Mark 5

နတ်ဆိုးကိုင်သူတစ်ယောက် အကောင်းဖြစ်ခြင်း

(မဿဲ ၈:၂၈-၃၄၊ လုကာ ၈:၂၆-၃၉)

1ယင်းနောက် ယေရှုန သူ့တပည့်ရို့စာ ဂါလိလဲမြစ်ကို ကူးရို့ ဂါဒရလူမျိုးရို့ နီထိုင်စာ အရပ်တို့ ကြွကတ်လီရေ။ 2ယေရှု လောင်းက ဆင်းရေချက်ချင်း နတ်ဆိုးကိုင်သူတစ်ယောက်န တွိလီရေ။ ယင်းခါ ထိုနတ်ဆိုးကိုင်သူစာ သင်္ချိုင်းက ထွက်ရို့ ယေရှုတို့ လာလီရေ။ 3သူစာ သင်္ချိုင်းမာစီ လားရို့ နီလီရေ အရာ သူ့ကို တစ်ယောက်လည်း သံကျိုက်ကြိုးန တိုင်အောင် ချိုင်ထားဖို့ မနိုင်လီ။ 4လူရို့စာ အပြန်ပြန် သူ့အခြီအလက်ကို သံကျိုက်ကြိုးန ချိုင်ရို့ထားကတ်လီရေ၊ ယေကေလည်း သူစာ ထိုသံကျိုက်ကြိုးတိကို ဖြတ်ဘိုက်လီရေ အရာ ခြီချင်းကိုလည်း ချိုးဘိုက်လိုက်လီရေ။ သူ့ကို တစ်ယောက်လည်း ထိန်းရို့ မနိုင်လီ။ 5သူစာ ညဉ့်ပါ-ရက်ပါ သင်္ချိုင်းတိန တောတောင်တိမာ အော်ရို့ လည်နီလီရေ အရာ ကျောက်လုံးအစောင်းန ကိုယ့်ခန္ဓာကို လှီးနီလီရေ။ 6– 7ထိုနတ်ဆိုးကိုင်သူစာ ယေရှုကို အဝီးက မြင်ရေလှောက်ကပင် ဗြီးလာရို့ သူ့ကို ရှိခိုးလီရေ။ အရာ သူစာ အားန အော်ရို့ ပြောလီရေ၊ “မြင့်မြတ်စာ ထာဝရဘုရား၏ သားတော် ယေရှု၊ ကိုယ်ဘင် အကျွန်န ဇာ ဆိုင်ပါစာလည်း? ထာဝရဘုရား၏ နာမည်ကို တိုင်တန်းရို့ ပြောပါရေ၊ ကိုယ်ဘင် အကျွန့်ကို ဝေဒနာ မပီးပါကေ့!” 8အကြောင်းကား ယင်းအယင်က ယေရှုစာ သူ့ကို၊ “အဝေး နတ်ဆိုး၊ နင် ဒေလူခန္ဓာက ထွက်လားလီ” ဟို့ ပြောလီရေ။

9ယေရှုစာ သူ့ကို မီးလီရေ၊ “နင့် နာမည် ဇာလည်း?” သူစာ အဖြေပီးလီရေ၊ “အကျွန့်နာမည် သရွဲပါ၊ အကြောင်းကား အကျွန်ရို့ အများကြီး ဟိကတ်ပါရေ။” 10ကိုယ်ရို့ကို ထိုအရပ်က နှင်မထုတ်လတ်အောင် သူစာ ယေရှုကို အပြန်ပြန် အညှိုးခံရို့ တောင်းပန်ကတ်လီရေ။

