Mark 16
ယေရှု သီရာက ပြန်ရှင်ထမြောင့်ခြင်း
(မဿဲ ၂၈:၁-၁၁၊ လုကာ ၂၄:၁-၁၂၊ ယောဟန် ၂၀:၁-၉)
1 သတင်းနိ ရွန်ရို့ စနီနိ ညဇာဆိုင်းဆာရီရောမာ မိန်းမသုံးယောက် ယေရှု၏ အကောင်တော်မာ လူးဖို့အတွက် အမွှီးနံသာပေါင်း ဝယ်ကတ်လီရေ။ သူရို့စာ မာဂဒလမြို့သမ မာရိ၊ ယာကုပ်အမိ မာရိ အရာ ရှာလုံ ဖြစ်တေ။ 2တလင်္ဂနွီနိ မိုးသောက်စောစောက နီအာရုံလာရေ ချက်ချင်း သူရို့စာ သင်္ချိုင်းတို့ လားကတ်လီရေ။ 3လားရေလမ်းမာ သူရို့စာ တစ်ယောက်ကို တစ်ယောက် မီးကတ်လီရေ၊ “သင်္ချိုင်းဂူဝမာ ပိတ်ထားစာ ကျောက်လုံးကို အသူ ရွှိဖို့လည်း?” 4ယေကေလည်း သူရို့ လားရို့ ကြည့်ကတ်တေခါ သင်္ချိုင်းဂူဝမာ ပိတ်ထားစာ ကျောက်လုံး ရွိရို့ ဟိစာကို မြင်ရကတ်လီရေ။ ထိုကျောက်လုံးစာ ကောင်းကောင်း အကြီးသန် ဟိလီရေ။ 5သူရို့စာ သင်္ချိုင်းဂူထဲတို့ ဝင်ရို့ ကြည့်ကတ်တေခါ အဝတ်ဖြူဝတ်ရို့ လူပျိုတစ်ယောက် သူရို့ ညာဖက်က ထိုင်ရို့ ဟိစာကို မြင်ရကတ်လီရေ။ ယင်းခါ သူရို့စာ ကောင်းကောင်း လန့်လားခကတ်လီရေ။ 6ထိုလူပျိုစာ ပြောလီရေ၊ “မလန့်ကတ်ကေ့။ ကားတိုင်မာ တင်ရို့ အသီအသတ်ခံလီစာ နာဇရက်မြို့သျှေသား ယေရှုကို နင်ရို့ ရှာကတ်စာ မဟုတ်လော? သူကား ဒေမာ မဟိဗျာ၊ ပြန်ရှင်ထမြောင့်လားခဗျာ။ သူ့ကို ထားလီစာ နေရာကို လာရို့ ကြည့်ခလိုက်ကတ်။ 7ယင်းနောက် နင်ရို့ သူ့တပည့်ရို့န ပေတရုဘားမာ လားရို့ ဒေ အကြောင်းကို ပြောပြခီကတ်။ သူစာ နင်ရို့ထက် အယင် ဂါလိလဲပြည်နယ်တို့ ကြွလိမည်၊ သူပြောခစာပိုင်တထန် နင်ရို့ သူ့ကို ယင်းမာ မြင်ရကတ်လိမည်။” 8ထိုမိန်းမရို့စာ တစ်ခုလည်း နားမလည်ကတ်လီ အရာ ကြောက်ရို့ တုန်ပြီးကေ သင်္ချိုင်းဂူထဲက ထွက်ရို့ ဗြီးလားခကတ်လီရေ။ သူရို့စာ ကောင်းကောင်း ကြောက်ကတ်လီရေအတွက်န တစ်ယောက်ကိုလည်း တစ်ခုလည်း ပြောဖို့ မနိုင်ကတ်လီ။[ပထမဆုံး ရွီးလီစာ ဂရိဘာသာ ကျမ်းစာအဟောင်းတိမာ ဒေ အခန့်ငယ် ၉-၂၀မာ စကားတိ ရွီးရို့ မဟိပါ။]
ကိုယ့်တပည့်ရို့ဘားမာ ယေရှု အမြင်ခံခြင်း
(မဿဲ ၂၈:၉-၁၀၊ ၁၆-၂၀၊ လုကာ ၂၄:၁၃-၄၉၊ ယောဟန် ၂၀:၁၁-၂၃၊ တမန်တော် ၁:၆-၈)
