Mark 2

တစ်စိတ်နာရောဂါသေ အကောင်းဖြစ်ခြင်း

(မဿဲ ၉:၁-၈၊ လုကာ ၅:၁၇-၂၆)

1လိုင်းကေရက် ရွန်ရေခါ ယေရှုစာ ပြန်ရို့ ကပေရနောင်မြို့သျှေတို့ ကြွလီရေ။ ယေရှု အိမ်မာ ဟိရေဆိုစာကို လူရို့စာ ကြားရကတ်လီရေ။ 2ယင်းအတွက်န ယေရှု တည်းစာအိမ်မာ လူအများကြီး စုလာကတ်လီရေ။ ယင်းခါ အိမ်ထဲမာကား ထားအုန့်သိ၊ အိမ်ပြင်က တိုင်အောင်ပင် နေရာ မဟိလီဗျာ။ ယေရှုစာ ထိုလူရို့ဘားမာ ထာဝရဘုရား၏ စကားတော်ကို ဟောပြောရို့ နီလီရေ။ 3ယင်းခါ လူလေးယောက် တစ်စိတ်နာရောဂါ ဖြစ်သူတစ်ယောက်ကို သယင်းန ရွက်ရို့ ယေရှုတို့ ယူလာကတ်လီရေ။ 4ယေကေလည်း လူပရိတ်သတ် အများကြီး ဟိလီရေအတွက်န ရောဂါသေကို ယေရှုတို့ ယူလားဖို့ မရကတ်လီ။ ယင်းအတွက်န သူရို့စာ အိမ်ခေါင်တို့ တက်ရို့ ယေရှု ဟိစာတတည့် အိမ်ခေါင်ကို ရွှာကတ်လီရေ။ ယင်းနောက် သူရို့စာ ရောဂါသေကို သယင်းမာ ထည့်ရို့ သယင်းကို ကြိုးန ချိုင်ပြီးကေ ထိုအပေါက်က ချလိုက်ကတ်လီရေ။ 5ယေရှုစာ သူရို့မာ ကျုံခြင်းတရားကို မြင်ရို့ ရောဂါသေကို ပြောလီရေ၊ “မိတ်ဆွေ၊ နင့် အပြစ်ကို ခွင့်ရွှတ်လိုက်ပျာ။”

6ယင်းနေရာမာ ကျမ်းဆရာ လိုင်းကေယောက် ထိုင်ရို့ ဟိကတ်လီရေ။ ယေရှု ပြောစာစကားကို ကြားရို့ သူရို့စာ စိတ်မာ စိတ်မာ စဉ်းစားကတ်လီရေ၊ 7“ဒေလူ ဇာဖို့ ဒေပိုင် စကားပြောစာလည်း? ဒေလူ ထာဝရဘုရားကို တရိုက်တေကား။ ထာဝရဘုရားကို ပယ်ရို့ အသူ အပြစ်ကို ခွင့်ရွှတ်နိုင်ရေလည်း?” 8သူရို့ စိတ်မာ စဉ်းစားချက်ကို ယေရှုစာ ချက်ချင်း ကိုယ့်စိတ်နှလုံးမာ သိလီရေ။ ယင်းအတွက်န သူစာ ထိုဂေါင်းဆောင်ရို့ကို ပြောလီရေ၊ “ကိုယ်ဘင်ရို့ စိတ်ထဲမာ ဇာဖို့ ဒေပိုင် စဉ်းစားနီကတ်စာလည်း? 9ဒေသူကို ဇာပိုင် ပြောကေ ရွယ်ဖို့လည်း၊ ‘နင့် အပြစ်ကို ခွင့်ရွှတ်လိုက်ပျာ’ ဟို့ ပြောကေ ရွယ်ဖို့လော၊ မဟုတ်ကေ ‘နင့် အိပ်ရာကို ယူရို့ ထရို့ လားနီ’ ဟို့ ပြောကေ ရွယ်ဖို့လော? 10ယေကေလည်း ဒေ ကမ္ဘာမာ လူအပြစ်ကို ခွင့်ရွှတ်ဖို့စာ တန်ခိုး မနုသသားတော်မာ ဟိရေဆိုစာကို ကိုယ်ဘင်ရို့ သိလတ်အောင် ငါ ကိုယ်ဘင်ရို့ကို ပြမည်။” ယင်းပိုင် ပြောရေအတိုင်း သူစာ ရောဂါသေကို ပြောလီရေ၊ 11“ငါ နင့်ကို ပြောရေ၊ ထ၊ နင့် အိပ်ရာကို ယူရို့ အိမ်တို့ လားလီ။” 12ယင်းခါ ချက်ချင်း သူစာ ထရို့ ကိုယ့်အိပ်ရာကို လိပ်ယူပြီးကေ အားကုံးသူ ရှိက ပြင်တို့ ထွက်လားခလီရေ။ ယင်းသျှင့်ကို မြင်ရို့ အားကုံးသူ အံ့ဩပြီးကေ ထာဝရဘုရားကို ချီမွမ်းရို့ ပြောကတ်လီရေ၊ “ငါရို့ တစ်ခါလည်း ဒေပိုင် မမြင်ဖူးသိ။”

