Luke 5:17-26
တစ်စိတ်နာရောဂါသေတစ်ယောက် အကောင်းဖြစ်ခြင်း
(မဿဲ ၉:၁-၈၊ မာကု ၂:၁-၁၂)
17တစ်ရက်နိ ယေရှု သွန်သင်ပီးရို့ နီလီရေခါ ဖာရိရှဲအဖွဲ့သားရို့န ကျမ်းဆရာရို့စာ ယင်းနေရာမာ ထိုင်ရို့ ဟိကတ်လီရေ။ သူရို့စာ ဂါလိလဲပြည်နယ်န ယုဒပြည်နယ်မာဟိစာ အမျိုးမျိုး မြို့ရွာတိက အရာ ယေရုရှလင်မြို့က လာသူရို့ ဖြစ်ကတ်တေ။ ရောဂါသေရို့ကို ကောင်းအောင် လုပ်ဖို့အတွက် အသျှင်၏ တန်ခိုးစာ ယေရှုဘားမာ ဟိလီရေ။ 18ယင်းခါ လူလိုင်းကေယောက်စာ တစ်စိတ်နာရောဂါ ဖြစ်သူတစ်ယောက်ကို သယင်းန ရွက်ရို့ ယူလာကတ်လီရေ။ သူရို့စာ အိမ်ထဲတို့ သွင်းယူလားရို့ ယေရှု ရှိက ချဖို့ ကြိုးစားကတ်လီရေ၊ 19ယေကေလည်း လူပရိတ်သတ် အများကြီး ဟိလီရေအတွက်န အိမ်ထဲတို့ ယူလားဖို့လမ်း မရကတ်လီ။ ယင်းခါ သူရို့စာ အိမ်ခေါင်ထက်တို့ တက်ကတ်လီရေ အရာ အိမ်ခေါင်ကို ရွှာပြီးကေ သယင်းကို ကြိုးနချိုင်ရို့ ရောဂါသေကို ယေရှု ရှိက ချလိုက်ကတ်လီရေ။ 20ယေရှုစာ သူရို့မာ ကျုံခြင်းတရားကို မြင်ရို့ ပြောလီရေ၊ “မိတ်ဆွေ၊ နင့် အပြစ်ကို ခွင့်ရွှတ်လိုက်ပျာ။” 21ယင်းခါ ကျမ်းဆရာရို့န ဖာရိရှဲအဖွဲ့သားရို့စာ စိတ်မာ စိတ်မာ စဉ်းစားကတ်လီရေ၊ “ဒေလူ အသူလည်း? ဒေလူ ထာဝရဘုရားကို တရိုက်တေကား! ထာဝရဘုရားကို ပယ်ရို့ အသူ အပြစ်ကို ခွင့်ရွှတ်နိုင်ရေလည်း?” 22ယေရှုစာ သူရို့ စိတ်မာ စဉ်းစားချက်ကို သိရို့ ပြောလီရေ၊ “ကိုယ်ဘင်ရို့ စိတ်ထဲမာ ဇာဖို့ ဒေပိုင် စဉ်းစားနီကတ်စာလည်း? 23ဇာပိုင် ပြောကေ ရွယ်ဖို့လည်း၊ ‘နင့် အပြစ်ကို ခွင့်ရွှတ်လိုက်ပျာ’ ဟို့ ပြောကေ ရွယ်ဖို့လော၊ မဟုတ်ကေ ‘နင် ထရို့ လားနီ’ ဟို့ ပြောကေ ရွယ်ဖို့လော? 24ယေကေလည်း ဒေ ကမ္ဘာမာ လူအပြစ်ကို ခွင့်ရွှတ်ဖို့စာ တန်ခိုး မနုသသားတော်မာ ဟိရေဆိုစာကို ကိုယ်ဘင်ရို့ သိလတ်အောင် ငါ ကိုယ်ဘင်ရို့ကို ပြမည်။” ယင်းပိုင် ပြောရေအတိုင်း သူစာ ရောဂါသေကို ပြောလီရေ၊ “ငါ နင့်ကို ပြောရေ၊ ထ၊ နင့် အိပ်ရာကို ယူရို့ အိမ်တို့ လားလီ။” 25ယင်းခါ သူစာ ချက်ချင်း အားကုံးသူ ရှိက ထရို့ ရပ်လီရေ အရာ ကိုယ့်အိပ်ရာကို လိပ်ယူပြီးကေ ထာဝရဘုရားကို ချီမွမ်းရို့ အိမ်တို့ ပြန်လားခလီရေ။ 26ယင်းသျှင့်ကို မြင်ရို့ လူရို့ အားကုံးသူ အံ့ဩကတ်လီရေ အရာ ရိုသေကြောက်လန့်ခြင်းန ထာဝရဘုရားကို ချီမွမ်းရို့ ပြောကတ်လီရေ၊ “ငါရို့ ဒေနိခါ ကောင်းကောင်း အကြီးအကျယ် အံ့ဩဖွယ်တစ်ခုကို မြင်ရကတ်ပျာ!”
Copyright information for
RmzSC