Mark 11
ယေရှု ယေရုရှလင်မြို့တို့ ဝင်ခြင်း
(မဿဲ ၂၁:၁-၁၁၊ လုကာ ၁၉:၂၈-၄၀၊ ယောဟန် ၁၂:၁၂-၁၉)
1ယေရှုန သူ့တပည့်ရို့စာ ယေရုရှလင်မြို့နမနီးမဝီး သံလွင်တောင်ခြီရင်းမာဟိစာ ဗက်ဖာဂေရွာန ဗေသနိရွာနားတို့ ရောက်ကတ်လီရေ။ ယင်းခါ ယေရှုစာ သူရို့အထဲက တပည့်နှစ်ယောက်ကို ဒေပိုင် ပြောရို့ ရွှတ်လိုက်လီရေ၊ 2“နင်ရို့ ထိုရှိကဟိစာ ရွာတို့ လားခီကတ်။ နင်ရို့ ယင်းရွာတို့ ဝင်ရေခါ တစ်ယောက်လည်း မစီးဖူးစာ ဝန်ရွက်မြင်းသျှေ တစ်ကောင်ကို ချိုင်ရို့ တွိကတ်လိမည်။ ထိုဝန်ရွက်မြင်းသျှေကို ဖြီရို့ ငါ့တို့ ယူခကတ်။ 3အသူမဆို၊ ‘နင်ရို့ ဇာဖို့ ဖြီကတ်စာလည်း’ ဟို့ နင်ရို့ကို မီးရေဆိုကေ၊ ‘ဒေ ဝန်ရွက်မြင်းသျှေကို အသျှင် အလိုဟိရေ အရာ ဒေ ဝန်ရွက်မြင်းသျှေကို အသျှင် အယင်အမြန် ပြန်ပီးလိမည်’ ဟို့ ပြောခကတ်။” 4သူရို့စာ ထို ရွာတို့ ရောက်လားခကတ်တေခါ လမ်းအထက်က အိမ်လမ်းခဝနားမာ ဝန်ရွက်မြင်းသျှေ တစ်ကောင် ချိုင်ရို့ဟိစာကို မြင်ရကတ်လီရေ။ 5သူရို့စာ ထိုဝန်ရွက်မြင်းသျှေကို ဖြီကတ်တေခါ ယင်းနေရာမာ ရပ်ရို့ ဟိသူရို့စာ မီးကတ်လီရေ၊ “နင်ရို့ ဇာ လုပ်ကတ်စာလည်း? ယင်းဝန်ရွက်မြင်းသျှေကို ဇာဖို့ ဖြီကတ်စာလည်း?” 6သူရို့စာ ယေရှု မှာလိုက်စာပိုင်တထန် ထိုလူရို့ကို ပြောပြကတ်လီရေ။ ယင်းခါ လူရို့စာ ဝန်ရွက်မြင်းသျှေကို ယူလားဖို့ ပီးကတ်လီရေ။ 7သူရို့စာ ဝန်ရွက်မြင်းသျှေကို ယေရှုတို့ ယူလာကတ်လီရေ အရာ ယင်းဝန်ရွက်မြင်းသျှေ နောက်ကုံးထက်မာ ကိုယ်ရို့ကိုယ်ရုံကို ခင်းကတ်လီရေ။ ယင်းခါ ယေရှုစာ ဝန်ရွက်မြင်းသျှေ နောက်ကုံးထက်မာ ထိုင်လီရေ။ 8အရာ လူအများကြီး ကိုယ်ရို့ကိုယ်ရုံကို လမ်းမာ ခင်းကတ်လီရေ အရာ တစ်ချိုးလူရို့စာ အရွက်နအတိုင်း အပင်အခက်အလက်တိကို ခွတ်ယူခရို့ လမ်းမာ ခင်းကတ်လီရေ။ 9ယေရှု နောက်က ရှိက ပါကတ်သူရို့စာ အော်ရို့ ပြောကတ်လီရေ၊“ဟောရှဏ္ဏ! ထာဝရဘုရား၏ ဘုန်းကြီးပါစီ!
