Mark 6

နာဇရက်မြို့သျှေသားရို့ ယေရှုကို ငြင်းပယ်ခြင်း

(မဿဲ ၁၃:၅၃-၅၈၊ လုကာ ၄:၁၆-၃၀)

1ယင်းနောက် ယေရှုစာ ယင်းနေရာက ထွက်ရို့ ကိုယ်ကြီးပြင်းခစာ နာဇရက်မြို့သျှေတို့ ကြွလီရေ။ ယင်းခါ တပည့်ရို့လည်းသောက် သူနအတူ ပါကတ်လီရေ။ 2သူစာ သတင်းနိမာ တရားဇရပ်တို့ ကြွရို့ သွန်သင်ပီးဖို့ စလီရေ အရာ လူအများကြီး သူ့စကားကို ကြားရေခါ အံ့ဩရို့ ပြောကတ်လီရေ၊ “ဒေသူမာ ဒေ ညာဏ်ပညာတိ ဇာက ရခီရေလည်း? ဒေသူ ဇာပိုင်ပျင်ရို့ ညာဏ်ပညာန စကား ပြောနိုင်ရေလည်း? အရာ ဒေ အံ့ဩဖွယ်အလုပ်တိကို ဒေသူ ဇာပိုင်ပျင်ရို့ လုပ်နိုင်ရေလည်း? 3ဒေသူ လက်သမားသျှေ မဟုတ်လော? ဒေသူ မာရိသား မဟုတ်လော? ဒေသူစာ ယာကုပ်၊ ယောသပ်၊ ယုဒ အရာ ရှိမုန်မာ အစ်ကိုသေ မဟုတ်လော? ဒေသူမာ နမှရို့ ဒေမာ ငါရို့နအတူ နီထိုင်ကတ်တေ မဟုတ်လော?” လူရို့မာ ဒေပိုင် စဉ်းစားချက် အကြောင်းန သူရို့စာ ယေရှုကို လက်ခံဖို့ မနိုင်ကတ်လီ။

4ယင်းခါ ယေရှုစာ သူရို့ကို ပြောလီရေ၊ “ဘုရားသတင်းပို့သူရို့စာ ကိုယ့်မြို့၊ ကိုယ့်အမျိုးအဆွီ အရာ ကိုယ့်အိမ်ကို ပယ်ရို့ အခြား ဟိသမျ နေရာမာ ရိုသေခြင်းကို ခံရကတ်တေ။” 5ယင်းနောက် သူစာ ရောဂါသေ လိုင်းကေယောက်ဘားမာ အလက်တင်ရို့ အကောင်း လုပ်လီရေ၊ ယေကေလည်း သူစာ ထိုအလုပ်တိကို ပယ်ရို့ ယင်းနေရာမာ အခြားအံ့ဩဖွယ်အလုပ် တစ်ခုလည်း လုပ်ဖို့ မရခလီဗျာ။ 6လူရို့ ကိုယ့်ကို မကျုံကတ်စာကို မြင်ရို့ သူစာ ကောင်းကောင်း အံ့ဩလီရေ။ ယင်းနောက် သူစာ မြို့ရွာတိမာ လည်ရို့ သွန်သင်ပီးဖို့ စလီရေ။

တမန်တော်ရို့ကို တရားဟောဖို့ ရွှတ်ခြင်း

(မဿဲ ၁၀:၅-၁၅၊ လုကာ ၉:၁-၆)