11ယင်းအချိန်ခါ ယင်းနေရာန မနီးမဝီး တောင်ခယောကာမာ ဝက်အရွီကြီးတစ်ရွီ အစာစားရို့ ဟိလီရေ။ 12နတ်ဆိုးတိစာ ယေရှုကို တောင်းပန်ရို့ ပြောလီရေ၊ “အကျွန်ရို့ကို ထိုဝက်အရွီတို့ ပို့ပါ၊ ထိုဝက်တိဘားမာ အကျွန်ရို့ကို ဝင်ဖို့အခွင့် ပီးပါ။” 13အရာ ယေရှုစာ သူရို့ကို ထိုဝက်တိဘားမာ ဝင်ဖို့အခွင့် ပီးလီရေ။ ယင်းခါ နတ်ဆိုးတိစာ ထိုလူခန္ဓာက ထွက်ရို့ ဝက်တိဘားမာ ဝင်ကတ်လီရေ။ ယင်းအတွက်န ဝက်တိစာ မြစ်ကမ်းနားတို့ တစ်ဟုန်တည်း ဗြီးဆင်းရို့ ရီမာ နစ်ရို့ သီလားခလီရေ။ ထိုဝက်အရွီမာ ဝက်အကောင် နှစ်ထောင်လှောက် ဟိလီရေ။

14ယင်းခါ ဝက်ကျောင်းသားရို့စာ ဗြီးလားခရို့ ထိုရွာသားရို့န အပါးနီးဝန်းကျင်မာ ဟိသမျ လူရို့ဘားမာ ဖြစ်ပျက်ခြင်း အကြောင်းကို ပြောပြကတ်လီရေ။ ယင်းခါ လူရို့စာ ဇာ ဖြစ်တေလည်းဆိုစာကို ကြည့်ဖို့အတွက် ထွက်လာကတ်လီရေ။ 15ထို ရွာသားရို့စာ ယေရှုတို့ လာကတ်တေခါ နတ်ဆိုး အများကြီး ကိုင်စာက ကောင်းသူကို အဝတ်အစား ဝတ်ရို့ အကောင်းမွန်းစာ ထိုင်ရို့ မြင်ရကတ်လီရေ။ ယင်းသျှင့်ကို မြင်ရို့ သူရို့စာ ကြောက်ကတ်လီရေ။ 16ထိုဖြစ်ပျက်ခြင်းကို မြင်လီသူရို့စာ နတ်ဆိုးကိုင်စာက ကောင်းသူ အကြောင်းန ဝက်တိ အကြောင်းကို ရွာသားရို့ဘားမာ ပြောပြကတ်လီရေ။ 17ထိုစကားတိကို ကြားရို့ သူရို့စာ ထိုအရပ်က ထွက်လားပတ်စီအတွက် ယေရှုကို တောင်းပန်ကတ်လီရေ။

18ယေရှု လောင်းမာ တက်လီရေခါ နတ်ဆိုးကိုင်စာက ကောင်းသူစာ ယေရှု နောက်က လိုက်ဖို့အတွက် တောင်းပန်လီရေ။ 19ယေကေလည်း ယေရှုစာ သူ့ကို ဒေပိုင် ပြောရို့ ရွှတ်လိုက်လီရေ၊ “နင် အိမ်တို့ ပြန်လားလီ အရာ နင့်အတွက် အသျှင် ဇာလှောက် ကြီးကျယ်စာ အလုပ်လုပ်လီရေလည်းဆိုစာကို အရာ နင့်ကို ဇာပိုင် ကျေးဇူးပြုလီရေလည်းဆိုစာကို နင့် အိမ်သားရို့ဘားမာ ပြောပြလီ။” 20ယင်းခါ သူစာ ယင်းနေရာက လားခလီရေ အရာ ကိုယ့်အတွက် ယေရှု ဇာလှောက် ကြီးကျယ်စာ အလုပ်လုပ်လီရေလည်းဆိုစာကို ဒေကာပေါလိပြည်နယ်မာ လည်ရို့ ပြောပြလီရေ။ ယင်းခါ သူ့စကားကို ကြားရို့ လူရို့ အားကုံးသူ အံ့ဩကတ်လီရေ။

မိန်းမနှစ်ယောက် အကောင်းဖြစ်ခြင်း

(မဿဲ ၉:၁၈-၂၆၊ လုကာ ၈:၄၀-၅၆)