အသျှင်၏ နာမည်န ကြွလာသူစာ မင်္ဂလာ ဟိပါစီ!
10အကျွန်ရို့အဖ ဒါဝိဒ်မင်း၏ နိုင်ငံတော် လာနီရေ၊
ထိုနိုင်ငံတော်စာ မင်္ဂလာ ဟိပါစီ!
အရာ ဂေါင်းခင်ဘုံလည်း ဟောရှဏ္ဏ ဖြစ်ပါစီ!” 11ယေရှု ယေရုရှလင်မြို့တို့ ရောက်တေခါ ဝိပဿနာကျောင်းမာ ဝင်ရို့ လေးဖက်လက်စိမာ ဟိသမျ အားကုံးကို ကြည့်လီရေ။ ယေကေလည်း သူစာ နီဝင်ရေအတွက်န တပည့်တစ်ဆယ့်နှစ်ယောက်ကို ယူရို့ ဗေသနိရွာတို့ ကြွလီရေ။
သဖန်းပင်ကို ကျိန်ဆဲထည့်ခြင်း
(မဿဲ ၂၁:၁၈-၁၉)
12နောက်တစ်ရက်နိ သူရို့စာ ဗေသနိရွာက ထွက်ရို့ ကြွကတ်တေခါ ယေရှုစာ အဝမ်းဆာလီရေ။ 13ယင်းခါ ယေရှုစာ အဝီးကပင် အရွက်အုပ်ရို့ဟိစာ သဖန်းပင်တစ်ပင်ကို မြင်ရလီရေ။ ယင်းအတွက်န သူစာ ထိုအပင်မာ အသီး ဟိရေလော ဟို့ အပင်အနားတို့ လားရို့ ကြည့်လီရေ။ ယေကေလည်း အသီးသီးချိန် မတိုင်သိရေအတွက်န အရွက်ကို ပယ်ရို့ အသီးတစ်လုံးလည်း မမြင်ရလီ။ 14ယင်းအတွက်န ယေရှုစာ ထိုအပင်ကို ကြည့်ရို့၊ “နင့်အသီးကို ဒေဂုကပင် တစ်ခါလည်း တစ်ယောက်လည်း မစားရစီကေ့” ဟို့ ကျိန်ဆဲထည့်လီရေ။ တပည့်ရို့စာ ယေရှု ကျိန်ဆဲထည့်စာ စကားကို ကြားရကတ်လီရေ။ငါ့အိမ်စာ ဆုတောင်းစာ အိမ် ဖြစ်ရဖို့
(မဿဲ ၂၁:၁၂-၁၇၊ လုကာ ၁၉:၄၅-၄၈၊ ယောဟန် ၂:၁၃-၂၂)
15ယင်းနောက် ယေရှုစာ ယေရုရှလင်မြို့တို့ ရောက်တေခါ ဝိပဿနာကျောင်းတို့ ဝင်လီရေ။ ယင်းခါ သူစာ ဝိပဿနာကျောင်းထဲမာ အရောင်းအဝယ်လုပ်နီသူ တစ်ယောက်မကျန်ကို နှင်ထုတ်လိုက်လီရေ။ အရာ သူစာ တန်းကား ဖနီသူရို့ ခုံတိန ခေါ် ရောင်းနီသူရို့ ထိုင်ကတ်စာ ခုံတိကို ပြန်ဘိုက်လိုက်လီရေ။ 16သူစာ ဝိပဿနာကျောင်းတလင်းကနီရို့ အရောင်းအဝယ်လုပ်စာ ဝန်တိကို ယူလားဖို့ မပီးလီ။ 17ယင်းနောက် သူစာ ထိုလူရို့ကို ပြောလီရေ၊ “‘ငါ့အိမ်စာ ဟိသမျ လူမျိုးရို့ ဆုတောင်းစာအိမ် ဖြစ်ရဖို့’ ဟို့ ကျမ်းစာမာ ရွီးရို့ ဟိရေ မဟုတ်လော? ယေကေလည်း နင်ရို့စာ ထာဝရဘုရား၏ အိမ်ကို ဒါးမြအိမ်ပိုင် လုပ်နီကတ်တေ!” 