7ယင်းနောက် သူစာ တမန်တော် တစ်ဆယ့်နှစ်ယောက်ကို ကိုယ့်တို့ ခေါ်လီရေ အရာ တရားဟောဖို့အတွက် နှစ်ယောက် နှစ်ယောက်စီ ရွှတ်လိုက်လီရေ။ သူစာ နတ်ဆိုးတိကို အနိုင်ယူဖို့အတွက် သူရို့ကို တန်ခိုး ပီးလီရေ။ 8အရာ လားရေလမ်းမာ အသုံးပြုဖို့အတွက် တောင်မိတစ်ချောင်းကို ပယ်ရို့ အခြားတစ်ခုကိုလည်း သူစာ တပည့်ရို့ကို ယူဖို့အခွင့် မပီးလီ။ စားစရာ၊ ရွယ်အိပ် အရာ ခါးပန်းကြားမာ ဖွေသျှာတိုင်အောင်ပင် ချပ်ရို့ ယူဖို့အခွင့် မပီးလီ။ 9သူစာ တပည့်ရို့ကို ဖနပ်စီးဖို့ ခိုင်းလီရေ၊ ယေကေလည်း အင်္ကျီတစ်လုံးထက် နှစ်လုံးအပို ယူဖို့အခွင့် မပီးလီ။ 10သူစာ အရာလည်း ပြောလီရေ၊ “နင်ရို့ အသူ့အိမ်မာမဆို တည်းရေဆိုကေ ထို ရွာက ထွက်ရို့ မလားသကြား နင်ရို့ ယင်းအိမ်မာ နီလီကတ်။ 11ဇာမြို့မာပင်မဆို လူရို့စာ နင်ရို့ကို လက်မခံကတ်ဆိုကေ အရာ နင်ရို့ ဟောပြောစာ စကားကို နားမထောင်ကတ်ဆိုကေ နင်ရို့ ထိုမြို့က ထွက်လားကတ်တေခါ သူရို့ကို သတိပီးစာ အမှတ်တရအဖြစ် နင်ရို့ အခြီက ကျုပ်မုန့်ကို ခါချဘိုက်ခကတ်။”

12ယင်းနောက် တပည့်ရို့စာ လူရို့ အပြစ်က စိတ်လှည့်ရို့ လာကတ်ပတ်စီအတွက် အမျိုးမျိုး မြို့ရွာတိမာ လည်ရို့ တရားဟောကတ်လီရေ။ 13သူရို့စာ လူရို့က နတ်ဆိုး အများကြီး နှင်ထုတ်ကတ်လီရေ အရာ ရောဂါသေ အများကြီး အဂေါင်းမာ ဆီထည့်ရို့ သူရို့ကို အကောင်း လုပ်ကတ်လီရေ။

ဟေရုဒ်မင်း စဉ်းစားရို့မရ ဖြစ်ခြင်း

(မဿဲ ၁၄:၁-၂၊ လုကာ ၉:၇-၉)

14ယေရှုနာမည်စာ လေးဖက်လက်စိမာ ကျော်လီရေအတွက်န ဟေရုဒ်မင်းလည်းသောက် ကြားရလီရေ။ လူရို့အထဲမာ တစ်ယောက်တစ်ရီ ပြောကတ်လီရေ၊ “သူစာ ရီနှစ်မင်္ဂလာပီးသူ ယောဟန် ဖြစ်တေ။ သူစာ သီရာက ပြန်ရှင်ထမြောင့်ဗျာ။ ယင်းအတွက်န သူစာ ဟိသမျ အံ့ဩဖွယ်အလုပ်ကို လုပ်နိုင်ရေ။” 15တစ်ယောက်တစ်ရီ ပြောကတ်လီရေ၊ “သူစာ ဘုရားသတင်းပို့သူ ဧလိယ ဖြစ်တေ။” အရာ တစ်ယောက်တစ်ရီ ပြောကတ်လီရေ၊ “ခိုက်ဟောင်းက ဘုရားသတင်းပို့သူရို့ပိုင် သူလည်းသောက် ဘုရားသတင်းပို့သူတစ်ပါး ဖြစ်တေ။” 16ယေကေလည်း ဟေရုဒ်မင်းစာ ထိုစကားတိကို ကြားရို့ ပြောလီရေ၊ “သူစာ ငါ အဂေါင်း ဖြတ်ဖို့ အာဏာချလီစာ ရီနှစ်မင်္ဂလာပီးသူ ယောဟန် ဖြစ်တေ။ သူစာ သီရာက ပြန်ရှင်ထမြောင့်လာဗျာ။”

ရီနှစ်မင်္ဂလာပီးသူ ယောဟန် အသီခံရခြင်း

(မဿဲ ၁၄:၃-၁၂)

