Luk 7:24-35 | RmzSC | STEP | ယောဟန် တပည့်ရို့ ပြန်လားခကတ်တေခါ ယေရှုစာ ယောဟန် အကြောင်းကို လူရို့ဘားမာ ပြောဖို့ စလီရေ၊ “ကိုယ်ဘင်ရို့ ဇာကို ကြည့်ဖို့အတွက် သဲကန္တာရတောပြင်တို့ လားခီကတ်စာလည်း? လီထရို့ လုတ်စာ ပန်းဇင်ဂြည်အရုံကိုလော?

Luke 7:24-35

ယောဟန် အကြောင်းကို ယေရှု ပြောပြခြင်း

(မဿဲ ၁၁:၇-၁၉)

24 ယောဟန် တပည့်ရို့ ပြန်လားခကတ်တေခါ ယေရှုစာ ယောဟန် အကြောင်းကို လူရို့ဘားမာ ပြောဖို့ စလီရေ၊ “ကိုယ်ဘင်ရို့ ဇာကို ကြည့်ဖို့အတွက် သဲကန္တာရတောပြင်တို့ လားခီကတ်စာလည်း? လီထရို့ လုတ်စာ ပန်းဇင်ဂြည်အရုံကိုလော? 25 မဟုတ်ကေ ဇာကို ကြည့်ဖို့ လားခီကတ်စာလည်း? လှပတင့်တယ်စာ အဝတ် ဝတ်သူကိုလော? အဝတ်ကောင်း-အစားကောင်းကို ဝတ်ရို့ စဉ့်စိမ်ခံရို့ စားသောက်နီသူရို့ကား မင်းနန်းမာရာ နီကတ်တေ။ 26 မဟုတ်ကေ ဇာကို ကြည့်ဖို့ လားခီကတ်စာလည်း? ဘုရားသတင်းပို့သူကိုလော? ဟုတ်တေ၊ ငါ ကိုယ်ဘင်ရို့ကို ပြောရေ၊ ကိုယ်ဘင်ရို့ လားရို့ ကြည့်ခီသူစာ ဘုရားသတင်းပို့သူထက်လည်း ကြီးမြတ်တေ! 27 ယောဟန် အကြောင်းကို ကျမ်းစာမာ ရွီးရို့ ဟိရေ၊
‘နားထောင်၊ ငါ နင့် ရှိက ငါ့မာ သတင်းပို့သူတစ်ယောက်ကို ရွှတ်လိုက်ဖို့၊
သူစာ နင် လားဖို့စာလမ်းကို အဆင်သင့် လုပ်လိမည်။’

28 “ငါ ကိုယ်ဘင်ရို့ကို ပြောရေ၊ လူ့သားရို့အထဲမာ ယောဟန်ထက် ကြီးမြတ်သူ တစ်ယောက်လည်း မဟိ။ ယေကေလည်း ထာဝရဘုရား၏ နိုင်ငံတော်မာ အားကုံးသူထက် အသျှေဆုံး ဖြစ်သူလည်း ယောဟန်ထက် ကြီးမြတ်တေ။”

29 ဟိသမျ လူရို့န ဖန်ဒါကောက်သမားရို့စာ ယောဟန် ဟောပြောစာ တရားတော်ကို နားထောင်ကတ်လီရေ အရာ ယောဟန်ဘားမာ ရီနှစ်မင်္ဂလာ ခံယူပြီးကေ ထာဝရဘုရားကို ရိုးသားသူအဖြစ် ဝန်ခံကတ်လီရေ။ 30 ယေကေလည်း ဖာရိရှဲအဖွဲ့သားရို့န ကျမ်းဆရာရို့စာ ယောဟန်တို့ လာရို့ ရီနှစ်မင်္ဂလာ မခံယူလီကတ်၊ အကြောင်းကား သူရို့အတွက် စီစဉ်ထားစာ ထာဝရဘုရား၏ ရွယ်မှတ်ချက်ကို သူရို့ ငြင်းပယ်ကတ်လီရေ။

31 ယေရှုစာ အရာလည်း ပြောလီရေ၊ “ယင်းပိုင်ဆိုကေ ဒေခိုက်မာ လူရို့ကို ငါ အသူ့န နှိုင်းယှဉ်ရဖို့လည်း? သူရို့ ဇာပိုင်ဇတ် လူရို့လည်း? 32 သူရို့စာ ဈီးတလင်းမာ ထိုင်နီကတ်စာ အသျှေရို့နတူကတ်တေ။ သူရို့စာ အခြား အသျှေတစ်တိုင်ကို ခေါ်ရို့ ပြောကတ်တေ၊
‘ငါရို့ နင်ရို့အတွက် နှဲမှုတ်လီကတ်တေ၊
ယေကေလည်း နင်ရို့ မကလီကတ်။
အရာ ငါရို့ ဝမ်းနည်းစာ တေးခြင်းကို ဆိုလီကတ်တေ၊
ယေကေလည်း နင်ရို့ ဝမ်းနည်းခြင်း ပြန်ရို့ မငိုလီကတ်။’

33 “အကြောင်းကား ယောဟန်စာ ရောက်လာရေခါ အခြားလူရို့ပိုင် ပေါင်မုန့်န စပျစ်ရည် မစားမသောက်လီ။ ယင်းအတွက်န ကိုယ်ဘင်ရို့၊ ‘သူ့ကို နတ်ဆိုး ကိုင်နီဗျာ’ ဟို့ ပြောကတ်တေ။ 34 အရာ မနုသသားတော် ကြွလာရေခါ အခြားလူရို့ပိုင် စားသောက်လီရေ။ ယင်းအတွက်န ကိုယ်ဘင်ရို့ ပြောကတ်တေ၊ ‘ထိုမာ စားကြူး-သောက်ကြူးသူတစ်ယောက်ကို ကြည့်လိုက်ကတ်! သူစာ ဖန်ဒါကောက်သမားရို့န လူဆိုးရို့မာ မိတ်ဆွေ ဖြစ်တေ။’ 35 ယေကေလည်း အသူ့မာမဆို ညာဏ်ပညာ ကောင်းရေ မကောင်းဆိုစာကို သူ့အလုပ်ကနီရို့ သိရရေ။”