ဖန်ဒါကောက်သမား လေဝိကို ခေါ်ခြင်း

(မဿဲ ၉:၉-၁၃၊ လုကာ ၅:၂၇-၃၂)

13ယင်းနောက် ယေရှု အရာတစ်ပြန် ဂါလိလဲမြစ်ကမ်းနားတို့ ကြွလီရေ။ ယင်းခါ လူအများကြီး ယေရှုတို့ လာကတ်လီရေ အရာ သူစာ ထိုလူရို့ကို သွန်သင်ပီးလီရေ။ 14ယင်းနောက် သူစာ လမ်းမာ ကြွရေခါ အာလဖဲသား လေဝိကို ဖန်ဒါကောက်စာ ယုံးမာ ထိုင်ရို့ မြင်လီရေ။ ယင်းခါ သူစာ လေဝိကို၊ “လာ၊ ငါ့နောက်က လိုက်” ဟို့ ခေါ်လီရေ။ ယင်းခါ သူစာ ထရို့ ယေရှု နောက်က လိုက်လားခလီရေ။

15ယင်းနောက် ယေရှုစာ ကိုယ့်တပည့်ရို့နအတူ လေဝိအိမ်မာ စားသောက်ဖို့ ထိုင်လီရေ။ ယင်းနေရာမာ ဖန်ဒါကောက်သမားရို့န လူဆိုးရို့လည်း အများကြီး ဟိကတ်လီရေ၊ အကြောင်းကား လူအများကြီး ယေရှု နောက်က လိုက်နီကတ်လီရေ။ 16ဖာရိရှဲအဖွဲ့က ကျမ်းဆရာရို့စာ ယေရှုကို ဖန်ဒါကောက်သမားရို့န အရာ လူဆိုးရို့နအတူ ထိုင်ရို့ စားသောက်စာကို မြင်လီရေ။ ယင်းခါ သူရို့စာ ယေရှု တပည့်ရို့ကို ပြောလီရေ၊ “နင်ရို့မာ ဆရာ ဖန်ဒါကောက်သမားရို့န အရာ လူဆိုးရို့နအတူ ထိုင်ရို့ ဇာဖို့ စားသောက်စာလည်း?” 17ထိုစကားကို ကြားရို့ ယေရှုစာ ကျမ်းဆရာရို့ကို ပြောလီရေ၊ “ကျန်းမာသူရို့အတွက် ဆီးဆရာကို အလိုမဟိ၊ ယေကေလည်း မကျန်းမာသူရို့အတွက်ရာ ဆီးဆရာကို အလိုဟိရေ။ ငါ သူတော်ကောင်းရို့ကို ခေါ်ဖို့ လာစာ မဟုတ်၊ ယေကေလည်း ငါ လူဆိုးရို့ကို ခေါ်ဖို့ လာစာ ဖြစ်တေ။”

အစားရှောင်ဖို့စာ အကြောင်းကို သွန်သင်ခြင်း

(မဿဲ ၉:၁၄-၁၇၊ လုကာ ၅:၃၃-၃၉)