17– 18ရီနှစ်မင်္ဂလာပီးသူ ယောဟန်စာ ဒေပိုင် အသီခံရလီရေ။ ဟေရုဒ်မင်းမာ ဖိလိပ္ပုနာမည်န ညီတစ်ယောက် ဟိလီရေ။ ဖိလိပ္ပုမာ မယားနာမည်စာ ဟေရောဒိမ ဖြစ်တေ။ ဟေရုဒ်မင်းစာ ဒေ ဟေရောဒိမ အကြောင်းန လူရွှတ်လိုက်ရို့ ယောဟန်ကို ဖမ်းရို့ ထောင်မာ လှောင်ထားလီရေ၊ အကြောင်းကား ယောဟန်စာ ဟေရုဒ်မင်းကို အပြန်ပြန် ပြောလီရေ၊ “ကိုယ်ဘင် ကိုယ့်ညီမာ မယား ဟေရောဒိမကို နစပ်ဖို့ မသင့်ပါ။” 19ယင်းအတွက်န ဟေရောဒိမစာ ယောဟန်ကို ကောင်းကောင်း မန်တက်ရို့ အသီသတ်ဖို့ ကြည့်လီရေ။ ယေကေလည်း သူစာ ယောဟန်ကို သတ်ဖို့ မနိုင်လီ၊ 20အကြောင်းကား ဟေရုဒ်မင်းစာ ယောဟန်ကို သူတော်ကောင်းန သန့်ရှင်းသူတစ်ပါး ဖြစ်တေဆိုစာကို သိလီရေအတွက်န သူ့ကို ကြောက်လီရေ။ ယင်းအတွက်န သူစာ ယောဟန်ကို အပြန်ပြန် ဖီးဒုက္ခက ကယ်ဆယ်လီရေ။ ဟေရုဒ်မင်းစာ ယောဟန် စကားကို နားထောင်ရေခါ မငြိမ်းမသာ ဖြစ်ကေလည်းသောက် သူ့စကားကို နားထောင်ဖို့ နှစ်သက်လီရေ။

21နောက်ဆုံးပြီးမာ ဟေရောဒိမမာ ယောဟန်ကို အသီသတ်ဖို့ အခွင့်ရေးတစ်ခု ရလီရေ။ ဟေရုဒ်မင်းစာ ကိုယ်မွီးဖွားစာ ရက်ကို ကျင့်ပရေနိမာ အစိုးရလူကြီးရို့ကို၊ စစ်ဗိုလ်ကြီးရို့ကို အရာ ဂါလိလဲပြည်နယ်မာ ဟိသမျ လူကြီးရို့ကို စားပွဲတစ်ပွဲ ပီးလီရေ။ 22ဟေရောဒိမ သမီးစာ ထိုစားပွဲမာ ကပြရို့ ဟေရုဒ်မင်းန အခြား အာဂန္တုရို့ကို နှစ်သက်အောင် လုပ်လီရေ။ ယင်းခါ ဟေရုဒ်မင်းစာ ထိုမိန်းမသျှေကို ပြောလီရေ၊ “နင် တောင်းစာကို ငါ ပီးဖို့။” 23ဟေရုဒ်မင်းစာ ထိုမိန်းမသျှေဘားမာ အကျိန်သစ္စာ ကိုင်ရို့ ပြောလီရေ၊ “နင် တောင်းစာကို ငါ ပီးဖို့။ ယင်းထက်မက ငါ့နိုင်ငံ တစ်ခြမ်းကိုလည်း နင့်ကို ငါ ပီးဖို့။” 24ယင်းခါ ထိုမိန်းမသျှေစာ အမိတို့ လားရို့ မီးလီရေ၊ “အမိ၊ အကျွန် ဇာ တောင်းဖို့လည်း?” အမိစာ ပြောလီရေ၊ “ရီနှစ်မင်္ဂလာပီးသူ ယောဟန် အဂေါင်းကို တောင်းခီ။” 25ထိုမိန်းမသျှေစာ ချက်ချင်း မင်းတို့ လားရို့ ပြောလီရေ၊ “ရီနှစ်မင်္ဂလာပီးသူ ယောဟန် အဂေါင်းကို လောင်ပန်း တစ်ချပ်မာ ထည့်ရို့ အကျွန့်တို့ ယူခပါ။”