18 ယဇ်ပုရောဟိတ်အကြီးရို့န ကျမ်းဆရာရို့စာ ထိုစကားကို ကြားရို့ ယေရှုကို အသီသတ်ဖို့ နည်းလမ်း ရှာကတ်လီရေ။ ယေကေလည်း သူရို့စာ ယေရှုကို ကြောက်ကတ်လီရေ၊ အကြောင်းကား လူရို့စာ ယေရှု၏ သွန်သင်ချက်ကို ကြားရို့ အံ့ဩလီကတ်တေ။ 19နီဝင်လာရေခါ သူစာ တပည့်ရို့နအတူ မြို့ပြင်တို့ ထွက်လားခလီရေ။ကျိန်ဆဲအထည့်ခံစာ သဖန်းပင်
(မဿဲ ၂၁:၂၀-၂၂)
20နောက်တစ်ရက်နိ စောစောက သူရို့ ယင်းလမ်းအနှူး ကြွလာရေခါ ထိုသဖန်းပင်စာ သီရို့ အမြစ်ကပင် ခြောက်လားခစာကို တပည့်ရို့ မြင်ရကတ်လီရေ။ 21ပေတရုစာ ယေရှု စကားကို တွက်ရရို့ သူ့ကို ပြောလီရေ၊ “ဆရာ၊ ကြည့်လိုက်ပါ၊ ကိုယ်ဘင် ကျိန်ဆဲထည့်စာ သဖန်းပင် သီရို့ ခြောက်လားခပါဗျာ။” 22ယင်းခါ ယေရှုစာ သူရို့ကို ပြောလီရေ၊ “ထာဝရဘုရားကို ကျုံကတ်။ 23ငါ နင်ရို့ကို အမှန် ပြောရေ၊ အသူမဆို စိတ်နှလုံးမာ မယုံသင်္ခါ မထားဘိုင်းန ကိုယ်ပြောရေအတိုင်း ဖြစ်ဖို့ ဆိုပြီးကေ ကျုံရေဆိုကေ သူစာ ဒေ တောင်ကို၊ ‘ဒေ နေရာက ရွိရို့ ပင်လယ်မာ ကျ’ ဟို့ ပြောရေအတိုင်း ဖြစ်လိမည်။ 24ယင်းအတွက်န ငါ နင်ရို့ကို ပြောရေ၊ နင်ရို့ ဆုတောင်းကတ်တေခါ နင်ရို့ တောင်းစာတိကို ရလားခဗျာ ဟို့ နင်ရို့ ကျုံရေဆိုကေ ဟိသမျ အားကုံးကို ရကတ်လိမည်။ 25နင်ရို့ ဆုတောင်းကတ်တေခါ အသူ့ကိုမဆို နင်ရို့မာ အပြစ်တင်ရို့ စကားပြောစရာ ဟိရေဆိုကေ နင်ရို့ ယင်းသူကို ခွင့်ရွှတ်ကတ်။ ယင်းပိုင်ဆိုကေ နင်ရို့မာ ဂေါင်းခင်ဘုံသျှင် အဖလည်း နင်ရို့ အပြစ်ကို ခွင့်ရွှတ်လိမည်။ 26 ▼▼ပထမဆုံး ရွီးလီစာ ဂရိဘာသာ ကျမ်းစာအဟောင်းတိမာ ဒေ အခန့်ငယ် ၂၆-မာ စကားတိ ရွီးရို့ မဟိပါ။