21– 22ယေရှုစာ အရာတစ်ပြန် လောင်းမာ တက်ရို့ မြစ်ကမ်းတစ်ဖက်တို့ ကူးလီရေ။ ယင်းခါ လူအများကြီး သူ့လေးဖက်လက်စိမာ လာရို့ စုကတ်လီရေ။ သူစာ မြစ်ကမ်းနားမာ ရပ်နီတုံးမာ ယာဣရုနာမည်န ယုဒလူမျိုး တရားဇရပ်မာ ဂေါင်းဆောင်တစ်ယောက် ယင်းနေရာတို့ လာလီရေ အရာ သူစာ ယေရှုကို မြင်ရေခါ သူ့အခြီးရင်းမာ ဒူးထောက်လီရေ။ 23အရာ သူစာ ယေရှုကို ကောင်းကောင်း တောင်းပန်ရို့ ပြောလီရေ၊ “ဆရာ၊ အကျွန့်မာ သမီးသျှေ သီပါဖို့ဗျာ။ ကိုယ်ဘင် လာရို့ အကျွန့် သမီးသျှေ ခန္ဓာမာ အလက်တင်ရေဆိုကေ သူစာ အသက်ရှင်ပါဖို့။”

24ယင်းခါ ယေရှုစာ သူနအတူ လိုက်လီရေ။ ယေရှုနအတူ လူအများကြီး လိုက်ကတ်လီရေ အရာ သူ့လေးဖက်လက်စိမာ တိုးရို့တွန်းရို့ ဟိကတ်လီရေ။ 25ထိုလူပရိတ်သတ်ရို့အထဲမာ တစ်ဆယ့်နှစ်နှစ်ပတ်လုံး သွီးကျရောဂါ ဖြစ်နီစာ မိန်းမတစ်ယောက် ဟိလီရေ။ 26သူစာ ဆီးဆရာရို့ အကြောင်းန ကောင်းကောင်း ဒုက္ခ ခံရလီရေ။ သူစာ ရောဂါကောင်းဖို့အတွက် ကိုယ့်မာ ဟိသမျ အားကုံးကို ရောင်းရို့ ဆီးကြည့်လီရေ၊ ယေကေလည်း သူ့မာ ရောဂါကောင်းဖို့စာထက်ပင် တစ်ရက်ထက် တစ်ရက် ပိုရို့ ဆိုးလာလီရေ။ 27ယေရှု အကြောင်းကို ကြားရို့ သူစာ လူကျိုင်ထဲမာ ယေရှု နောက်က လာရို့ သူ့ကိုယ်ရုံကို ကိုင်လီရေ၊ 28အကြောင်းကား သူစာ၊ “ယေရှု အဝတ်ကိုဆိုကေလည်း ကိုင်ဖို့ ရရေဆိုကေ ငါ့မာ ရောဂါကောင်းလားလီဖို့” ဆိုပြီးကေ စိတ်မာ စိတ်မာ စဉ်းစားရို့ ဟိလီရေ။ 29ယေရှု ကိုယ်ရုံစွမ်ကို ကိုင်ရေချက်ချင်း သူ့မာ သွီးကျရောဂါစာ ကောင်းလားခလီရေ အရာ သူစာ ကိုယ့်မာ ရောဂါကောင်းလားခဗျာဆိုစာကို သိလီရေ။

30ယေရှုစာ ကိုယ့်က တန်ခိုး ထွက်လားခစာကို ချက်ချင်း သိလီရေ။ ယင်းအတွက်န သူစာ လူပရိတ်သတ် လေးဖက်လက်စိတို့ ဝန်းရို့ယာရို့ ကြည့်ပြီးကေ မီးလီရေ၊ “ငါ့အဝတ်ကို အသူ ကိုင်လီစာလည်း?” 31သူ့တပည့်ရို့စာ ပြောကတ်လီရေ၊ “လူရို့ တစ်ယောက်ကို တစ်ယောက် တိုးရို့တွန်းရို့ ကိုယ်ဘင်ဘားမာ အက်ကျကတ်စာကို ကိုယ်ဘင် မြင်ပါရေ၊ ယေကေလည်း ‘ငါ့အဝတ်ကို အသူ ကိုင်ရေလည်း’ ဟို့ ကိုယ်ဘင် မီးပါရေ?” 32ယေကေလည်း ယေရှုစာ ကိုယ့်ကို အသူ ကိုင်လီရေလည်းဆိုစာကို သိဖို့အတွက် လေးဖက်လက်စိတို့ ဝန်းရို့ယာရို့ ကြည့်လီရေ။ 33ယင်းမိန်းမစာ ကိုယ့်ခန္ဓာမာ ဇာ ဖြစ်တေလည်းဆိုစာကို သိရေခါ တုန်ရို့ တုန်ရို့ လာရို့ ယေရှု အခြီရင်းမာ ဒူးထောက်လီရေ အရာ ဟိသမျ အကြောင်းအရာကို ပြောပြလီရေ။ 34ယေရှုစာ သူ့ကို ပြောလီရေ၊ “အယွေ၊ အယွေ ကျုံရေအတွက်န အယွေမာ ရောဂါကောင်းလားခဗျာ။ ဒေဂု စိတ်အီးချမ်းသာန ပြန်လားလီဖိ၊ အယွေ အရာ ဒေပိုင် ဒုက္ခကို မခံရစီကေ့ဖိ။”