26ထိုစကားကို ကြားရို့ ဟေရုဒ်မင်းစာ ကောင်းကောင်း စိတ်ဒုက္ခ ရလီရေ၊ ယေကေလည်း စားပွဲမာ လာကတ်စာ အာဂန္တုရို့ ရှိက အကျိန်သစ္စာ ကိုင်ရို့ ပြောလီရေအတွက်န သူစာ ထိုမိန်းမသျှေ တောင်းစာကို ငြင်းဖို့ မနိုင်လီဗျာ။ 27– 28ယင်းခါ သူစာ ချက်ချင်း စစ်သားတစ်ယောက်ကို ရွှတ်လိုက်ရို့ ယောဟန် အဂေါင်းကို ဖြတ်ယူခဖို့ ခိုင်းလီရေ။ ထိုစစ်သားစာ ထောင်တို့ လားရို့ ယောဟန် အဂေါင်းကို ဖြတ်လီရေ။ ယင်းနောက် သူစာ ထိုအဂေါင်းကို လောင်ပန်း တစ်ချပ်မာ ထည့်ယူခရို့ ထိုမိန်းမသျှေကို ပီးလီရေ။ အရာ မိန်းမသျှေစာ ထိုအဂေါင်းကို ကိုယ့်အမိကို ပီးလီရေ။ 29ထိုသတင်းကို ကြားရို့ ယောဟန် တပည့်ရို့စာ လာပြီးကေ သူ့အကောင်တော်ကို ယူလားရို့ သင်္ဂြိုဟ်ကတ်လီရေ။

လူငါးထောင်ကို ကျွေးခြင်း

(မဿဲ ၁၄:၁၃-၂၁၊ လုကာ ၉:၁၀-၁၇၊ ယောဟန် ၆:၁-၁၅)

30ယေရှု ရွှတ်လိုက်လီစာ တမန်တော် တစ်ဆယ့်နှစ်ယောက် ပြန်လာကတ်လီရေ၊ အရာ သူရို့စာ ကိုယ်ရို့ လုပ်လီကတ်စာ အလုပ်အကြောင်းန သွန်သင်ပီးလီစာ ဟိသမျ အကြောင်းအရာကို ယေရှုဘားမာ ပြောပြကတ်လီရေ။ 31ယင်းခါ လူအများကြီး အလားအလာ ဟိလီရေအတွက်န တပည့်ရို့စာ တစ်ခုလည်း စားသောက်ဖို့ မရကတ်လီ။ ယင်းအတွက်န ယေရှုစာ သူရို့ကို ပြောလီရေ၊ “နင်ရို့ ငါနအတူ တတိန်းဆဆိတ်နေရာ တစ်ခုတို့ လားရို့ တစ်နားသျှေ နားနီကတ်။” 32ယင်းအတွက်န သူရို့စာ ယေရှု ပြောရေအတိုင်း လောင်းတစ်စင်းမာ တက်ရို့ တတိန်းဆဆိတ်နေရာ တစ်ခုတို့ လားခကတ်လီရေ။ 33ယေကေလည်း လူရို့စာ သူရို့ လားစာကို မြင်ရို့ အရိပ်ကျကတ်လီရေ။ ယင်းအတွက်န အပါးနီးဝန်းကျင်မာဟိစာ မြို့ရွာတိက လူရို့စာ ဗြီးလားရို့ သူရို့ထက် အယင် ထိုနေရာတို့ ရောက်လားခကတ်လီရေ။ 34ယေရှုစာ လောင်းက ဆင်းရေခါ လူပရိတ်သတ် အများကြီးကို မြင်ရလီရေ။ ထိုလူရို့စာ အကျောင်းသားမဟိစာ သိုးဆိတ်တိနတူကတ်လီရေ။ ယင်းအတွက်န ယေရှုစာ သူရို့ကို သနားလီရေ။ ယင်းခါ ယေရှုစာ သူရို့ဘားမာ အများကြီး အကြောင်းအရာကို သွန်သင်ပီးလီရေ။