နင်ရို့ အခြားလူရို့ အပြစ်ကို ခွင့်မရွှတ်ဆိုကေ နင်ရို့မာ ဂေါင်းခင်ဘုံသျှင် အဖလည်း နင်ရို့အပြစ်ကို ခွင့်ရွှတ်လိမည် မဟုတ်။” ယေရှု၏ အခွင့်အာဏာကို စစ်ဆေးခြင်း
(မဿဲ ၂၁:၂၃-၂၇၊ လုကာ ၂၀:၁-၈)
27ယင်းနောက် သူရို့စာ အရာတစ်ပြန် ယေရုရှလင်မြို့တို့ ကြွလာကတ်လီရေ။ ယေရှုစာ ဝိပဿနာကျောင်းမာ လမ်းသျှောက်နီရေခါ ယဇ်ပုရောဟိတ်အကြီးရို့၊ ကျမ်းဆရာရို့ အရာ ဂေါင်းဆောင်ဝါကြီးရို့စာ သူ့တို့ လာရို့ မီးကတ်လီရေ၊ 28“နင် ဇာအခွင့်အာဏာန ဒေ အလုပ်တိကို လုပ်နီစာလည်း? အရာ နင့်ကို ဒေ အခွင့်အာဏာ အသူ ပီးစာလည်း?” 29ယေရှုစာ သူရို့ကို အဖြေပီးလီရေ၊ “ငါလည်းသောက် ကိုယ်ဘင်ရို့ကို စကားတစ်ခွန်း မီးမည်။ ကိုယ်ဘင်ရို့ ငါ့စကားကို အဖြေပီးနိုင်ရေဆိုကေ ငါ ဇာအခွင့်အာဏာန ဒေ အလုပ်တိကို လုပ်တေလည်းဆိုစာကို ငါလည်းသောက် ကိုယ်ဘင်ရို့ကို ပြောမည်။ 30ပြောကြည့်န၊ ရီနှစ်မင်္ဂလာ ပီးဖို့စာအခွင့်အာဏာ ယောဟန် အသူ့က ရလီစာလည်း? ထာဝရဘုရားကလော၊ မဟုတ်ကေ လူကလော?” 31ယင်းခါ သူရို့စာ ကိုယ်ရို့အချင်းချင်း တိုင်ဘင်ကတ်လီရေ၊ “ငါရို့စာ၊ ‘ထာဝရဘုရားက ရလီရေ’ ဟို့ ပြောရေဆိုကေ ယင်းသူ ငါရို့ကို၊ ‘ယင်းပိုင်ဆိုကေ ကိုယ်ဘင်ရို့ ဇာဖို့ ယောဟန်ကို မကျုံလီကတ်စာလည်း’ ဟို့ ပြောဖို့။ 32အရာ ငါရို့စာ၊ ‘လူက ရလီရေ’ ဟို့ ပြောရေဆိုကေ လူရို့စာ ငါရို့ကို မန်တက်ကတ်ဖို့။” သူရို့စာ လူရို့ကို ကြောက်ကတ်လီရေ၊ အကြောင်းကား လူရို့ အားကုံးသူ ယောဟန်ကို ဘုရားသတင်းပို့သူတစ်ပါး ဖြစ်တေ ဟို့ ကျုံလီကတ်တေ။ 33ယင်းအတွက်န သူရို့စာ ယေရှုကို အဖြေပီးကတ်လီရေ၊ “ငါရို့ မသိ။” ယင်းခါ ယေရှုစာ သူရို့ကို ပြောလီရေ၊ “ယင်းပိုင်ဆိုကေ ငါ ဇာအခွင့်အာဏာန ဒေ အလုပ်တိကို လုပ်တေလည်းဆိုစာကို ငါလည်းသောက် ကိုယ်ဘင်ရို့ကို မပြော။”
Copyright information for
RmzSC