9သတင်းနိ ရွန်ရို့ တလင်္ဂနွီနိ မိုးသောက်စောစောက ယေရှု သီရာက ပြန်ရှင်ထမြောင့်လီရေ။ ယင်းနောက် သူစာ ပထမဆုံး မာဂဒလမြို့သမ မာရိဘားမာ အမြင်ခံလီရေ။ ယင်းအယင်က ယေရှုစာ ဒေ မာရိခန္ဓာက နတ်ဆိုးခုနစ်ကောင် နှင်ထုတ်လီရေ။ 10မာရိစာ ယေရှုကို မြင်ပြီးရေနောက် ယေရှုနအတူ နီလီကတ်စာ တပည့်ရို့တို့ လားရို့ ကိုယ်မြင်ခစာ အကြောင်းကို ပြောပြလီရေ။ ယင်းအချိန်ခါ သူရို့စာ ဝမ်းနည်းပြီးကေ ငိုရို့ ဟိကတ်လီရေ။ 11ယေရှု သီရာက ပြန်ရှင်ထမြောင့်လားခဗျာ အရာ မာရိ သူ့ကို မြင်ခလီရေဆိုစာကို ကြားရို့ တပည့်ရို့စာ မကျုံကတ်လီ။ 12ယင်းနောက် သူ့တပည့်နှစ်ယောက် ရွာတို့ လားရေခါ ယေရှုစာ အခြားတစ်ယောက် အရုပ်ဆောင်ရို့ သူရို့ဘားမာ အမြင်ခံလီရေ။ 13သူရို့နှစ်ယောက် ပြန်လာရို့ အခြား ဟိသမျ တပည့်ရို့ဘားမာ ပြောပြကတ်လီရေ၊ ယေကေလည်း သူရို့စာ ထိုနှစ်ယောက် စကားကိုလည်း မကျုံကတ်လီ။ 14ယင်းနောက် ယေရှုစာ ကိုယ့်တပည့် တစ်ဆယ့်တစ်ယောက်ဘားမာ အမြင်ခံလီရေ။ ယင်းခါ သူရို့စာ စားရို့သောက်ရို့ ဟိကတ်လီရေ။ ယေရှုစာ တပည့်ရို့မာ ကျုံခြင်းတရား မဟိရေအတွက်န အရာ စိတ်နှလုံး ကျန်းရေအတွက်န သူရို့ကို အပြစ်တင်လီရေ၊ အကြောင်းကား ယေရှု သီရာက ပြန်ရှင်ထမြောင့်ပြီးရေနောက် သူ့ကို မြင်ခသူရို့ ပြောစာစကားကို သူရို့စာ မကျုံလီကတ်။ 15ယေရှုစာ ကိုယ့်တပည့်ရို့ကို ပြောလီရေ၊ “နင်ရို့ ကမ္ဘာမာ ဟိသမျ နေရာတို့ လားရို့ ဟိသမျ လူရို့ဘားမာ သတင်းကောင်းကို ဟောပြောလီကတ်။ 16အသူမဆို ကျုံရို့ ရီနှစ်မင်္ဂလာ ခံယူရေဆိုကေ သူစာ ကယ်တင်ခြင်းကို ရလိမည်၊ ယေကေလည်း အသူမဆို မကျုံဆိုကေ ထာဝရဘုရား သူ့ကို အပြစ်ဒါဏ် ပီးလိမည်။ 17ငါ့ကို ကျုံသူရို့အထဲမာ ဒေပိုင် နိမိတ်လက္ခဏာတိကို မြင်ရလိမည်။ သူရို့စာ ငါ့နာမည်န နတ်ဆိုး နှင်ထုတ်ကတ်လိမည်၊ အသစ် အသစ် ဘာသာစကားကို ပြောကတ်လိမည်၊ 18သူရို့စာ မြိန်ကို အလက်န ဖမ်းကတ်လိမည်၊ သူရို့စာ အဆိတ်ဟိစာ တစ်ခုမသာကို စားကေလည်း သီကတ်လိမည် မဟုတ်၊ အရာ သူရို့စာ ရောဂါသေရို့ ခန္ဓာမာ အလက်တင်ရေဆိုကေ ရောဂါကောင်းလိမည်။”ယေရှု ဂေါင်းခင်ဘုံတို့ ကြွခြင်း
(လုကာ ၂၄:၅၀-၅၃၊ တမန်တော် ၁:၉-၁၁)
19ကိုယ့်တပည့်ရို့ဘားမာ ဒေပိုင် စကားတိကို ပြောပြီးရေနောက် ယေရှုစာ ဂေါင်းခင်ဘုံတို့ တင်ယူခြင်းကို ခံရလီရေ။ သူစာ ဂေါင်းခင်ဘုံမာ ထာဝရဘုရား၏ ညာဖက်က ထိုင်လီရေ။ 20ယင်းနောက် တပည့်ရို့စာ ဟိသမျ နေရာမာ လားရို့ သတင်းကောင်းကို ဟောပြောဖို့ စကတ်လီရေ။ အသျှင်စာ ကိုယ့်တပည့်ရို့နအတူ အလုပ်လုပ်ရို့ နီလီရေ အရာ တပည့်ရို့ လုပ်ကတ်စာ အံ့ဩဖွယ်အလုပ်ကနီရို့ သူရို့ ဟောပြောကတ်စာ သတင်းကောင်း မှန်ရေဆိုစာကို သက်သီပြလီရေ။
Copyright information for
RmzSC