35ယင်းနိ နီဝင်ဖို့ ပါးလာရေခါ တပည့်ရို့စာ ယေရှုတို့ လာရို့ ပြောကတ်လီရေ၊ “ဒေ နေရာစာ တတိန်းဆဆိတ်နေရာ ဖြစ်ပါရေ အရာ နီလည်း ဝင်လာပါဗျာ။ 36ဒေ လူရို့စာ အပါးနီးဝန်းကျင်မာ ရွာတိတို့ လားရို့ ကိုယ်ရို့အတွက် အစားဝယ်ဖို့ ရလတ်အောင် သူရို့ကို ရွှတ်လိုက်ပါဖိ။” 37ယင်းခါ ယေရှုစာ သူရို့ကို ပြောလီရေ၊ “နင်ရို့ ကိုယ်တိုင် သူရို့ကို တစ်ခုမသာ စားဖို့ ပီးလိုက်ကတ်။” တပည့်ရို့စာ သူ့ကို ပြောကတ်လီရေ၊ “ဒေ လူရို့ကို အစားဝယ်ရို့ ပီးဖို့ဆိုကေပင် ငွေသားတန်းကား အချပ်နှစ်ရာလိုပါဖို့။” 38ယေရှုစာ သူရို့ကို ပြောလီရေ၊ “နင်ရို့မာ ပေါင်မုန့် ဇာမျှသျှက် ဟိရေလည်း ကြည့်လိုက်။” သူရို့စာ ကြည့်ရို့ ပြောကတ်လီရေ၊ “အကျွန်ရို့မာ ပေါင်မုန့် ငါးသျှက်န ငါးနှစ်ကောင် ဟိပါရေ။”

39ယင်းခါ ယေရှုစာ လူရို့ကို မြက်တောမာ အစုအစုပျင်ရို့ ထိုင်စီဖို့အတွက် တပည့်ရို့ကို ခိုင်းလီရေ။ 40အရာ လူရို့စာ တစ်စုစီမာ အယောက်တစ်ရာစီ၊ တစ်ရာစီ၊ အယောက်ငါးဆယ်စီ၊ ငါးဆယ်စီ ပျင်ရို့ ထိုင်ကတ်လီရေ။ 41ယင်းခါ ယေရှုစာ ပေါင်မုန့် ငါးသျှက်န ငါးနှစ်ကောင်ကို ယူပြီးကေ ဂေါင်းခင်တို့ မော်ကြည့်ရို့ ထာဝရဘုရားကို ကျေးဇူးတင်လီရေ။ ယင်းနောက် သူစာ ထိုပေါင်မုန့်တိကို ဖဲ့ရို့ လူရို့ကို ဝီပီးဖို့အတွက် တပည့်ရို့အလက်မာ အပ်လီရေ။ အရာ ငါးနှစ်ကောင်ကိုလည်း ယင်းပိုင်တထန် ဝီပီးလီရေ။ 42ယင်းခါ လူရို့ အားကုံးသူ ဝအောင် စားကတ်လီရေ။ 43ယင်းနောက် တပည့်ရို့စာ လူရို့ စားရို့ ကျန်စာ ပေါင်မုန့်န ငါးအပဲ့အခြမ်းတိကို ကောက်ကတ်တေခါ တစ်ဆယ့်နှစ်တောင်း အပြည့် ဖြစ်လီရေ။ 44ထိုစားကတ်သူရို့အထဲမာ ယောက်ျား သက်သက် ငါးထောင် ဟိလီရေ။

ယေရှု ရီအထက်က ကြွခြင်း

(မဿဲ ၁၄:၂၂-၃၆၊ ယောဟန် ၆:၁၆-၂၁)