35ယေရှု စကားပြောနီတုံးမာ ဂေါင်းဆောင် ယာဣရုအိမ်က လူလိုင်းကေယောက် လာရို့ ပြောကတ်လီရေ၊ “ကိုယ်ဘင်မာ သမီးသျှေ သီလားခပါဗျာ။ ဆရာကို ဒုက္ခ မထည့်ပါကေ့ဖိ။” 36ယေကေလည်း ယေရှုစာ ထိုစကားကို ကြားရို့ ယာဣရုကို ပြောလီရေ၊ “မကြောက်ကေ့၊ ကျုံခြင်းတရားကိုရာ ထား!” 37ယင်းခါ ယေရှုစာ သက်သက် ပေတရု၊ ယာကုပ် အရာ သူ့မာညီ ယောဟန်ကို ကိုယ်နအတူ ခေါ်ယူလီရေ။ 38ယင်းနောက် သူစာ ယာဣရုအိမ်တို့ ရောက်တေခါ ကောင်းကောင်း ရောင်းရင်းသပ်ပြီးကေ အော်ရို့ ငိုနီကတ်စာကို မြင်ရလီရေ။ 39ယင်းခါ သူစာ အိမ်ထဲတို့ ဝင်ရို့ လူရို့ကို ပြောလီရေ၊ “ကိုယ်ဘင်ရို့ ဇာဖို့ ရောင်းရင်းသပ်ရို့ ငိုနီကတ်စာလည်း? ဒေ မိန်းမသျှေ မသီသိ၊ အိပ်နီစာရာ။”

40ယေရှု စကားကို ကြားရို့ လူရို့စာ ရယ်သွန်းပြုကတ်လီရေ။ ယင်းခါ သူစာ အားကုံးသူကို ပြင်တို့ ထွက်ဖို့ ခိုင်းလီရေ။ အရာ သူစာ မိန်းမသျှေ အမိအဖန ကိုယ့်တပည့်ရို့ကို ယူရို့ မိန်းမသျှေ ဟိစာအခန့်တို့ ဝင်လီရေ။ 41အရာ သူစာ မိန်းမသျှေ အလက်ကို ကိုင်ရို့ ပြောလီရေ၊ “တလိသကုမိ။” ဒေ စကား အဓိပ္ပါယ်ကား၊ သမီးသျှေ၊ ငါ နင့်ကို ပြောရေ၊ ထဖိ။ 42ယေရှု ပြောရေချက်ချင်း ထိုမိန်းမသျှေစာ ထရို့ လားနီလီရေ။ ယင်းခါ အားကုံးသူ ကောင်းကောင်း အံ့ဩကတ်လီရေ။ (ထိုမိန်းမသျှေစာ အသက်တစ်ဆယ့်နှစ်နှစ် ဟိလီရေ)။ 43ယင်းနောက် သူစာ အိမ်ထဲမာ ဖြစ်စာ အကြောင်းအရာကို တစ်ယောက်ဘားမာလည်း မပြောရအောင် တတင်းရရင်း ဟန့်ဘိုက်ခလီရေ အရာ ထိုမိန်းမသျှေကို တစ်ခုမသာ စားစရာ ပီးဖို့ ခိုင်းလီရေ။