘိုင်းန သီလားခရေဆိုကေ သူ့မာ ကျန်ဟိလိုက်စာ မယားကို သူ့မာညီ နစပ်ရို့ အစ်ကိုသေ အစိုင်ကို ဆက်ရဖို့။’ 29ကောင်းရေ၊ ကိုင်လိုက်ဖိ၊ အိမ်တစ်အိမ်မာ ညီအစ်ကို ခုနစ်ယောက် ဟိလီပါရေ။ အစ်ကိုသေအကြီးသူစာ အိမ်ထောင်ပြုပြီးရေနောက် သားသမီး မမြင်ဘိုင်းန သီလားခလီပါရေ။ 30– 31ယင်းနောက် ထိုမဆမကို ညီအလတ်သူ နစပ်လီပါရေ အရာ ယင်းနောက် ညီအငယ်သူ နစပ်လီပါရေ။ ယင်းပိုင် ညီအစ်ကိုခုနစ်ယောက်စုံ သားသမီး မမြင်ဘိုင်းန သီလားခကတ်လီပါရေ။ 32နောက်ဆုံးပြီးမာ ထိုမဆမလည်း သီလားခလီပါရေ။ 33ယင်းပိုင်ဆိုကေ သူရို့ သီရာက ပြန်ရှင်ထမြောင့်ကတ်တေခါ ထိုမိန်းမစာ အသူ့ မယား ဖြစ်ပါဖို့လည်း? အကြောင်းကား ညီအစ်ကိုခုနစ်ယောက်စုံ ထိုမိန်းမကို နစပ်ခကတ်လီပါရေ။” 34ယေရှုစာ သူရို့ကို ပြောလီရေ၊ “ဒေ ဘဝမာ လူရို့စာ အိမ်ထောင်နီကတ်တေ အရာ သူရို့ကို အိမ်ထောင်လည်း ချကတ်တေ။ 35ယေကေလည်း သီရာက ပြန်ရှင်ထမြောင့်ဖို့ ထိုက်တန်သူရို့စာ အိမ်ထောင်မနီကတ်ပျာ အရာ သူရို့ကို အိမ်ထောင်လည်း မချကတ်ပျာ။ 36သူရို့စာ ဂေါင်းခင်နတ်သားရို့နတူကတ်တေအတွက်န သီခြင်းတရားနကင်းကတ်ပျာ။ အရာ သူရို့စာ သီရာက ပြန်ရှင်ထမြောင့်လီကတ်တေအတွက်န ထာဝရဘုရား၏ သားသမီး ဖြစ်ကတ်ပျာ။ 37မီးတောက်နီစာ အုပ်ခြုံ အကြောင်းနပတ်သပ်ရို့ ရွီးထားစာ နေရာမာ၊ သီသူရို့ အမှန် ပြန်ရှင်ထမြောင့်ရေ ဆိုပြီးကေ မောရှေ ဖေါ်ပြလီရေ။ မောရှေစာ အသျှင်ကို၊ ‘အာဗြဟံ၏ ဘုရား၊ ဣဇာက်၏ ဘုရား အရာ ယာကုပ်၏ ဘုရား’ ဟို့ ခေါ်လီရေ။ 38ယေကေလည်း ထာဝရဘုရားစာ သီသူရို့မာ ဘုရား မဟုတ်၊ အသက်အရှင် ဟိသူရို့မာရာ ဘုရား ဖြစ်တေ၊ အကြောင်းကား ထာဝရဘုရား၏ လူရို့ အားကုံးသူ အသက်အရှင် ဟိကတ်တေ။” 39ယင်းခါ ကျမ်းဆရာ လိုင်းကေယောက်စာ ပြောကတ်လီရေ၊ “ဆရာ၊ ကိုယ်ဘင် ပြောစာစကား မှန်ပါရေ!” 40ယင်းနောက် သူရို့စာ ယေရှုကို စကားတစ်ခွန်းလည်း မီးဖို့ မဝံ့ကတ်လီပျာ။
Copyright information for
RmzSC