45ယင်းနောက် ယေရှုစာ တပည့်ရို့ကို ကိုယ့်ထက် အယင် လောင်းမာ တက်ရို့ မြစ်ကမ်းတစ်ဖက်က ဗက်ဇဲဒရွာတို့ လားဖို့ ခိုင်းလီရေ။ အရာ သူစာ တစ်ချိန်တည်းမာ လူရို့ကို အိမ်တို့ ပြန်ရွှတ်လီရေ။ 46သူစာ လူရို့ကို ရွှတ်လိုက်ပြီးရေနောက် ဆုတောင်းဖို့အတွက် တောင်တို့ တက်လီရေ။ 47ညဉ့်နက်တေခါ တပည့်ရို့မာ လောင်းစာ မြစ်အလယ်တို့ ရောက်လီရေ၊ ယေကေလည်း ယေရှု နူးချင်းတည်း တောင်ထက်မာ ဟိလီရေ။ 48လီအပြန်ထရေအတွက်န ကိုယ့်တပည့်ရို့ ကောင်းကောင်း ဒုက္ခခံရို့ လောင်းလှော်စာကို သူစာ မြင်လီရေ။ မိုးလင်းဖို့လုတ်မာ သူစာ ရီအထက်က တပည့်ရို့တို့ ကြွလာလီရေ အရာ သူစာ တပည့်ရို့ကို ရွန်ရို့ ရှိတို့ ကြွဖို့ ကြည့်လီရေ။ 49ယေကေလည်း တပည့်ရို့စာ သူ့ကို ရီအထက်က ကြွနီစာကို မြင်ရေခါ နတ်ထင်ရို့ အော်ကတ်လီရေ၊ 50အကြောင်းကား အားကုံးသူ သူ့ကို မြင်ရို့ ကြောက်ကတ်လီရေ။ ယေရှုစာ ချက်ချင်း သူရို့ကို ပြောလီရေ၊ “မကြောက်ကတ်ကေ့! ငါရာ၊ ရဲဝံ့ဖြည့်ကတ်!” 51ယေရှုစာ တပည့်ရို့ လောင်းမာ တက်တေခါ လီတန့်လားခလီရေ။ ယင်းခါ တပည့်ရို့စာ ကောင်းကောင်း အံ့ဩကတ်လီရေ၊ 52အကြောင်းကား သူရို့စာ ယင်းအယင်က ပေါင်မုန့် ကျွေးလီစာ အကြောင်းကို နားမလည်လီကတ်။ သူရို့မာ စိတ်နှလုံးစာ ကျန်းရို့ ဟိလီရေ။

လူအများကြီး ရောဂါကောင်းခြင်း

(မဿဲ ၁၄:၃၄-၃၆)

53ယေရှုန သူ့တပည့်ရို့စာ မြစ်ကို ကူးရို့ ဂင်္နေသရက်အရပ်မာ လားရို့ လောင်းကို ချိုင်းကတ်လီရေ။ 54– 55သူရို့ လောင်းက ဆင်းရေချက်ချင်း လူရို့စာ ယေရှုကို သိကတ်လီရေ။ ယင်းအတွက်န လူရို့စာ ထိုအရပ်မာ ဟိသမျ နေရာတို့ ဗြီးကတ်လီရေ။ ယင်းနောက် ယေရှု ဇာမာ ဟိရေလည်းဆိုစာကို သတင်း ယူရို့ သူရို့စာ ရောဂါသေရို့ကို သယင်းန ရွက်ရို့ ယေရှုတို့ ယူလာကတ်လီရေ။ 56ယေရှု ဇာ မြို့ရွာတို့မဆို ကြွရေခါ ယင်းနေရာမာ လူရို့စာ ရောဂါသေရို့ကို ယူခရို့ ဈီးမာ စုထားကတ်လီရေ။ အရာ ယေရှု ကိုယ်ရုံစွမ်ကို ထိုရောဂါသေရို့ ကိုင်ဖို့ ရလတ်အောင် လူရို့ ယေရှုကို တောင်းပန်ကတ်လီရေ။ အရာ ရောဂါသေရို့စာ ယေရှု ကိုယ်ရုံစွမ်ကို ကိုင်ဖို့ ရရေဆိုကေ သူရို့မာ ရောဂါ ကောင်းလားခလီရေ။