18တစ်ရက်နိ ရီနှစ်မင်္ဂလာပီးသူ ယောဟန် တပည့်ရို့န ဖာရိရှဲအဖွဲ့သားရို့စာ အစားရှောင်ကတ်လီရေ။ ယင်းသျှင့်ကို မြင်ရို့ လူလိုင်းကေယောက် ယေရှုတို့ လာရို့ ပြောကတ်လီရေ၊ “ယောဟန် တပည့်ရို့န ဖာရိရှဲဖွဲ့သားရို့မာ တပည့်ရို့ အစားရှောင်ကတ်ပါရေ၊ ယေကေလည်း ကိုယ်ဘင်မာ တပည့်ရို့ ဇာဖို့ အစား မရှောင်ကတ်ပါစာလည်း?” 19ယေရှုစာ သူရို့ကို ပြောလီရေ၊ “သမက်သျှာနအတူ ဟိရို့အတိုင်းလည်း သမက်သျှာမာ အဖက်သားရို့ အစားရှောင်ဖို့ အလိုဟိရေလော? သမက်သျှာ သူရို့နအတူ ဟိသရိကာလပတ်လုံး အစားရှောင်ဖို့ အလိုမဟိ။” 20ယေကေလည်း သမက်သျှာကို သူရို့က တင်ယူလားဖို့စာအချိန် ရောက်လာလိမည်။ ယင်းအချိန်ခါရာ သူရို့ အစားရှောင်ကတ်လိမည်။

21“တစ်ယောက်လည်း အင်္ကျီအဟောင်းမာ အဝတ်သျှာအသစ်ကို မဖာ။ ဖာရေဆိုကေ အင်္ကျီအဟောင်းက အဝတ်သျှာအသစ်စာ စုတ်ထွက်လားခရေ အရာ အပေါက် အများကြီး ကျယ်လားခရေ။ 22အရာ တစ်ယောက်လည်း သရီအိပ်အဟောင်းမာ စပျစ်ရည်အသစ်ကို ထည့်ရို့ မထား။ ထားရေဆိုကေ စပျစ်ရည်အသစ် အကြောင်းန သရီအိပ်အဟောင်းစာ စုတ်ရို့ စပျစ်ရည် ယိုဆင်းလားခရေ အရာ အိပ်တိလည်း ပျက်လားခရေ။ ယင်းအတွက်န စပျစ်ရည်အသစ်ကို သရီအိပ်အသစ်မာရာ ထည့်ရို့ ထားရရေ။”

သတင်းနိကို ပိုင်ဆိုင်စာအသျှင်

(မဿဲ ၁၂:၁-၈၊ လုကာ ၆:၁-၅)

23အခြားတစ်ရက် သတင်းနိမာ ယေရှုန သူ့တပည့်ရို့စာ ဂျုံခင်းအထဲက ဝင်ရို့ ကြွကတ်လီရေ။ ယင်းခါ ယေရှု တပည့်ရို့စာ ဂျုံအနှံတိကို ဆွတ်ရို့ စားကတ်လီရေ။ 24ယင်းသျှင့်ကို မြင်ရို့ ဖာရိရှဲအဖွဲ့သားရို့စာ ယေရှုကို ပြောကတ်လီရေ၊ “ဘာသာရေး ထုံးစဉ်အတိုင်း သတင်းနိမာ မလုပ်သင့်စာတိကို ဒေသူရို့ ဇာဖို့ လုပ်ကတ်ပါစာလည်း?” 25– 26ယေရှုစာ သူရို့ကို ပြောလီရေ၊ “ဒါဝိဒ်မင်းန သူ့အဖက်သားရို့ အဝမ်းဆာလီရေခါ ဇာ လုပ်လီကတ်တေလည်းဆိုစာကို ကိုယ်ဘင်ရို့ မဖတ်ဖူးကတ်လော? အဗျာသာ မဟာယဇ်ပုရောဟိတ် ဖြစ်ရို့ ဟိလီရေခါ သူရို့စာ ထာဝရဘုရား၏ ကျောင်းထဲမာ ဝင်ရို့ သန့်ရှင်းစာ ပေါင်မုန့်ကို စားကတ်လီရေ၊ ယေကေလည်း ထိုသန့်ရှင်းစာ ပေါင်မုန့်ကို ယဇ်ပုရောဟိတ်ရို့ကို ပယ်ရို့ အခြားတစ်ယောက်လည်း စားဖို့ ထုံးစဉ် မဟိလီ။” 27ယေရှုစာ သူရို့ကို အရာလည်း ပြောလီရေ၊ “လူအတွက် သတင်းနိကို ဖန်ဆင်းလီစာ ဖြစ်တေ၊ ယေကေလည်း သတင်းနိအတွက် လူကို ဖန်ဆင်းလီစာ မဟုတ်။ 28ယင်းအတွက်န မနုသသားတော်စာ သတင်းနိကိုလည်း ပိုင်ဆိုင်စာ အသျှင် ဖြစ်တေ။”