Luke 20:9-19
စပျစ်ခင်းအပိုင်သျှင်န ဘက်ကာစားယူသူရို့ ပုံဥပမာ
(မဿဲ ၂၁:၃၃-၄၆၊ မာကု ၁၂:၁-၁၂)
9ယင်းနောက် ယေရှုစာ လူရို့ကို သွန်သင်ပီးဖို့အတွက် ဒေပိုင် ပုံဥပမာတစ်ခု တင်ပြလီရေ၊ “လူတစ်ယောက်စာ စပျစ်ခင်းတစ်ခင်း စိုက်လီရေ အရာ ထိုစပျစ်ခင်းကို လယ်သမားရို့ဘားမာ ဘက်ကာစား အပ်ဘိုက်ခရို့ ရက်ပေါင်းများစွာ နီဖို့အတွက် အခြားပြည်တို့ လားခလီရေ။ 10ယင်းနောက် သူစာ စပျစ်သီးမှည့်ဖို့ အချိန်ကျရေခါ စပျစ်သီး အဝီယူဖို့အတွက် ကိုယ့်မာ ကျွန်တစ်ယောက်ကို လယ်သမားရို့တို့ ရွှတ်လိုက်လီရေ။ ယေကေလည်း လယ်သမားရို့စာ သူ့ကို ဘုတ်ရို့သတ်ရို့ လက်ခစည်းသသန့် ပြန်ရွှတ်လိုက်ကတ်လီရေ။ 11ယင်းခါ သူစာ အခြားတစ်ယောက် ကျွန်ကို ရွှတ်လိုက်လီရေ၊ ယေကေလည်း လယ်သမားရို့စာ သူ့ကိုလည်းသောက် ဘုတ်ပြီးကေ အသရေခွဲရို့ လက်ခစည်းသသန့် ပြန်ရွှတ်လိုက်ကတ်လီရေ။ 12ယင်းနောက် သူစာ တတိယ ကျွန်တစ်ယောက်ကို ရွှတ်လိုက်လီရေ၊ ယေကေလည်း လယ်သမားရို့စာ သူ့ကိုလည်းသောက် ရရိထိန်ရို့ နှင်ရွှတ်လိုက်ကတ်လီရေ။ 13“ယင်းခါ စပျစ်ခင်း အပိုင်သျှင်စာ ပြောလီရေ၊ ‘ဒေဂု ငါ ဇာ လုပ်ရဖို့ရောင်? အေး ကောင်းဗျာ၊ ငါ့မာ အချစ်ဆုံး သားကို ရွှတ်လိုက်ဖို့ဗျာ။ ထိုလယ်သမားရို့စာ အမှန် သူ့ကို ရိုသေကတ်လိမည်။’ 14“ယေကေလည်း လယ်သမားရို့စာ သူ့ကို မြင်ရေခါ ကိုယ်ရို့အချင်းချင်း ပြောကတ်လီရေ၊ ‘တစ်ရက်နိ ဒေသူ အမွီဥစ္စာတိကို ပိုင်ဆိုင်လာဖို့။ လား၊ သူ့အမွီဥစ္စာတိကို ငါရို့ ပိုင်ဆိုင်လတ်အောင် ငါရို့ သူ့ကို အသီသတ်ဘိုက်လိုက်ကတ်မည်။’ 15ယင်းနောက် သူရို့စာ သူ့ကို ဖမ်းရို့ စပျစ်ခင်းပြင်တို့ ထုတ်ယူလားပြီးကေ အသီသတ်ကတ်လီရေ။ “ဒေဂု စပျစ်ခင်း အပိုင်သျှင် ထိုလယ်သမားရို့ကို ဇာ လုပ်ဖို့လည်း? 16သူစာ လာရို့ ထိုလယ်သမားရို့ကို အသီသတ်ဘိုက်လိမည် အရာ စပျစ်ခင်းကို အခြားလူရို့ဘားမာ ဘက်ကာစား အပ်ဘိုက်ခလိမည်။” လူရို့စာ ယေရှု ပြောစာစကားကို ကြားရို့ ပြောကတ်လီရေ၊ “ယင်းပိုင် မဖြစ်ပါစီကေ့!” 17ယင်းခါ ယေရှုစာ သူရို့တို့ ကြည့်ရို့ ပြောလီရေ၊ “ယင်းပိုင်ဆိုကေ ကျမ်းစာမာ၊ ‘လက်သမားရို့ ပယ်ဘိုက်လိုက်စာ ကျောက်လုံးစာ ဒေါင့်ကတည်စာ အခြေခံကျောက်လုံး ဖြစ်လာရေ’ ဟို့ ရွီးထားစာ စကား အဓိပ္ပါယ် ဇာလည်း? 18အသူမဆို ထိုကျောက်လုံးထက်မာ ကျရေဆိုကေ ယင်းသူစာ အစိတ်အညှင်း ဖြစ်လားလိမည် အရာ ထိုကျောက်လုံးစာ အသူ့ဘားမာမဆို ကျရေဆိုကေ ယင်းသူလည်းသောက် တထွတ်ကြီလားလိမည်။” 19ယင်းခါ ကျမ်းဆရာရို့န ယဇ်ပုရောဟိတ်အကြီးရို့စာ ယေရှု ကိုယ်ရို့ကို ဆန့်ကျင်ရို့ စကား ပြောရေဆိုစာကို နားလည်ကတ်လီရေ။ ယင်းအတွက်န သူရို့စာ ယေရှုကို ဖမ်းဖို့ ကြည့်ကတ်လီရေ၊ ယေကေလည်း သူရို့စာ လူရို့ကို ကြောက်ကတ်လီရေ။
Copyright information for
RmzSC